Read Cuiba Juan 11 Bible Online

Juan 11 - Cuiba bible

Juan 11

¹Irʉ pebin popona, pon pewʉn Lázaro. Bapon atene. Bapon Betania tomarapin. Irʉrʉ bapon Lázaro pamchobe tatsi barichi Betania tomarapiwayobe. Barapo pamchobe tatsi ichowayo pewʉn María, ichowayo pewʉn Marta.

²Barapowa María, powa Lázaro pamcho tatsi, powa Jesús taxu epatabinchi icha matacabitha penasiwatha xua petuxueiwa xuano xua taxu tsewa exanaeinchi pentanatha.

³María pamchobe najume caitorobabe ichʉntha icha tomara beya xua baxotiya Jesús beya petacajume jeichinexatsibe: —Patatanecanamataxeinaein, jinya jiton atene, petacajume jeichinexatsibe bapon.

⁴Poxonae Jesús baxua jume tane, Jesús jeye: —Bequein Lázaro atene ichitha barapo peatenewa jopa exanaeyo xua tʉpa peexaneibiwa ataya. Saya atene, apara Nacom pia jiwi tsita itʉtsichi pia peayapusʉya itorobi coyenewa. Mataʉtano irʉ xan Nacom Pexanton jiwitha tatsita itʉtsinexa taayapusʉya itorobi coyenewa, jei Jesús.

⁵Bequein Jesús antobe Marta irʉ María irʉ Lázaro ichitha cataunxuae eca baxotiya ainya matacabibe poxonae jume taetha xua Lázaro bayatha atene nawita.

⁶

⁷Pirapae Jesús daxita pijimonae barai, jeye: —Caibeya poinchi Judea nacua beya, jei Jesús.

⁸Nexata daxita Jesús pijimonae baraichi, jeye: —Pon Patatanecuidubim, cain judiomonae, Judea nacuatha ichichichipa cacuinbaba ibotoxitha. Dacotsiwa equeicha jinya ponaetsi barapo Judea nacua beya, jeichichi.

⁹Jesús barai, jeye: —Caentacabi doce po horabe xeina poxonae pentha tsuncuae. Icha pebin mataqueitha popona jopa xuirapopaeyo pentha petsuncuaexae barapo cae pin nacuathe.

¹⁰Barichin poxonae cataunxuae poponan barapo cae pin nacuathe bewa exanaein xua Taxa pocotsiwa neitoroba. Tsipei poxonae tʉpaein jopa neitacʉpae tsane xua exanaein baxua, barapo cae pin nacuathe.

¹¹Pirapae Jesús daxita pijimonae barai, jeye: —Wajiton, Lázaro, maituncua. Ichitha tha bexa yaʉbaxuichi, jei Jesús.

¹²Nexata daxita Jesús pijimonae baraichi, jeye: —Patatanecanamataxeinaem, icha bapon maituncua, ¿metha poxoru anoxuae yasatatsi, daxota baxua paebame? jeichichi.

¹³Ichitha Jesús namchi: “Lázaro bayatha tʉpa”, jei, xua poxonae jei: “Lázaro maituncua”, jei. Daichitha Jesús pijimonae tatsi nanta xeina xua metha Lázaro maituncua icha merawi ichi poxonae maiteca.

¹⁴Bapoxonae Jesús pijimonae tsita najume itapeinya xeina, jeye: —Lázaro bayatha naxuba. Pacata daxua wʉnae xua jopa baxotiya poponaeinyo poxonae Lázaro tʉpa. Tsipei baxua painya nejume cowʉntsinexa, daxota jopa nainya ponaeinyo. Antha poinchi bara beya ichaxota Lázaro boca, jei Jesús.

¹⁵(null)

¹⁶Nexata Tomás, pon icha wʉn Gemelo peweichobe penama naexanaexaebe, bapon Jesús pijimonae tatsi baraichi, jeye: —Bʉ naca barʉ pona Jesús, xain Jesús naca barʉ werapa, jei Tomás. Meje yabara xua Jesús namchi: “Xan pon jiwi asʉ taexanaein petʉpae cuiru coyene weya”, jei

¹⁷Poxonae Jesús pijimonae barʉ patopa Betania tomaratha, jiwi Jesús tsipaebatsi xua pinae bayatha Lázaro cuatro po matacabibe yapucaewa xua mʉthʉtha xotsi.

¹⁸Betania tomara tajʉyo itamataeca Jerusalén tomara saya tres po kilómetro epatiyobe xeina.

¹⁹Pinmonae judiomonae Marta irʉ María siwa poinchibe pia botha tatsi peitanuwe matʉtaenexa tsainchibe petatʉpaexaetsibe peweicho tatsi.

²⁰Poxonae Marta yaputane xua Jesús pijimonae barʉ patopa, bapowa bo wejonarena xua Jesús pententa weyataeya wabinexatsi. Ichitha nama María botha eca.

²¹Marta Jesús baraichi, jeye: —Pon Necanamataxeinaem jiwi, icha bayatha xote ecaetsipame, metha bayatha jopa tʉpaetsipae taeweicho.

²²Yaputan xua methaunxuae Nacom cacatsina daxita pocotsiwa newʉcaewam, jei Marta.

²³Jesús barai, jeye: —Eweicho equeicha cata asʉ poponaena, jei Jesús.

²⁴Marta Jesús baraichi, jeye: —Aa, bara yaputan xua equeicha asʉ poponaena poxonae po mataqueitha daxita jiwi Nacom asʉ exanaena petʉpae cuiru coyene weya poxonae po cae pin nacue daxita weraweracaena, jei Marta.

²⁵Nexata Jesús jume barai, jeye: —Xan apara barapo jiton, pon jiwi asʉ jinompa taexanaein petʉpae cuiru coyene weya. Mataʉtano xan pon jiwi tacatsin peajʉntʉyapusʉwa, po peajʉntʉyapusʉwa jopa weraweracaeyo. Pon nejume cowʉnta bequein bara tʉpa ichitha equeicha asʉ poponaena.

²⁶Pon xeinaena peajʉntʉyapusʉwa xuano xua nejume cowʉntsina, bapon bapana jopa weraweracae tsane. ¿Baxua bara yabara jume cowʉntame? jei Jesús xua Marta tsipaebatsi.

²⁷Bapowa jume nota, jeye: —Aa, Tanecanamataxeinaem, bara baxua yabara jume cowʉntan xua xam Mesías pon Nacom Pexantom, pon bewa juinya patopaename po cae pin nacuathe tsique, jei Marta. Meje yabara poxonae Jesús itamata wecoyei tsuncuae ichaxota Lázaro yamʉthʉ uncua

²⁸Poxonae Marta najume weta xua Jesús tsipaebatsi, bapoxonae Marta pamcho waba powa pewʉn María. Marta nameicha pamchotha jeye: —Pon jiwi Pecuidubin xote patope, cawaba, jei Marta.

²⁹Poxonae María baxua jume taeba, bapoxonae caena nainya ponataba Jesús petaenexatsi.

³⁰Jesús abʉ cataunxuae pijimonae jopa barʉ ponaeyo tomaratha. Jesús caxinatsi ichaxota copiya Marta Jesús caxinatsi.

³¹Judiomonae pomonae María pamchobe itanuwe matateicatsibe xua pomonae pia botha tatsi taenatsibe, poxonae barapo judiomonae tane xua María nainya ponataba, irʉrʉ barapomonae napuna pona. Barapo judiomonae nanta xeina xua mexeya itara María pamchobe mʉthʉ beya ponabewei xua pewecoyeinexabe ichaxota peweichobe tatsi tayamʉthʉ uncuatsibe.

³²Poxonae María itamata patopatsi María pentabocototha uncua, yawa Jesús baraichichi, jei: —Tanecanamataxeinaem, icha bayatha xote ecaetsipame metha bayatha pata taeweicho jopa tʉpaetsipae, jei María xua Jesús tsipaebatsi.

³³Jesús tane xua María wecoyei. Taneno xua judiomonae pomonae napona xua irʉrʉ wecoyei. Bapoxonae Jesús ʉnthʉthʉ wecoyei yawa anthʉthʉrewe.

³⁴Jesús baraino barapomonae, jeye: —¿Exota Lázaro pamʉthʉthʉ xubame? jei Jesús. Jesús jume notatsi, jeye: —Pon Necanamataxeinaem jiwi, xotiye incane matha taema, jei barapomonae.

³⁵Irʉrʉ Jesús wecoyei tsanareca.

³⁶Bapoxonae judiomonae Jesús yabara jeichichi, jeye: —Incane pataema maisa bapon Lázaro bichocono antobetsi, najei judiomonae.

³⁷Ichitha ichamonae judiomonae Jesús yabara jeichichi: —Icha bapon itacʉpatsi xua pon peitata nacʉtsin axaibi exainchi, ¿eta xua metha bapon jopa itacʉpaetsi xua Lázaro yawenatsi xua bayatha jopa tʉpaetsipae? najei judiomonae. Meje yabara poxonae Lázaro equeicha asʉ popona

³⁸Equeicha Jesús bichocono anthʉthʉrewe. Yawa imoxoyo pijimonae barʉ pona mʉthʉ beya. Barapo mʉthʉ ibo mʉthʉ, yawa mʉthʉ yauxatatabanota pin ibo panawatha.

³⁹Jesús barai barapomonae, jeye: —Papataxore ibo panawa, jei Jesús. Lázaro pon tʉpa bapon pamcho tatsi Marta, Jesús jeichi: —Patatanecanamataxeinaem, apara bayatha pepon bichocono tuxamna, tsipei bayatha cuatro po matacabibe yapucaewa poxonae tʉpa, jei Marta.

⁴⁰Ichitha Jesús Marta jume baraichi, jeye: —Bara bayatha catsipaebatsiba: Icha yabara jume cowʉntame, necotsiname Nacom pia peayapusʉwa, cajeichiba, jei Jesús.

⁴¹Nexata ichamonae ibo panawa pataxuba. Bapoxonae Jesús peitaboco beicha athabeicha necoicha. Yawa jeye Paxatha: —Axa, jʉntʉ coyene weiweinan, yaitama nejume taneme pocotsiwa tacawʉcaexaetsi.

⁴²Bara yaputan xua nejume taibame poxonae cawʉqueibatsi. Apara catsipaebatsi baxua xua pomonae xote umene barapomonae nexa xua tana neyabara jume cowʉntsinexa xua xan pon tana neitorobim, jei Jesús.

⁴³Poxonae Jesús najume weta baxua, bapoxonae jume daunweya wawai, jeye: —¡Lázaro, bara wejondena! jei Jesús.

⁴⁴Bapoxonae pon xua tʉpa mʉthʉ wejondena. Xua bayatha paparuwatha maxʉ caecunta cʉbaxotsi yawa pesito decano yawa xua painyaweratha itabara yarabaxotsi, baxuan Lázaro yawa jondena. Jesús barai jiwi, jeye: —Daxita baxuan paweisacare, bapoxonae bʉ bara pona, jei Jesús. Meje yabara poxonae fariseomonae irʉ sacerdotemonae pia pentacaponaewi tatsi daxita barapomonae Jesús yabara nanta xeinatsi xua po coyeneya Jesús pewaetabiwa tsainchi

⁴⁵Judiomonae pomonae María pamchobe cueyatatsibe, poxonae barapo judiomonae baxua Jesús cui tainchi Jesús yabara jume cowʉntatsi pinmonae.

⁴⁶Ichitha ichamonae judiomonae fariseomonae beya pona xua peyabara paebinexa pocotsiwa bayatha Jesús exana.

⁴⁷Nexata fariseomonae irʉ sacerdotemonae pia pentacaponaewi tatsi daxita barapomonae nacaetuta penacanamata caitorobi bicheitotha, yawa najei barapomonae: —¿Eta xua exanaeinchi metha? Barapo pebin exana nawita pexeinya petsita itʉtsi coyenewan.

⁴⁸Icha baraxua saya yabara cui copatinchi metha pinmonae bapon yabara jume cowʉntsinchi. Barapoxonae romanomonae pia pentacaponaewi patsina waxantha, yawa abe exanaena Nacom pin pia bo tatsi xua watomaratha, yawa wanacuatha naca jutebina, najei barapomonae.

⁴⁹Caein bapomonae jiwana pewʉn Caifás. Bapon Caifás barapo weitha sacerdotemonae pia pepa pentacaponaein tatsi naexana. Bapon Caifás jei pin bicheitotha: —Paxam apara jopa baxua payabara yaputaem.

⁵⁰Mataʉtano jopa payabara yaputaem xua po coyene pacata xanepana xua ichʉn bara caein piamonae yaitatsina pebexubinexatsi xua daxita piamonae tatsi jopa petajutebinexa tsainchi, jei Caifás xua piraichi nanta xeina.

⁵¹Ichitha Caifás jopa baxua pia coutha nanta xeinaeyo. Tsipei Caifás barapo weitha sacerdotemonae pia pepa pentacaponaein tatsi naexana, daxota tsiwʉnae yabara paeba xua Nacom cueicueijei exana xua Jesús bewa tsitʉpaena judiomonae.

⁵²Meisa barapo judiomonae Jesús jopa tsitʉpaeyo, apara irʉrʉ ichamonae nexano Jesús tsitʉpa xua Jesús caemonae nacaetuta peexanaenexa pomonae Nacom piamonae tatsi, pomonaeno tajʉ ena ichaxota icha nacuantha.

⁵³Daxota barapomonae judiomonae pia pentacaponaewi tatsi nabarʉ muxu jei po coyeneya xua poxonae Jesús pebexubiwa tsainchi.

⁵⁴Daxota Jesús jopa naitapeinya xeinaeyo judiomonaetha. Saya Jesús Judea nacua wewarapiya, tomara beya pona po tomara pewʉn Efraín, po tomara eca ichaxota ira xuepana susato tsurucuae nacua. Barapo tomaratha pijimonae barʉ eca Jesús.

⁵⁵Bara nama imoxoyo tsurucuae tsoponae po matacabin xua judiomonae pia Pascua wʉn matacabin tatsi. Pin bicheitomonae tomara weya pona xua Jerusalén tomara beya pona xua baxotiya pia cui coyenewa peexanaenexa Nacom nexa, xua Nacom jopa petsita natsicuentsinexatsi xua abe petsita peexanaexae. Tsipei pia peitorobi coyenewatha tatsi baxua yabara paeba xua barapomonae bewa baxua exanaena Pascua wʉn matacabin pewʉnaeya.

⁵⁶Daxita barapomonae Jesús wenaweneichi. Poxonae barapomonae Nacom pin pia botha pata, baxota barapomonae najei: —¿Etabe payabara nanta xeinaeya ichim? ¿Metha Jesús xote patopaena jampa? ¿Metha jopa patopae tsane jampa? najei barapomonae.

⁵⁷Fariseomonae irʉrʉ sacerdotemonae pia pentacaponaewi tatsi daxita barapomonae jiwi baraichi, jeichichi: —Pon tane Jesús, nexata bʉ pana netsipaeba, xua bapon pata tha waetabichi, jei barapomonae.