Read Cuiba 1 Corintios 16 Bible Online

1 Corintios 16 - Cuiba bible

1 Corintios 16

¹Yabara paca tsipaebatsi paratixi po paratixi penacaetutsimonae jejebapona ichamonae nexa pomonae pejume cowʉntsiwi Nacom. Paexande icha pomonae penacaetutsi jiwimonae ichi xua exana pocotsiwa itoroban pomonae Galacia nacuamonaepiwi.

²Daxita domingo wʉn matacabintha paxam daxita barompaya painya paratixi pajiwana wetsabiya pajejebaponaename pocotsi matoma pana busi matoma xeineibame. Pomonae pin matoman nabusi matoma xeineiba bewa ainya paratixi jejebaponaena. Pomonae tsiqui matomaxi nabusi matoma xeineiba bewa cae paratixi jejebaponaena. Abʉ paratixi pajebare xua jopa painya neexanaewa tsane baraxua xua poxonae equeicha patopaein.

³Poxonae patopaein bapoxonae paitapetsiname pebiwi po pebiwi pecaponaenexa carta. Barapo pebiwi Jerusalén tomara beya caitorobin carta. Barapomonae carta caponaena yawa muxuna caponaena paratixi po paratixi pajejebaponame Jerusalén tomarapiwi nexa pomonae pejume cowʉntsiwi Nacom.

⁴Icha nanta xeinaein xua yapu wʉnaein paratixi penawichixae metha moya bara ponaetsipan Jerusalén tomara beya. Bapoxonae barapomonae nepuna ponaena. Meje xua Pablo yabara nanta xeina, xua pewarapaewa tsane

⁵Poxonae ponaein, bewa Macedonia nacua iyan tsane. Bapoxonae cotacaya paca siwa ponaeinchi Corinto tomaratha.

⁶Metha beya paca barʉ ecaetsipatsi be caentacabiyobetha. Ichacuitha metha poxonae awʉbo paca barʉ ecaetsipatsi. Bapoxonae poxonae weta xua awʉbo, paca itacʉpa xua pata neyawenaewam pocotsiwa nantawenonan poxonae warapaein icha tomara beya.

⁷Jopa ichipaeinyo xua saya bara caetotha tapaca siwa ponaewatsi. Jame ichichipan xua be pecono daepayobe tapaca barʉ ecaewatsi tsainchi poxonae patopaein. Baxua exanaein icha Nacom baxua inta copatsina.

⁸Ecan xote Efeso tomaratha beya poxonae matacabi jopaena po matacabi pewʉn Pentecostés. Barapo matacabi po matacabi jiwi yabara jʉntanaina xua poxonae matha Nacom pia Pejumope tʉnaxʉ tatsi patopa penacaetutsi jiwitha pomonaetha pomonae pejume cowʉntsiwi.

⁹Anoxuae neitacʉpa xua bichocono tatanacuichiwa Nacom xua jiwi pinmonae pejume cowʉntsinexa barapo tomaratha. Ichitha ayei jiwi ichichipa abe necana exana xua jopa taexanaenexa tsane.

¹⁰Icha Timoteo patopaena painya xantha, pantenta weyataema xua bapon jʉntema pepoponaenexa painya xantha. Baxua pata exande poxoru bapon exana pocotsiwa Nacom ichichipa, icha xan ichin xua exanan pocotsiwa Nacom ichichipa.

¹¹Daxita paxam jopa payabara jande: “Apara bapon Timoteo pewowin, jopa apara peyaputaein”, jopa payabara jande. Jame maisa bapon payawende xua equeicha jʉntema caewa peponaenexa taxainya berena. Baxua paexande tsipei xan irʉ ichamonae pomonae irʉ pejume cowʉntsiwixae Jesucristo, panabarʉ wʉnae ewatan bapon xua Timoteo paewatan.

¹²Apolos pon irʉ pejume cowʉntsin matowa tsipaeban xua painya nepaca cataenexa xua bapon pecueyabinexa tsainchi ichamonae pomonae irʉ pejume cowʉntsiwixae Jesucristo. Ichitha bapon nanta xeina xua anoxuae jopa yapu jʉpaetsi xua peponaewa tsane xua painya nepaca siwa ponaewa. Bapon ponaena ichitha poxonae tayapu jʉpaeinchi. Meje poxonae Pablo najume wetsiya paeba

¹³Dota pam, pomonae xua abe pacata exana. Beta paajʉntʉsʉya pajume cowʉnta dubenanaebiyama. Paexana dubenanaebiyama icha pebiwi ichi xua jopa cunuwiya exana dubenanaebiyaeyo xua beta peexanaewa.

¹⁴Daxita pocotsiwan xua paexaneibame, peantobe coyeneyatha paexaneibare ichamonaetha.

¹⁵Tamonae pam, paxam pomonae irʉ painya nejume cowʉntsiwixae Jesucristo. Paxam payaputaneme xua Estéfanas piamonae tatsi copiya jume cowʉnta Jesucristo Acaya nacuatha. Barapomonae bichocono yawena ichamonaetha pomonaetha pomonae irʉ pejume cowʉntsi jiwi Nacom.

¹⁶Paca tsipaebatsi xua paxam xuya paexana dubenanaebiyama pocotsiwan barapomonae paca itoroba. Pabarʉ nacuire barapomonae xuano ichamonae irʉ pabarʉ nacuitame pomonae jʉpaeya exana icha barapomonae ichi.

¹⁷Maisa bichocono jʉntʉ coyene weiweinan xua Estéfanas irʉ Fortunato irʉ Acaico xote pate. Barapomonae inta exana pocotsiwa jopa paca itacʉpaeyo xua painta exaname xua jopa xote tapaca barʉ ecaexaetsi.

¹⁸Barapomonae nejʉntʉ cui coyene tsacaba exana xua xaniwaicha tapoponaenexa Nacom nexa. Barichi irʉ baxua pacata exana. Beta paweyataename barapocotsi jiwimonae.

¹⁹Pomonae penacaetutsimonaepiwi, pomonae pejume cowʉntsiwi Nacom, pomonae Asia nacuatha jinompa, barapomonae paca jacoba. Aquila irʉ piowa tatsi Prisca, irʉ pomonae petanacaetutsi dubenanaebiyae jiwichi pia botha tatsi, barapomonae bichocono paca jacoba peantobe jiwixae xua peantobexaetsi pon jiwi Pecanamataxeinaein.

²⁰Daxita pomonae pejume cowʉntsiwixae Cristo pomonae xote jinompe daxita paca jacoba. Betiya painta nantiya pana najacobare painya neantobewaxae Cristo.

²¹Xan Pablon pacata tinatsi po diwesiyo xua cotacaya opi ducua. Yatsicaya tacoutha tacobe couya pacata tinatsi tapaca jacobinexatsi.

²²Icha ichʉn jopa Jesucristo antobetsi pon jiwi Pecanamataxeinaein barabʉ Nacom itawetsina pexainya weya, xua bapon be pon abe peexanae jiton tsane. ¡Xam ponxaem Pata Necanamataxeinaem nainya antha patopare!

²³Barabʉ Jesucristo pon jiwi Pecanamataxeinaein paca yawenaena pia paca nepaca caantobewaxae xua xanepanaya painya nejinompaenexa.

²⁴Daxita paxam pacata itorobatsi po coyene xua tapaca caantobe coyenewatsi taantobewaxae Cristo Jesús. Baja Pablo.