Read Cuiba 2 Tesalonicenses 3 Bible Online

2 Tesalonicenses 3 - Cuiba bible

2 Tesalonicenses 3

¹Patamonae, paxam pomonae pam pomonae irʉ painya nejume cowʉntsixae Nacom. Anoxuae paca tsipaebatsi pocotsiwa xua pawetan xua pata paca tsipaebiwatsi. Paca jeichi xua painta Nacomtha wʉcare xua xain pon jiwi Pecanamataxeinaein pejume diwesi tatsi awiya nainya tajʉ patsipaebaponaein daxita nacuantha. Mataʉtano painta wʉcare xua xain ichaxota patsipaeban barapo diwesi daxita jiwi beta jume barʉ jejei peainya cui diwesixae, icha paichim poxonae pajume taneme barapo diwesi.

²Mataʉtano Nacom painta wʉcare xua xain Nacom jopa copatsiyo xua painta abe exana pomonae bichocono ajʉntʉcoyenebe. Tsipei jopa daxita jiwiyo pomonae beta jume cowʉnta po diwesi patsipaeban.

³Ichitha jame bara ita coxoinchi xua wajume cowʉntsiwa pon jiwi Pecanamataxeinaein tsipei bara bapon xainyeya naca yawena. Mataʉtano bapon paca jʉntʉ ayapusʉya exanaena. Mataʉtano bapon paca ita ararana xua abe paca exanaeyainwa pon bichocono abe peexaneibin. Paca yawenaena xua jopa painya neexanaenexa abe peexanae cuiru coyenewan.

⁴Bara paca yabara jume cowʉntatsi xua bara bapon pon jiwi Pecanamataxeinaein paca yawena. Bapon paca yawenaena xua paexaname, xuano xua paexana dubenanaebiyaename pocotsiwan xua paca itorobatsi.

⁵Barabʉ bapon pon jiwi Pecanamataxeinaein, paca yawenaena xua bichocono painya neyabara yaputaenexa Nacom pia paca antobe coyenewa tatsi. Mataʉtano barabʉ paca yawenaena xua awiya antʉcoyenesʉya painya nejume cowʉnta dubenanaebiyaenexa tsane. Bapoxonae bequein ichamonae abe pacata exanaetha tsane jopa paaitaconaem tsane. Bara paichim tsane icha Cristo ichi xua poxonae jiwi barapocotsi coyene exana jopa aitaconaeyo. Meje yabara poxonae Pablo yabara paeba xua jiwi bewa nacuichina

⁶Patamonae pam, paca itorobatsi tsipei Jesucristo Wanacanamataxeinaein pana cata pia peitorobi coyenewa. Painya xoba imoxoyo pabarʉ jinompame peafaetabi jiwi pomonae aichaxaibi nacuita, xua pomonae irʉ pejume cowʉntsiwixae. Barapomonae jopa yabara jume cuiya exanaeyo po pecuidubi coyenein xua Jesucristo weya bayatha, xuano xuya barapomonaetha pacuiduban.

⁷Paxam payaputaneme, xua bewa xanepanaya betiya pajinompaem, icha bayatha paichin. Poxonae paca barʉ jinompatsi jopa paacoyenefaetabinyo, apara panacuitan nawita.

⁸Poxonae paxaiban painya xantha bara pentoma paexaneiban pexaewa nexa. Jopa amanaya panabaneibinyo. Jame apara daunweya panacuiteiban merawintha matacabinthano xua jopa daunweya pata pacata exanaewatsi tsainchi. Jopa panantawenonaem xua painta comocame pexaewa.

⁹Bequein pana yabara cui copata xua pata paca wʉcaewatsi pata neyawenaenexam tsane, ichitha bara pana netaneme xua pexaewa pana natsiʉpain nacuitan, xua irʉ bara painya neichinexarʉ.

¹⁰Tsipei poxonae paca barʉ enatsi baxua yabara paca tsipaebatsi xua barapo peitorobiwe paca jeiche: “Pon jopa benacuichiyo bʉ jopa xae tsane”, paca jeiche.

¹¹Ichamonae pana tsipaeba xua painyamonae jiwana yabara, xua pinae painyamonae jiwana jopa natsiʉpain nacuichiyo pexaewa. Saya pinae dubenanaebiya. Barapomonae saya pinae ichamonae yabara yʉyʉjeichi. Barapomonae jopa pinae exanaeyo piawa. Saya pinae penabarʉ yʉyʉjei poxonae ichamonae eneibatsi poxonae nacuiteiba.

¹²Barapomonae pomonae saya dubenanaebiya, paitoroban pajanje: “Tsipei Jesucristo pana cata pia peitorobi coyenewa pon jiwi Pecanamataxeinaein, daxota pecono jumeyotha paca tsipaebatsi. Bara panacuire painya nenacuichiwa xua pexaewa painya natsiʉpain nacuichinexa. Jopa ichamonae payabara nabarʉ yʉyʉjande”, pajanje.

¹³Ichitha paxam patamonae pam, pomonae pam irʉ pajume cowʉntame jopa paajʉntʉcoyenefaetabinde xua xanepanaya painya neexanaewam. Awiya xanepanaya paexanaponde.

¹⁴Icha ichʉn painyamonae jiwana jiton jopa exanaeyo pocotsiwa paca tsipaebiya tinatsi barapo cartathe barapo pebin pacui naitaeware painya necui yaputaenexa. Barapo pebin jopa pabarʉ jinompaeinde, xain bapoxonae aura xua jopa peexanaexae xua barapo cartathe papaeban.

¹⁵Ichitha jopa bapon pacana exanaeinde be pon painya nepaca caaitafaetabi jiton. Saya jame maisa pamuxuwere xua bapon maisa penacuichinexa. Mataʉta maisa bapon patsipaebare icha paichim poxonae patsipaebame pontha pon pejume cowʉntsin. Meje yabara xua Pablo najume wetsiya paeba

¹⁶Jesucristo pon jiwi Pecanamataxeinaein xua jʉntema popona peyacuiya jinaein, bʉ bara barapo jʉntema pejinompae coyene paca catsina daxita matacabin tsaibi poxonae bequein ichamonae abe pacata exaneiba. Barabʉ bapon pon jiwi Pecanamataxeinaeinxae daxita paxam paca barʉ jinompaena.

¹⁷Xan Pablon saya meisa barapo couye tacoutha bara tinan, po jumeyo xua paca jacobatsi. Baxua tsita itapeinya xeinan xua barapo carte apara bara tacarta. Daxita tacartantha barapo jume couxi wetsiya tineiban icha barapo carte ichi.

¹⁸Pon Wanacanamataxeinaein, Jesucristo, barabʉ daxita paxam bichocono paca yawenaena pia paca antobexae. Baja Pablo, irʉ Silvano, irʉ Timoteono ponbe necueyatabe.