Read Cuiba Hebreos 1 Bible Online

Hebreos 1 - Cuiba bible

Hebreos 1

¹Caena bayatha Nacom itoroba pia peitorobi jume diwesi petacueicueijei jiwichi. Barapomonae Nacom tacueicueijeichi xua poxonae tsipaebatsi wamo susato jiwi. Barapomonae matowa tacueicueijei tsaibi xua Nacom tacueicueijei tsaibichi mataʉtano ainya coyeneintha tsipaeba xua Nacom tatsipaebatsi.

²Ichitha nama anoxuae matapainya barapo matacabinthe po matacabin opi dubena Nacom itorobica Pexanto wanacata cueicueijeinexa, yawa wayabara yaputaenexa Nacom. Barapon Nacom Pexantoxae tatsi caena bayatha barapo nacue forota. Mataʉtano Nacom Pexanto caena barapoxonae cana exana xua Pexanto tatsi pecanamataxeinaenexa daxita coyeneintha.

³Nacom Pexanto tatsi pexeinya peitʉpanae jʉntʉ coyenein xeina po jʉntʉ coyenein Nacom xeina. Bapon Nacom Pexanto cui coyene jontatsi. Mataʉtano bapon Nacom Pexanto tatsi pia pejume ayapusʉ itorobiwatha babatiya exana daxita carepaya nacuan. Nacom Pexanto tatsi nacui yabara jume weta xua Nacom Pexanto peyabara paebixae pejume diwesitha. Baxua exana poxonae naca tsitʉpa xua wanaca jʉntʉ coyene xanepana exanaenexa. Bapon naca capanepa abe waexanae cuiru coyenein weya. Bapoxonae bapon itaboco beicha pona penacuaretsinexa pexeinya peecaethopeibiwatha Nacom pia coxa weya tatsi xua itaboco beicha xua Nacom pia peecaethopeibiwatha tatsi beicha. Meje yabara xua Nacom Pexanto tatsi peainya cuin beyacaincha matatsunpiwi

⁴Nacom Pexanto ainya cui cana exana beyacaincha matatsunpiwi. Nacom baxua tsita itapeinya xeina xua poxonae wʉn duta Pexanto xua po wʉn jei: “Nacom Pexanto”, jei, po wʉn bichocono ainya cui beyacaincha matatsunpiwi pewʉn.

⁵Tsipei Nacom bapana jopa jeiyo matatsunpintha:“Xam Taxantom, anoxuae jiwi tsita itapeinyaxeinan xua xan jinya axan”,jopa bapana jei Nacom matatsunpintha. Mataʉtano bapana jopa jei matatsunpin yabara:“Xan bapon pia paxa tatsin tsane,bapon bara taxanto tsane”, jopabapana jei Nacom xua matatsunpinpeyabara paebiwatsi.Saya ba meisa Nacom Pexantothayabara paeba barapo jume.

⁶Mataʉtano poxonae Pexanto itorobica po cae pin nacuamonaepiwitha tsique, pon yatsicaya compa tatsi, Pexanto yabara jei:“Barabʉ daxita tamatatsunpiwimonaeTaxanto wʉnae jaintinchi”, jei Nacom.

⁷Nacom yabara jei matatsunpiwi:“Tamatatsunpiwi itoroban xua nainya intanacuita icha joibo ichi xua nainya ponapoxonae itoroban barapo joibo.Barichi barapomonae itoroban xua intadaunweya nacuita icha nawa coicha ichi xuadaunweya taxua poxonae itoroban barapo nawa”,jei Nacom.

⁸Ichitha nama Nacom Pexantotha jei:“Jaina, xam ponxaem Nacom, ataya tsitecaeyaitorobiya ewatsiname xuaitorobathopequeibame jiwi.Jinya neitorobiya ewatsi coyenewabara ataya pexainyei coyenewa.

⁹Xam ichichipame pocotsiwa exanapomonae xanepanaya peexanaewi.Mataʉtano bichocono aitafaetabimpocotsiwa exana pomonae abe peexaneibiwi.Daxota xan Nacom ponxaein, jinya Nacombichocono cajʉntʉ coyene weiweinaexanatsi, beyacaincha xua jinya jiwimonaejʉntʉ coyene weiweina exanan”,jei Nacom Pexantotha.

¹⁰Equeicha Nacom Pexantotha jei:“Xam pon pepa Necanamataxeinaem jiwi,caena bayatha forotame barapo caepin nacua poxonae aena.Jinya coya exaname peitaboco.

¹¹Daxita baxuan pocotsiwan xua jinyaneexanaewam weraweracaena.Tsipei daxita baxuan saya peruwan tsane,icha be poxonae paparuwa ichi xuaperuwa tsane xua tsapatsapaca.Ichitha xam nama atayatsitecaeya poponaename.

¹²Barapo cae pin nacua irʉ barapo itabocopoxoru peruwa tsane pichiname xuanexubinexa, xua pena ira equeichaneexanaenexa yawa xua itaboco.Barapocotsi jʉta coyeneya exanaenameicha be poxonae pebin ichi xua peruwanama xuena xua xuba, xuapenawa penamaxatatsinexa.Ichitha xam nama ataya tsitecaeya poponame.Mataʉtano jinya nepoponae coyenewaataya jopa weraweracae tsane”,jei Nacom Pexantotha.

¹³Nacom bapana jopa jeiyo matatsunpintha:“Xam tacoxa weya ecare, beya poxonae abʉcaexanaeinchi xua itorobiname jinyanecaaitafaetabi jiwi”, bapana jopa jeiyoNacom matatsunpintha.Saya meisa Pexantotha baxua paeba.

¹⁴Daxita matatsunpiwi peinya pejinompaewi jiwitha. Barapo matatsunpiwi exana dubenanaebiya pocotsiwa Nacom itoroba. Nacom itoroba barapomonae xua petayawenaenexa tsainchi pomonaetha pomonae bexa Nacom capanenebiyaena pomonae pejume cowʉntsi jiwixaetsi.