Read Cuiba Hebreos 3 Bible Online

Hebreos 3 - Cuiba bible

Hebreos 3

¹Nacom irʉ paca wʉn duba poxonae itapeta pomonae pepatsinexa tsane pia nacuatheicha tatsi. Tamonae pam, paxam jiwana pam pomonae pejume cowʉntsiwi Jesucristo, pomonae pam Nacom paca jʉntʉ coyene xanepana exana xua piamonae tatsi painya paca cana exanaenexa. Daxota Cristo Jesús pacayabara nanta xeinare. Bapon Jesús Nacom pia peitorobin tatsi pon naca tsipaeba Nacom nexa. Mataʉtano bapon wapepa sacerdotepin pon wanacata paebeibin Nacom beicha. Bapon payabara cueicueijan ichamonaetha wajume cowʉntsixae bapon.

²Jesús bara xainyeya exana Nacom pia petanacuichiwa tatsi Nacom peyabara tsiwʉnae muxu dutsixae bapon barapo penacuichiwanexa xua Nacom pia peitorobin tatsi tsane yawa wapepa sacerdotepin tsane. Jesús beta xainyeya taexana, icha matha Moisés ichi xua poxonae daxita coyene beta xainyeya taexana Nacom piamonaetha xua Nacom nexa.

³Jesús pecapanepaexae jiwi bewa bichocono toxeincha barʉ cui itara jinaetsi bapon beyacaincha xua barʉ cui itara jinatsi Moisés. Barapocotsi jʉta coyeneya ichi, bewa Jesús cana exanaetsi icha be poxonae jiton ichi xua bewa barʉ cui itura jinaeinchi xua ainya cui exanatsi peacabixae bo beyacaincha xua bo xua ainya cui tsuncuae.

⁴Daxita ba bon tsoponae poxoru apara jiton peexanaexae. Ichitha jame pon yatsicaewa nama daxita coyenewan exana apara bapon Nacom.

⁵Bayatha Moisés apara pon petanacuichinchi Nacom. Bapon xainyeya daxita exana Nacom pia botha pocotsiwa Nacom itoroba. Bapon Moisés pia penacuichiwa tatsi saya xua yabara tsiwʉnae caunuta pocotsiwan xua bexa Nacom exanaena.

⁶Ichitha nama Cristo Nacom Pexantoxae tatsi xainyeya daxita exana Nacom nexa tsipei cana exana xua bapon canamataxeina daxita pomonae Nacom piamonae tatsi. Waxainchi Nacom piamonaetsi icha ajʉntʉyapusʉya jume cowʉntapoinchi Cristo beya xua poxonae tʉpaeinchi. Mataʉtano waxainchi Nacom piamonaetsi icha jʉntʉ coyene weiweinaya wʉnae ewatatsi pocotsiwa bexa Nacom wanaca tsiexanaewa tsane. Meje yabara xua nafifina caewata Nacom piamonae tatsi

⁷Cristo ainya cui peexanaexaetsi beyacaincha xua Moisés ainya cui exanatsi daxota Nacom pia Pejumope tʉnaxʉ tatsi naca itoroba xua bewa jume taetsi Cristo. Baxua paeba Nacom pia Pejumope tʉnaxʉ tatsi. Nacom Pejume Diwesitha, jeye:“Anoxuae pana nejume taema pocotsiwapaca tsipaebatsi ponxaein Nacomxaein.

⁸Painya xoba pana nejumefebame painyajʉntʉ coyenewatha xua daxota jopapainya tana nejume cowʉntsiwam.Jopa bara paichinde icha pomonae ichixua poxonae bayatha nejume matawentaxua exanan poxonae jinompa ichaxotaira xuepana susato tsurucuae nacuatha.Barapomonae nefayacoteiba poxonaenejʉntʉ coyene jʉjʉteiba beyapoxonae anaepanan barapomonaethapoxonae jopa xapain exaneibiyo.

⁹Barapomonae pomonae nejʉntʉ coyenejʉjʉta, apara painya amo susato jiwi.Barapomonae baxua inta exana poxonaejopa nejume cowʉntsiyo.Baxua exaneiba beya poxonae cuarenta poweibe tsuxubi bequein taiba pocotsiwaxua taexaneiban barapomonae xua beyacuarenta po weibetha.

¹⁰Daxota barapomonae caseban yawa yabarajan barapomonae: ‘Barapomonae jopa benejumecowʉntsiyo pejʉntʉ coyeneintha yawajopa beyaputaeyo pocotsiwa ichichipantaexanan barapomonae’, jan.

¹¹Barapomonae caseban.Tacoutha jume daunweya najan:‘Barapomonae bapana jopa patsi tsanetanacuatha ichaxota po nacuatheichanafifinacaewatsina pomonae tana nejumecowʉntsiwi’, najan”, jei Nacompia Pejumope tʉnaxʉ tatsi,Nacom Pejume Diwesitha.

¹²Tamonae pam, pomonae irʉ painya nejume cowʉntsi jiwixae Jesucristo. Painya xoba paxeiname po jʉntʉ coyene bichocono abe, po jʉntʉ coyene jopa ichipaeyo xua pejume cowʉntsiwa Nacom, pon xua asʉ popona.

¹³Jame maisa daxita matacabin nantiya pana najʉntʉ coyene tsacabare xua ajʉntʉyapusʉya painya nejinompaewa tsane. Daxita pam baxua paexande anoxuae poxonae cataunxuae po dapaetha anoxuae petain paca itacʉpa xua paexaname baxua. Mataʉtano baxua paexande xua jopa pata tana nejumefebiwam painya jʉntʉ coyenewatha. Icha pana nejumefebame painya coutha pana namuxujainyabichipame xua daxota abe painya neexanaewa tsane.

¹⁴Bewa xanepanaya ayapusʉya jume cowʉnta dubenanaebiyaeinchi Nacom xua beya poxonae tʉpaeinchi. Icha baxua betiya ayapusʉya jume cowʉnta dubenanaebiyaeinchi icha ichichi poxonae aena jume cowʉntatsi, bapoxonae nayawa muxuna xeinaeinchi Nacom pia nacuatheicha pocotsiwa Cristo xeina.

¹⁵Daxota equeicha paca tsipaebatsi xuaunxuae po diwesi paca tsipaebatsi xua Nacom Pia Pejumope tʉnaxʉ tatsi cueicueijei, jeye:“Anoxuae pana nejume taema pocotsiwa pacatsipaebatsi, ponxaein Nacomxaein.Icha pana nejume taneme bapoxonae painya xobapana nejumefebame painya jʉntʉ coyenewathaxua daxota jopa pata tana nejumecowʉntsiwam tsane.Jopa bara paichinde icha pomonae ichi xuapoxonae nejume matawenta poxonae jinompaichaxota ira xuepana susato tsurucuae nacuatha”,jei Nacom pia Pejumope tʉnaxʉ tatsi.

¹⁶Payabara nanta xeinare pomonae jume tane xua Nacom pejume tatsi xua bapoxonae Nacom jume matawentatsi. Daxita bapomonae apara pomonae Moisés mata cawarapa Egipto nacua weya.

¹⁷Payabara nanta xeinare Nacom xua caseba xua beya cuarenta po weibetha tsuxubi. Bapomonae apara israelmonae pomonae xua abe exana poxonae jinompa ichaxota ira xuepana susato tsurucuae nacua beya, xuano xua baxota werapano.

¹⁸Payabara nanta xeinare pomonae Nacom daunweya yabara paeba, xua jei: “Barapomonae bapana jopa patsi tsane tanacuatha ichaxota po nacuatheicha nafifinacaewatsina pomonae tana nejume cowʉntsiwi”, jei. Bapomonae apara israelmonae pomonae xua jopa exanaeyo pocotsiwa Nacom itoroba.

¹⁹Bara yaputainchi xua barapomonae jopa itacʉpaetsi xua pepatsiwa Nacom pia nacuatheicha tsipei jopa Nacom jume cowʉntsichi.