Read Cuiba Apocalipsis (de Juan) 12 Bible Online

Apocalipsis (de Juan) 12 - Cuiba bible

Apocalipsis (de Juan) 12

¹Bapoxonae itabocotha naitʉta xua pocotsiwa bexa exanaena po cae pin nacuathe tsique. Tan petsiriwa powa nama xatata po paparuwa bichocono wʉnae, icha be xometo ichi poxonae pentha. Bapowa nataxu yʉtʉuncua jomocoichatotha. Barapowa mataina tepa, po tepatha doce xoyobe xeina opitei.

²Bapowa yaporowa jina pexuyo. Bapowa wawai tsipei atene, poxoru pexuyo naexana imoxoyo.

³Bapoxonae itabocotha equeicha naitʉta ichawa. Tan pon pinyo, pon be jomowabi, pon be Joyoinya. Bapon pon be Joyoinya bichocono tsobia yawa siete po pentasipabe xeina yawa diez po pentetobe xeina. Daxita carepaya pentasipantha mataina tepan.

⁴Pebosototha ira bereca bebaireca opitei. Ichaxota acoibi po opiteitonbe dudubena tsiniya cae opiteiton jiwanan abe eexana tsiniya. Barapon pon be Joyoinya ewatuncua, yabʉyo ewatuncuatsi, powa xua imoxoyo exanaena pexuyo. Bapon pon be Joyoinya ichichipa xane pexuyo poxonae naexanaena.

⁵Barapo petsiriwa tanaexanatsi pexuyo pebin wʉto. Barapo pexuyo, po pexuyo poxonae wichaba itorobiya ewata pomonae jinompa po cae pin irathe xua daxita carepaya nacuantha. Bapon daunweya beta ewata barapomonae icha pon oveja peewatsin ichi xua poxonae daunweya beta ewata ovejan. Bapon exana baxua naewa xua be naebarʉpato. Poxonae barapo pexuyo naexana, pitatsi yawa capoinchi Nacom pia pexeinya peecaethopaewatha beicha.

⁶Bapoxonae barapo petsiriwa naetsiriwa ira xuepana susato tsurucuae nacua beya. Baxotiya Nacom tsiwʉnaeta xua pia ira nexa yawa xua bapowa pexaewa peapatsinexatsi mil doscientos sesenta matacabibetha.

⁷Bapoxonae itabocotha matatsunpiwi naba. Matatsunpin pon pewʉn Miguel, bapon matacapona pia matatsunpiwi. Irʉrʉ pon be Joyoinya, bapon pia matatsunpiwi matacapona. Daxita barapo bicheito nantiya naba.

⁸Ichitha pon be Joyoinya irʉ pia matatsunpiwi tatsi jopa cui jʉpaetsi xua Miguel peamanayabaxubiwatsi yawa xua pia matatsunpiwi tatsithano. Daxota pon be Joyoinya yawa pia matatsunpiwi tatsino jopa cui jʉpaetsi xua peitabocotha pejinompaewa tsipei amanayabapentatsi.

⁹Bapon pon be Joyoinya yawa pia matatsunpiwi tatsino itawetsicatsi po irathe tsique. Bapon pon be Joyoinya pon caena bayatha yabara paebatsi xua jeye: “Bapon apara jomo”, jei. Bapon caurimonae pia pentacaponaein tatsi xua icha wʉn pewʉn Satanás. Bapon pon jiwi pemuxujainyabeibin pomonaetha pomonae jinompa daxita po cae pin irathe tsique.

¹⁰Bapoxonae itabocotha pejume jume tan pon xua jume daunweya wawai, jeye:“Anoxuae Nacom naca capanepa exana piapeayapusʉ itorobi coyenewatha xua pon beJoyoinya jopa wanacanamataxeinaenexa.Yawano anoxuae Wanacom itorobiya ewatadaxita carepaya nacuantha pomonaejinompa po cae pin irathe tsique.Yawano anoxuae Nacom Mesías catatsipia peayapusʉ itorobi coyenewa ponNacom pia peitorobin tatsin.Daxita barapo coyenein anoxuae pata,tsipei pon be Joyoinya itawetsicatsipo cae pin irathe tsique.Pon Nacom itawetsica, bapon wajiwimonaetha,pomonae jume cowʉnta Nacom, abeyamuxujainyabeibatsi merawitha yawamataqueithano xua Nacom peitʉtha tatsi.

¹¹Wajiwimonae pomonae irʉ xua pejumecowʉntsiwi Nacom, barapomonae amanayababapontha pejume cowʉntsixae xuaMesías tsitʉpa barapomonae.Bapon pon Cordero, xua pon oveja pebto penʉn.Yawano amanayaba bapomonae tsipei Mesíasyabara paeba dubenanaebiyatsi pocotsiwabapon barapomonae taexainchi.Barapomonae amanayaba, tsipei najei: ‘Bequeinbapon pon be Joyoinya ichichipa naca jutebaichitha jopa junuwichi xua werapaeinchi.Awiya jume cowʉnta dubenanaebiyaeinchiNacom’, najei.

¹²¡Pajʉntʉ coyene weiweinare pomonaeitabocotha painya nejinompaexae!¡Daichitha tsobenae pomonae jinompapo cae pin nacuathe deque, yawanoxua xuan pin mar mentha jinompa,tsipei Satanás bara berecabichocono anaepanaya patopareca!Bapon Satanás yaputane xua jopabayatha tsaibi tsane poxonae abeexaneibina po cae pin nacuathe deque”, jei.

¹³Poxonae barapon pon be Joyoinya, pon Satanás itawetsicatsi po cae pin irathe tsique, bapoxonae yabʉyo barainatsi, powa xua bayatha pexuyo exana pebin wʉto.

¹⁴Ichitha Nacom, barapowa pecuarafe catatsi, ainya cuarafebe xua cuiyausi piawan. Daxota Nacom cata xua bapowa tajʉ beya pepupunaenexa ichaxota po ira beya xua Nacom bayatha tsiwʉnaeta, xua pepupunaenexa pon be Joyoinya weya. Barapowa pupuna barapo ira xuepana susato tsurucuae nacua beya. Nacom apata bapowatha pexaewa tres po weibetha yawa xua seis po xometobetha.

¹⁵Bapon pon be Joyoinya pecoiboto tsina mene sutaba xua peawʉbonexa xua bapowa pemonoxubinexa tsainchi awʉbotha.

¹⁶Ichitha ira bapowa yaweinchi. Barapo ira, naira yetaxuba yawa mene apaxoreca, po mene bayatha sutaba bapon pon be Joyoinya.

¹⁷Bapoxonae bapon pon be Joyoinya bichocono anaepana bapowatha. Daxota bapon nainya pona bapowa piamonae tatsi beya tatsi xua penabinexa. Bapon ba xua bʉtsi pomonae jume cowʉnta Nacom penajume caitorobi diwesi xuano xua paeba dubenanaebiya Jesús pejume diwesi.

¹⁸Bapoxonae bapon pon be Joyoinya, pon be jomowabi, pin mar mene itapa taetabotha uncua xua pewabinexa ichamonae xua peyawenaenexatsi.