Read Cuiba Apocalipsis (de Juan) 6 Bible Online

Apocalipsis (de Juan) 6 - Cuiba bible

Apocalipsis (de Juan) 6

¹Bapoxonae tan poxonae Cordero tsitsinaxuba caewa xua catsataba. Bapoxonae caein jiwana pomonae cuatro poyobe xua xuan asʉ jume tan xua daunweya paeba xua be yamʉxʉ busi, nejei: “¡Anetha, taema!” jei.

²Bapoxonae tan cawayu pemainyan. Pon cawayutha equeica, bapon bicheibi caequeica. Bapon pexeinya tepa catatsi penamata xatatsinexa. Bapon cawayutha ponataba xua beta penabinexa. Bapon amanayaba pia peaitafaetabiwichi.

³Poxonae Cordero equeicha tsitsinaxuba icha pecatsatabiwa, bapoxonae barapo cuatro poyobe jiwana xua xuan asʉ jume tan, nejei: “¡Anetha, taema!” jei.

⁴Equeicha patopa ichʉn cawayu petsobian. Pon tsijuma equeica, bapon catatsi peayapusʉ itorobi coyenewa xua jiwi pejʉntʉ coyene wepuxana exanaenexatsi po coyene xua jʉntema pejinompaewa. Yawano peexanaenexa xua pebiwi penajutebinexa. Mataʉtano bapon pin dejona catatsi.

⁵Poxonae Cordero equeicha tsitsinaxuba icha pecatsatabiwa, bapoxonae equeicha barapo cuatro poyobe jiwana xua xuan asʉ jume tan, nejei: “¡Anetha, taema!” jei. Equeicha cawayu tan petsaebian. Pon tsijuma equeica, bapon comaequeica pocotsiwa pepesabiwa.

⁶Bapoxonae barapo cuatro poyobe pia xantha jume tan xua nejei: “Saya cae kilo trigo xu cae denario nantomatsina, pocotsi paratixi xua nantomata caentaqueitha poxonae nacuita. Yawano tres po kilobe cebada beno cae denario nantomatsina pocotsi paratixi xua nantomata caentaqueitha poxonae nacuita. Ichitha jopa copatsin tsane xua abe exanaena aceite mera yawano vino mera”, jei pon jume tan.

⁷Barapoxonae barapo cuatro poyobe xua opi ducuanaya jume tan yawa nejei: “¡Anetha, taema!” jei.

⁸Bapoxonae cawayu ichʉn tan pon na daena. Pon tsijuma equeica wʉn dutatsi: “Pon Petʉpaein”, jei. Barapo cawayu peputha tapoinchi ichʉn cawayu. Pon tsijuma equeica wʉn dutatsi: “Petʉpaewa Nacua”, jei. Pon tsijuma equeicabe baponbe catatsibe Cordero pia peayapusʉ itorobi coyenewa tatsi xua baponbe pejiwana bexubinexabe poxonae cuatro poyobe necotabe pomonae po cae pin nacuathe jinompe, yawano xua pejutebinexabe poxonae jiwi naba, yawano pejutebinexabe poxonae jiwi piyain poxoru pexaewa aibi tsane, yawano pejutebinexabe poxonae jiwi atene, yawano pejutebinexabe unupiwi xua xuan bichocono anaepana.

⁹Poxonae Cordero tsitsinaxuba ichaxota xua cinco po cuiyobe xua pecatsatabiwa, bapoxonae tan xua be pexaethopaewa ichaxota tauteiba duwei xua tuxusi exaneiba Nacom nexa. Baraxua xua be pexaethopaewa juma bereca tan pomonae bayatha jutebatsi ichamonae, pecaponaexae Nacom Pejume Diwesi xua amsiya awiya pecueicueijeixae.

¹⁰Pomonae xua bayatha jutebatsi ichamonae, barapomonae jume daunweya paeba, jeye: “Nacom ponxaem pepa Necanamataxeinaem daxita jiwi, Nacom ponxaem bichocono nejʉntʉ coyene xeicaem. Xam ponxaem pocotsiwan yabara tsiwʉnae muxu dubame baxuan xaniwaicha exaname. ¿Eta poxonae exanaename xua poxonae jiwi yabara paebiname xua penatsicuentsiwa xua abe peexanaexae, xuano xua pana yantomatsiname xua nejutebinexa pomonae jinompa po cae pin nacuathe copiya pata tana nejutebixae?” jei barapomonae.

¹¹Bapoxonae barapomonae juma xatabatsi paparuwan, po paparuwan inyapana. Yawano barapomonae baraichichi: “Abʉ cataunxuae paeware beya poxonae yacui opi ducuiya weraweracaena xua cataunxuae jujutebaponaeinchi pomonae irʉ Cristo pejume cowʉntsiwi. Barapomonae jujutebaponaeinchi pecueicueijeixae Cristo pejume diwesi, icha xua poxonae paichim”, jei Nacom.

¹²Poxonae Cordero tsitsinaxuba pecatsatabiwa xua seis po cuiyobetha, bapoxonae tan xua bichocono ira jijiyata. Xometo bichocono tsaebia tsanaya icha paparuwa ichi, pocotsi paparuwa bichocono tsaebia. Jomocoichato bichocono tsobia tsanaya icha pejana ichi.

¹³Opitei xua peitabocotha dubena othopeica po irathe tsique, icha be joibo ichi xua jʉbaba higuera nae xua pethei othothopeica.

¹⁴Peitaboco aichurucuae icha be poxonae ichʉn ichi xua poxonae mata quiyontaba papera. Mataʉtano demxuwan, petunaetonno equeicha ichawa bepoinya poxonae ira jijiyata.

¹⁵Bapoxonae daxita pomonae jiwi itorobiya pia pepa peewatsiwichi tatsi xua barapo cae pin nacuathe, barapomonae nantsiyaba. Irʉ pomonae pentacaponaewi irʉ pomonae copei pexeinaewi, irʉ pomonae soldadomonae pia pentacaponaewi xua pomonae jiwi peamanayabeibi jiwi daxita barapomonae nantsiyaba. Daxitarʉ pomonae pebusi cui tatayebeibiwichi irʉ pomonae xua saya penata exanaewi piawan nantsiyabarʉ. Ichamonae barapomonae jiwana ibo mʉthʉntha nantsiyaba. Ichamonae barapomonae jiwana nantsiyaba po ibotontha xua saya bobena xua demxuwan itapatororon tsica.

¹⁶Barapomonae demxuwan beya yawa iboton beya jeye: “Pana mataperababare xua pata werapaewa tsane xua daxota pon xua eca pia pexeinya peecaethopeibiwatha jopa pata tana netaewa tsane, yawa xua barapo Cordero pecuiyainwa xua pata neperaxa jʉbiya exanaeyainwa xua abe pata exanaexae.

¹⁷Tsipei barapo matacabi patopa po mataqueitha daxita jiwi peraxa jʉbebinchi. Dapon aibi pon panepa barapo mataqueitha”, jei pomonae nantsiyaba.