Read Cuvok Mata 11 Bible Online

Mata 11 - Cuvok bible

Mata 11

¹Masa Yesu ka ndəvda mekətec ndah masasəraka jene tata kuraw dapa yaŋ ecew sə, a daɓa faŋga ka ta sasərak nda va mabəzad Labara mambəla ana kad ndah dapa wunam hay mazlakava ta vavara ana.

²Zaŋ Baatis aŋga dapa daŋgay, ka cəna ma da yaŋ mezlər hay masa Kəristi ta ŋgiya. Ke zlerdec ndah masasəraka jene tata dərziya kad vara vaw ka nəkafa, gege:

³«Kaa sə, ka Mesi masa e te dekey sə, geyey? Daha aabay anda ɓal nda mekele geyey?»

⁴Yesu ke vehecen, gege: «Madaɗay ma ta gwaɗan Zaŋ jə masa akwa cəna va masa akwa wala.

⁵Magwaɗa sə, mahazlaw hay aca wala ndey, ndah mahahalɓa ece də eve sek teceŋ, meskwelme hay ece səɗey, madagazlam hay aca cəna zləmay, ndah maməca ece pərekey, Labara mambəla ana mabəzada kad maslamarga hay.

⁶Mapəsma ɓa kad nda masa a ta gərda makəsparav tata mafay taaɗaw aabay.»

⁷Ara masa aca daɓa, Yesu ke gweɗ da yaŋ Zaŋ Baatis ana kad miya, gege: «Akwa də kad pa səɓak sə, ke te wuzeɗek mey? Ɓəlev masa memeɗ ta ɓəliya geyey?

⁸Naa, akwa wuzeɗek sə, mey? Nda masa aŋga ava rəkwat ta səlay fa vaw geyey? Amaa ndah mapana rəkwat ta səlay sə, aca njah sə, da way ta bay hay.

⁹Akwa də ke te wuzeɗekey ana sə, melemey? Nda mehwedek ma geyey? Aŋga, ya gwaɗakwar, aŋga sə, ka fəna nda mehwedek ma,

¹⁰aŋga sə, aŋga nda masa mavinda dapa Ɗelewer mavəna, gege: “Wala ya ta zləraɗ maslaŋ aɗaw fəma takaa, a ta ləmadakaɗ cəv takaa fəma takaa”.

¹¹Ya gwaɗakwar, deveŋ ndah masa ece heyek dapa ŋgwaza hay sə, kwa ndana mafəna Zaŋ Baatis ana sə, aabay. Ava aŋga ana fakwanay, nda mekusetke ana dapa Wunam ta bay da baymaləvaŋ hay sə, aŋga mazlakava fətiya.

¹²Dəga zleezle masa Zaŋ Baatis a zlar mabəzad ma kasl pəsna, ndana hay aca yahafa ma Wunam ta bay da baymaləvaŋ hay ava gədaŋ, ma ta mapərasliya ndah mayaha ma.

¹³Ndah mehwedek ma fakwanay va ma majawa ec ke gweɗ da yaŋ Meŋgə bay ta Zlavay ana kasl fe medek ta Zaŋ Baatis.

¹⁴Daha akwa wal makəsiya pa rav takwar, Zaŋ sə, aŋga Eli masa e te vehekey.»

¹⁵Nda masa aŋga ava zləmay sə, da cəna.

¹⁶Ye de cecelec ndah pəsna nesey sə, ava wa? Ac ara wudeh manjaha dapa slam ta macam yaŋ masa aca cə lalaw kad mandala tec hay, gege:

¹⁷«Andə ka fətakwar slərem, amaa akwar ke gərev aabay. Andə ka slakwar law ta macəhwandaw, amaa akwar ka kuɗa aabay.»

¹⁸Yaw, Zaŋ ke dekey, ke ndə jene aabay, ka sə jene aabay. Amaa, ndana hay ac ka gwaɗafa, gege: Leŋgesl ka nasata.

¹⁹Wut ta nda e dekey, a ndə jene, e sə jene. Amaa ndana hay ece gweɗ, gege: «Mawala, nda mambərhwalam nesey, nda masana jene, aŋga guula ta ndah macəkala budaw hay va ta ndah maŋga mebər hay.» Amaa leŋgesl te meven jene hay ta Zlavay sə, ka sənata mambəla ana jaka pe mezlər tata hay.

²⁰Ara nesey, Yesu ke peyefec wunam hay mazlakava masa ka ŋgə ha mazlakava ta cah hay dapa mabay, afa ac ka ŋgwada rav tec aabay.

²¹Wabaw kad kaa Kurazeŋ! Wabaw kad kaa Baytisayda! Afa daha cah hay masa maŋga da varakwar nesey sə, ac maŋga da Tir va da Sidaŋw sə, efes ac ka ŋgwada rav teceŋ dəga zleezle, ac ka paɗ bakatar hay fa vaw va magwadəbal vaw dapa meləwec.

²²Aŋga, ya gwaɗakwar, pas ta matəɗ ma sə, mekət te Tir va ta Sidaŋw a ta ŋgata afəcaka da yaŋ takwar.

²³Kaa may, Kafarnahum, ka wulakiya sə, ac ta baŋgaɗakaa avəda kasl a baymaləvaŋ geyey? Ka ta bəraŋgata kasl pa vavara ta ndah maməca hay, afa daha efes cah hay masa maŋga da varakaa nesey sə, ac maŋga da Sawduma, wunam ana aŋga ɓa heley kasl pəsna.

²⁴Aŋga, ya gwaɗakwar, pas ta matəɗ ma sə, mekət ta Sawduma a ta ŋgata afəcaka da yaŋ takaa.

²⁵Dapa ŋgesey ana, Yesu ka zlar megweɗ, gege: «Ya ŋgakaa wasay, Papa, Bay Mazlakava ta baymaləvaŋ va ta vavara, masa ka ka raɓda jeŋ ana hay nesey fa yam te ndey ta ndah masəna jene hay va ta ndah eve leŋgesl, ke ke ŋguzdecen kad wudeh mekweskwes ana.

²⁶Aŋga, Papa, ka ka walaw e de ŋgə ara nesey ana dapa mambəla ana takaa.

²⁷Papa ka vuwa jene hay fakwanay pa ha aɗaw. Kwa ndana masəna, Wat sə, aabay, say Papaŋ, kwa Papaŋ ana, say Wudiya va nda masa wat a wal maŋguzdanay.»

²⁸[8] Medek kad vara yey, akwar fakwanay ndah mayiva ta mazaɓ jə masa a fənakwar fa gədaŋ, yey sə, ya ta vakwar masasak vaw.

²⁹Mazaɓ zakw aɗaw fa yaŋ takwar, manjah dapa mesesərekey aɗaw, afa yey sə, ya nda makwaɗma va nda manaha yaŋ dapa rav, ara nesey, mesfen takwar a ta ŋgat masasak vaw.

³⁰Aŋga zakw aɗaw sə, e zeɓ ava ha tata, jə masa ya ta zəɓakwaɗ fə yaŋ sə, aŋga cefekcefek.