Read Cuvok Mata 13 Bible Online

Mata 13 - Cuvok bible

Mata 13

¹Ta pəsaŋga ana ŋgesey, Yesu ka daɓa da way ana kad a vəda, ke dey, ka njah da ma te təker mazlakava te Gelile.

²Ndana hay gaa ec ke kwesek vaw kad cak tata. Mafay ana, ke tep kad pa kaslkaslah da yaŋ yam ana, ka njah pa. Ndana hay gaa mazlaca da ma ta yam ana.

³Yesu ke gweɗec ava ma maɗəva, gege: «Nda te mehəv ɓa ke dey, ka ta kwakwac hulef de ley.

⁴Dapa masa a kwakwaciya sə, hulef hay ŋgeɗey ece kwi kad pa ma te cəvey, ɗiyak hay da baymaləvaŋ ece dey, aca pala avəda fakwanay.

⁵Hulef hay ŋgeɗey, ece kwi kad fa ɗəsa pa slam masa wuyak da yaŋ ana gaa aabay. Hulefey ana, ec ke pəcec zef, afa wuyak da yaŋ ana gaa aabay.

⁶Amaa, daha pas a tay sə, e ɓətec avəda, ece kuleceŋ, afa slaslalay ana dapa veɗ gaa aabay.

⁷Hulef hay ŋgeɗey, ece kwi kad pa taɓa ta mətak hay. Mətak ana hay, ece gəley, ece ŋgeŋgəɗecec avəda.

⁸Mekele hay, ece kwi kad pa slam mambəla ana, ece hey wudiya ana hay gaa. Hulef amta sə, e hey temere, leŋgeɗ kwakwar makwa, leŋgeɗ saya kwakwar mahkar.

⁹A lada nda masa aŋga ava zləmay ɓa sə, da cəna.»

¹⁰Ndah masasəraka jene ac ka ŋgucafa vaw, ac ka nəkafa, gege: «Ke gweɗec ava ma hay maɗəva sə, mafay te mey?»

¹¹Yesu ke vehecen, gege: Ye gweɗec ava ma hay maɗəva sə, afa takwar sə, akwar ava macəyaŋ ta masəna jene hay maraɓa da yaŋ Wunam ta bay da baymaləvaŋ hay. Amaa ta ndah ana nesey sə, ac ava macəyaŋ ta masəniya aabay,

¹²afa kad nda masa jene tata ɓa sə, aca vana, a da ŋgat jene hay gaa mafəna ana. Amaa ta nda masa jene tata aabay sə, kwa mekusetke ana tata ŋgesey, aca kəsan avəda.

¹³Mawala mafay te mey ye gweɗec ava ma hay maɗəva, afa ece njerey, amaa ece wele ndey bay. Aca cak zləmay, amaa aca cəna bay, kwa macəna ma da yaŋ ana sə, aca cəna aabay.

¹⁴Ara nesey, jeŋ ana ka ŋgata ara masa Izay, nda mehwedek ma te gweɗey: Akwar ta cak zləmay mambəla ana, amaa akwar ta cəna aabay, akwar te pə ndey mambəla ana, amaa akwar ta wala aabay,

¹⁵afa rav ta ndah ana nesey, a cəna jene bay. Ac ka dəzla zləmay tec hay avəda, ac ka ɓəzla ndey tec hay avəda, afa aca ra wala jene eve ndey tec bay, aca ra cəna ava zləmay tec bay, aca ra cəna eve leŋgesl tec bay, afa ac ta ŋgwada rav teceŋ ye de mbəlec avəda bay.

¹⁶Amaa takwar sə, mapəsma ɓa kad ndey takwar hay, afa ece wele ndey va zləmay takwar hay may, afa aca cəna.

¹⁷Ya gwaɗakwar, ndah mehwedek ma hay gaa va ndah maŋga mezlər ara aŋga ana gaa ac ka wal mawala jeŋ ana eve ndey teceŋ, amaa ac ka wala aabay. Ac ka wal macəna jə masa akwar dapa macəna, amaa ac ka cəna aabay.

¹⁸«Macəna mapan ma maɗəva da yaŋ nda makwakwaca hulefey.

¹⁹Daha ndana a cəna ma da yaŋ Wunam ta bay da baymaləvaŋ, amaa a cəna ma da yaŋ ana bay sə, afa nda suwe te dekey, ta kəsan ma masləka dapa rav tata. Nda ana ŋgesey, aŋga ara hulef masa aŋga te kezl a ma te cəvey.

²⁰Hulef masa e kezl kad pa slam ɗəsa sə, ŋgesey nda macəna ma ta Zlavay, aca kəsiya zef zef eve mewesley.

²¹Amaa aŋga ava slaslalay aabay, afa a kəsiya sə, ta manjah kusetke war. Pas masa marga va mayah ma hay te dekey mafay ta ma ta Zlavay sə, a təɗata.

²²Hulef masa e kezl kad pa mətak hay sə, ŋgesey aŋga ara nda macəna ma ta Zlavay, amaa mawulak yaŋ ta vavara va mafəc nda te zleley hay aca ŋgaŋgəɗac ma ana, ara nesey, nda ana e hey aabay.

²³Hulef masa e kezl kad pa slam mambəla ana sə, aŋga ara nda macəka zləmay fa ma ta Zlavay, a cəna. Ara nesey, e hey wude hey. E hey wudiya ana hay temere, ŋgeɗey kwakwar makwa, ŋgeɗ saya kwakwar mahkar.»

²⁴Ke gweɗec ma maɗəva mekele, gege: «Wunam ta bay da baymaləvaŋ hay sə, aŋga ara ndana ta slak hulef mambəla ana e ley tata.

²⁵Dapa masa ndana hay aca njawaŋ sə, maslagəra tata ke dey, ka slakaɗ zlərev pa taɓa ta bəley ana, ka data.

²⁶Masa hulefey ana, ka pəcata, e heyey sə, zlərev ke ŋguzdek vaw may.»

²⁷Ara nesey, ndah maŋga mezlər ta nda te ley ana, ec ke dekey, ac ka gwaɗa bay ta way tec, gege: «Bay taciya, amba ke sləkek e ley takaa sə, hulef mambəla ana, biba? Na zlərev hay na ece dek dama?»

²⁸Bay ta way teceŋ sə, ke vehecen, gege: «Maŋga mezlərey ana nesey sə, maslagəra.» Ndah maŋga mezlərey, ac ka gwaɗa, gege: «Ara nesey sə, ka wal anda dey, anda te ŋgəɗec avəda geyey?»

²⁹Ke vehecen, gege: «Away, afa daha akwa ŋgəɗiya sə, akwar ta ŋgəɗa avəda ava bəley ana.

³⁰Megərdeceŋ ece re gəl fa slam ana kasl fa kiya te meŋgə jene kad a wunam. Ye te gweɗec ndah meŋgek jene de ley, aca ra tawa zlərev ana avəda ɗagay, aca ra ɓəcaɗ fa slam ana ke te ndeley, ta bəley sə, ece re ɓəceken kad pa wuda aɗaw.»

³¹E gweɗec ava ma maɗəva mekele saya, gege: «Wunam ta bay da baymaləvaŋ hay sə, aŋga ara wut te venjeh, masa ndana ta kəsiya, a sləkiya e ley tata.

³²Wudiya ana aŋga kusetke deveŋ hulef hay dərziya, amaa daha ka pəcata sə, e gəl a fəna lak hay dərziya de ley, e tər ka gamslak mazlakava ana, ɗiyak hay da baymaləvaŋ ece dekey, aca lam way fa ha ana hay.»

³³Yesu ke gweɗec ava ma maɗəva mekele saya, gege: «Wunam ta bay da baymaləvaŋ hay sə, aŋga ara is masa ŋgwaz ta həliya kusetke, ka gaɓa ava kəfa gaa, ka guvaɗa kəfa ana avəda fakwanay.»

³⁴Ma ana fakwan nesey, Yesu e gweɗec kad miya sə, ava ma hay maɗəva. Ke gweɗec masa ava ma hay maɗəva aabay sə, aabay,

³⁵afa ara masa nda mehwedek ma te gweɗey sə, da ŋgata, ke gweɗ, gege: «Ya ta wuna ma ke te gweɗ ma hay maɗəva, ya ta slaf jene hay maraɓa mezleezle ana dəga dapa mezler ta vavara.»

³⁶Ara nesey, Yesu ke gərdec miya faŋga, ka data kad a wunam. Ndah masasəraka jene tata ac ka ŋgucafa vaw, ac ka gwaɗa, gege: «Panandan ma da yaŋ ma maɗəva eve zlərev de ley sey.»

³⁷Yesu, ke vehecen, gege: «Nda masləka hulef mambəla ana sə, Wut ta nda.

³⁸Ley sə, e ŋguzdek vavara. Hulef mambəla ana sə, e ŋguzdek wudeh ta Wunam ta bay. Zlərev sə, e ŋguzdek wudeh ta nda suwe.

³⁹Maslagəra masləka zlərev sə, bay ta haalay. Kiya te meŋgek jene kad a wunam sə, pas te mendəv ta vavara. Ndah meŋgek jene kad a wunam sə, maskəla hay.

⁴⁰Ara masa aca ɓac zlərev ke te ndel pa kwakwaw sə, e te ŋgə ara aŋga ana pas te mendəv ta vavara may.

⁴¹Wut ta nda e te zlərek maskəla tata hay ke te həlec kad a vəda dapa Wunam ta bay tata, ndah mafəca ndana hay fakwanay ke te ŋgə mebərey va ndah maŋga jene hay mambəla ana hay aabay fakwanay.

⁴²Ec te kezleɗec pe dəlev ta kwakwaw mahaldadas ana. Faŋga sə, makuɗa hay va mapaɗ zleŋ hay.

⁴³Ara nesey, ndah maŋga mezlər ara aŋga ana ac te weɗ ara pas dapa Wunam ta bay ta Papaŋ teceŋ. A lada nda masa aŋga ava zləmay ɓa sə, da cəna.»

⁴⁴«Wunam ta bay da baymaləvaŋ hay sə, aŋga ara zleley maraɓa de ley masa ndana ka ŋgata avəda, a raɓda saya. Dapa meweslə tata, a daɓa, a husamda jene hay tata fakwanay, a da husam ley ana.

⁴⁵Wunam ta bay da baymaləvaŋ hay sə, aŋga ara nda maŋga fəlew masa mayaha gavda hay mambəla ana.

⁴⁶Daha ka ŋgat gavda mambəla ana masa e husem bay ɓa sə, e dey, a husamda jene hay tata fakwanay, a da husamiya.»

⁴⁷«Wunam ta bay da baymaləvaŋ hay sə, aŋga ara səfa masa ac ta kazlaɗ pa yam mafayakfayak ana ta matəhaz tərsam te kəlef hay fakwanay.

⁴⁸Masa ka nəhata weh cay sə, ece səpenek kad a rav ta zazay, aca njah maanjahay, aca pala tərsam te kəlef ana hay mambəla ana, ece kuyeɗec pa waŋ, amaa tərsam te kəlef hay masa mambəla ana aabay sə, ece kwideceŋ.

⁴⁹E te ŋgə ara nesey ana dapa pas te mendəv ta vavara may. Maskəla hay ec te dekey ke te wekec ndah maŋga jə mambəla ana aabay va ndah maŋga mezlər ara aŋga ana.

⁵⁰Ec te kezleɗec pe dəlev ta kwakwaw. Faŋga sə, makuɗa hay va mapaɗ zleŋ hay.»

⁵¹Yesu ke nəkefec, gege: «Akwar ka cəna ma ana hay fakwan geyey?» Ac ka vahan, gege: «Aŋga, andə ka cəna fakwanay.»

⁵²Ke gweɗec saya, gege: «Ara nesey, kwa waawa masa aŋga nda mesesərekecen ma majawa kad ndana hay masa ke sesərekek jene da yaŋ Wunam ta bay da baymaləvaŋ hay sə, aŋga ara bay ta way mehəlekec jene hay tata waya va mava dapa zleley tata maraɓa kad a vəda.»

⁵³Masa Yesu a ndəvda megweɗ ava ma hay maɗəva nesey sə, ndal! A daɓa faŋga,

⁵⁴ke dey e Nezeret, pa wunam masa e gəlek dapa. Dərŋga sə, ke sesərekec ndana hay dapa Way ta macə mbahw te Zuwef hay. Ndah dapa way ana faŋga fakwanay ec ke rəzleceŋ, ec ke gweɗ, gege: «Leŋgesl te mesen jene hay va gədaŋ te meŋgə cah hay nesey sə, e ŋgetekec dama?

⁵⁵Aŋga sə, aŋga wut ta nda macacəɗa hap biba? Naa Mamaŋ sə, mezel Maaray? Zak, Zezef, Simaŋw va Zud sə, naa ac malamaŋ hay?

⁵⁶Naa dəmaŋ hay fakwanay ac da vara andakwa fana? Leŋgesl te mesen jene hay va gədaŋ te meŋgə cah hay ana nesey sə, e ŋgetekec dama?»

⁵⁷Mafay ta mawulak yaŋ ana hay nesey, aca ŋgaŋgar Yesu. Amaa Yesu gege: «Nda mehwedek ma sə, ndana hay aca hahəmiya vəla vəla fakwanay, amaa dapa wunam tata va da vara tərsam tata sə, a ŋgat mehehəm aabay.»

⁵⁸Dərŋga sə, Yesu ka ŋgə cah hay gaa aabay, afa ac ka kəs ma tata aabay.