Read Cuvok Mata 18 Bible Online

Mata 18 - Cuvok bible

Mata 18

¹Dapa ŋgesey ana, ndah masasəraka jene ac ka ŋgucafa vaw Yesu ana, ac ka gwaɗa, gege: «Nda mazlakava mafəna ndana hay fakwanay dapa Wunam ta bay da baymaləvaŋ hay sə, wa?»

²Yesu ke zelek wat kusetke, ka zlacaɗ pa taɓa teceŋ.

³Ke gweɗ, gege: «Eve metehwe ana ya gwaɗakwar, daha akwar ka ŋgwada rav takwar ke te tər ara wudeh aabay sə, kwa akwar ta ŋgat mesehw pa Wunam ta bay da baymaləvaŋ hay aabay.

⁴Nda masa ka təraɗ yaŋ kusetke ara wat nesey sə, nda ana ŋgesey, aŋga nda mazlakava mafəna ndana hay fakwanay dapa Wunam ta bay da baymaləvaŋ.

⁵Nda masa a kəs wat ara wat nesey mafay taaɗaw sə, nda ŋgesey a kəs yey ana.»

⁶Amaa kwa waawa masa ka taɗda nda amta deveŋ ndah mekusetke ana masa ac ka kəs ma aɗaw nesey kad pe mebərey, kad aŋga sə, zuwan ac ta jawana ləgeŋ mazlakava ana pa uway, ac ta kazlaɗ pe dəlev ta yam mafayakfayak ana.

⁷Wabaw! Kad yaŋ ndah ta vavara nesey, afa ece ŋgə jene hay masa e təɗdec ndana hay ke te ŋgə mebərey. Tehwe ara aŋga ana, jeŋ ana hay nesey ec de ŋgə ɓa. Amaa wabaw kad nda masa jə mataɗda ndana hay kad pe mebərey ana ŋgesey e dek jaka vara vaw.

⁸Daha ke teɗ kad pe mebər mafay ta ha takaa, daha aabay mafay te sek takaa sə, ŋgəla avəda, kazlda dəreŋ ava kaa. Kad kaa sə, zuwan ka ta ŋgat manjah katar ka midakw ava ha amta, daha aabay eve sek amta, da yaŋ mekezl kad pa kwakwaw masa e te ndəv aabay ava ha hay ecew, daha aabay eve sek hay ecew.

⁹Daha ke teɗ kad pe mebər mafay te ndey, wuslaka avəda, kazlda dəreŋ ava kaa. Kad kaa sə, zuwan ka ta ŋgat manjah katar ka midakw eve ndey amta, da yaŋ mekezl kad pa kwakwaw masa e te ndəv aabay eve ndey takaa cuweeney.

¹⁰Map leŋgesl ta map wat amta deveŋ wudeh nesey[12] ke jene taambəla, afa ya gwaɗakwar, da baymaləvaŋ sə, maskəla tec hay ɓa ac mazlaca mafay teceŋ cəɗem cəɗem da baymaləvaŋ da cak ta Papa. [

¹¹Wut ta nda e dek sə, ka ta mbəl ndah masa ec ke zeceŋ.]

¹²«Mawulak yaŋ takwar gwagumaw? Daha ndana aŋga ava təmak hay temere, amta deveŋ eceŋ ka zata sə, nda ana e gərdec təmak hay dərziya kwakwar cuɗ dapa yaŋ ana cuɗ dapa wudam ke te yehek təmak amta masa ka zata sə, aabay geyey?

¹³Eve metehwe ana ya gwaɗakwar, daha ke ŋgetek avəda sə, e te wesl da yaŋ təmak ana macəkuma bay ka fəna da yaŋ təmak hay kwakwar cuɗ dapa yaŋ cuɗ masa ac ɓa.

¹⁴Ara aŋga ana, Papaŋ takwar da baymaləvaŋ, a wal kwa nda amta deveŋ wudiya hay da zə bay.»

¹⁵«Daha malamakw ka ŋgə mebər fa yam te ndey takaa, daɗ ŋgatafa ka amta, gwaɗa masa akwar ava aŋga babəla. Daha ka cənakaɗ ma sə, ŋgesey, ka ke mbəlek malamakw ana avəda.

¹⁶Amaa daha ka cənakaɗ ma aabay sə, kəs nda amta, daha aabay ndah ecew mekele kad veŋ kaa, afa ara mavinda dapa Ɗelewer mavəna, gege: “Kwa ma wula wula de ləmedey sə, a lada da yaŋ matə yaw ta ndah ecew, daha aabay ta ndah mahkar.”

¹⁷Daha ka gwam mecənecen ma aabay sə, gwaɗan ma ana kad Macam yaŋ ta ndah ta Zlavay. Daha ka gwam mecənecen ma ta Macam yaŋ ta makəsparav ana hay aabay jaŋgata sə, paɗ malamakw ana ara nda masa a sən Zlav bay, daha aabay ara nda macəkala budaw.

¹⁸Eve metehwe ana ya gwaɗakwar, jene hay fakwan masa akwar ta jawiya dapa vavara, ac ta jawata da baymaləvaŋ. Jene hay fakwan masa akwar ta pəliya dapa vavara, ac ta pəlata da baymaləvaŋ.»

¹⁹Ya gwaɗakwar saya, daha ndah ecew dapa vavara nesey, ac ka cacala ma teceŋ ka ta nək kwa mey mey dapa macə mbahw sə, Papaŋ masa aŋga da baymaləvaŋ sə, e te vec jeŋ ana,

²⁰afa dapa slam masa ndah ecew, daha aabay mahkar ac macama eve mezel taaɗaw sə, ya faŋga dapa taɓa teceŋ.

²¹Ara nesey, Piyer ka ŋgucafa vaw Yesu, ka gwaɗa, gege: «Bay Mazlakava, daha malama ke ŋgə jə mambəla ana aabay fa yam te ndey taaɗaw sə, ya da pəlan mebər tata ana dəɓa ecuwey? Kasl dəɓa tasəla geyey?»

²²Yesu ka vahan, gege: «Away! Ya gwaɗakaa masa dəɓa tasəla sə, aabay, amaa dəɓa kwakwar tasəla kasl dəɓa tasəla ana.»

²³Wunam ta bay da baymaləvaŋ hay sə, aŋga ara bay masa a wal a da səna ndah maŋgan mezlər tata hay ece ŋgə mezlər eve zleley tata sə, meemey.

²⁴A zlariya ava nda masa aŋga ava səlay tata e ŋgə miliyaŋw hay gaa.

²⁵Ara masa nda ana ka zlafa mapəlan sabay sə, bay ta way tata ke və cəvey ka ta husamda nda ana, ŋgwaza, wudiya hay ara ɓeley va jene hay tata fakwanay masa aŋga ava aŋga ka ta pəl duwa tata.

²⁶Nda maŋga mezlər sə, ka təɗafa kad fəma tata, ke kekəredey, ka ŋgana mbahw, gege: «Mbahw piyey sek, ya ta pəlakaɗ avəda fakwanay.»

²⁷Bay sə, metekwen ka ŋgana. Ara nesey, ka gəran duwa tata ana, ka gərda da daɓa.

²⁸Medek ta nda ana da way ta bay kad a vəda sə, ac ta cə yaŋ ava guula tata masa duwa tata vara vaw ɓa may, e ŋgə yam ta səlay temere. E dek kesl a təhaziya pa uway, a tərvaɗiya, ava magwaɗa, gege: «Pəlekendə duwa aɗaw.»

²⁹Guula tata sə, ka təɗafa kad fəma tata, ke kekəredey! Ka ŋgana mbahw, gege: «Mbahw piyey sek, ya ta pəlakaɗ avəda fakwanay.»

³⁰Amaa nda sə, ka wal ma ana aabay. Ka kazlaɗ pa daŋgay kasl pa pas masa aŋga ta pəlan duwa tata ana avəda.

³¹Masa ndah maŋga mezlər hay dərziya aca wala ara nesey sə, ke məceceŋ vaw macəkuma bay, ec ke dey ka ta gwaɗan ma ana fakwanay kad bay ta way teceŋ.

³²Ara nesey, bay ta way sə, ka zala nda ana, ka gwaɗa, gege: «Nda maŋga mezlər masa suwe, ya ka gərakaɗ duwa aɗaw hay fakwanay, afa ke ke ŋgiyey mbahw.

³³Efes na kaa may, ka ŋgafa metekwen nda masa akwa ŋgə mezlər ava aŋga, ara masa ya ta ŋgafakaa sə, aabay ŋgəɗa geyey?»

³⁴Bay ta way sə, rav ka haca mabay, ka zləraɗ nda ana pa daŋgay aca ra ŋgada hahar kasl pa pas masa aŋga ta pəlan duwa ta bay ta way tata fakwanay.

³⁵Yesu ke gweɗ saya, gege: Ara aŋga ana, Papa da baymaləvaŋ a ta ŋgiya ava akwar, daha ndana deveŋ akwar a wal mapəlan mebər ta malamaŋ ava rav tata amta bay.