Read Cuvok Mata 21 Bible Online

Mata 21 - Cuvok bible

Mata 21

¹Yesu va ndah masasəraka jene tata ac zef ava Zeruzelem, aca husa pa wunam ta Betfazey fa ŋguɗa ta Awliviyey hay. Yesu ke zlerdec ndah masasəraka jene tata ecew fəma teceŋ.

²Ke gweɗ, gege: «Madaɗay pa wunam fəma takwar antisey, akwar ta ŋgat mamaŋ ta zaŋgwa majawa ava wudiya ana da cak tata. Mepəlekeceŋ, mehwedekendey.

³Kwa daha ndana a gwaɗakwar, akwar da vahanay: “Bay Mazlakava ta waya”. Faŋga faŋga ana, ac ta pəlakwaɗ ma.»

⁴Jeŋ ana e dek ara nesey sə, afa a da ŋgata ara nda mehwedek ma ke gweɗ, gege:

⁵«Megweɗec ndah dapa berne ta Siyawna: “Wala bay takaa a daɗay kad varakaa. Aŋga makwaɗma, aŋga matapa da yaŋ wut ta zaŋgwa. Zaŋgwa ana sə, wut ta mamaŋ zaŋgwa ana ŋgesey.”»

⁶Ara nesey, ndah masasəraka jene tata sə, ec ke dey, ac ka ŋgaw ara masa Yesu te gweɗeceŋ.

⁷Ac ka hwadan mamaŋ ta zaŋgwa va wudiya ana. Ac ka caɗ rəkwat tec fa zaŋgwa ana hay, Yesu ka njah a yaŋ ana.

⁸Ndana hay gaa ac ka caɗ rəkwat tec hay pe cəvey. Dərziya hay ac ka bəzlah ha ta wudez hay, ac ka ɗaɗəpaɗ pe cəvey.

⁹Miya hay masa ece dey fəma tata va ŋgeɗ hay masa aca cəpiya jaka ava dəɓa sə, aca cə lalaw, gege: «Hawzana! Wut te Deevet! Mapəs ma ɓa da yaŋ nda masa e dekey eve mezel ta Bay Mazlakava. Hawzana! Kad Zlav masa aŋga da wudam da baymaləvaŋ!»

¹⁰Masa Yesu e sehw kad Zeruzelem sə, leŋgesl ta ndah dapa wunam ana fakwanay ka dəŋgazlata! Mafay ana, ac ka nəkaw dapa taɓa tec, gege: «Nesey ana sə, ndana wa?»

¹¹Miya hay sə, ec ke vehecen, gege: «Aŋga sə, aŋga Yesu, nda mehwedek ma, aŋga nda Nezeret ana dapa vavara te Gelile.»

¹²Ava dəɓa ana, Yesu ke sehw kad pə Way ta kwakwas, ke mbesec ndah mahusamda jene hay fakwanay va ndah mahusamiya dapa Way ta kwakwas ana. Ke vərekwec taabəla ta ndah mayambaɗa səlay va slam ta manjah ta ndah mahusamda mahwɗagwam hay avəda.

¹³Ke gweɗ, gege: «Mavinda dapa Ɗelewer mavəna, gege: “Way aɗaw sə, ac ta zaliya way ta macə mbahw”. Amaa takwar sə, akwa təraɗ ka bədam ta makar hay!»

¹⁴Mahazlaw hay va ndah mahahalɓa hay ac ka ŋgucafa vaw Yesu dapa Way ta kwakwas ana, ke mbəlec avəda fakwanay.

¹⁵Masa mazlakava hay ta ndaakwas hay va ndah mesesərekecen ma hay majawa kad ndana hay, aca wala cah hay masa Yesu a ŋgiya va masa aca cəna macə lalaw te wudeh dapa Way ta kwakwas, gege: «Hawzana! Wut te Deevet!» Rav ke hecec mabay.

¹⁶Ac ka gwaɗa Yesu, gege: «Ka cəna ma masa ece gweɗ na geyey?» Amaa Yesu ke vehecen, gege: «Aŋga.» Kwa akwar ka jaŋgə ma hay masa ece gweɗ, gege: «Jaka pə ma te wudeh mekweskwes ana va wudeh masa aca sə wa heley, ka ka ləmada mahahəm yaŋ takaa sə, aabay geyey?»

¹⁷Yesu ke gərdec faŋga, ka data a gəva ta Betani, ka nahata dərŋga.

¹⁸Tedew te pərek ana, Yesu ka vahakata kad pe berne, may ka kəɗa.

¹⁹A ta wala maftay ɓa da ma te cəvey, ka ŋgucafa vaw, amaa ka ŋgat jene fətiya aabay, say gamslak ana hay. Ara nesey, ka gwaɗa maftay ana, gege: «Kwa ke de hey wat sabay katar.» Faŋga faŋga ana, maftay ana ka kulata.

²⁰Masa ndah masasəraka jene aca wala maftay ana e kwel ara nesey sə, ece rəzley, aca gwaɗa Yesu, gege: «Maftay ana, e kwel zef ara nesey sə, meemey?»

²¹Yesu ke vehecen, gege: «Eve metehwe ana ya gwaɗakwar, daha pas amta akwar ava makəsparav ɓa, akwa wulak yaŋ ecew ecew aabay sə, akwar ta zlafa meŋgə sə, jə masa ara ya ta ŋgiya ava maftay na babəla bay, amaa kwa daha akwa gwaɗa ŋguɗa nesey: “Zleftek fana, te kezl pa yam mafayakfayak ana” sə, a ta ŋgata.

²²Jene hay fakwanay masa akwar ta nəkiya dapa macə mbahw ava makəsparav sə, akwar ta ŋgatiya.»

²³Masa ka sahwata pa Way ta kwakwas, mazlakava hay ta ndaakwas hay va mazlakava hay te Zuwef hay, ac ka ŋgucafa vaw dapa masa e sesərekec ndana hay, ac ka gwaɗa, gege: «Ka ŋgə jeŋ ana hay nesey sə, ava gədaŋ wula? Mavakaa gədaŋ ana wa?»

²⁴Yesu, ke vehecen, gege: «Yey may, ya ta nəkafakwar ma amta, pal amta. Daha akwar ke vehekendey, ara nesey, ya ta gwaɗakwaɗ ava gədaŋ ta wa masa ye ŋgec jeŋ ana hay nesey.

²⁵Mezlərek Zaŋ Baatis ke te ŋgec beetem kad ndana hay sə, wa? Zlav geyey, ndana hay?» Amaa ac ka tə yaw dapa taɓa teceŋ, ec ke gweɗ, gege: «Daha anda gwaɗakwa: “Zlav te zlərekey”, a ta nəkafandakwa: “Naa akwa kəs ma tata ana bay sə, mafay te mey?”

²⁶Amaa daha anda gwaɗakwa: “Ndana hay te zlərekey”, say anda lalakwa fa miya, afa ndana hay fakwanay aca pə Zaŋ ka nda mehwedek ma.»

²⁷Ara nesey, ac ka vahan kad Yesu, gege: «Anda səniya bay.» Aŋga may, gege: «Yey may, ya ta gwaɗakwaɗ nda meviyey gədaŋ te meŋgə jeŋ ana hay nesey sə, aabay.»

²⁸Yesu ke gweɗec saya, gege: «Mawulak yaŋ takwar da yaŋ maɗay na gwagumaw? Ndana ɓa, aŋga ava wudeh ecew. E də kad vara wat amta, a gwaɗa, gege: “Wat aɗaw, pəsana nesey, daɗ te ŋgə mezlər de ley te wudez te rezeŋ”.

²⁹Wat ana, ka vahan, gege: “Ye də aabay”. Amaa manjah kusetke ava dəɓa ana, ka ŋgwada mawula yaŋ, ke dey.

³⁰Papaŋ sə, ke də kad vara wat leŋgeɗey, ka gwaɗa ara aŋga ana. Wat ana, ka vahan, gege: “Aya papa, ye dey”. Amaa ke də aabay.

³¹Deveŋ wudeh ecew nesey sə, maŋgana jə masa papaŋ tec ta waya sə, wat wula?» Ndah ana, ac ka vahan, gege: «Wat macaaca ana.» Yesu gege: «Eve metehwe ana ya gwaɗakwar, ndah macəkala budaw va ŋgwazah makəsa vaw fa zaŋ ana, ac ta ŋgəlakwaɗ ma kad pa Wunam ta bay ta Zlavay.

³²Eve metehwe ana, Zaŋ Baatis ke dekey kad varakwar, ka ŋguzdakwaɗ cəv te meŋgə jene ara aŋga ana, amaa akwar ka kəsaw aabay. Sesəker ndah macəkala budaw va ŋgwazah makəsa vaw fa zaŋ ana, eceŋ sə, ac ka kəsaw. Takwar sə, kwa akwar ka wala ara nesey, amaa akwar ka ŋgwada rav takwar masa akwar da kəsiya sə, aabay.»

³³Yesu ke gweɗec saya, gege: «Mawala ma maɗəva mekele ɓa. Nda te ley ɓa, ke ŋgey wudez te rezeŋ, ka cəra teleleŋ. De ley ana, ka zləla veɗ ta maɗac wut te wudez ana, ka ɗəzla balak mazambəla ana. Ka gəraɗ wudez ana hay pa ha ta ndah ma ta ŋgana mezlər de ley ana masa aca ra vəniya, ka data kad maŋgway.

³⁴Masa kiya te meŋgel wut te wudez ana ka husakata cay sə, bay te ley ana, ka zlar ndah maŋga mezlər tata kad vara ndah maŋga mezlər de ley ana, ke te helek meven ta ma tata.

³⁵Amaa ndah maŋga mezlər de ley sə, dəɗak! Ec ke təhezec avəda. Nda amta sə, ac ka kəlapa. Nda leŋgeɗey sə, tata ac ka kəɗa avəda cukw cukw ka macəhwandaw. Ta nda leŋgeɗey sə, tata aca kaliya eve kekeŋ.

³⁶Ava dəɓa ana, nda te wudez ana ke zlərek ndah maŋga mezlər tata hay gaa mafəna macaaca ana saya. Ndah maŋga mezlər de ley sə, ec ke ŋgec ara aŋga ana jaŋgata.

³⁷Mamaɗ yaŋ ana, ka zlar wudiya, a wulakiya sə, gege: “Ac ta nahan yaŋ kad wat aɗaw”.

³⁸Amaa masa ndah maŋga mezlər de ley ana, aca wala wut ta nda ana sə, aca cə mamənak dapa taɓa tec, gege: “Anti wat ma ta cama jene ta papaŋ. Amcakwa, ma ta kəɗakwaɗ avəda, afa andə da camakwa jene hay ta papaŋ fakwanay kad andakwa”.

³⁹Ara nesey, dəɗak ac ka təhaza, ac ka hwadaɗ a vəda te ley ana, ac ka kəɗa vəda cukw cukw ka macəhwandaw.

⁴⁰Yaw e tehey, na daha bay te wudez te rezeŋ ana ka ta dakata sə, e te ŋgec ndah maŋga mezlər de ley ana sə, mey?»

⁴¹Mazlakava te Zuwef hay sə, ac ka vahan, gege: «E te kəɗec ndah suwe hay na avəda cukw cukw ka macəhwandaw, kwa e te ŋgefec metekweney aabay may. Ara nesey, e te vecen wudez ana hay pa ha ta ndah maŋga mezlər mekele masa aca ra vəniya pas masa wudez ana hay te heyekey.»

⁴²Yesu ke gweɗec saya, gege: Akwar ka jaŋgə Ma hay Mavinda dapa Ɗelewer mavəna sə, aabay geyey? Ec ke gweɗ, gege: Kekeŋ masa masamahəzla hay ta kazlda ava zlalav sə, anjəkar aŋga kekeŋ masa mambəla ana. Ŋgesey, mezlər ta Bay Mazlakava, nesey sə, jə marəzla nda fa yam te ndey tandakwa.

⁴³Mafay ana, ya gwaɗakwar: «Wunam ta bay ta Zlavay sə, ac ta pəraslakwaɗ avəda dapa ha takwar. Ec te vecen kad tərsam hay mekele masa ec te heyek wudiya ana hay ɓa. [

⁴⁴Ava dəɓa ana, Yesu ke gweɗec saya, gege: “Nda masa e te teɗ kad yaŋ kekeŋ ana nesey sə, e te pesl meepesley, ta nda masa kekeŋ ana te kezl kad yaŋ ana sə, kekeŋ ana a ta humbasla avəda.”»]

⁴⁵Ava macəna ma maɗəva hay nesey, mazlakava hay ta ndaakwas hay va Farisa hay ac ka cəna avəda anjəkar e gweɗek nesey sə, da yaŋ eceŋ.

⁴⁶Ac ka yah wewer ta matəhaziya, amaa ece lel fa miya hay, afa miya ana hay, aca pə Yesu sə, ka nda mehwedek ma.