Read Cuvok Mata 25 Bible Online

Mata 25 - Cuvok bible

Mata 25

¹«Wunam ta bay da baymaləvaŋ hay sə, aŋga ara dahəla hay kuraw ta kəs petərla tec hay, ece dey kad a vəda ka ta cə yaŋ ava wat makəsa madəmay.

²Zlam deveŋ eceŋ ac marəzla, zlam ac eve leŋgesl.

³Dahəla hay masa marəzla sə, ac ka kəs petərla tec hay, ac ka kəs mal mekele pa ha tec sə, ɓasabay.

⁴Amaa ta dahəla hay zlam masa ac eve leŋgesl sə, ac ka kəs petərla tec hay va maɗah mal mekele pa kwalaba hay.

⁵Ara masa makəsa madəm sə, ke husek zef aabay, ec ke yəvec fakwanay, ac ka zlar manja waŋ.

⁶Ta yaŋ ta vaɗ sə, uway e cənek ava gədaŋ, gege: “Makəsa madəm ka husakata cay! Medek kad vəda ma ta cə yaŋ ava aŋga”.

⁷Dapa ŋgesey ana, dahəlah kuraw sə, ece pərek dapa waŋ, aca ləmad petərla tec hay.

⁸Dahəlah masa marəzla sə, ec ke gweɗec dahəlah masa ac eve leŋgesl sə, gege: “Magəjandaw ava mal takwar ana kusetke, afa petərla taciya hay aca məcay”.

⁹Dahəlah eve leŋgesl hay sə, ec ke vehecen, gege: “Away! A fa a ta husa kad andaw va akwar ana bay. Mambəla sə, madaɗay vara ndah mahusamda mal ana, ma ta husamaɓa kad akwar.”»

¹⁰Dapa masa ece dey ke te husemek mal sə, makəsa madəm mavaŋga. Dahəlah masa ac maləmada sə, ece sehw fa slam ana ava makəsa madəmay kad pa way ta macunam ta madəmay ana. Ma ta way ana ke ɓəzlata.

¹¹«Manjah kusetke ava dəɓa ana, dahəla hay marəzla sə, ec ke husekey. Ec ke gweɗ, gege: “Bay Mazlakava, Bay Mazlakava, wunandan ma ta way!”

¹²Amaa makəsa madəm sə, ke vehecen, gege: “Eve metehwe ana ya gwaɗakwar, ya sənakwar bay”.

¹³Ara nesey, manjah eve ndey, afa akwa san kwa pas ana, kwa ler ana bay.»

¹⁴E te ŋgə ara nda masa e te də kad maŋgway. Wagaa e te dey sə, ke zelec ndah maŋga mezlər tata, ke gərecen zleley tata hay fa ha teceŋ.

¹⁵Ka vana kad nda macaaca ana yam ta səlay ta gənaɓ temere zlam, kad nda meecew ana temere ecew, kad nda mamahkar ana temere amta. E vec səlay ana sə, təɗe fa gədaŋ ta nda ana. Ka data.

¹⁶Nda maŋgata yam ta səlay ta gənaɓ temere zlam sə, ke dey, ke ŋgə mezlər ava səlay ana faŋga faŋga. Ka ŋgat yam ta səlay ta gənaɓ temere zlam mekele kad yaŋ ana.

¹⁷Nda maŋgata yam ta səlay ta gənaɓ temere ecew sə, ka ŋgat yam ta səlay ta gənaɓ temere ecew mekele kad yaŋ ana.

¹⁸Amaa nda maŋgata yam ta səlay ta gənaɓ temere amta sə, ke dey, ka zlal veɗ, ka raɓaɗ səlay ta bay ta way tata sə, pa.

¹⁹«Manjah gaa ava dəɓa ana, bay ta way ta ndah maŋga mezlərey e husekey, ke nəkefec mezlər masa ac ta ŋgiya ava səlay tata.

²⁰Nda maŋgata yam ta səlay ta gənaɓ temere zlam, ka ŋgucafa vaw, ka ŋguzdan səlay temere zlam mekele, ka gwaɗa, gege: “Bay aɗaw, ka ka viyey yam ta səlay ta gənaɓ temere zlam, wala ya ka ŋgat temere zlam mekele kad yaŋ ana”.

²¹Bay ta way tata sə, ka gwaɗa, gege: “Etehey! Kaa sə, ka nda maŋga mezlər mambəla ana, ka nda maŋga mezlər eve cəvey ana. Ka ke ŋgə mezlər eve cəvey ana ava jə masa mehehəmey ana kusetke. Ya ta paɗakaa a yaŋ jene hay masa ac eve mehehəm mabay. Dek, te wesl fa slam ana ava bay ta way takaa”.

²²Nda maŋgata yam ta səlay ta gənaɓ temere ecew sə, ka ŋgucafa vaw, ka gwaɗa, gege: “Bay aɗaw, ka ka viyey yam ta səlay ta gənaɓ temere ecew, wala ya ka ŋgat yam ta səlay ta gənaɓ temere ecew mekele kad yaŋ ana”.

²³Bay ta way tata sə, ka gwaɗa, gege: “Etehey! Kaa sə, ka nda maŋga mezlər mambəla ana, nda maŋga mezlər eve cəvey ana. Ka ke ŋgə mezlər eve cəvey ana ava jə masa mehehəmey ana kusetke. Ya ta paɗakaa a yaŋ jene hay masa ac eve mehehəm mabay. Dek te wesl fa slam ana ava bay ta way takaa”.

²⁴Mamaɗ yaŋ ana, nda maŋgata yam ta səlay ta gənaɓ temere amta sə, ka ŋgucafa vaw, ka gwaɗa, gege: “Bay aɗaw, ya səniya kaa sə, ka nda masasala elehey, ke ŋgek jene kad a wunam dapa slam masa ka ka sləkaw aabay, ke ɓəcek jene hay dapa slam masa ka ka kwakwacaw aabay,

²⁵zidaw ke kəɗiyey, ye ke dey, ya ka raɓaɗ səlay takaa ana ha pe veɗ. Aŋga kana, aha kəs jə takaa”.

²⁶Amaa bay tata sə, ka vahan, gege: “Nda maŋga mezlər masa suwe va maslamayaɗ! Ka səniya, ya nda meŋgek jene dapa slam masa ya ka sləkaw aabay, meɓəcek jene hay dapa slam masa ya ka kwakwacaw aabay.

²⁷Efes ka pəwa səlay aɗaw ana pa baŋ, pas te mevehek taaɗaw sə, ye te kəsek jeŋ aɗaw ava yam da yaŋ ana”.

²⁸Ke gweɗec ndah maŋga mezlər tata hay mekele, gege: “Makəsan yam ta səlay ta gənaɓ tata temere sə, avəda, mavan kad nda masa aŋga ava yam ta səlay ta gənaɓ bakatar,

²⁹afa kwa waawa masa aŋga ava jene sə, ac ta vana kad yaŋ ana, a da njah dapa mambivaw. Amaa ta nda masa aŋga ava jene aabay sə, kwa mekusetke ana tata ŋgesey, ac ta kəsan avəda.

³⁰Ta nda maŋga mezlər masa a jəna nda aabay nesey sə, makazlaɗ kad a vəda pa ləvaŋ, dərŋga sə, makuɗa hay va mapaɗ zleŋ hay.”»

³¹«Pas masa Wut ta Nda e te vehek dapa mehehəm tata ava maskəla hay fakwanay ava dəɓa tata, ara nesey, a ta njah fa gwadadakw ta bay tata masa aŋga eve mehehəmey.

³²Vavara hay fakwanay ec te kwesek vaw fəma tata, e te vənec ndana hay amta amta ara gwala jene te vənec təmak hay va ɗakw hay.

³³E te peɗec təmak hay a luwa ta zam tata, ɗakw hay a luwa ta gula tata.

³⁴Ara nesey, bay e te gweɗec ndah da ha ta zam tata, gege: “Medekey, akwar ndah maŋgata mapəsma ta Papa, makəsaw ara meven ta ma ta Wunam ta bay masa maləmada kad akwar dəga dapa mezler ta vavara,

³⁵afa mayə ke kəɗiyey, akwar ke viyey jə ta manday. Yam ke kəɗiyey, akwar ke viyey yam ta masay. Ya ka njah məlaŋ, akwar ke kəsiyey kad way takwar.

³⁶Ya ka njah meetersey, akwar ke piyey rəkwat fa vaw, ya ka ŋgə gwabay, akwar ke mbəliyey avəda, ya ka njah dapa daŋgay, akwar ke dek wuzeɗeyey”.

³⁷Ara nesey, ndah maŋga mezlər eve cəvey ana sə, ac ta vahan, gege: “Bay Mazlakava, andə ka walakaa masa mayə a kəɗakaa, andə ka vakaa jə ta manday sə, ewey? Andə ka walakaa masa yam a kəɗakaa, andə ka vakaa yam ka masay sə, ewey?

³⁸Andə ka walakaa masa ka məlaŋ, andə ka kəsakaa sə, ewey? Andə ka walakaa masa ke meetersey, andə ka pakaa rəkwat fa vaw sə, ewey?

³⁹Masa ka gwabay va masa ka dapa daŋgay sə, andə de dey ka ta wuzaɗakaa sə, ewey?”

⁴⁰Bay e te vehecen, gege: “Eve metehwe ana ya gwaɗakwar, jene hay masa akwar te ŋgec cəɗem cəɗem kad nda amta deveŋ ndah aɗaw mekweskwes ana masa ac malama hay, akwa ŋgiya ŋgesey sə, kad yey”.

⁴¹Ava dəɓa ana, bay e te gweɗec ndah da ha ta gula tata, gege: “Madaɓa dəreŋ eve yey, akwar ndah masa Zlav ka gwadarakwar avəda. Madaɗ kad pa kwakwaw masa maləmada katar ka midakw kad bay ta haalay va maskəla tata hay,

⁴²afa mayə ke kəɗiyey, akwar ke viyey jə ta mandə aabay. Yam ke kəɗiyey, akwar ke viyey jə ta masə aabay.

⁴³Ya ka njah məlaŋ, akwar ke kəsiyey aabay. Ya ka njah meetersey, akwar ke piyey rəkwat fa vaw aabay. Ya ka ŋgə gwabay va ya ka njah dapa daŋgay, akwar ke wuzeɗeyey aabay”.

⁴⁴Ara nesey ana, ac may, ac ta vahan kad bay, gege: “Bay Mazlakava andə ka walakaa masa mayə a kəɗakaa, daha aabay yam a kəɗakaa, ka ka njah məlaŋ, ka ka njah meetersey, ka ka ŋgə gwabay, daha aabay ka ka njah dapa daŋgay, andaw ka jənakaa aabay sə, ewey?”

⁴⁵Dapa ŋgesey ana, e te vehecen, gege: “Eve metehwe ana ya gwaɗakwar, cəɗem cəɗem masa akwar ke ŋgec jene hay kad nda amta deveŋ ndah mekweskwes ana hay na aabay sə, akwar ka ŋgaw aabay ana ŋgesey sə, kad yey may.”

⁴⁶Teceŋ sə, ec te dey pa marga masa e te ndəv aabay katar ka midakw. Amaa ta ndah maŋga mezlər ara aŋga ana sə, ec te də pa slam ta manjah katar ka midakw.»