Read Cuvok Mata 27 Bible Online

Mata 27 - Cuvok bible

Mata 27

¹Tedew te pərek ana, mazlakava hay ta ndaakwas hay fakwanay va mesnendə hay te Zuwef hay ac ka cə mamənak ta matəɗana ma yaŋ Yesu ke te kəɗey.

²Ac ka jawa, ac ka hwadan gwevernel Pilatu.

³Zudas, nda mavana Yesu pa ha ta ndana hay sə, a wala masa ac ka təɗana ma yaŋ Yesu ke te kəɗey sə, ka zalda marava. Mafay ana, ke hwedecen yam ta səlay kwakwar mahkar sə, kad bay hay ta ndaakwas hay va mesnendə hay te Zuwef hay.

⁴Ke gweɗ, gege: «Ye ke ŋgə mebərey, afa ya ka husamda nda masa aŋga eve mebər aabay ke te kəɗey.» Amaa ac ka vahan, gege: «Ma taciya dapa aabay, ka ta səniya.»

⁵Ara nesey, ka ŋgəla vaw, ke kuyecen səlay ana faŋga pə Way ta kwakwas, ka data ka ta lawaɗ vaw tata fe wudez, a da məcaɓa.

⁶Bay hay ta ndaakwas hay sə, ac ka hal səlay ana, ec ke gweɗ, gege: «Cəv mava ta macam səlay ana nesey ava səlay ta way ta kwakwas ta Zlav aabay, afa nesey ana sə, səlay te bembez.»

⁷Ava dəɓa ta macə mamənak teceŋ, ac ka husam ley ta nda malama maŋgam ɓa ava səlay ana ka slam ta jəv ta mapəsah macəhwandə ta məlaŋ hay.

⁸Mafay ana, kasl pəsna, aca zal ley ana ŋgesey sə, ley te bembez.

⁹Jeŋ ana e ŋgə ŋgesey sə, ara Zeremi, nda mehwedek ma te gweɗey. Ke gweɗ, gege: «Ac ka kəs yam ta səlay kwakwar mahkar, səlay ana sə, masa Isreyel hay ta piya ka ta husamiya kad aŋga.

¹⁰Aca və səlay ka ta husam ley ta nda malama maŋgam ana sə, ara masa Bay Mazlakava te gweɗiyey.»

¹¹Ac ka zlacaɗ Yesu fəma ta gwevernel Pilatu. Pilatu ana, ka nəkafa, gege: «Ka bay te Zuwef hay sə, tehwe may geyey?» Yesu ka vahan, gege: «Megweɗek nesey sə, kaa.»

¹²Ava dəɓa ana masa bay hay ta ndaakwas hay va mesnendə hay te Zuwef hay aca cafa lalaw sə, kwa ke kezlec pa aabay.

¹³Ara nesey, Pilatu ka nəkafa, gege: «Ka cəna matə yaw hay fakwanay da yaŋ kaa na sə, aabay geyey?»

¹⁴Amaa kwa Yesu ka kazlana pa aabay. Ara nesey, gwevernel Pilatu ka rəzlata gaa da yaŋ ana.

¹⁵Fa macunam ta Pak fakwanay sə, gwevernel ana aŋga masasəraka te mapəla nda amta dapa daŋgay kad a vəda, ara masa miya ta waya.

¹⁶Dapa ŋgesey ana, ndana ɓa dapa daŋgay, mezel Yesu Barabas, aŋga nda masa mezel tata e cen vəla vəla.

¹⁷Pilatu ka nəkafa miya makwasa sə, gege: «Akwa wal ya pəlakwaɗ sə, wa, Yesu Barabas geyey, Yesu nda mezel Kəristi?»

¹⁸E gweɗ ara nesey sə, afa a səniya aca cafa lalaw sə, mafay te səlek.

¹⁹Dapa masa aŋga manjaha ka ta wuzaɗ ma ana sə, ŋgwaza ka zlərafa ndana, ka gwaɗa, gege: «Ke te kezl pə ma ta nda masa aŋga eve mebər aabay ŋga bay, afa teefes ta vaɗ nesey meshwen hay ke kəɗiyey gaa mafay tata.»

²⁰Bay hay ta ndaakwas hay va mesnendə hay te Zuwef hay sə, ece heheɗecen dar ta miya ac da nəkafa Pilatu a da pəla Barabas, a da kəɗa Yesu avəda ka macəhwandaw.

²¹Gwevernel sə, ke nəkefec saya, gege: «Deveŋ ndah ecew nesey sə, akwa wal ya pəlakwaɗ sə, wa?» Ac ka vahan, gege: «Pəla Barabas.»

²²Pilatu ke nəkefec saya, gege: «Na te Yesu mezel Kəristi sə, ya da ŋgana mey?» Ac fakwanay, ac ka vahan, gege: «Daraɗ fa hap mazləlawa!»

²³Ke nəkefec saya jaŋgata, gege: «E ŋgek mambəla ana aabay sə, mey?» Amaa eceŋ sə, aca cə lalaw ava gədaŋ jaŋgata, gege: «Daraɗ fa hap mazləlawa!»

²⁴Pilatu a wala a zlafa meŋgə jene mekele ɓasabay, a wala masa ndana hay aca cə lalaw ava gədaŋ sə, ka kəs yam, ka pana ha tata hay meendey ta miya, ke gweɗ, gege: «Ma aɗaw dapa bembez ta nda ana na aabay, nesey ma takwar!»

²⁵Miya fakwanay, ac ka gwaɗa, gege: «Bembez tata ana de təɗek kad yaŋ andaw va wudeh taciya hay!»

²⁶Ara nesey, Pilatu ke pəlecen Barabas, ke vecen Yesu aca ra kəlapa ava laway va aca ra ta daraɗ fa hap mazləlawa.

²⁷Ava dəɓa ana, kafaraŋ hay te gwevernel ac ka hwadaɗ Yesu pə way ta bay, ec ke zelekec kafaraŋ hay fakwanay kad cak tata.

²⁸Ac ka cəkwan rəkwat tata hay avəda fa vaw, ac ka pana rəkwat ta bay fa vaw.

²⁹Ac ka slaslap mətak hay ara mataɗa ta makəɗ yaŋ ta bay, ac ka pan fə yaŋ. Ac ka vana daŋgwar te ɓəlev pa ha ta zam. Ec ke kekəred fəma tata, ac ka sasarafa, gege: «Anda gwaɗafakaa, bay te Zuwef hay!»

³⁰Ava dəɓa ana, ac ka cəɓafa slesleɓ, ac ka kəsan daŋgwar te ɓəlev sə, avəda dapa ha, ac ka kəɗaw pə yaŋ.

³¹Masa ac ka sasarafa cay sə, ac ka cəkwan rəkwat ta bay hay sə, avəda fa vaw, ac ka pan rəkwat tata hay. Ac ka hwadaw ke te der fa hap mazləlawa.

³²Masa kafaraŋ hay aca hwad Yesu sə, ac ka cə yaŋ ava nda Siren ana ɓa, mezel Simaŋw. Ac ka tatəkaw a da zaɓ hap mazləlawa ta madər Yesu.

³³Aca husa pa slam mezel Gwalgata, ara megweɗey, taɓa ta yaŋ,

³⁴ac ka vana wuzam magaɓa eve jə masa dendərek ɗuzlezlekzlek. Masa Yesu a cakiya sə, ka gwam masiya bay.

³⁵Masa ac ka daraɗ fa hap mazləlawa ana cay sə, ac ka vəna rəkwat tata hay avəda jaka pa makazl siyakw.

³⁶Ac ka njah faŋga, ac ka jəɗaw.

³⁷Da yaŋ yaŋ tata, ac ka vinda ma ta majaw yaŋ tata, mavinda ara nesey: «Nda nesey sə, aŋga Yesu, bay te Zuwef hay.»

³⁸Ndah suwe hay ecew ac madara da cak tata. Nda amta, jaka ha ta zam, nda leŋgeɗey, jaka ha ta gula.

³⁹Ndah medə jaka ava aŋga sə, aca lafiya, aca ɓəla yaŋ,

⁴⁰ece gweɗ, gege: «Kaa sə, ka nda masa ka gwaɗa, ka mbəɗa Way ta kwakwas ta Zlav avəda, ka da lamiya mekele da hwaɗ ta manah mahkar sə, biba? Mbəla yaŋ takaa avəda. Daha kaa sə, ka gwaɗa ka Wut ta Zlavay, bəreŋgek kad fa vara!»

⁴¹Ara aŋga ana, bay hay ta ndaakwas hay, ndah mesesərekecen ma majawa kad ndana hay va mesnendə hay te Zuwef hay ac ka sasarafa, ec ke gweɗ, gege:

⁴²«E mbəlec ndana hay sə, a zlafa mambəl yaŋ tata sabay geyey? Daha aŋga bay te Isreyel hay sə, da bəraŋgakata fa hap mazləlawa ana kad fa vara təlam nesey. Ara nesey, anda kəs ma tata.

⁴³Ka paɗ mawulak yaŋ tata fakwan fa Zlavay. Yaw, Zlavay ana da pəla avəda təlam nesey daha a waya, afa ke gweɗ, gege: “Yey sə, ye Wut ta Zlavay!”»

⁴⁴Ndah suwe hay ecew masa madara da cak tata sə, aca lafiya ara aŋga ana saya may.

⁴⁵Dəga ta yaŋ pas, ləvaŋ ke ŋgey dapa vavara fakwanay kasl fe ler mahkar ta fakwaɗ.

⁴⁶Fe ler mahkar sə, Yesu ka cə lalaw ava gədaŋ, gege: «Eli, Eli, lema sabaktani?» Ara megweɗey «Zlavay aɗaw, Zlavay aɗaw, ke gərdeyey sə, mafay te mey?»

⁴⁷Ndah dərziya faŋga macəna lalaw ana sə, ec ke gweɗ, gege: «Mawala, a zal Eli!»

⁴⁸Faŋga faŋga ana, nda amta deveŋ eceŋ ka hway, ka təkaɗa meŋgel ta matala fa gada, ka jəhwaɓaɗ pa wuzam kwakwiyaŋ, ka talan Yesu a da sasəɓaw.

⁴⁹Amaa ndah dərziya, gege: «Maɓəlakwa, gəla anda walakwaɗ Eli ana e te dekey ka ta mbəla avəda kwa!»

⁵⁰Amaa Yesu sə, ka cə lalaw ava gədaŋ saya, ka məcata.

⁵¹Dapa ŋgesey ana, magambargambar dapa Way ta kwakwas ka ŋgarata dapa ecew, dəga da wudam kasl bəlam. Vavara ka ɓəla vaw, gwadakwam hay ec ke pəɗekeceŋ,

⁵²jav hay ec ke wuneceŋ, ndah ta Zlavay mabay maməca sə, ec ke pərekec dapa maməcay.

⁵³Ec ke dekec kad vəda dapa jəvay. Ava dəɓa te mepərekek te Yesu dapa maməcay sə, ndah ana, ec ke dey e Zeruzelem, pe berne ta Zlavay, ec ke ŋguzdecen yaŋ teceŋ kad ndana hay gaa.

⁵⁴Masa aca wala vavara a ɓəla vaw va jene hay mekele mekele masa ece ŋgey sə, mazlakava ta kafaraŋ hay temere va kafaraŋ hay maɓəla Yesu sə, ac ka ŋgə zidaw macəkuma bay, ec ke gweɗ, gege: «Eve metehwe ana, nda nesey sə, aŋga Wut ta Zlavay.»

⁵⁵Faŋga, ŋgwazah mabay masa ece pə ndey dəreŋ. Ece cəpek Yesu ana dəga de Gelile ka ta ŋgana mezlər hay.

⁵⁶Deveŋ ŋgwaza hay ana sə, Maaray dəm da Magədala, Maaray mamaŋ ta Zak va Zezef va mamaŋ te wudeh te Zebede.

⁵⁷Ta fakwaɗ ana ŋgesey, nda Arimatey ana ɓa, mezel Zezef. Nda ana aŋga eve zleley mabay, masa aŋga may ka tərata ka nda masasəraka jene te Yesu.

⁵⁸Nda ana ke dey vara Pilatu, ka ta nəkafa macəhwandə te Yesu. Ara nesey, Pilatu ka və cəv ta mavan macəhwandaw ana.

⁵⁹Zezef ka kəs macəhwandə te Yesu ana, ka paɗa ava rəkwat waya mambəla ana,

⁶⁰ka hwadaɗ pa jəv tata waya ana masa aŋga ta hwahurkwiya dapa pəra. Ke tetelem beelem mazlakava ana ka ta ɓezl ma ta jəvay ana, ka data.

⁶¹Dapa ŋgesey ana, Maaray da Magədala va Maaray leŋgeɗey ac faŋga, ac manjaha ma maŋgwada kad fa jəvay ana.

⁶²Tedew te pərek ana, ara megweɗey, pas masa a cəp pas maləmad vaw ta pas ta masasak vaw te Zuwef hay, mazlakava ta ndaakwas hay va Farisa hay ec ke dey fa slam ana vara Pilatu,

⁶³ac ka gwaɗa, gege: Bay Mazlakava, anda sənafa ma ta nda maŋgəla ma nesey, afa dapa masa aŋga eve ndey heley sə, ke gweɗ, gege: «Ava dəɓa ta manah mahkar sə, ya ta pərakata dapa maməcay.»

⁶⁴Ara nesey, və cəv ta maɓal jəvay ana kasl fa manah mamahkar ana. Daha aabay sə, ndah masasəraka jene tata ec te dekey, ac ta kəra avəda, ec te gweɗ kad ndana hay, gege: «“Ka pərakata dapa maməcay”. Ara nesey, maŋgal ma mamaɗ yaŋ ana nesey, a ta ŋgata mahwalhwala ana ka fəna maŋgal ma macaaca ana.»

⁶⁵Pilatu gege: «Akwar ava kafaraŋ hay ɓa. Madaɗay! Ma ta jəɗ jəvay ana mambəla ana, ara masa akwar ta waya.»

⁶⁶Ec ke dey ka ta ɓəl jəvay ana ava mandərah beelem dapa ma ta jəvay ana mambəla ana va ava mapə kafaraŋ hay ka ta ɓəliya.