Read Cuvok Mata 8 Bible Online

Mata 8 - Cuvok bible

Mata 8

¹Dapa masa Yesu e bəreŋgek da yaŋ ŋguɗa sə, miya hay gaa ac ka cəpaw.

²Nda meskwelme ana ɓa ka ŋgucafa vaw, ke kekəred fəma tata, ka gwaɗa, gege: «Bay Mazlakava, daha ka waya sə, ka zlafa mepeneyey avəda.»

³Yesu ka talana ha, ka pafa ha, ka gwaɗa, gege: «Ya ka walaw, panaɗay!» Faŋga faŋga ana, ka səɗata dapa meskwelme tata!

⁴Yesu ka gwaɗa, gege: «Pə leŋgesl, ka ta gwaɗan ma ana kwa kad ndana bay. Amaa daɗ ŋguzdan yaŋ takaa kad ndaakwas ta Zlavay, ŋguzdan jə ta kwakwas masa ma majawa ta Muyiz te gweɗey. Faŋga ac ta ŋgat matə yaw da yaŋ kaa, ka masəɗa dapa meskwelme takaa cay.»

⁵Dapa masa Yesu e sehw kad pe berne ta Kafarnahum sə, mazlakava ta kafaraŋ hay temere ka ŋgucafa vaw, ka ŋgana mbahw,

⁶gege: «Bay Mazlakava, nda maŋga mezlərey aɗaw ɓa aŋga manaha da wunam, aŋga mahahalɓa, a sə marga elehey.»

⁷Yesu ka vahan, gege: «Yey sə, ya ta daɗ ka ta mbəliya.»

⁸Mazlakava ta kafaraŋ hay sə, a vahan, gege: «Bay Mazlakava, ya husa masa ke de sehw a way aɗaw sə, aabay, gweɗ ma pal amta war, ara nesey nda maŋga mezlərey aɗaw ana a ta mbəlata.

⁹Yey ava yaŋ taaɗaw ana, kafaraŋ hay ɓa masa ac bay da yaŋ yey, ye cənecen ma. Yey may, kafaraŋ hay mekele ɓa masa ya bay da yaŋ eceŋ, aca cənawa ma. Daha ye gweɗ kad nda amta: “Daɗay” sə, e dey. Daha ye gweɗ kad nda leŋgeɗey: “Dekey” sə, e dekey. Daha ye gweɗ kad ɓeley aɗaw: “Ŋgə mezlər nesey” sə, a ŋgiya.»

¹⁰Masa Yesu a cəna ma ana hay nesey, ka rəzlata macəkuma bay, ke gweɗec ndah macəpiya, gege: «Ya gwaɗakwar, kwa ya ka ŋgat tərsam ta makəsparav ara nesey da vara nda Isreyel ana sə, aabay.

¹¹Ya gwaɗakwar, ndana hay gaa ec te dek jaka bəlam va jaka ma ta wudam ka ta ndə ɗaf ta macunam ava Abəraham, Izak va Zakwab dapa Wunam ta bay da baymaləvaŋ hay.

¹²Amaa ta ndah masa aca wulakiya ma ta cama Wunam ta bay eceŋ sə, ac te kezleɗec a vəda pa ləvaŋ meɓekɓek ana. Faŋga sə, makuɗa hay va mapaɗ zleŋ hay.»

¹³Yesu ka gwaɗa bay ta kafaraŋ hay temere sə, gege: «Daɗ kad a wunam! E de ŋgey ara masa ka ta kəsiya dapa rav takaa.» Faŋga faŋga ana, nda maŋga mezlər sə, ka mbəlata.

¹⁴Ara masa Yesu e sehw kad way te Piyer, a wala mamaŋ ta ŋgwaza manaha, kwakwaw fa vaw.

¹⁵Ka pafa ha fa ha tata, kwakwaw sə, həl! A həla ma, ŋgwaz sə, ke zleftek, ka vana jə ta manday.

¹⁶Ta fakwaɗ ana ŋgesey, ac ka hwadana ndana hay mabay masa ac ava damkwaw hay dapa yaŋ. Ka mbas mesfen hay ava ma tata masa aŋga ta gwaɗiya va membəl ndah gwabay hay fakwanay,

¹⁷afa a da ŋgata ara masa Izay, nda mehwedek ma zleezle ke gweɗ, gege: «Ka kəsa vaw tandakwa maməca avəda, ka zəɓa mehecey tandakwa hay avəda.»

¹⁸Masa Yesu a wala miya mabay da cak tata sə, ke və cəv kad ndah masasəraka jene tata ta madaɓa kad a luwa leŋgeɗey te təker mazlakava.

¹⁹Nda amta deveŋ ndah mesesərekecen ma majawa kad ndana hay ɓa, ka ŋgucafa vaw, ka gwaɗa, gege: «Nda masasəraka nda, ya ta cəpakaa kwa pa slam wula wula masa ke te dey.»

²⁰Yesu ka gwaɗa, gege: «Gwebegwebekw hay ac ava veɗ teceŋ, ɗiyak hay da baymaləvaŋ ac ava way teceŋ. Amaa Wut ta nda sə, kwa slam kusetke kad aŋga ta masasak vaw sə, aabay.»

²¹Nda mekele amta deveŋ ndah masasəraka jene tata ka gwaɗa, gege: «Bay Mazlakava, viyey cəv ye te pəsehek papa avəda ɗagay.»

²²Amaa Yesu ka gwaɗa, gege: «Cəpiyey, gərdec ndah maməca aca ra pəsah ndah tec maməca.»

²³Yesu ke tep pa kaslkaslah, ndah masasəraka jene tata ac ka cəpaw.

²⁴Dapa masa ece dey, bərgadaŋ mazlakava ana ke ŋgə da yaŋ yam mafayakfayak ana, meŋgeŋgel ta yam hay ec ke beŋgeɗey kad yaŋ kaslkaslah ana kasl pa masəratiya. Dapa ŋgesey ana, Yesu a njawaŋ.

²⁵Ndah masasəraka jene tata ac ka ŋgucafa vaw, ac ka pəraka eve megweɗey: «Bay Mazlakava, mbəlandakwa avəda, bəna anda zakwa.»

²⁶Yesu gege: «Akwa lel sə, mafay te mey, akwar ndah masa makəsparav pahata?» Ara nesey, ke zleftek, ke ɓeɓəcec memeɗ hay va yam. Faŋga faŋga ana, jene hay fakwanay ec ke njehec teete.

²⁷Ndana hay ec ke rəzleceŋ, ec ke gweɗ, gege: «Gwalaha! Nda ana na aŋga wa, afa kwa memeɗ hay va yam aca cənan ma?»

²⁸Ara masa a husa a luwa leŋgeɗey te təker mazlakava, pa vavara te Gederen hay, ndana hay ɓa ecew ac ava damkwaw hay dapa yaŋ, ece dek kad a vəda dapa jəv hay kad vara vaw. Aca ŋgə zidaw kad ndana macəkuma bay, kwa ndana mazlafa medə jaka pe cəvey ana ŋga aabay.

²⁹Aca cə lalaw, gege: «Ka wal fandaw mey, Wut ta Zlavay? Ke dek kad fana sə, ka ta ŋgadandaw marga wagaa pas ana e de husek geyey?»

³⁰Faŋga ana, bakw te vetem hay mabay ɓa, ac zəŋgaɗa eve eceŋ, ac dapa manday.

³¹Damkwaw hay sə, ac ka ŋgana mbahw Yesu, gege: «Daha ka wal mambəsandaw sə, zləraɗandaw pa bakw te vetem hay antisey.»

³²Yesu gege: «Madaɗay!» Ec ke dec a vəda, ec ke sehwec pe vetem hay. Ara nesey, bakw te vetem hay sə, ec ke tetelem da ma ta mazaŋgalaŋ kad pa yam mafayakfayak ana, ec ke zec dapa yam ana.

³³Gwala vetem hay mahway kad pe berne, ece kərecen maɗay da yaŋ vetem hay ana fakwan kad ndana hay va ma da yaŋ ndah masa ac ava damkwaw hay dapa yaŋ.

³⁴Ara nesey, ndah dapa berne sə, ece dek kad vara Yesu. Masa aca wala sə, aca ŋgana mbahw da daɓa dapa vavara teceŋ.