Read Cuvok Markwas 1 Bible Online

Markwas 1 - Cuvok bible

Markwas 1

¹Nesey, mezler ta Labara mambəla ana da yaŋ Yesu Kəristi, Wut ta Zlavay[1]

²Labara ana sə, e zler ara Izay, nda mehwedek ma zleezle ka vindaw dapa ɗelewer tata, gege: «Zlav ke gweɗ, gege: “Wala, ya zləraɗ maslaŋ aɗaw kad fəma takaa, a da ləmadakaɗ cəvey”.

³Ndana ɓa ka tal ma dapa yaŋ ta səɓak, gege: “Maləmadan cəv ta Bay Mazlakava, maləmada cəvey ana mambəla ana nduwak.”»

⁴Ara nesey, Zaŋ Baatis ke təhek dapa yaŋ ta səɓak, ka bəzad ma kad ndana hay da yaŋ beetem ta maŋgwad rav, afa aca ra ŋgat mapal mebərey.

⁵Ndah dapa wunam hay va berne hay mekele mekele masa dapa vavara te Zudey va ndah dapa berne te Zeruzelem, ec ke dey kad vara vaw, ac ka ŋguzdan mebər teceŋ. Zaŋ Baatis ke ŋgec beetem da wayam te Zurdeŋ.

⁶Zaŋ a pə fa vaw tata sə, rəkwat te ŋgwec ta zlagumay[2] ŋgwah tata majawa ava ɗuweŋ ta mbal. A ndə sə, yakw hay va ŋgbam de ley.

⁷Ke bəzedec ma ta Zlavay kad ndana hay, gege: «Ava dəɓa aɗaw sə, nda mefəniyey ɓa e te dekey. Ya husa mezeŋgə fəma tata ka ta pəl ɗuweŋ ta tahkar tata hay bay.

⁸Yey sə, ya ŋgakwar beetem ava yam, amaa ta nda ana sə, a ta ŋgakwar beetem eve Mesfen Mavəna.»

⁹Dapa pas ana ŋgesey, Yesu ke zleftek de Nezeret, dapa vavara te Gelile. Ka husa vara Zaŋ da wayam te Zurdeŋ, Zaŋ ana ka ŋgana beetem.

¹⁰Dapa masa Yesu e beŋgeɗek yaŋ dapa yam ana kad a vəda sə, faŋga faŋga ana, ka wala slam da wudam paŋ! E wuney, Mesfen Mavəna ke bəreŋgek kad a yaŋ ana ara mahwɗagwam.

¹¹Ka cəna uway e gweɗek da wudam, gege: «Kaa sə, ka wat aɗaw masa ya waya elehey, ye wesl da yaŋ kaa[3]»

¹²Faŋga faŋga ana, Mesfen Mavəna ka tatəkaɗ Yesu pə yaŋ ta səɓak.

¹³Dapa manah kwakwar faɗ, aŋga dərŋga deveŋ jə te ley hay. Faŋga, Saadan ka wal mafəciya, amaa ka zlafa aabay. Ava dəɓa ana, maskəla hay ac ka ŋgana mezlərey.

¹⁴Ava dəɓa ana, ac ka kazlaɗ Zaŋ Baatis pa daŋgay, Yesu ke dey pa vavara te Gelile. Dərŋga, ka bəzad Labara mambəla ana masa e dek da vara Zlavay kad ndana hay, gege:

¹⁵«Pas ana ka ŋgata cay, Meŋgə bay ta Zlavay sə, aŋga hukw cay! Maŋgwada rav takwar, makəs Labara mambəla ana.»

¹⁶Yesu ke dey a ma te təker mazlakava te Gelile, ka wala ndah matəhaza kəlef, Simaŋw va malamaŋ Endəre, aca kazl səfa teceŋ hay kad pa yam.

¹⁷Yesu ke ŋgucefec vaw, gege: «Medek, mecəpiyey. Akwar sə, ndah matəhaza kəlef hay, amaa təlam nesey, ya ta tərakwar avəda ka ndah mezelekec ndana hay.»

¹⁸Faŋga faŋga ana, ac ka gərda səfa tec hay, ac ka cəp Yesu.

¹⁹Medə te Yesu kad fəma kusetke, ke welec Zak va malamaŋ Zaŋ, wudeh te Zebede. Ac dapa kaslkaslah[4] aca ləmad səfa tec hay.

²⁰A faŋga ana, Yesu ke zeleceŋ. Zak va malamaŋ Zaŋ sə, ac ka gərda papaŋ tec Zebede dapa kaslkaslah ana ava ndah maŋga mezlərey, ac ka cəp Yesu.

²¹Ava dəɓa ana, Yesu va ndah masasəraka jene tata ec ke dey pe berne ta Kafarnahum. Pas ta masasak vaw, Yesu ke sehw pə Way ta macə mbahw te Zuwef hay. Dapa faŋga, ke sesərekeceŋ, ke bəzedec ma ta Zlavay.

²²Ndah macəkafa zləmay ec ke rəzlec da yaŋ mesesərek tata, afa mesesərekey ana sə, ara ta ndah mesesərekecen ma majawa kad ndana hay bay. E sesərekec sə, ara nda masa aŋga ava gədaŋ ta masasərak nda.

²³Faŋga faŋga, ndana ɓa aŋga ava damkwaw dapa yaŋ, ke sehw kad pə Way ta macə mbahw te Zuwef hay ana, ka cə lalaw ava gədaŋ, gege:

²⁴«Yesu nda Nezeret, ka wal fa andaw damkwaw hay mey? Ke dek sə, ka ta zandaw geyey? Ya səniya eve metehwe ana, kaa sə, ka maslaŋ ta Zlavay masa aŋga te zlərek ke te ŋgə mezlər tata!»

²⁵Yesu ka ɓaɓəca damkwaw dapa yaŋ ta nda ana, ka gwaɗa, gege: «Ɓəzla ma, daɓa dapa nda nesey!»

²⁶Damkwaw sə, ka kakaslda nda ana ava gədaŋ, ka data kad a vəda ava macə lalaw.

²⁷Ndah dapa way ana faŋga fakwanay ec ke rəzleceŋ, ac ka nəkaw dapa taɓa teceŋ, gege: «Gwalaha! Maŋgata mey? Mesesərekey ana na waya lakwa? Nda ana na aŋga ava gədaŋ mabay. Kwa e gweɗec kad damkwaw hay sə, aca cənan ma!»

²⁸Faŋga faŋga ana, mezel te Yesu ke cen vəla vəla fakwanay dapa vavara te Gelile.

²⁹Yesu ka data dapa Way ta macə mbahw te Zuwef hay da Kafarnahum sə, kad a way te Simaŋw va Endəre. Ece də ava Zak va Zaŋ.

³⁰Mamaŋ ta ŋgwaz ta Simaŋw, vaw a haca, aŋga manaha, kwakwaw fa vaw mabay. Mahusa te Yesu pə way ana, ndana hay ac ka gwaɗan ma da yaŋ mehecey ta ŋgwaz ana kad Yesu faŋga faŋga ana.

³¹Yesu ka ŋgucafa vaw, ka təhazan ha, ka baŋgaɗa. Kwakwaw fa vaw tata sə, ndeŋ! A həla ma. Ŋgwaz ana, ke vec jene ta manday.

³²Ta fakwaɗ, ava dəɓa te mekezl ta pas kad a way sə, ndana hay ec ke hwedek ndah masa ac eve mehecey hay va ndah masa ac ava damkwaw hay fakwanay kad vara Yesu.

³³Ndah dapa berne ana fakwanay, ac ka ɓəca vaw fəma ta way ana.

³⁴Yesu ke mbəlec ndana hay mabay dapa mehecey hay mekele mekele. Asaya, e mbesec damkwaw hay gaa. Kwa ke vec cəv kad damkwaw ana hay aca ra gweɗey sə, aabay, afa aca səniya, Yesu sə, aŋga wut ta Zlavay.

³⁵Tedew te pərek ana slamɓal sə, Yesu ke zleftek, ke də pə yaŋ ta səɓak ka ta cə mbahw dərŋga.

³⁶Simaŋw va ndah masa aca ŋgway fa slam ana sə, ac ka yahaw.

³⁷Masa ac ka ŋgata avəda cay sə, ac ka gwaɗa, gege: «Ndana hay fakwanay aca yahakaa.»

³⁸Amaa Yesu gege: «Amcakwa kad pa slam hay mekele masa zef, afa ye de bəzedec Labara mambəla ana may. Afa mehwedekiyey sə, mezlərey ana nesey.»

³⁹Ara nesey, ke dey, ka bəzad Labara mambəla ana dapa way ta mabəzad ma te Zuwef hay dapa vavara te Gelile fakwanay dərŋga. Ke mbesec damkwaw hay dapa ndana hay.

⁴⁰Nda meskwelme ana ɓa ke dek kad vara Yesu, ke kekəred fəma tata, ka ŋgana mbahw, gege: «Daha ka waya sə, peneyey avəda dapa meskwelme aɗaw.»

⁴¹Metekwen ka ŋgana Yesu fətiya. Mafay ana, ka tal ha tata, ka pafa ha, ka gwaɗa, gege: «Ya ka walaw, panaɗay.»

⁴²Faŋga faŋga ana, meskwelme fa vaw ta nda sə, ɓasabay, ka panata.

⁴³Ava dəɓa ana, Yesu ka gwaɗa da daɓa kad a wunam, amaa wagaa a ta gwaɗa da daɓa kad a wunam sə, ka ɓabəca ɗagay,

⁴⁴ka gwaɗa, gege: «Pə leŋgesl, ka ta ŋguzda jə masa ya ta ŋgə ŋgakaa nesey kwa kad ndana bay. Amaa daɗ a vara ndaakwas ta Zlavay, da wuzaɗakaa ɗagay. Ava dəɓa ana, vana jene ta kwakwas kad Zlavay ara Muyiz te gweɗey. Ara nesey ac ta ŋgat matə yaw da yaŋ kaa.»

⁴⁵Amaa aŋga sə, ke dey fəma ta way fəma ta way, ka gwaɗ labara ana ava gədaŋ kad ndana hay fakwanay masa Yesu ta ŋgiya. Mafay ana, Yesu ka zlafa mesehw pe berne meendey ta ndana hay ɓasabay, afa ndana hay ac ke kwesek vaw kad cak tata mabay. Ara nesey, Yesu ke dey, ka njah pa slam masa aŋga amta. Ava aŋga ana fakwanay, ndana hay ec ke dek vəla vəla kad vara vaw.