Read Cuvok Markwas 10 Bible Online

Markwas 10 - Cuvok bible

Markwas 10

¹Yesu ke zleftek da Kafarnahum, ke dey pa vavara te Zudey jaka luwa leŋgeɗey ta wayam te Zurdeŋ. Ndana hay ec ke kwesek vaw gaa kad vara vaw saya. Ke sesərekec ndana hay ara aŋga ta ŋgiya cəɗem cəɗem.

²Farisa hay dərziya ac ka ŋgucafa vaw ka ta cakiya. Ac ka nəkafa, gege: «Ma tandakwa majawa ka vana cəv kad ndana da mbasana ŋgwaza da way geyey?»

³Yesu ke vehecen ava manək ma, gege: «Muyiz a sasərakakwaɗ ma hay majawa sə, wula?»

⁴Farisa ana hay ac ka vahan, gege: «Muyiz ke gweɗ, gege: “Daha nda masa a wal mambasana ŋgwaza sə, a da vindana ɗelewer te membesey ana pa ha ɗagay, ava dəɓa ana, a zlafa mambasana da way[17]”»

⁵Yesu gege: «Masəna, Muyiz a vindakwar ma majawa ana ara nesey sə, afa rav takwar masasala elehey.

⁶Dapa mezler te jene hay fakwanay sə, Zlav ka lam jene hay fakwanay, ava dəɓa ana, ka lam “mawal va ŋgwaz”.

⁷Mafay ana, “Mawal a gərda papaŋ va mamaŋ ka ta cam vaw ava ŋgwaza.

⁸Ac ecew ɓasabay, aca tərata ka nda amta”. Ara nesey, ac ta njah ka ndah ecew ɓasabay, amaa aca tərata ka nda amta.

⁹A lada ndana a ta vəna jə masa Zlav ka cama sə, bay.»

¹⁰Da wunam, ndah masasəraka jene ac ka nəkafa saya da yaŋ ana.

¹¹Yesu gege: «Nda masa ka mbasana ŋgwaza da way, a kəs ŋgwaz mekele sə, ŋgesey, a kəs vaw fa zaŋ ana ava ŋgwaza macaaca ana.

¹²Ara aŋga ana, ŋgwaza hay, daha ŋgwaz masa ka gərda mawula, a daɓa a dara nda mekele sə, ŋgwaz ana ŋgesey, e ŋgə kəs vaw fa zaŋ ana.»

¹³Ndana hay ec ke hwedek wudeh teceŋ kad vara Yesu e de pec ha yaŋ, e de pəsefec ma. Amaa ndah masasəraka jene ec ke peyefeceŋ.

¹⁴Masa Yesu a wala sə, rav ka zəmana mabay. Mafay ana, ke gweɗec ndah masasəraka jene tata sə, gege: «Megərdec wude hey, ece re dek kad vereyey! Akwa derecen ma bay, afa Wunam ta bay ta Zlavay sə, mapa kad ndah masa ac ara eceŋ.

¹⁵Ya gwaɗakwar, daha nda masa ka kəs Wunam ta bay ta Zlavay ara wat aabay sə, e te sehw pa aabay.»

¹⁶Yesu ka humbar wudeh sə, pa ha tata, ke pec ha yaŋ, ke pəsefec ma.

¹⁷Masa Yesu e zleftek dapa slam ana, a ta daɓa kad pa slam mekele sə, ndana ɓa ke hwek kad vara vaw, ke kekəred fəma tata, ka nəkafa, gege: «Nda masasəraka nda, nda mambəla ana, ye de ŋgə ɓa sə, mey masa ya da ŋgat manjah katar ka midakw?»

¹⁸Yesu ka vahan, gege: «Ke zeliyey nda mambəla ana sə, mafay te mey?» Nda mambəla ana sə, Zlav pal amta, bəna ndana mekele aabay.

¹⁹Ma hay ta ma majawa sə, ke sənec geyey? Ka ta kəɗ ndana cukw cukw bay, ka ta kəs vaw fa zaŋ ana bay, ka te kər bay, ka ta tə yaw ava maŋgal ma da yaŋ ndana bay, ka ta pərasl jene ta ndana ava gədaŋ bay, nahan yaŋ kad papakw va mmakw.

²⁰Nda sə, ka vahan, gege: «Nda masasəraka nda, ma majawa hay fakwan nesey sə, ye sənec ava yaŋ dəga ya dapa wat heley.»

²¹Yesu ka ndandazla nda ana ava mawal vaw, mafay ana, ka gwaɗa, gege: «Magəra jene pal amta ɓa te meŋgey da varakaa. Daɗ ta husamda jene hay takaa fakwanay, ke de vənecen səlay ana kad maslamarga hay. Daha ka ka ŋgaw ara nesey sə, ka ta ŋgat zleley hay gaa da baymaləvaŋ. Ava dəɓa ana, dekey, cəpiyey.»

²²Masa nda ana a cəna ara nesey sə, kusaf! Ka məcan vaw avəda, ndey tata ka ŋgwadata. Ka gərda Yesu, ka data, afa aŋga eve zleley mabay, a wal maviya kad ndah mekele bay.

²³Yesu ke njer ava zlalav, ke gweɗec ndah masasəraka jene tata, gege: «Gədaŋ dapa kad ndah masa ac eve zleley hay te mesehw pa Wunam ta bay ta Zlavay.»

²⁴Ndah masasəraka jene ece rəzl da yaŋ ma ana hay. Amaa Yesu e gweɗec saya, gege: «Wude hey aɗaw, gədaŋ dapa te mesehw kad pa Wunam ta bay ta Zlavay[18]

²⁵Gədaŋ dapa kad zlagumay[19] te mesehw jaka pe veɗ te leper[20] Amaa gədaŋ dapa mafəna ana saya kad nda eve zleley de sehw pa Wunam ta bay ta Zlavay.»

²⁶Ndah masasəraka jene tata sə, ec ke rəzlec mafəna ana saya, ec ke gweɗ dapa taɓa tec, gege: «Yaw, daha ara nesey sə, ma te mbəl wa?»

²⁷Mafay ana, Yesu ke njerefeceŋ, gege: «Membəl dapa mebərey sə, ŋgesey jə masa ndana a zlafa maŋgiya bay. Amaa kad Zlavay sə, jene mafəna fa gədaŋ aabay, afa aŋga ava gədaŋ te meŋgə jene hay fakwanay.»

²⁸Piyer ka gwaɗa Yesu, gege: «Wala, taciya sə, andə ka gərda jene hay fakwanay ka ta cəpakaa.»

²⁹Yesu ka vahan, gege: «Ya gwaɗakwar eve metehwe ana, daha ndana ka gərda way tata, malamaŋ hay, dəmaŋ hay, mamaŋ, papaŋ, wudiya hay va ley tata hay mafay taaɗaw va mafay ta mabəzad Labara mambəla ana sə,

³⁰nda ŋgesey, a ta ŋgat jene hay mafəna ana, a ŋgə dəɓa temere kad yaŋ jene hay masa aŋga te gərdeceŋ dapa manjah tata dapa vavara. Ara megweɗey, a ta ŋgat way hay, malamaŋ hay, dəmaŋ hay, mamaŋ hay, wude hey va ley hay mekele mekele mabay saya. Dapa ŋgesey ana, ndana hay ac ta ŋgafa suwe mabay mafay taaɗaw. Ava dəɓa te mendəv ta vavara sə, a ta ŋgat manjah katar ka midakw saya.

³¹Yaw, deveŋ ndah mama gaa makəsa ma aɗaw masa ac ɓa təlam nesey, ac te vehec kad ava dəɓa. Asaya, deveŋ ndah ava dəɓa təlam nesey sə, ndana hay gaa ac te njehec mama.»

³²Yesu va ndah macəpiya ac dapa cəv te medə kad Zeruzelem. Yesu sə, ke dey fəma ta ndah masasəraka jene tata hay. Ndah masasəraka jene tata ana sə, rav e təɗeceŋ, afa aca səniya, ac ta ŋgada hahar kad Yesu de Zeruzelem ana, amaa e dey kad arŋga ana suwar. Ndah macəpiya sə, zidaw ke kəɗeceŋ. Mafay ana, Yesu ke zelec ndah masasəraka jene tata kuraw dapa yaŋ ana ecew, ke gweɗecen ma da yaŋ jene hay masa ac ta ŋgatafa de Zeruzelem.

³³Ke gweɗ, gege: «Macak zləmay, aŋga nesey anda dakwa kad Zeruzelem. Dərŋga sə, ac ta paɗ Wut ta nda pa ha ta mazlakava hay ta ndaakwas hay va ndah mesesərekecen ma majawa kad ndana hay. Ac ta təɗana ma yaŋ te mekəɗ cukw cukw, ac ta paɗ pa ha ta ndah masa aca sən Zlav bay.

³⁴Ndah ana ŋgesey, ac ta sasarafa, ac ta cəɓafa slesleɓ, ac ta kəlapiya ava laway, ava dəɓa ana, ac ta kəɗa avəda cukw cukw. Amaa ava dəɓa ta manah mahkar sə, a ta pərakata dapa maməcay.»

³⁵Ava dəɓa ana, Zak va Zaŋ, wudeh te Zebede ac ka ŋgucafa vaw Yesu, ac ka gwaɗa, gege: «Nda masasəraka nda, anda wal manəkafakaa jene amta ɓa ka da ŋgandanay.»

³⁶Yesu ke nəkefec, gege: «Akwar wal ya da ŋgakwar sə, mey?»

³⁷Ac ka vahan, gege: «Anda wal pas masa ka ta njah fa slam ta bay takaa sə, mbahw vandaw cəvey ta manjah dapa slam te mehehəm takaa, nda amta a da njah da ha ta zam, nda leŋgeɗey a da njah da ha ta gula takaa.»

³⁸Amaa Yesu gege: «Akwa sən manək jene bay. Akwa zlafa maɓas marga hay masa ya ta ɓəsiya geyey? Asaya, akwa zlafa matal yaŋ pe beetem ta marga hay masa ya ta tal yaŋ aɗaw pa geyey?»

³⁹Ac ka vahan, gege: «Aŋga, anda zlafa.» Yesu gege: «Eve metehwe ana, akwar ta ɓəs marga hay masa ya ta ɓəsiya. Asaya, akwar ta tal yaŋ pe beetem ta marga hay masa ya ta tal yaŋ kad pa.

⁴⁰Amaa, ya zlafa makəs mawulak yaŋ ta manjahaɗ ndana a ha ta zam, daha aabay a ha ta gula aɗaw bay. Slam ta manjahay ana ŋgesey, maləmada sə, kad ndah masa Zlav ke yeheɗec ha.»

⁴¹Ava dəɓa ana masa ndah masasəraka jene dərziya kuraw ac ta cəna ma ana sə, rav ke hecec mabay da yaŋ Zak va Zaŋ.

⁴²Mafay ana, Yesu ke zelec ndah masasəraka jene tata fakwanay kad cak tata, gege: «Akwa səniya deveŋ ndah ta vavara nesey sə, bay hay ɓa. Bay ana hay aca ŋgə bay da yaŋ ndana hay sə, ava gədaŋ. Asaya, ndah mazlakava leŋgeɗ hay ac ŋgə bay da yaŋ ndana hay eve cəvey ana aabay.

⁴³Amaa a lada dapa taɓa takwar sə, de ŋgə ara na bay. Yaw, daha ndana deveŋ akwar a wal manjah ka nda mazlakava sə, a da njah ka nda maŋga mezlər takwar.

⁴⁴Asaya, daha ndana deveŋ akwar a wal manjah fəma ta ndana hay sə, da njah ke ɓel takwar fakwanay.

⁴⁵Masəna, Wut ta nda e dek kad pa vavara sə, ndana hay aca ra ŋgana mezlər bay. Amaa e dek sə, e de ŋgec mezlər kad ndana hay, e de və mesfen tata ke te mbəlek ndana hay gaa dapa mebərey.»

⁴⁶Yesu va ndah masasəraka jene tata aca husa pe berne te Zeriku. Masa Yesu, ndah masasəraka jene tata va ndah macəpiya gaa ec ke dek kad a vəda dapa berne ana, ac ka ŋgat nda mahazlaw ana ɓa, aŋga da ma te cəvey, e rəkey. Nda ana, mezel Bartimey wut te Timey.

⁴⁷Masa a ta cəna anjəkar Yesu, nda Nezeret ana te dey jaka pe cəvey ana sə, ka cə lalaw ava gədaŋ, gege: «Yesu wut te Deevet, mbahw ŋgefiyey metekweney, jəniyey!»

⁴⁸Ndana hay gaa ac ka payafa nda mahazlaw ana, ac ka wal a da njaha teete. Amaa nda sə, ka cə lalaw ava gədaŋ jaŋgata, ke gweɗ, gege: «Wut te Deevet, mbahw ŋgefiyey metekweney!»

⁴⁹Yesu ke zlecey, ke gweɗec ndana hay, gege: «Mezelek nda ana.» Ec ke zelek nda ana, ac ka gwaɗa, gege: «Təhaza rav, zlecey, Yesu a zalakaa.»

⁵⁰Ara nesey, ka kazlda gwedurey tata, ke zleftek, ke teteley kad vara Yesu.

⁵¹Yesu ka nəkafa, gege: «Ka wal ya da ŋgakaa sə, mey?» Nda mahazlaw sə, ka vahan, gege: «Bay aɗaw, ya wal ya da wala ndey saya.»

⁵²Yesu ka gwaɗa, gege: «Təlam nesey, daɗay! Makəsparav takaa ka mbəlakaa avəda.» Faŋga faŋga ana, ndey tata sə, pəlac a wunata, a wala ndey mambəla ana ara macaaca ana, ka cəp Yesu dapa cəvey.