Read Cuvok Markwas 11 Bible Online

Markwas 11 - Cuvok bible

Markwas 11

¹Yesu va ndah masasəraka jene tata ac mbala zef eve berne te Zeruzelem. Masa aca husa zef ava wunam hay ɓa mezel Betfazey va Betani da rav ta ŋguɗa ta Awliviyey hay, Yesu ka zlarda ndah ecew deveŋ ndah masasəraka jene tata kad fəma teceŋ.

²Ke gweɗ, gege: «Madaɗay kad pa wunam fəma takwar antisey. Daha akwar ka husata cay sə, akwar ta ŋgat wut ta zaŋgwa masa ndana ke tep a fətiya aabay heley majawa. Mepəlekey, mehwedekendey.

³Yaw, daha ndana ka nəkafakwar, gege: “Akwa pəl zaŋgwa ana kad ma sə?” Magwaɗa, “Bay Mazlakava a waya, e te vehek avəda təlam nesey ana.”»

⁴Ec ke dey, ac ka ŋgatafa wut ta zaŋgwa sə, majawa dapa cəv fa ma ta way da vəda. Ac ka pəlaw.

⁵Ndah dərziya deveŋ ndana hay faŋga ɓa, ec ke nəkefec, gege: «Akwa mbahana wut ta zaŋgwa mey? Akwa pəliya kad ma?»

⁶Ndah masasəraka jene sə, ec ke vehecen ma ana ara masa Yesu te gweɗeceŋ. Ndah ana ec ke gərdeceŋ aca ra daɗ ava aŋga.

⁷Ec ke hwedek wut ta zaŋgwa sə, kad Yesu, ac ka caɗ rəkwat fa dəɓa ta zaŋgwa ana. Yesu ke tep a yaŋ ana.

⁸Ndana hay gaa ac ka caɗ rəkwat teceŋ pe cəvey, ŋgeɗ hay ec ke gumek ha te wudez hay de ley ac ka ɗaɗəpaɗ pe cəvey ana may.

⁹Ndah dərziya ec ke dey fəma te Yesu, leŋgeɗ hay ac ava dəɓa tata. Ac fakwanay ac ka cə lalaw, gege: «Mahahəmakwa Zlavay! A lada Bay Mazlakava da pəsafa ma nda masa e dek eve mezel tata nesey!

¹⁰A lada Zlav da pəsafa ma bay masa a ta njah pa slam ta bay Deevet, papaŋ ta papaŋ tandakwa zleezle. Mahahəmakwa Bay Zlav da wudam!»

¹¹Yesu a husa pe berne te Zeruzelem, ke sehw kad pə Way ta kwakwas, ka wuzaɗa jene hay dapa fakwanay. Ava dəɓa ana, ac ka data ava ndah masasəraka jene tata kuraw dapa yaŋ ana ecew kad Betani, afa pas ɓasabay.

¹²Tedew te pərek ana, Yesu va ndah masasəraka jene tata ec ke zleftek da Betani. Dapa medə teceŋ dapa cəvey sə, may ka kəɗa Yesu.

¹³Yesu ka wala maftay ɓa, maɗa degəzle-zleɓzleɓ. Ke dey a cakiya, ka wulakaw gəla wudiya ana fətiya ɓa kwa. Amaa a ta ŋgatafa sə, gamslak ana war, wudiya ana fətiya aabay, afa kiya te mehey tata bay heley.

¹⁴Mafay ana, Yesu ka gwadara avəda, ka gwaɗa maftay ana, gege: «A lada wudez ana na da hayə wat sabay katar ka midakw!» Masa e gweɗ ara nesey sə, ndah masasəraka jene tata ac ka cəna ma ana.

¹⁵Masa Yesu va ndah masasəraka jene tata aca husa e Zeruzelem, ece sehw pə way ta kwakwas. Dapa way ana faŋga, ke ŋgetefec ndana hay ac ŋgə luma teceŋ. Mafay ana, ke mbəsec ndah mahusamda jene hay va ndah mahusama jene hay dapa way ana faŋga kad a vəda. Ke bəzlemecen slam ta ndah mayambaɗ səlay va slam ta manjah ta ndah mahusamda mahwɗagwam hay kad fa vavara.

¹⁶Yesu ke və cəv kad kwa waawa masa a da ŋgway eve jene hay wula wula dapa zaŋ ta way ta kwakwas ana sə, aabay.

¹⁷Ava dəɓa ana, ke sesərekec ndana hay, gege: «Mavinda dapa Ɗelewer mavəna Zlav ke gweɗ, gege: “Way aɗaw sə, way masa ndah dapa vavara hay fakwanay aca ra cəyey mbahw dapa”. Amaa takwar sə, akwa təraɗ way ana ka bədam ta makar hay!»

¹⁸Bay hay ta ndaakwas hay va ndah mesesərekecen ma majawa kad ndana hay ac ka cəna ma ana ara, ac ka yah cəvey ka ta kəɗ Yesu ka macəhwandaw. Amaa ece lel fətiya, afa ndana hay fakwanay ac ke rəzleceŋ fe mesesərek tata mabay.

¹⁹Ta fakwaɗ ana ŋgesey, Yesu va ndah masasəraka jene tata ac ka data dapa berne te Zeruzelem ana.

²⁰Tedew te pərek ana saya, Yesu va ndah masasəraka jene tata ec ke veh jaka pe cəv masa ece dek kad Zeruzelem jaka vaŋga sə, ac ka ŋgatafa maftay masa Yesu ta gwadariya sə, ka kulata ava slaslalay ana fakwanay.

²¹Piyer sə, a sənafa ma da yaŋ maftay masa Yesu ta gwadariya, ka gwaɗa Yesu ana, gege: «Nda masasəraka nda, wala maftay masa ka ta gwadariya taavanay sə, ka kulata fakwanay.»

²²Yesu gege: «Makəs ma ta Zlavay pa rav takwar.

²³Ya gwaɗakwar, akwa zlafa magwaɗa kwa kad wudam nesey, “Zleftek fana, te kezl pa yam mafayakfayak ana”. Daha akwar ava mawulak yaŋ ecew ecew da yaŋ ana aabay, amaa daha akwar ka kəsaw dapa rav takwar, jeŋ ana a ŋgata sə, jeŋ ana a ta ŋgata eve metehwe ana.

²⁴Mafay ana, ya gwaɗakwar: “Daha akwa nək jene da vara Zlavay dapa macə mbahw takwar. Akwar ka kəsaw dapa rav takwar Zlav a ta vakwar jeŋ ana sə, a ta vakwar eve metehwe ana, kwa akwa nəkafa jene wula wula”.

²⁵Yaw, daha akwa cə mbahw, amaa rav a hacakwar da yaŋ ndana ka ŋgakwar jə masa e teh bay ɓa sə, mapəlan mebər ta nda ana avəda, afa Papaŋ takwar da baymaləvaŋ da pəlakwaɗ mebər takwar hay masa akwar ta ŋgiya sə, may. [

²⁶Amaa daha akwa pəl mebər ta ndana aabay sə, ŋgesey, Papaŋ takwar da baymaləvaŋ a ta pəlakwaɗ mebər takwar hay masa akwar ta ŋgiya sə, aabay may.»]

²⁷Yesu va ndah masasəraka jene tata ec ke veh kad Zeruzelem saya. Masa Yesu a ŋgway dapa Way ta kwakwas, bay hay ta ndaakwas hay, ndah mesesərekecen ma majawa kad ndana hay va mesnendə hay te Zuwef hay ec ke dey kad vara vaw.

²⁸Ac ka nəkafa, gege: «Magwaɗaka ŋgec jeŋ ana hay nesey sə, wa? Mavakaa gədaŋ te meŋgec jeŋ ana hay wa?»

²⁹Yesu ke vehecen, gege: «Yey ava manək ma aɗaw pal amta ɓa kad varakwar may. Daha akwar ke veheken avəda sə, ya ŋguzdakwaɗ nda meviyey cəv te meŋgec jeŋ ana hay nesey fakwan may.

³⁰Yaw, mezlərek Zaŋ Baatis ke te ŋgec beetem kad ndana hay sə, wa? Zlav geyey, ndana hay? Maŋguzdawa!»

³¹Dapa ŋgesey ana, ndah sə, ac ka cə mamənak dapa taɓa teceŋ, gege: «Ma da vahan kad pa sə, gwagumaw? Daha anda gwaɗakwa, “Mezlərek sə, Zlavay”, a ta gwaɗandakwa, gege: “Naa akwa kəs ma ta Zaŋ Baatis ana bay sə, mafay te mey?”

³²Amaa daha anda gwaɗakwa: “Mezlərek sə, ndana hay”, ndah makwasa da cak tandakwa fana ac ta kəs ma ana aabay.» Yaw, ndah ana, aca ŋgə zidaw fa ndana hay mabay sə, afa ndana hay fakwanay aca səniya, Zaŋ Baatis sə, aŋga nda mehwedek ma.

³³Mafay ana, ac ka gwaɗa Yesu, gege: «Anda səniya bay.» Yesu ke vehecen, gege: «Yaw, daha ara nesey sə, ya may, ya ŋguzdakwaɗ nda meviyey cəv te meŋgə jeŋ ana hay nesey sə, aabay may.»