Read Cuvok Markwas 13 Bible Online

Markwas 13 - Cuvok bible

Markwas 13

¹Masa Yesu e dek kad a vəda dapa Way ta kwakwas sə, nda amta deveŋ ndah masasəraka jene tata ka gwaɗa, gege: «Nda masasəraka nda, wala Way ta kwakwas nesey! Tərsam ta way malama eve kekeŋ mambəla ana ara na ɓa sə, fəla!»

²Yesu ka vahan, gege: «Ka wala way malama mazlakava ana na biba? Kwa kekeŋ e te zek da yaŋ kekeŋ amta aabay, fakwanay ac ta pəlahata.»

³Ara masa aŋga manjaha fa ŋguɗa ta Awliviyey hay, ndey maŋgwada kad fa Way ta kwakwas. Piyer, Zak, Zaŋ va Endəre ac babəla teceŋ da cak tata, ac ka nəkafa, gege:

⁴«Ŋguzdandanay, jeŋ ana hay ara nesey sə, ac ta ŋgə ewey? Andaw da sən pas ana ka husakata cay sə, fe mey hay mey?»

⁵Yesu ke kətec ndah masasəraka jene tata, gege: «Mep leŋgesl fa ndah ma ta fəcakwar.

⁶Masəna, ndana hay gaa ac te dekey eve mezeley aɗaw, kwa waawa e te gweɗ, gege: “Yey sə, ye Kəristi”. Ac ta fəcaɓa ndana hay gaa.

⁷Pas masa akwar ta cəna labara ta vəram hay mezef ana ava akwar va masa ece ŋgə dəreŋ ava akwar sə, akwar te lel bay, afa jeŋ ana hay ŋgesey, cama ec te ŋgec ɗagay. Amaa ŋgesey ana sə, mendəv ta vavara bay heley.

⁸Masəna, wunam ŋgeɗey ac ta ŋgə vəram ava wunam leŋgeɗey. Bay ŋgeɗey a ta yahafa ma bay leŋgeɗey. Vavara a ta ɓəla vaw dapa slam hay mekele mekele. Mayə e te ŋgey dapa vavara fakwanay. Jeŋ ana hay ac te ŋgey ara mehec te meheyey masa a zlara kad ŋgwaz ava hwaɗ, ara megweɗey, ŋgesey sə, mendəv ta vavara bay heley, amaa mezlerey ana ɗagay.»

⁹Yesu ke gweɗec saya, gege: «Akwar sə, mep leŋgesl fə yaŋ takwar, afa ndana hay ac ta hwadaɗakwar pa slam ta mambaɗ ma hay, ac ta kəlapakwar dapa Way ta macə mbahw te Zuwef hay. Ac ta hwadaɗakwar fəma te gwevernel hay va fəma ta bay hay mafay taaɗaw. Ara nesey, akwar ta tə yaw da yaŋ yey fəma teceŋ.

¹⁰Afa a lada Labara mambəla ana da yaŋ yey da bəzadata kad ndah dapa vavara hay fakwan ɗagay.

¹¹Pas masa ac ta təhazakwar, ac ta hwadakwar pa slam ta mambaɗ ma hay sə, akwar ta ŋgə zidaw da yaŋ ma hay masa akwar te gweɗec bay. Amaa, magwaɗ ma masa Zlav ta wunakwaɗ te megweɗ pəsaŋga ana ŋgesey, afa ma ana hay ŋgesey sə, ec te dek da varakwar bay, amaa da vara Mesfen Mavəna.

¹²Dapa pas ana hay ŋgesey, ndana a ta vana malamaŋ avəda ka te kəɗ ka macəhwandaw. Papaŋ te wude hey ac ta ŋgiya ara ŋgesey ana ava wudeh teceŋ may. Wude hey ac te ŋgwedefec dəɓa papaŋ va mamaŋ tec hay may, ec te venec avəda pa ha ta ndana hay ece re kəɗec avəda cukw cukw.

¹³Ndana hay fakwanay ac ta walakwar fe ndey bay mafay taaɗaw. Amaa nda masa ka ɓəsa marga ana hay avəda kasl pe mendəvey ana sə, Zlav a ta mbəla avəda.»

¹⁴Yesu ke gweɗec saya, gege: «Daha pas ana ka ta husakata cay sə, akwar ta wala nda masa aca zaliya, “Nda magədasa jene va meŋgə jene hay masa e teh fa yam te ndey ta ndana hay bay”, aŋga manjaha fa slam ta manjah tata bay. [A lada nda majaŋga labara ana nesey, da pə leŋgesl fa ma ana.] Ara nesey, ndah masa ac dapa vavara te Zudey aca ra hwaɓa ke te reɓ pa wudam hay.

¹⁵Kwa nda masa a sasak vaw da vəda sə, e te sehw kad a way ke te kəsek jene dapa kad a vəda bay.

¹⁶Kwa nda masa aŋga de ley sə, e te veh kad a wunam ke te kəsek rəkwat tata bay.

¹⁷Dapa pas ana hay ŋgesey saya, wabaw a yaŋ ŋgwazah ava hwaɗ va ŋgwazah masa wedeh tec hay aca sə wa heley.

¹⁸Macə mbahw kad Zlavay, manəkafa, a lada jeŋ ana hay ŋgesey ac de ŋgə fa kiya masa e teh bay bay[21]

¹⁹afa dapa pas ana hay ŋgesey, marga hay mabay ec te ŋgedec hahar kad ndana hay. Dəga dapa mezler ta vavara masa Zlav te lemek jene hay fakwanay kasl pəsna sə, ndana ka wala marga ana hay ara ŋgesey aabay heley. Asaya, marga masa e de dek mafəna ŋgesey ana sə, ɓasabay.

²⁰Daha Bay Zlav ka wakafa pas ana hay aabay sə, ndana me te zek eve ndey sə, aabay. Amaa a wakafa pas ana hay sə, mafay ta ndah masa aŋga te peleɗec ha kad aŋga.

²¹Mafay ana, daha ndana a gwaɗakwar, gege: “Kəristi sə, aŋga kana” daha aabay “Menjerey, aŋga katay”, akwar ta kəs ma ana bay.

²²Ya gwaɗakwar ara nesey sə, afa ndah mapana yaŋ tec ka Kəristi va ndah mapana yaŋ tec ka ndah mehwedek ma ec te dekey. Ac ta ŋgə cah hay mekele mekele masa e de ŋguzdek gədaŋ teceŋ ka ta fəc ndana hay ava aŋga. Daha ac ta zlafa sə, kwa ndah masa Zlav ke peleɗec ha ka ndah tata hay sə, ece re fəcec avəda may.

²³Akwar sə, mep leŋgesl, afa ya ka sləfakwaɗ ma da yaŋ jeŋ ana hay fakwan cay.»

²⁴Yesu ke gweɗ saya, gege: «Amaa dapa pas ana hay ŋgesey, ava dəɓa ta marga meŋgedec hahar kad ndana hay sə, Pas e te weɗ ɓasabay, kiya a te weɗ ɓasabay,

²⁵Menjewzle hay ec te kwiyekec da wudam kad fa vara, gədaŋ hay mazlakava da baymaləvaŋ fakwanay ac ta ɓəla vaw.

²⁶Ava dəɓa ana, ndana hay ac ta wala, Wut ta nda e dek dapa zlav ta yam ava gədaŋ mazlakava va dapa membeɗ tata meendey ta ndana hay fakwanay.

²⁷Pəsaŋga ana ŋgesey, ye te zlərek Maskəla aɗaw hay kad dərgazlav hay faɗanay ke te kwesekec ndah masa ye te peleceŋ ka ndah taaɗaw hay.»

²⁸Yesu gege: «Macak zləmay mambəla ana fa ma masa ya ta cacalakwaɗ ava maftay. Dapa masa akwa wala gamslak ta maftay a ɗə gulaf gulaf sə, ŋgesey akwa səniya, kiya te medə kad e ley aŋga hukw cay.

²⁹Ara aŋga ana, daha akwa wala jene hay masa ece ŋgey ara ya ta gwaɗakwar nesey, ŋgesey, masəna sə, Wut ta Nda aŋga hukw te mevehek cay may.

³⁰Ya gwaɗakwar, jene hay masa ya ta gwaɗakwar fakwanay nesey sə, ec te ŋgec kamma fa ndah dərziya ta pəsna wagaa ac ta məcay.

³¹Masəna mambəla ana, jene hay da baymaləvaŋ va dapa vavara ec te ndəveceŋ, amaa ma aɗaw sə, e te ndəv aabay, a ta njah katar ka midakw.»

³²Yesu ke gweɗec saya, gege: «Jeŋ ana hay masa ac te ŋgə fakwanay nesey sə, ndana ma ta səna pas ana aabay, kwa ler ana aabay. Kwa maskəla hay masa ac manjaha cəɗem cəɗem da cak ta Bay Zlav da wudam, aca səniya bay, kwa Wut ta Nda, a sən pas ana bay may, amaa masən pas ana sə, Zlav Papaŋ pal aŋga amta.

³³Mafay ana, mep leŋgesl, akwar ta njawaŋ bay, afa akwa sən pas ana masa e te husek bay.

³⁴Pas ana e te ŋgə sə, ara ndana te dey kad maŋgway. Nda ana a ta daɓa sə, ke mbəɗec ma kad ndah maŋga mezlər tata hay, ka vana mezlər kad kwa waawa te meŋgey. Ka gwaɗa nda ma ta ɓəla way ana, gege: “Njah eve ndey, ka ta njawaŋ bay.”»

³⁵«Mafay ana, mep leŋgesl, manjah eve ndey, afa akwar sən pas masa bay ta way ana e te vehek da maŋgway tata bay. Gəla e te vehek sə, ta fakwaɗ, gəla ta yaŋ ta vaɗ, gəla ta slamɓal masa balaŋgwaz a ŋgal uway, daha aabay, gəla te pərek ana sə, akwa səniya bay.

³⁶Daha ye te vehek hukw sə, ya wal ya da ŋgatafakwar dapa waŋ bay.

³⁷Ma masa ya gwaɗakwar nesey sə, ye gweɗ na kad ndana hay fakwanay, manjah eve ndey, akwar ta njawaŋ bay.»