Read Cuvok Markwas 15 Bible Online

Markwas 15 - Cuvok bible

Markwas 15

¹Te pərek ana, mazlakava hay ta ndaakwas hay, mesnendə hay, ndah mesesərekecen ma majawa kad ndana hay va ndah maca mamənak te Zuwef hay fakwanay ac ka kwas vaw ka ta cə mamənak da yaŋ Yesu. Ava dəɓa ana, ac ka jawa Yesu, ac ka hwadaɗ vara gwevernel Pilatu faŋga.

²Gwevernel Pilatu sə, ka nəkafa Yesu, gege: «Kaa sə, ka bay te Zuwef hay tehwe may geyey?» Yesu ka vahan, gege: «Ara megweɗ takaa ana.»

³Bay hay ta ndaakwas hay sə, ac ka ŋgəlafa ma hay mekele mekele, kad yaŋ Yesu.

⁴Mafay ana, gwevernel Pilatu ka nəkafa saya, gege: «Ke vehecen ma ana kad ndah megweɗ da yaŋ kaa nesey sə, aabay war geyey?»

⁵Amaa Yesu ke vehecen ma ana aabay. Ara nesey, Pilatu ka rəzlata mabay da yaŋ ana.

⁶Fa mavay fa mavay, pas macunam ta Pak te Zuwef hay sə, Pilatu a pəla nda dapa daŋgay amta masa miya ta waya.

⁷Dapa pas ana hay ŋgesey, ndana ɓa mezel Barabas, aŋga dapa daŋgay ava ndah maŋgaŋgəra bay, ac ka kəɗaɓa ndana cukw cukw dapa meŋgə gada.

⁸Ndah makwasa sə, ec ke dey kad pa ma ta way te gwevernel ka ta nəkafa e de pəlec nda amta dapa daŋgay ara masa aŋga a ŋgiya fa mavay fa mavay.

⁹Pilatu ke vehecen, gege: «Akwa wal sə, ya pəlakwaɗ bay te Zuwef hay sə, geyey?»

¹⁰E gweɗec ara nesey sə, afa bay hay ta ndaakwas hay ece hwedek Yesu kad vara vaw sə, mafay te səlek.

¹¹Amaa bay hay ta ndaakwas hay sə, ec ke heheɗecen dar ta miya, aca ra nəkafa e de pəlecen Barabas.

¹²Pilatu ke nəkefec saya, gege: «Naa akwa wal ya da ŋgana nda masa akwa zaliya bay te Zuwef hay sə, melemey?»

¹³Ac ka cə lalaw saya, gege: «Daraɗ fa hap mazləlawa!»

¹⁴Pilatu sə, ke nəkefec, gege: «Jə masa e ŋgek mambəla ana aabay sə, wula?» Ac ka cə lalaw ava gədaŋ, gege: «Daraɗ fa hap mazləlawa!»

¹⁵Gwevernel Pilatu a wal mewesldec ndana hay, mafay ana, ke pəlecen Barabas dapa daŋgay. Ke gweɗec kafaraŋ hay aca ra kəlapa Yesu ava laway. Ava dəɓa ana te mekəlepey, ke vecen Yesu sə, pa ha teceŋ aca ra ta daraɗ fa hap mazləlawa.

¹⁶Kafaraŋ hay ac ka hwadaɗ Yesu pa zaŋ ta way te gwevernel, ara megweɗey way ta bay. Ec ke zelekec kafaraŋ hay dərziya fakwanay kad faŋga.

¹⁷Ac ka pana rəkwat ta bay gagaza ana fa vaw. Ac ka təkaɗan yaŋ ava maslalba ta mətak maslasləpa ana.

¹⁸Ac ka gwaɗafa, gege: «Anda gwaɗafakaa, bay te Zuwef hay!»

¹⁹Ac ka kəɗaw pay ava gada te ɓəlev pa taɓa ta yaŋ. Ac ka cəɓafa slesleɓ, ec ke kekəred fəma tata, ac ka nahda yaŋ kad fa vara.

²⁰Ava dəɓa ta masa ac ka sasarafa cay sə, ac ka cəkwan rəkwat ta bay gagaza sə, avəda fa vaw, ac ka pan rəkwat tata. Ec ke dek kad avəda, ac ka hwadiya ke te dər fa hap mazləlawa.

²¹Simaŋw, nda Siren ɓa, aŋga papa tec Alekzandərus va Rufuz. E dek de ley jaka vaŋga. Kafaraŋ hay ac ka tatəkiya a da zəɓ hap mazləlawa ta madər Yesu.

²²Ac ka hwadaɗ Yesu pa slam mezel Gwalgata, a wal megweɗey, taɓa ta yaŋ.

²³Ac ka wal mavana wuzam magaɓa eve menjev mezel mir, amaa Yesu ka walaw aabay.

²⁴Ava dəɓa ana, ac ka daraɗ fa hap mazləlawa, ac ka kazlə siyakw ta mavən rəkwat tata hay, aca ra səna meven ta ma ta rəkwat tata masa kwa waawa da ŋgatiya.

²⁵Aca dər Yesu sə, fe ler cuɗ te pərek.

²⁶Fa karkaslah te meŋguzdek majaw yaŋ tata te mekəɗ ka macəhwandaw, ac ka vindaɗ ma ɓa ara nesey: «Bay te Zuwef hay.»

²⁷Dapa slam masa aca dər Yesu faŋga sə, ac ka daraɗ makar hay ecew ɓa a cak tata. Nda amta aŋga da ha ta zam tata, nda leŋgeɗey aŋga da ha ta gula tata. [

²⁸Jeŋ ana ka ŋgata ara mavinda dapa Ɗelewer mavəna, gege: «Aŋga maŋgəfa deveŋ ndah makəɗa nda.»]

²⁹Ndah medə jaka pa slam ana ŋgesey ac ka sasarafa, ac ka ɓəla yaŋ, ac ka lafaw, gege: «Ee! Kaa sə, ka nda megweɗ ka ta mbəɗa Way ta kwakwas ta Zlav avəda ka da lamiya dapa manah mahkar sə, biba?

³⁰Mbəla yaŋ takaa avəda, ke de bəreŋgek fa hap ana kad fa vara.»

³¹Asaya, bay hay ta ndaakwas hay va ndah mesesərekecen ma majawa kad ndana hay ac ka sasarafa, ec ke gweɗ dapa taɓa tec, gege: «Ndah dərziya hay sə, a zlafa membəleceŋ, na yaŋ tata sə, a zlafa membəliya bay geyey?

³²Daha aŋga Kəristi, nda masa Zlav ta piya ka bay te Isreyel hay sə, de bəreŋgek fa hap ana təlam nesey, andə da wala, andə da kəsiya may!» Ndah mazləlalwa fa hap hay da cak tata sə, ac ka lafaw ara aŋga ana may.

³³Ta yaŋ ta pas, ləvaŋ ke ŋgey dapa vavara fakwanay. Ləvaŋ ana ka njah mabay kasl fe ler mahkar ta fakwaɗ.

³⁴E zler fe ler mahkar ana ŋgesey, Yesu ka cə lalaw ava gədaŋ, gege: «Eluwa, Eluwa, Lama sabaktani?» Ara megweɗey: «Zlavay aɗaw, Zlavay aɗaw, ke gərdeyey sə, mafay te mey?»

³⁵Ndah dərziya faŋga ac ka cəna macə lalaw tata ana, ec ke gweɗ, gege: «Mawala a zal Eli!»

³⁶Nda amta deveŋ eceŋ ka hway ka ta jəhweɓek jene ara gagəmay pa wuzam kwakwiyaŋ[23]. Ka təkaɗaɗ fəma ta gada, ka talan Yesu a da sasəɓiya eve megweɗ, gege: «Ɗagay gwalaha, anda ra walakwaɗ gəla daha Eli ana e dekey, ke te bəreŋgek avəda fa hap mazləlawa ana kwa!»

³⁷Amaa Yesu ka cə lalaw ava gədaŋ, ka məcata.

³⁸Dapa Way ta kwakwas, magambar gambar ta mar slam ta manjah ta Zlav ɓa. Maməc te Yesu sə, magambar gambar ana ka caɗata paa, dapa ecew, dəga da wudam kasl fa vara.

³⁹Mazlakava ta kafaraŋ hay ta Rawma mazlaca fəma te Yesu ana, ka wala masa Yesu a məcay meendey tata, ke gweɗ, gege: «Eve metehwe ana, nda nesey sə, aŋga Wut ta Zlavay.»

⁴⁰Ŋgwazah ɓa faŋga may, ac mazlaca dəreŋ, ece pə ndey. Eceŋ ana sə, Maaray da Magədala, Salawmey, Maaray mamaŋ tec Zuzes va Zak wat gawla.

⁴¹Ŋgwaza hay ana sə, ac ka ŋgway ava Yesu dapa masa aŋga de Gelile, ac ka ŋgana mezlərey. Dapa slam masa aca dar Yesu fa hap mazləlawa ana sə, ŋgwazah mekele hay gaa ɓa faŋga ana may. Ŋgwaza hay ana sə, ac ke də ava Yesu fa slam ana kad a Zeruzelem.

⁴²Pəsaŋga ana ŋgesey sə, pas masa Zuwef hay aca ləmad vaw kad pa pas ta masasak vaw. Ta fakwaɗ ana ŋgesey, Zuwef hay ac ka zlara masasak vaw cay.

⁴³Ndana ɓa da gəva ta Arimatey mezel Zezef, aŋga nda amta deveŋ mazlakava ta ndah maca mamənak te Zuwef hay. Aŋga nda masa ndana hay aca wal makəs ma tata mabay. A ɓal Meŋgə ta Zlavay da yaŋ ndah tata. Ka təhaza rav, ke dey kad vara Pilatu, a wal a da vana cəvey ke te bəreŋgek slaw ta vaw te Yesu ke te pəsehey.

⁴⁴Pilatu ka rəzlata da yaŋ masa a cəna Yesu ka məcata zef ara nesey. Mafay ana, ka zal mazlakava ta kafaraŋ tata hay, ka nəkafa, maməc te Yesu sə, ka njah gaa cay geyey?

⁴⁵Masa Pilatu ka nəkafa mazlakava ta kafaraŋ tata hay cay sə, ka vana cəv kad Zezef a ra ta kəs macəhwandə ana.

⁴⁶Zezef sə, ka husam rəkwat məsle ana mambəla ana. Ke bəreŋgek slaw ta vaw te Yesu sə, avəda fa hap mazləlawa kad fa vara. Ka paɗa ava mataɗa ana, ka hwadaɗ pa jəvay. Jəvay ana sə, mahwahurkwa dapa kekeŋ. Ka tatalam beelem mazlakava ana ka ta ɓazl ma ta jəvay ana.

⁴⁷Maaray da Magədala va Maaray mamaŋ te Zuzes sə, ac faŋga, aca pə ndey kad pa jəv masa aca paɗ Yesu pa.