Read Cuvok Markwas 16 Bible Online

Markwas 16 - Cuvok bible

Markwas 16

¹Ava dəɓa ta pas ta masasak vaw te Zuwef hay sə, Maaray da Magədala, Maaray mamaŋ ta Zak va Salawmey, ac ka husam mal hay masa mezekey ana mambəla ana, ka ta kucafa Yesu dapa jəvay.

²Ta slamɓal te pərek, pas ta luma ta məzam, masa mbala pas e te dek kad a vəda sə, ec ke dey kad pa jav te Yesu.

³Ec ke gweɗ dapa taɓa tec, gege: «Ma da tatalamandankwaɗ beelem mazlakava da ma ta jəvay ana sə, wa?»

⁴Ac ta pə ndey sə, ac ta wala kwa beelem sə, matatalama avəda ava zlalav.

⁵Ec ke sehw pa jəvay ana, ac ka wala wat gawla ɓa manjaha da ha ta zam teceŋ, aŋga ava rəkwat məsle ana fa vaw, ac ka ŋgə zidaw mabay.

⁶Amaa nda sə, ke gweɗec, gege «Akwa ŋgə zidaw bay! Akwa yah Yesu, nda Nezeret masa ac ta dariya fa hap mazləlawa sə, geyey? Ka pərakata dapa maməcay, aŋga fana ɓasabay. Mawala slam masa ac ta nahaɗ fətiya.

⁷Təlam nesey sə, madaɗ ma ta gwaɗa Piyer va ndah masasəraka jene tata dərziya sə, Yesu aŋga sem fəma takwar e Gelile. Akwar ta ŋgatafa dərŋga ara masa aŋga ta gwaɗakwar.»

⁸Ec ke dec kad a vəda, ec ke hweyec dəreŋ ava jəvay ana, afa ke kekeslədeceŋ va ke dəŋgezlecen yaŋ mabay. Ac ka gwaɗ ma ana kwa kad ndana aabay, afa zidaw ke kəɗeceŋ.

⁹Te pərek ana, pas ta luma ta məzam, ava dəɓa te mepərek te Yesu dapa jəvay sə, ka ŋguzdan vaw kad Maaray da Magədala, ŋgwaz masa aŋga ta mbasan damkwaw hay tasəla dapa yaŋ tata.

¹⁰Ŋgwaz ana ke dey ke te ŋguzdecen ma ana kad ndah maŋgway ava Yesu. E ŋgetefec aca kuɗa, afa rav e təɗeceŋ.

¹¹Maaray sə, ke gweɗec, gege, «Yesu aŋga eve ndey, ya ka wala.» Dapa masa aca cəna ma ana ara nesey sə, kwa ac ka kəsaw aabay.

¹²Ava dəɓa ana, Yesu ke ŋguzdecen vaw eve cəv mekele kad ndah masasəraka jene tata ecew dapa cəv te medek dapa berne te Zeruzelem kad pa wunam hay dapa səɓak.

¹³Ec may, ec ke vehekey, ec ke ŋguzdecen labara ana kad ndah masasəraka jene dərziya. Amaa ndah masasəraka jene dərziya sə, ac ka kəs labara ana bay jaŋgata. [

¹⁴Ava dəɓa ana, masa ndah masasəraka jene kuraw dapa yaŋ ana amta aca ndə ɗaf sə, Yesu ke ŋguzdecen vaw. Ke peyefeceŋ mafay ta masa aca gwam ka kəs ma tata zef bay va mafay ta masa rav tec masasala, afa ac ka kəs ma ta ndah mawala eve ndey teceŋ masa aŋga ka pərakata dapa maməcay sə, bay.

¹⁵Ke gweɗ, gege: «Madaɗay pa vavara fakwanay, ma ta bəzad Labara mambəla ana kad ndana hay fakwanay.»

¹⁶Nda masa ka kəsaw sə, a ta ŋgat beetem, a ta mbəlata. Amaa nda masa ka kəsaw aabay sə, Zlav a ta təɗana ma yaŋ.

¹⁷Mawala jene hay masa ec te ŋguzdekec ndah masa ec te kəsiyey. Ac te mbesec damkwaw hay eve mezeley aɗaw, ac ta gwaɗ ma ta wunam hay mekele mekele masa aca səniya bay.

¹⁸Ac ta təhaz zezekw hay ava ha, kwa ndana hay ec te dedənec eve menjevey sə, jene ma te ŋgec aabay. Ac ta pə ha teceŋ a yaŋ ndah gwabay hay, ndah ana hay ac te mbəleceŋ.] [

¹⁹Masa Bay Mazlakava Yesu ka ndəvda megweɗecen ma hay fakwanay kad ndah masasəraka jene tata sə, Zlav ka kəsaw kad baymaləvaŋ a cak tata. Dərŋga sə, Yesu manjaha da ha ta zam ta Zlavay.

²⁰Ndah masasəraka jene tata sə, ec ke dey vəla vəla fakwanay, ac ka bəzad Labara mambəla ana kad ndana hay. Bay Mazlakava Yesu ke ŋgə mezler eve eceŋ va meŋguzdek mabəzad ma teceŋ ana masa aŋga tehwe sə, jaka pe meŋgə cah hay mekele mekele.]