Read Cuvok Markwas 2 Bible Online

Markwas 2 - Cuvok bible

Markwas 2

¹Yaw, manah kusetke ava dəɓa ana, Yesu ka vahata pe berne ta Kafarnahum, ndana hay ac ka səna avəda aŋga da wunam.

²Mafay ana, ndana hay ec ke kwesek vaw mabay, kwa slam kusetke ɓasabay, kwa fəma ta way da vəda, slam ɓasabay. Yesu ke bəzedec ma ta Zlavay.

³Ndana hay ɓa faɗ ac ka hwadana nda mahahalɓa ana.

⁴Amaa ac ka ŋgat cəv ta mahwadiya kad fəma te Yesu aabay, afa miya elehey. Mafay ana, ec ke tep a yaŋ way, ac ka pəzakw yaŋ ta way ana derre ava slam masa Yesu aŋga dapa. Ac ka bəraŋgaɗ nda mahahalɓa sə, fəma tata, nda ana aŋga manaha da yaŋ lambaŋ, macakiya ana hay faɗ majawa ava ɗuweŋ.

⁵Masa Yesu a ta wala makəsparav ta ndah ana hay sə, ka gwaɗa nda mahahalɓa sə, gege: «Wat aɗaw mebər takaa hay mapəla.»

⁶Ndah dərziya mesesərekecen ma majawa ta Muyiz kad ndana hay ac faŋga, ac ka wulakaw, gege:

⁷«Nda ana e gweɗ ara nesey sə, mafay te mey? A ŋgə sə, a Zlavay. Mazlafa mapəla mebər ta ndana sə, Zlav pal aŋga amta, bəna wa?»

⁸Faŋga faŋga ana, Yesu ka səna mawulak yaŋ tec sə, avəda, ke nəkefec, gege: «Akwa wulakiya dapa rav takwar ara nesey sə, mafay te mey?

⁹Ma masa gədaŋ dapa aabay te megweɗ kad nda mahahalɓa sə, wula: “Mebər takaa hay mapəla” geyey, daha aabay: “Zleftek kəs lambaŋ takaa, daɗay”?

¹⁰Yaw masəna, Wut ta nda aŋga ava gədaŋ ɓa ta mapal mebər ta ndana hay dapa vavara.» Ara nesey, Yesu ka gwaɗa nda mahahalɓa sə, gege:

¹¹«Ya gwaɗakaa: “Zleftek, kəs lambaŋ takaa, daɗ kad a wunam.”»

¹²Faŋga faŋga ana, nda sə, pərtakaɗ! E zleftek meendey ta ndana hay fakwanay, ka kəs lambaŋ tata, ka data kad a wunam. Mafay ana, ac fakwanay, ec ke rəzlec macəkuma bay, ac ka hahəm Zlavay, ec ke gweɗ, gege: «Jeŋ ana hay ara nesey sə, andə ka walakwaɗ dapa manjah tandakwa aabay!»

¹³Yesu ke veh saya a ma te təker mazlakava te Gelile. Miya hay gaa ec ke dey kad vara vaw, ke sesərekec ma ta Zlavay.

¹⁴Dapa maŋgway tata ana sə, a ta wala Levi wut ta Alfey manjaha dapa way ta macəkal budaw hay, e ŋgə mezlərey. Yesu ka gwaɗa, gege: «Dek, cəpiyey.» Levi ke zleftek, ka cəpaw.

¹⁵Ava dəɓa ana kusetke, Yesu ke dey ka ta ndə ɗaf da way te Levi ana. Ndah macəkala budaw va ndah maŋga mebər hay sə, ac ka ndə ɗaf ava Yesu va ndah masasəraka jene tata fa slam ana, afa macəpa Yesu ɗahw sə, tərsam ta ndana hay ara ŋgesey.

¹⁶Yaw, ndah mesesərekecen ma majawa kad ndana hay masa deveŋ Farisa hay ac ka wala Yesu a ndə ɗaf ava ndah maŋga mebər hay va ndah macəkala budaw. Mafay ana, ec ke gweɗec ndah masasəraka jene tata, gege: «Bay takwar a ndə ɗaf ava ndah macəkala budaw va ndah maŋga mebər hay sə, mafay te mey?»

¹⁷Yesu a ta cəna ma ana sə, gege: «Ndah masa ac werwer sə, ma tec ava daɓtar aabay, amaa manəka daɓtar sə, ndah gwabay hay. Masəna, ndah mapana yaŋ teceŋ ka ndah mambəla ana fa yam te ndey ta Zlavay sə, Zlav ke zlərekiyey ke te zelec aabay, amaa e zlərekiyey sə, ka ta zal ndah maŋga mebər hay.»

¹⁸Pas leŋgeɗ ɓa, Ndah masasəraka jene ta Zaŋ Baatis va Farisa hay aca ŋgə dalyama. Ndah mekele ec ke dey, ac ka nəkafa Yesu, gege: «Ndah masasəraka jene ta Zaŋ Baatis va ta Farisa hay aca ŋgə dalyama sə, ta ndah masasəraka jene takaa aca ŋgiya aabay sə, mafay te mey?»

¹⁹Yesu ke vehecen ava ma maɗəva, gege: «Ndah mazala kad pa macunam ta madəmay sə, aca ŋgə dalyama pəsaŋga ana geyey? Eve metehwe ana, e ŋgə aabay. Dapa masa makəsa madəmay aŋga verec heley sə, aca ŋgə dalyama aabay.

²⁰Amaa, pas ana masa ec te kəsecen makəsa madəm avəda sə, dapa ŋgesey ana ac ta ŋgə dalyama.»

²¹«Ndana a zlafa maɗapaɗ rəkwat mava fa rəkwat waya bay. Daha rəkwat ana maɗapa ara nesey sə, rəkwat waya a nasa rəkwat mava avəda, meŋgerey ana e dey fəma fəma.

²²Asaya, ndana a zlafa maɗahaɗ wuzam dedeɗek pa bakatar te kwenekwene hay[5] mava ana bay. Daha maɗaha dapa ara nesey sə, wuzam dedeɗek[6] sə, e ɓəsley, a təha bakatar ana hay mava sə, avəda. Ara nesey, wuzam va bakatar ana ec te neseceŋ. Da lada sə, ndana a ɗah wuzam dedeɗek sə, pa bakatar te kwenekwene hay waya ana may!»

²³Pas ta masasak vaw ɓa, Yesu va ndah masasəraka jene tata ec ke dey jaka pe ley te bəley. Dapa medə teceŋ, ndah masasəraka jene tata ac ka paslə jeŋ ana da ma te cəvey.

²⁴Farisa hay ac ka gwaɗa Yesu, gege: «Wala jə masa ndah masasəraka jene takaa ta ŋgiya pas ta vaw, ma majawa ka və cəv aabay!»

²⁵Yesu gege: «Akwar ka jaŋgaw masa Deevet ta ŋgiya dapa masa a hwar jene, may ka kəɗa, aŋga va ndah masa ece ŋgə mezlər aŋga sə, aabay geyey?

²⁶Dapa pas ana hay ŋgesey, Abiyatar aŋga mazlakava ta ndaakwas hay. Ɗaf hay masa mava kad Zlavay sə, kwakwas ana a və cəv ta mandiya sə, kad ndah maŋga kwakwas ta Zlav babəla. Amaa Deevet ke sehw pə way ta Zlavay ka ndaw ɗaf ana, ke vec kad ndah masa ac ava aŋga sə, may.»

²⁷Yesu ke gweɗec saya, gege: «Zlav a paɗ pas ta masasak vaw sə, mafay ta ndana bəna, ndana mapa mafay ta pas ta masasak vaw bay.

²⁸Ara nesey, Wut ta nda aŋga bay kwa da yaŋ pas ta masasak vaw.»