Read Cuvok Markwas 3 Bible Online

Markwas 3 - Cuvok bible

Markwas 3

¹Ava dəɓa ana, Yesu ke veh kad pə Way ta macə mbahw te Zuwef hay saya. Dapa way ana faŋga, ndana ɓa ha tata makula.

²Farisa hay aca jəɗ Yesu, gəla a ta mbəla nda ana avəda pas ta masasak vaw kwa! Aca jəɗiya sə, ka ta jawiya ava ma hay ta matəɗana ma a yaŋ.

³Yesu ka gwaɗa nda masa ha tata makula sə, gege: «Zleftek, zlec fəma ta ndana hay fakwanay.»

⁴Ke nəkefec, gege: «Jə masa cəv mava te meŋgə pas ta masasak vaw, mambəla sə, meŋgə jə mambəla ana geyey, jə masa e teh bay? Daha aabay, mambəla sə, mambəl mesfen ta ndana geyey, makəɗa avəda?» Amaa ndah ana ec ke njehec teete.

⁵Yesu ke njerefec fakwanay ava yam te ndey tata maŋgwada, ka zəmana fa rav mabay da yaŋ eceŋ, afa rav teceŋ masasala ta macəna jene hay masa aŋga te gweɗeceŋ. Ka gwaɗa nda sə, gege: «Baŋgaɗa ha.» Nda sə, ka baŋgaɗa, ha sə, ka ləmadata pa slam ana.

⁶Masa Farisa hay aca wala ha ta nda sə, ka ləmadata pa slam ana, ec ke dec kad a vəda dapa Way ta macə mbahw te Zuwef hay. Faŋga faŋga ana, ac ka cam yaŋ ava gəva ta ndah ta Herawt, ac ka cacal ma teceŋ ka ta kaɗ Yesu ka macəhwandaw.

⁷Yesu va ndah masasəraka jene tata ec ke gərdec ndana hay dapa Way ta macə mbahw te Zuwef hay ana faŋga, ac ka data kad ma te təker mazlakava te Gelile. Miya gaa ec ke cəpeceŋ. Ndah mecəpec sə, ece dek dapa vavara te Gelile, de Zudey,

⁸de Zeruzelem, de Idumey, da luwa leŋgeɗey ta wayam te Zurdeŋ. Asaya, dapa vavara hay masa zef eve berne te Tir va ta Sidaŋw. Ndah ana, ece dek gaa ara nesey sə, afa ac ka cəna mezlər masa Yesu ta ŋgiya.

⁹Yesu ke nəkefec ndah masasəraka jene tata aca ra ləmadana kaslkaslah, afa ndana hay ac ta ŋgaŋgəɗaciya.

¹⁰Ndah eve mehecey hay fakwanay ac ka ŋgaŋgəɗac vaw kad vara vaw ka ta pafa ha, afa ka mbəl ndana hay mabay.

¹¹Ndah ava damkwaw hay dapa yaŋ may, ac ka wala Yesu, ec ke teɗ kad fe sek tata ava macə lalaw, gege: «Kaa sə, ka wut ta Zlavay!»

¹²Amaa Yesu ke ɓeɓəcec ava gədaŋ, ke peyefeceŋ aca ra ŋguzda aŋga sə, yaŋ bay.

¹³Ava dəɓa ana, Yesu ke tep fa ŋguɗa, ke zelec ndah masa aŋga ta waya. Ndah ana, ec ke dey kad vara vaw.

¹⁴Aŋga may, ke pelec ndah kuraw dapa yaŋ ana ecew, e zelec maslaŋ tata hay. E peleceŋ sə, afa aca ra njah ava aŋga cəɗem cəɗem, e de zlerdeceŋ ka ta bəzad Labara mambəla ana te Meŋgə bay ta Zlavay.

¹⁵Asaya, afa e de vec gədaŋ ta mambas damkwaw hay dapa yaŋ ta ndana hay.

¹⁶Ndah mapala kuraw dapa yaŋ ana ecew sə, ac Simaŋw masa Yesu a pafa mezel Piyer,

¹⁷Zak va malamaŋ Zaŋ wudeh te Zebede masa Yesu e pefec mezel Bewenerges ara megweɗey, ndah maɓəsla ma elehey ara merev ta yam.

¹⁸Endəre, Fəlep, Bartelemi, Mata, Tumas, Zak wut ta Alfey, Taadey, Simaŋw nda ta wunam

¹⁹va Zudas Iskariyawt, nda ma ta vana Yesu pa ha ta maslagəra tata hay.

²⁰Mevehek tata kad a wunam, miya ka kwasafa vaw saya. Kwa Yesu va ndah masasəraka jene tata, ac ka ŋgat ha ta mandə ɗaf aabay.

²¹Masa ndah ta hwaɗ da way tata aca cəna ndana hay makwasa da cak tata mabay ara nesey sə, ec ke dey kad vara vaw ka ta kəsiya, afa ece gweɗ, gege: «Yesu sə, leŋgesl ka nasata.»

²²Ndah mesesərekecen ma majawa kad ndana hay masa ece dek de Zeruzelem, ec ke gweɗ da yaŋ ana, gege: «Aŋga eve Belzebul, bay ta damkwaw hay! Mavana gədaŋ ta mambas damkwaw hay sə, aŋga ana.»

²³Ara nesey, Yesu ke zeleceŋ, ke gweɗec ava ma hay maɗəva, gege: «Saadan, a da mbasana Saadan sə, a ŋgana gwagumaw?

²⁴Ara megweɗey, daha ndah dapa wunam amta aca ŋgə vəram dapa taɓa teceŋ sə, wunam ana a kwakwacata.

²⁵Asaya, daha ndah da hwaɗ ta way amta aca ŋgə vəram dapa taɓa teceŋ sə, hwaɗ ta way ana a kwakwacata.

²⁶Ara nesey, daha Saadan a ŋgə vəram ava yaŋ tata, a cəna ma fa vaw tata bay sə, ŋgesey, a kəɗa yaŋ tata avəda, e te ŋgə bay ɓasabay.

²⁷Asaya, kwa makar a zlafa mesehw kad way ta ndana masa a fəna ava gədaŋ ka te kərek jene meendey ta nda ana sə, e ŋgə aabay. Say makar sə, ta ŋgə gədaŋ teeməle, ta jawa nda mafəna ava gədaŋ sə, avəda ɗagay. Ava dəɓa ana, a zlafa medey ke te həlek jene hay da way tata.»

²⁸Ya gwaɗakwar eve metehwe ana, Zlav e te pəlecen mebər ta ndana hay masa ac ta ŋgiya fakwanay va mepəlecen mebər teceŋ da yaŋ ma hay mambəla ana aabay masa ec te gweɗ fətiya fakwanay.

²⁹Amaa kwa waawa malafa Mesfen Mavəna sə, a ta ŋgat mapəl mebər tata aabay, a ta njah eve mebərey ana katar ka midakw.

³⁰Yesu e gweɗec ara nesey sə, afa ec ke gweɗ, gege: «Yesu sə, aŋga ava damkwaw dapa yaŋ.»

³¹Ava dəɓa ana, mamaŋ te Yesu va malamaŋ hay ec ke husekey, ec ke zlec da vəda, ac ka zlar ndana ke te zelekey.

³²Ndana hay gaa makwasa, ac manjaha da cak tata. Maslaŋ sə, ka gwaɗa, gege: «Mmakw va malamakw hay ac da vəda, aca nəkakaa.»

³³Yesu ke vehecen, gege: «Mma sə, wa? Malama hay sə, wa hay wa?»

³⁴Yesu ke pefec ndey ndah manjaha matulaka da cak tata, ke gweɗ, gege: «Mawala, mma va malama hay sə, ndah nesey,

³⁵afa malama, dəma daha aabay mma sə, nda maŋga mezlər masa Zlav a waya.»