Read Cuvok Markwas 7 Bible Online

Markwas 7 - Cuvok bible

Markwas 7

¹Farisa hay va ndah dərziya mesesərekecen ma majawa ta Muyiz kad ndana hay medek de Zeruzelem, ac ka ɓəca vaw a cak te Yesu.

²Ac ka wala ndah masasəraka jene dərziya aca ndə ɗaf ava ha hay madakala, a wal megweɗ ndah masasəraka jene ana ac ka pana ha teceŋ ara kwakwas teceŋ hay te gweɗ sə, aabay.

³Farisa ana hay va Zuwef hay dərziya fakwanay aca nah yaŋ kad pa kwakwas ana dapa manjah teceŋ ara papaŋ ta papaŋ teceŋ te sesərekeceney. Wagaa ac ta ndə ɗaf sə, aca pana ha hay avəda mambəla ana ɗagay.

⁴Daha ece dek dapa luma, wagaa ac ta ndə ɗaf sə, aca pana ha va sek hay avəda ɗagay. Aca nahda yaŋ kad pe jene hay mekele mekele ara kwakwas teceŋ te gweɗeceŋ. Ara megweɗey, aca pana kwap ta masə jene hay, maŋgam hay va wuseɗef hay avəda wagaa ac te ŋgə mezlər eve eceŋ. [Asaya, kwa slam ta manah hay.]

⁵Mafay ana, Farisa hay va ndah mesesərekecen ma majawa kad ndana hay sə, ac ka nəkafa Yesu, gege: «Ndah masasərak jene takaa aca ŋgə jene hay masa kwakwas ta papaŋ ta papaŋ tandakwa hay ta ŋguzdandakwaɗ aabay. Aca ndə ɗaf ava ha hay maləza sə, mafay te mey?»

⁶Yesu ke vehecen, gege: «Akwar ndah masa neneŋ dapa ma ecew ecew! Zleezle Izay nda mehwedek ma ke gweɗ da yaŋ akwar sə, tehwe, afa mavinda dapa Ɗelewer mavəna, gege: “Zlav ke gweɗ, gege: Ndah nesey, ece hehəmiyey ava ɗaf ta ma taambəla, anjəkar rav teceŋ aŋga dəreŋ ava yey.

⁷Ece kəɗiyey ha sə, taambəla, afa ma hay masa ece sesərekecen kad ndana hay sə, ac ma hay masa ece dek dapa kwakwas ta ndana hay.”»

⁸Yesu ke gweɗec saya, gege: «Akwar Farisa hay va ndah mesesərekecen ma majawa kad ndana hay, akwa gərda ma majawa ta Zlavay ava zlalav ka ta cəp kwakwas ta ndana hay.»

⁹Ke gweɗec saya, gege: «Hay! Ma majawa ta Zlavay sə, akwa sən mekəzldec mambəla ana ka ta cəp kwakwas takwar hay.

¹⁰Yaw, Muyiz ke gweɗ, gege: “Nahda yaŋ kad papakw va mmakw”. Muyiz ana ke gweɗ saya, gege: “Nda malafa papaŋ, daha aabay mamaŋ sə, nda ana ŋgesey, ac ta kəɗa avəda cukw cukw”.

¹¹Amaa takwar sə, akwa sasərak ndana hay, akwa gwaɗa, ndana a zlafa magwaɗa papaŋ, daha aabay mamaŋ, jeŋ masa ya wal ma ta jənakaa ava aŋga sə, ya vakaɗ ɓasabay, afa jeŋ ana sə, Kwarbaŋ. A wal megweɗey: “Jə masa mava taambəla kad Zlavay”.

¹²Ŋgesey, akwa gərda nda ana, a da ŋgana jene kad papaŋ va mamaŋ sabay.

¹³Ara nesey, akwa vavas ma ta Zlavay ava kwakwas takwar hay masa akwa sesərekecen kad ndana hay. Asaya, akwa ŋgə jene hay mekele mekele mambəla ana aabay ara ŋgesey ana.»

¹⁴Yesu ka zal miya saya, gege: «Mecəkefiyey zləmay, akwar fakwanay, macəna ma nesey mambəla ana:

¹⁵“Jə masa ndana ta ndiya jaka pa ma sə, a ləza nda aabay. Amaa, jə masa e dek dapa rav ta ndana kad a vəda jaka pa ma sə, ŋgesey, a ləza nda”.

¹⁶[Macak zləmay mambəla ana, daha akwar ava zləmay ta macəna!]»

¹⁷Ava dəɓa ana, Yesu ke gərdec ndah makwasa fakwanay faŋga, ka sahwata kad a way. Ndah masasəraka jene tata ac ka nəkafa ma da yaŋ ma maɗəva masa aŋga ta gwaɗiya.

¹⁸Yesu gege: «Akwar may, kasl təlam nesey akwar ka cəna aabay suwar geyey? Jə masa ndana ta ndiya kad hwaɗ sə, a zlafa maləziya bay,

¹⁹afa jeŋ ana e sehw sə, kad pa rav bay, amaa e sehw sə, kad hwaɗ. Ava dəɓa ana a dakata kad a vəda.» Ava ma ana hay nesey, Yesu a wal megweɗec, jə ta mandə fakwanay sə, ndana a zlafa mandiya, a ləza nda aabay.

²⁰Yesu ke gweɗec saya, gege: «Ma ta ləza ndana sə, mawulak yaŋ hay masa ece dek dapa rav tata kad a vəda.

²¹Mawulak yaŋ hay masa ece teh bay sə, ece dek dapa rav ta ndana. Aca hwadiya pe meŋgə jene hay maləza, manjah dapa jə masa a ləza nda, makar, makəɗa nda cukw cukw,

²²makəs vaw fa zaŋ ana, meŋgə ndey fe jə ta ndana hay, meŋgə suwe[12] fa ndana, mafəc nda, meŋgə jene hay masa eve cəvey ana aabay, səlek, maŋgal dar fa ndana, magal yaŋ va meŋgə jene hay saw[13]

²³Jeŋ ana hay mambəla ana aabay fakwan nesey, ece dek dapa rav ta ndana kad a vəda, aca ləziya.»

²⁴Yesu ke zleftek dapa slam ana, ka data pe berne te Tir. Ka sahwata a way ta ndana ɓa, a wal ndana da səna masa aŋga faŋga bay. Amaa ka zlafa maraɓda yaŋ tata aabay.

²⁵Ŋgwaz ɓa daŋgwaya aŋga ava damkwaw dapa yaŋ, ka cəna labara te Yesu. Ke dey vara vaw, ke kekəred fəma tata.

²⁶Ŋgwaz ana sə, aŋga Gərek ana, aŋga dapa tərsam te Fenesi hay dapa vavara te Siriya. A ŋgana mbahw Yesu da mbasana damkwaw dapa daŋgwaya.

²⁷Amaa Yesu ka gwaɗa ava ma maɗəva, gege: «Gərdec wudeh aca ra mben ava ɗaf ɗagay, afa makazl ɗaf te wude hey kad gəda hay sə, mambəla ana aabay.»

²⁸Ŋgwaz ana ka vahan, gege: «Aŋga, Bay Mazlakava. Amaa dapa slam ta mandə ɗaf sə, mepepəsey ana hay masa ece kwiyek dapa ha te wude hey kad fa vavara sə, gəda hay aca paliya, aca ndiya aabay geyey!»

²⁹Yesu ka gwaɗa, gege: «Mafay ta mavah ma takaa ana nesey, damkwaw dapa daŋgwayak sə, ka hwayata a vəda cay, ka zlafa madaɓa kad a wunam.»

³⁰Ara nesey, ŋgwaz sə, a daɓa kad a wunam, a ŋgatafa daŋgwaya manaha fe kelvek, aŋga werwer cay, damkwaw sə, ka gərda tehwe.

³¹Yesu ke zleftek dapa berne te Tir, ke dey jaka pe berne ta Sidaŋw, ke veh kad ma te təker mazlakava te Gelile jaka pa vavara ta Dikapawl.

³²Ndah dərziya ɓa, ac ka hwadana nda madagazlam ana. Nda ana sə, a zlafa megweɗ bay. Ac ka ŋgana mbahw Yesu a da pafa ha.

³³Ara nesey, Yesu ac ka ŋgəla vaw ava nda ana babəla teceŋ dapa taɓa ta miya makwasa faŋga, ec ke dey ava zlalav. Ka tal wut ta ha tata pa zləmay ta nda ana. Asaya, ke ŋgə slesleɓ fa ha tata, ka ŋgaɗ fe neneŋ ta nda ana.

³⁴Ka baŋgaɗa ndey kad a wudam, ke jerey, ke gweɗ, gege: «Efata» ara megweɗey, «Wuney!»

³⁵Faŋga faŋga ana, zləmay ta nda sə, ŋguzlec! E wuney, neneŋ tata ke ŋgə mezlərey, ka zlafa megweɗ mambəla ana.

³⁶Yesu ke kətec fakwanay, gege: «Akwar ta ŋguzdan ma ana kad ndana mekele bay.» Amaa kwa Yesu ke kətec aca ra ŋguzda ma ana bay sə, ac ka ŋguzda labara ana mafəna ana saya.

³⁷Ndah macəna ma ana sə, ac ke rəzlec mabay, ec ke gweɗ, gege: «Jene hay masa aŋga te ŋgeceŋ fakwanay nesey sə, mambəla ana. Kwa ndah madagazlam hay sə, ke wunecen zləmay avəda, ndah ɓaɓa hay, ke pəlecen ma te megweɗey!»