Read Cuvok Markwas 9 Bible Online

Markwas 9 - Cuvok bible

Markwas 9

¹Ke gweɗ, gege: «Eve metehwe ana ya gwaɗakwar, deveŋ ndah masa ac fana, dərziya hay ac ta məc aabay, say ac ta wala Meŋgə bay ta Zlavay e dek ava gədaŋ mazlakava.»

²Manah makwa ava dəɓa ana, Yesu ka kəs Piyer, Zak va Zaŋ ke hwedec fa ŋguɗa mazambəla ana dəreŋ ava ndana hay. Faŋga sə, ac babəla teceŋ. Pəla! Yesu a ŋgwada vaw tata fəma teceŋ.

³Rəkwat tata ka tərata məsle ana ndeɗ ndeɗ. Ndana dapa vavara mazlafa matəra rəkwat tata avəda de weɗ ndeɗ ndeɗ ara ŋgesey ana sə, aabay[15]

⁴Faŋga faŋga ana, ndah masasəraka jene tata mahkar sə, ac ka wala Eli va Muyiz, ndah ta Zlav zleezle ece gweɗey ava Yesu.

⁵Mafay ana, Piyer ka gwaɗa Yesu, gege: «Nda masasəraka nda, mambəla sə, anda njahakwa fana cay. Makarakwa slam hay mahkar, amta takaa, amta ta Muyiz, amta ta Eli.»

⁶Piyer e gweɗ ara nesey sə, a sən jə masa a ta gwaɗiya bay, afa ac manjaha dapa zidaw mabay.

⁷Magwabagwaba ke səretec avəda. Dapa magwabagwaba ana, uway ke cənek, gege: «Nesey sə, wat aɗaw masa ya waya elehey, macəkafa zləmay!»

⁸Faŋga faŋga ana, ndah masasəraka jene ac ka pə ndey ava zlalav, amaa ac ka wala ndana mekele ɓasabay, magəra sə, say Yesu aŋga amta da cak teceŋ.

⁹Dapa mebəreŋgek teceŋ kad fa vavara sə, Yesu ke kətec, gege: «Jə masa akwar ta wala nesey sə, akwar ta ŋguzda kad ndana mekele bay, say pas masa Wut ta nda ta pərakata dapa maməcay.»

¹⁰Ndah masasəraka jene ana, ac ka kəs mekətey ana, amaa ac ka nək ma fa vaw teceŋ, gege: «Mepərekek dapa maməcay ana sə, a wal megweɗ, gege mey?»

¹¹Ac ka nəkafa Yesu, gege: «Ndah mesesərekecen ma majawa kad ndana hay ec ke gweɗ, gege: “A lada Eli, nda mehwedek ma zleezle da dakata kamma fa ɗagay” sə, mafay te mey?»

¹²Yesu ke vehecen, gege: «Aŋga, Eli sə, a dakata kamma ka ta ləmad jene hay fakwanay eve cəvey ana. Mavinda dapa Ɗelewer mavəna, ke gweɗ, gege: “Wut ta nda, a ta sə marga mabay, ndana hay ac ta kəsiya aabay. Akwa sənafa ma ana na geyey?”

¹³Yaw, ya gwaɗakwar, Eli sə, ka dakata cay. Ara masa ma ta Zlav te gweɗ da yaŋ ana zleezle, ndana hay ac ka ŋgana jene masa e teh bay ara ac ta waya.»

¹⁴Dapa mahusa te Yesu, Piyer, Zak va Zaŋ kad cak ta ndah masasəraka jene tata dərziya hay cuɗ, ac ka wala miya makwasa mabay de vereceŋ. Ndah mesesərekecen ma majawa kad ndana hay ac faŋga, aca tə yaw eve eceŋ.

¹⁵Masa ndana hay aca wala Yesu sə, ac fakwanay ac ka ŋgaŋgar vaw, ac ka hway kad vara vaw ka ta gwaɗafa.

¹⁶Yesu ke nəkefec ndah masasəraka jene tata faŋga, gege: «Akwa tə yaw ava ndah nesey sə, da yaŋ mey?»

¹⁷Nda amta deveŋ miya sə, ka gwaɗa, gege: «Nda masasəraka nda, ye ke hwedek wat aɗaw ɓa, aŋga ava damkwaw dapa yaŋ. Damkwaw ana sə, a vana cəv te megweɗ aabay.

¹⁸Kwa a fəla fəla daha masa jeŋ ana ka zlara cay sə, a kazlda wat ana fa vara, mahəslaslaf dapa ma e dek kad a vəda, a paɗ zleŋ, a salan vaw saya. Ye ke nəkefec ndah masasəraka jene takaa aca ra mbasana damkwaw ana, amaa ac ka zlafa aabay.»

¹⁹Yesu gege: «Akwar tərsam ta ndah təlam nesey masa makəsparav aabay, ya da njah ava akwar sə, kasl ewey? Ya da pakwar sek sə, kasl ewey?» Mehwedek wat ana.

²⁰Ac ka hwadanay. Masa damkwaw ana a wala Yesu sə, faŋga faŋga a kakaslda wat ana, pəɗazl! A kazlaɗ fa vara, a ɓərazlda, mahəslaslaf e dek dapa ma kad a vəda.

²¹Yesu ka nəkafa papaŋ ta wat ana, gege: «Jeŋ ana a zlara ara nesey sə, dəga ewey?» Papaŋ ka vahan, gege: «A zlara dəga dapa wat.

²²Pas mekele damkwaw ana a kazlaɗ pa kwakwaw, daha aabay a kazlaɗ pa yam, a wal a da kəɗa avəda cukw cukw. Daha ka zlafa mambasana sə, mbahw, ŋgafandaw metekweney, jənandaw!»

²³Yesu ka vahan, gege: «Ke de gweɗ “daha ya zlafa” sə, mafay te mey? Ya zlafa maŋgana jene fakwanay kad nda makəsa ma aɗaw pa rav tata.»

²⁴Faŋga faŋga ana, papaŋ ta wat sə, ka cə lalaw, gege: «Ya kəs ma ana, amaa mbahw jəniyey, afa mekəsey ana sə, e fəniyey fa gədaŋ!»

²⁵Masa Yesu a wala ndana hay gaa ece hwek kad vara vaw ka ta wuzaɗ jene hay masa aŋga te ŋgeceŋ sə, a ɓaɓac damkwaw dapa yaŋ ta wat sə, gege: «Kaa, matəra wat nesey ka ɓaɓa va ka madagazlam, ya gwaɗakaa daɓa dapa wat nesey, ke te vehek sabay!»

²⁶Damkwaw sə, ka cə lalaw, ka ɓərazlda wat ana ava gədaŋ, ka data. Wat sə, ka tərata ara nda maməca. Mafay ana, ndana hay faŋga gaa ec ke gweɗ, gege: «Wat ana ka məcata.»

²⁷Amaa Yesu ka təhazaw pa ha, ka baŋgaɗa. Wat sə, deŋ! E zlecey.

²⁸Ava dəɓa ana, Yesu va ndah masasəraka jene tata ec ke sehw kad pə way ɓa, ac babəla teceŋ. Ndah masasəraka jene tata sə, ac ka nəkafa, gege: «Andə ka zlafa mambasana damkwaw dapa yaŋ ta wat ana aabay sə, mafay te meŋgəɗemey?»

²⁹Yesu ke vehecen, gege: «Ma da zlafa mambasana tərsam ta damkwaw ana ara nesey sə, say ava macə mbahw kad Zlavay.»

³⁰Yesu va ndah masasəraka jene tata ec ke zleftek dapa slam ana, ec ke dey jaka pa vavara te Gelile. Yesu a wal ndana da səna slam masa aŋga dapa sə, bay,

³¹afa aŋga dapa mesesərek ndah masasəraka jene tata, gege: «Ac ta təhaza Wut ta nda avəda, ac ta paɗ pa ha ta ndana hay. Ndah ana, ac ta kəɗa avəda cukw cukw, amaa dapa manah mamahkar ana sə, a ta pərakata dapa maməcay.»

³²Amaa ndah masasəraka jene tata ac ka cəna ma masa Yesu te gweɗ sə, aabay. Asaya, ece leley ka ta nəkafa ma hay.

³³Yesu va ndah masasəraka jene tata aca husa a Kafarnahum, ec ke sehw kad pə way ɓa. Dapa masa ac da way ana sə, Yesu ke nəkefec, gege: «Tefes akwa tə yaw dapa cəvey sə, da yaŋ mey?»

³⁴Amaa ac manjaha teete, afa masa ac dapa cəvey sə, ac ka tə yaw dapa taɓa teceŋ, ec ke gweɗ, gege: «Ma ta njah ka nda mazlakava deveŋ andakwa sə, wa?»

³⁵Yesu ka njah maanjahay, ka zal ndah masasəraka jene tata kuraw dapa yaŋ ana ecew, gege: «Daha nda masa a wal manjah ka nda mama deveŋ akwar sə, da njah ka nda metekweɗ ta ndana hay fakwanay, e de ŋgec mezlər kad ndah dərziya fakwanay.»

³⁶Ka kəs wat kusetke, ka zlacaɗ pa taɓa teceŋ. Humbat! A humbatiya, ke gweɗec ndah masasəraka jene tata, gege:

³⁷«Nda masa a kəs wat mekusetke ana nesey, mafay te mezel taaɗaw sə, e ŋgə ŋgesey e kəsiyey, ava yaŋ taaɗaw. Asaya, nda masa a kəsiyey, a kəs ŋgesey sə, yey babəla sabay, amaa a kəs Bay Zlavay nda mezlərekiyey may.»

³⁸Zaŋ ka gwaɗa Yesu, gege: «Bay taciya, andaw ka ŋgat ndana ɓa a mbas damkwaw hay eve mezel takaa. Anda wal mazlaca avəda, afa aŋga deveŋ andakwa aabay.»

³⁹Amaa Yesu ka vahan, gege: «Akwar ta zlaciya bay, afa daha nda masa a zlafa meŋgə cah hay mambəla ana ava gədaŋ masa e dek dapa mezeley aɗaw sə, nda ŋgesey e te gweɗ ma mambəla ana aabay da yaŋ yey sə, aabay.

⁴⁰Ara nesey, nda masa aŋga maslagəra tandakwa bay sə, nda ŋgesey, aŋga nda tandakwa.

⁴¹Kwa waawa masa a ta gəjakwar yam ta masə kusetke mafay ta masa akwar ndah te Kəristi, ya gwaɗakwar, nda ana ŋgesey, meyəv tata a ta zə aabay.»

⁴²Kwa waawa mafəca nda amta deveŋ ndah makəsa ma aɗaw hay nesey ke te ŋgə mebərey sə, zuwan ac ta jawana kekeŋ mazlakava ana pa uway, ac ta kazlaɗ pa yam mafayakfayak ana.

⁴³Daha ha takaa a ta hwadakaa pe meŋgə mebərey sə, ŋgəla ha ana avəda. Zuwan ka ta ŋgataɓa manjah katar ka midakw ava ha amta da yaŋ masa ke te dey kad pa ləhwaɓ ta kwakwaw masa a məc aabay ava ha takaa hay cuweeney. [

⁴⁴Dapa faŋga sə, matalay hay manda nda, ac ta məc aabay, kwakwaw dapa slam ana a ta məc aabay.]

⁴⁵Daha sek takaa a ta hwadakaa pe meŋgə mebərey sə, ŋgəla sek ana avəda. Zuwan ka ta ŋgataɓa manjah katar ka midakw eve sek amta, da yaŋ masa ke te dey kad pa ləhwaɓ ta kwakwaw masa a məc aabay eve sek takaa hay cuweeney. [

⁴⁶Dapa faŋga sə, matalay manda nda ac ta məc aabay, kwakwaw dapa slam ana a ta məc aabay[16]]

⁴⁷Daha ndey takaa a ta hwadakaa pe meŋgə mebərey sə, huslaka ndey ana avəda. Zuwan ka ta ŋgataɓa manjah eve ndey amta dapa Wunam ta bay ta Zlavay, da yaŋ masa ke te dey kad pa ləhwaɓ ta kwakwaw eve ndey takaa hay cuweeney.

⁴⁸Dapa faŋga sə, matalay hay manda nda a ta məc aabay, kwakwaw dapa slam ana a ta məc aabay.

⁴⁹Kwa waawa e te dey jaka pa kwakwaw ta marga ava dəɓa ana, a ta ŋgat zenekwe ta mapaniya.

⁵⁰Fəceɗ sə, jene mambəla ana. Amaa daha fəceɗ ana ka zana mecən tata avəda sə, ma da ŋgana masa e de cən saya sə, gwagumaw? Akwar sə, meŋgec jene mambəla ana kad ndana hay ara fəceɗ te cen dapa jene hay fakwanay. Manjah dapa metehey dapa taɓa takwar.