Read Cuvok Lukas 1 Bible Online

Lukas 1 - Cuvok bible

Lukas 1

¹Tiyawfil, guula aɗaw masa ya waya elehey. Ndana hay gaa ac ke ŋgə vaw ta mavində jene hay masa ke ŋgey da varandaw fana.

²Ec ke vindek labara masa andaw ta cəna da vara ndah mawala jeŋ ana eve ndey teceŋ dəga dapa mezler te mezlər te Yesu. Ndah ana sə, ac ndah mabəzada ma ta Zlavay.

³Mafay ana, ya ka yah cəv ta masəna ma ana mambəla ana dəga dapa mezlerey ana. Yey may, ke wefiyey mabay ta mavindakaɗ labara masa cəv mava ta mavindiya kad kaa Tiyawfil, nda mazlakava masa ya waya elehey.

⁴Ya vindakaɗ ara nesey, afa ka da səna ma masa aca sasərakakaɗay sə, ŋgesey ma metehwe ana.

⁵Dapa masa Herawt e ŋgə bay da yaŋ vavara te Zudey, nda maŋga kwakwas ta Zlav ɓa mezel Zakaray. Aŋga deveŋ ndaakwas hay masa ece zelec: «Gəva ta Abiya.» Ŋgwaza mezel Elizebet, aŋga dapa tərsam ta Harawna, nda mazlakava ta ndah maŋga kwakwas ta Zlav zleezle.

⁶Zakaray ac va ŋgwaza cuweeney, ac ndah maŋga jə mambəla ana fa yam te ndey ta Zlavay, aca cəp ma majawa ta Zlavay mambəla ana. Asaya, aca nah yaŋ kad pə ma majawa ta Zlav fakwanay eve cəvey ana.

⁷Amaa wut tec aabay, afa Elizebet aŋga dəlaya Ac cuweeney marndaw hay cay.

⁸Pas ɓa, Zakaray e ŋgə mezlər kad Zlavay dapa Way ta kwakwas, afa mezlərey ana pəsaŋga ana ŋgesey, maŋgiya sə, gəva ta Abiya hay.

⁹E ŋgə mezlər dapa way ana faŋga sə, afa ndah maŋga kwakwas ta Zlav fakwanay ac ka kazl siyakw da yaŋ ana, ka ta kəsiya ara ma tec majawa te gweɗey. Mezlər tata ana sə, te mesehw pa Way ta kwakwas ta Bay Mazlakava, a da ndal təbekw hay ke te ŋgengəzey.

¹⁰Dapa masa Zakaray a ndal təbekw hay te meŋgeŋgəzey sə, ndana hay fakwan da vəda aca cə mbahw.

¹¹Faŋga faŋga ana, maskəla ta Bay Mazlakava ka ŋguzdan vaw, aŋga mazlaca jaka luwa ta zam ta slam te meŋgeŋgez təbekw hay.

¹²Masa Zakaray a ta wala sə, ka dəŋgazlan leŋgesl avəda, ka ŋgana zidaw mabay.

¹³Amaa maskəla ana ka gwaɗa, gege: «Ke ŋgə zidaw bay Zakaray, afa Zlav ka cəna mbahw takaa. Elizebet ŋgwazak a ta hayakaa wat mawal, ka ta pafa mezel Zaŋ.

¹⁴Ke te wesl mabay, ndana hay gaa ec te wesl mafay te meheyə ta wat ana.

¹⁵Wat ana, a ta njah ka nda maŋga mezlər mazlakava ta Bay Mazlakava. A ta sə wuzam aabay, kwa jə maɓəsla ana sə, a ta siya aabay. A nəhata eve Mesfen Mavəna dəga da hwaɗ ta mamaŋ.

¹⁶E te vehekec wudeh te Isreyel mabay kad vara Bay Mazlakava, Zlav teceŋ.

¹⁷E te dey fəma fa yam te ndey ta Zlavay eve leŋgesl va gədaŋ mazlakava ta Eli, ke te vehekec rav ta papa te wude hey kad vara wudeh teceŋ. E te hwedec ndah maŋgaŋgəra nda ka ta wulak yaŋ ara ndah maŋga jene eve cəvey ana, afa e de ləmedec tərsam maləmada ana kad Bay Mazlakava.»

¹⁸Zakaray ka gwaɗa maskəla sə, gege: «Ya da səniya masa jeŋ ana a ta ŋgata sə, fe mey? Afa ya marndaw cay, ŋgwaz aɗaw, aŋga ava mavay gaa cay may.»

¹⁹Maskəla sə, ka vahan, gege: «Yey Gebəriyel, nda mezlec fəma ta Zlavay ka ta ŋgana mezlərey, ya mazləra ka ta gwaɗakaa va ka ta ŋguzdakaɗ Labara mambəla ana nesey.

²⁰Amaa ma aɗaw masa ya ta gwaɗakaa nesey sə, a ta ŋgata pas masa Zlav ta waya ara ya ta gwaɗakaa, amaa ka ka kəsaw aabay. Mafay ana, təlam nesey, ka ta tərata ka ɓaɓa, ka ta zlafa megweɗ bay kasl pa pas masa jeŋ ana ta ŋgata.»

²¹Dapa masa Zakaray aŋga dapa way ta kwakwas sə, ndah da vəda ac ka ɓəlaw, ec ke rəzlec mabay, afa ke njehek da way ana elehey.

²²Medek ta Zakaray kad a vəda, a zlafa megweɗ sabay. Dapa ŋgesey ana, ndana hay ac ka səna avəda Zlav ka ŋguzdana jene dapa way ta kwakwas tata. A zlafa megweɗ sabay, e gweɗec sə, say ava ha.

²³Masa Zakaray ka ndəvda pas te mezlər tata cay sə, ka data kad a wunam.

²⁴Ava dəɓa ana, Elizebet ŋgwaza sə, ka ŋgata ava hwaɗ. Kiya zlam aŋga manjaha da way da way, a raɓda hwaɗ tata ana. Ke gweɗ da yaŋ aŋga ana, gege:

²⁵«Mawala, jə masa Bay Mazlakava ta ŋgiya mafay taaɗaw. Ka wal makəsawa hwar dapa ndey taaɗaw avəda, fa yam te ndey ta ndana hay.»

²⁶Masa Elizebet aŋga ava hwaɗ kiya makwa sə, Zlav ke zlərek maskəla tata Gebəriyel kad Nezeret dapa vavara te Gelile,

²⁷e zlərek sə, kad vara dem dahəla ɓa meseɓ te Zezef. Zezef ana sə, aŋga tərsam ta bay Deevet zleezle. Mezel te dem ana, Maaray.

²⁸Maskəla ana ke sehwey kad vara vaw, ka gwaɗa, gege: «Ya gwaɗafakaa Maaray, kaa, masa Zlav ka walakaa elehey, Bay Mazlakava aŋga ava kaa.»

²⁹Maaray a cəna ma ana nesey sə, ka dəŋgazlan yaŋ mabay, ka wulakaw, gege: «Megweɗ fa vaw ana ara nesey sə, a wal megweɗ gwagumaw?»

³⁰Maskəla sə, ka gwaɗa, gege: «Maaray, ka ŋgə zidaw bay, afa Zlav ka ŋgafakaa metekweney.

³¹Wala ke te ŋgə ava hwaɗ, ke te heyek wat mawal, ka ta pafa mezel Yesu.

³²A ta njah ka nda mazlakava, ac ta zaliya Wut ta Zlav da Wudam. Bay Mazlakava Zlavay a ta van gwadadakw bay Deevet papaŋ ta papaŋ.

³³A ta ŋgə bay katar da yaŋ hwaɗ ta way ta Zakwab, bay tata ana e te meɗ aabay.»

³⁴Maaray sə, ka gwaɗa maskəla sə, gege: «Jeŋ ana e te ŋgə meemey, afa ya sən mawal bay heley?»

³⁵Maskəla sə, ka vahan, gege: «Mesfen Mavəna e te dek kad a yaŋ kaa, gədaŋ mazlakava ta Zlav da Wudam, a ta bərɗakaa eve meezeŋ tata. Mafay ana wat masa e te heyek nesey sə, a ta njah mavəna, ac ta zaliya Wut ta Zlavay.

³⁶Wala, dəmakw Elizebet, aŋga ava hwaɗ təlam nesey, kwa aŋga marŋgwaz cay. E te heyek wat mawal. Ndana hay ac ka pafa dəlay, amaa təlam nesey, aŋga ava hwaɗ kiya makwa,

³⁷afa jene masa a fəna gədaŋ ta Zlavay sə, aabay.»

³⁸Ava dəɓa ana, Maaray ka gwaɗa, gege: «Ya nda maŋga mezlər ta Bay Mazlakava. A lada jeŋ ana hay fakwan de ŋgey ara ke te gweɗiyey.» Maskəla sə, ka gərda.

³⁹Dapa pas ana hay ŋgesey, Maaray ke dey ava mavas vaw kad pa wunam dapa wudam ɓa te berne te Zudey.

⁴⁰Dapa mahusa tata, ke sehw a way ta Zakaray ka ta gwaɗafa Elizebet.

⁴¹Masa Elizebet a cəna megweɗ fa vaw ta Maaray sə, zef, wat da hwaɗ tata, ka ɓəla vaw. A faŋga ana, Mesfen Mavəna ka nəha Elizebet.

⁴²Mafay ana, Elizebet ka gwaɗa Maaray ava gədaŋ, gege: «Mapəsma ta Zlavay aŋga da yaŋ kaa, ka fəna da yaŋ ŋgwazah dərziya fakwanay. Asaya, mapəsma ta Zlavay ana, aŋga da yaŋ wat masa ke te heyekey!

⁴³Ya waawa, masa mamaŋ ta Bay aɗaw Mazlakava e dek kad way aɗaw ara nesey?

⁴⁴Ya da səniya ka mamaŋ ta Bay aɗaw Mazlakava sə, afa dapa masa ya cəna megweɗ fa vaw takaa sə, wat da hwaɗ aɗaw ka ɓəla vaw eve mewesley.

⁴⁵Mapəsma ta Bay Mazlakava ɓa da yaŋ kaa, afa ka ka kəs ma tata masa aŋga ta gwaɗakaa da yaŋ jə masa a ta ŋgata.»

⁴⁶Ava dəɓa ana, Maaray ke gweɗ, gege: «Mesfeney aɗaw, da hahəm Bay Mazlakava.

⁴⁷Rav aɗaw aŋga manəha eve mewesley, mafay ta Zlav nda membəliyey.

⁴⁸Afa ka pafa ndey nda maŋga mezlər tata makwaɗma sə, mambəla ana. Aŋga, e zler dəga ta pəsna ndana hay fakwanay ec te gweɗ da yaŋ yey, gege: “Aŋga dapa mambivaw”.

⁴⁹Afa Zlav masa aŋga ava gədaŋ mabay, ke ŋgiyey jə mambəla ana. Mezel tata sə, Zlav Mavəna.

⁵⁰Mambəla ana tata e ŋgə sə, kad yaŋ ndah melel fətiya hayafa wat hayafa wat.

⁵¹Ke ŋguzdek gədaŋ tata te meŋgə mezlər mazlakava, ke wezlŋgerecen yaŋ ta maslahəɓa hay.

⁵²Ke bəreŋgec bay hay maŋga bay da yaŋ ndana hay ava gədaŋ, fa gwadadakw ta bay tec avəda. Ke peɗec ndah makwaɗma ka ndah mazlakava.

⁵³Ndah masa may e kəɗeceŋ sə, ke vec zleley, ndah eve zleley sə, ke vehdec ava ha dahəŋga.

⁵⁴Ke dekey ke te jənec Isreyel, ndah maŋga mezlər tata, ava masənafa mambəla ana tata.

⁵⁵Ara masa aŋga te gweɗec kad papaŋ ta papaŋ tandakwa hay, kad Abəraham va tərsam tata hay katar.»

⁵⁶Maaray ka njah da way te Elizebet ke ŋgə mbala kiya mahkar. Ava dəɓa ana, ka data kad a wunam.

⁵⁷Kiya te mehey te Elizebet ka husakata cay, ke heyek wat mawal.

⁵⁸Maslavda va tərsam tata hay, ac ka cəna masa Bay Mazlakava ka ŋgana mambəla ana kad Elizebet, ec ke wesley fa slam ana.

⁵⁹Manah cahkar, ava dəɓa te meheyə ta wat ana, maslavda va tərsam tata hay sə, ec ke dey kad pa meŋgə kwakwas ta maŋgal ŋgwal ta wat ana va mapafa mezel tata. Ac ka wal mapafa mezel Zakaray ara ta papaŋ.

⁶⁰Amaa mamaŋ gege: «Away, ara na bay, mezel tata sə, Zaŋ.»

⁶¹Ac ka vahan, gege: «Mezel ta ndana ara na dapa tərsam takwar ɓa geyey?»

⁶²Ac ka nəkafa Zakaray papaŋ, ava ha aca ra səna a wal mapafa mezel ta wat ana mey?

⁶³Zakaray ke nəkefec hap macacəɗa kaslparaha ke te vində mezel ta wat ana. Ka vindaw, gege: «Mezel tata Zaŋ.» Ndana hay fakwanay ec ke rəzlec fe mezeley ana.

⁶⁴Faŋga faŋga ana sə, Zakaray ka zlar megweɗ saya ava ma tata, aŋga ara ɓaɓa sabay. Ka hahəm Zlavay ava gədaŋ.

⁶⁵Ma ana, ke ŋgec zidaw mabay kad maslavda tata hay fakwanay. Ndah dapa wudam ta vavara te Zudey fakwanay ac ka gwaɗ ma ana.

⁶⁶Ndana hay fakwanay macəna ma ana, ac ka wulakaw, gege: «Wat ana nesey sə, e te tər ka nda melemey?» Ece gweɗ ara nesey sə, afa gədaŋ ta Bay Mazlakava aŋga da yaŋ wat ana.

⁶⁷Ava dəɓa ana, Mesfen Mavəna ke dek a yaŋ Zakaray, papaŋ ta wat ana. Ka zlar mabəzad ma ara nda mehwedek ma ke gweɗ, gege:

⁶⁸«Mahahəmakwa Bay Mazlakava, Zlav te Isreyel, afa ke jənec ndah tata, ke mbəlec avəda.

⁶⁹Ka zlərandakwa bigula ka ta mbəlandakwa. Nda ana sə, aŋga da hwaɗ ta way ta gwalay Deevet, Nda maŋga mezlər tata zleezle.

⁷⁰Zlavay ka gwaɗandakwa dəga zleezle jaka pa ma ta ndah mehwedek ma tata mavəna.

⁷¹Ka gwaɗandakwa, a ta pəlandakwa avəda dapa ha ta maslagəra tandakwa hay, va dapa ha ta ndah masa aca walandakwa fe ndey bay.

⁷²Ke ŋguzdek mawal vaw tata kad papaŋ ta papaŋ tandakwa hay, ka sənafa majaw ma tata mavəna ava andakwa.

⁷³Dapa majaw ma ana sə, Zlav ka gwaɗa kad Abəraham, papaŋ ta papaŋ tandakwa zleezle, gege:

⁷⁴“Ava dəɓa ta mapəraslakandakwa dapa ha ta maslagəra tandakwa hay sə, andə da kəɗakwa ha kad aŋga ava zidaw sabay.

⁷⁵Anda da njahakwa dapa meŋgə metekwen fa nda va meŋgə jene eve cəvey ana, fa yam te ndey tata dapa manjah tandakwa fakwanay.”

⁷⁶Kaa may, wat aɗaw, ka tərata ka nda mehwedek ma ta Zlav da Wudam, afa ke te dey fəma fa yam te ndey ta Bay Mazlakava ka ta ləmadan cəv tata hay.

⁷⁷Ke te ŋguzdecen kad ndah ta Zlavay, Zlavay ana sə, e te mbəlec avəda, jaka pe mepəlecen mebər teceŋ hay.

⁷⁸Bay tandakwa Zlavay e te mbəlec avəda sə, afa aŋga nda maŋga mezlər mambəla ana. Mbalay mambəla ana tata, ka zlərandakwa bat masa e dek da wudam ara pas te beŋgeɗek vaw.

⁷⁹Ke ŋguzdek vaw kad ndah masa ac manjaha dapa ləvaŋ va meezeŋ ta maməcay, afa a da padandakwaɗ ma dapa cəv te metehey.»

⁸⁰Ta wat ana sə, ke gəley, ka ŋgat leŋgesl fəma fəma. Ava dəɓa ana, ke dey ka ta njah pə yaŋ ta səɓak kasl pa pas ta maŋguzad vaw tata kad ndah te Isreyel hay.