Read Cuvok Lukas 13 Bible Online

Lukas 13 - Cuvok bible

Lukas 13

¹Dapa ŋgesey ana, ndana hay faŋga ɓa, ac ka gwaɗa Yesu, gege: «Pilatu ka kəɗa ndah Gelile ana hay avəda cukw cukw dapa masa aca ŋgə kwakwas kad Zlavay. Ka cama bembez teceŋ eve bembez ta gənaw hay fa slam ana.»

²Yesu ke vehecen, gege: «Akwa wulakiya sə, ac ndah maŋga mebər hay ka fəna Gelile hay dərziya mafay ta masa ec ke məcec ara ŋga geyey?

³Ya gwaɗakwa, ec ke fənec aabay, amaa daha akwar ka ŋgwada rav takwar aabay sə, akwar ta zə takwar fakwanay ara eceŋ ana may.

⁴Yaw, mawulakaw da yaŋ ndah kuraw dapa yaŋ ana cahkar, masa way mazambəla ana da gəva te Siluwey te mbeɗ kad yaŋ eceŋ. Akwa wulakiya ŋgesey sə, ndah ana hay ec ke fənec ndah dərziya de Zeruzelem eve mebər hay geyey?

⁵Ya gwaɗakwar, ec ke fənec aabay, amaa daha akwar ka ŋgwada rav takwar aabay sə, akwar ta zə takwar fakwanay ara eceŋ ana may.»

⁶Yesu ke gweɗec ava ma maɗəva, gege: «Ndana ɓa, maftay mapəca de ley tata. Ke dekey ka ta ŋgal wudiya ana, amaa maftay ana mahaya aabay.

⁷Bay te wudez ana, ka gwaɗa nda mapana ndey fe ley sə, gege: “Wala maftay nesey, mavay mahkar ye ke dekey ka ta ŋgal wudiya ana, amaa mahaya aabay. Ŋgəla avəda, bəna a fas slam de ley taambəla”.

⁸Amaa nda mapana ndey fe ley ana ka vahan, gege: “Bay aɗaw, gərda ta laməna na ɗagay, ya da tatəha dar te wudez ana, ya da həlana gəraŋ a dar ana.

⁹Gəla tasəfa sə, e te heyek kwa. Daha ke te heyə aabay suwar sə, ka da ŋgəlaw.”»

¹⁰Pas ta masasak vaw ɓa, Yesu aŋga dapa mesesərekec ndana hay dapa Way ta macə mbahw te Zuwef hay.

¹¹Ŋgwaz ɓa dapa way ana faŋga, aŋga eve mesfen maləza mavay kuraw dapa yaŋ ana cahkar. Mesfen maləza ana, ka hwarma avəda. A zlafa mezlec nduwak bay.

¹²Masa Yesu a wala ŋgwaz ana sə, ka zala, ka gwaɗa, gege: «Mamaŋ taaɗaw, mesfen maləza mahurmakaa nesey sə, ka gərdaka cay.»

¹³Yesu ka pafa ha ŋgwaz ana. Faŋga faŋga ana, ŋgwaz sə, ke zlecey, ka hahəm Zlavay.

¹⁴Amaa, bay ta Way ta macə mbahw te Zuwef hay ana, rav ka haca mabay mafay ta masa Yesu masa aŋga ta mbəl ndana pas ta masasak vaw. Mafay ana, ke gweɗec ndah dapa way ana faŋga, gege: «Manah makwa ɓa te meŋgə mezlər hay, daha akwa wal membəley sə, medek pəsaŋga ana hay ŋgesey, amaa akwar te dek pas ta masasak vaw bay.»

¹⁵Bay Mazlakava ka vahan, gege: «Akwar ndah masa neneŋ hay dapa ma ecew ecew! Pas ta masasak vaw sə, akwa pal zla takwar hay va zaŋgwa takwar hay dapa slam ta mandə jene tec hay ka ta sə yam aabay geyey?

¹⁶Yaw, ŋgwaz nesey, aŋga dapa tərsam ta Abəraham, aŋga majawa dapa ha ta Saadan mavay kuraw dapa yaŋ ana cahkar. Tata sə, ya da pəliya pas ta masasak vaw bay sə, mafay te mey?»

¹⁷Mafay ta ma ana hay nesey, hwar ke ŋgec maslagəra tata hay fakwanay. Amaa ta ndah dərziya makwasa faŋga sə, ec ke wesley da yaŋ mezlər hay mekele mekele mambəla ana masa Yesu te ŋgeceŋ.

¹⁸Ara nesey, Yesu ke gweɗ, gege: «Wunam ta bay ta Zlavay sə, aŋga ara mey? Ya da cacaliya eve mey?

¹⁹Ya zlafa macacaliya ava wut te venjeh masa ndana ta kəsiya, a sləkaɗ e ley tata. Wut te venjeh ana e pəcekey, e gəl ka gamslak mazlakava ana. Ɗiyak hay aca lam way fa ha ana hay.»

²⁰Yesu ke gweɗec saya, gege: «Ya da cacal Wunam ta bay ta Zlavay sə, eve mey?

²¹Ya zlafa macacaliya ava is masa ŋgwaz ta həliya kusetke, a haɗiya ava kəfa ta makala gaa, afa a da ɓəsla fakwanay.»

²²Yesu ke dey e Zeruzelem, ke də jaka pe berne hay va wunam hay dapa səɓak, ke sesərekec ndana hay.

²³Dapa ŋgesey ana, ndana ɓa ka nəkafa, gege: «Bay Mazlakava, Zlav a ta mbəl sə, ndana hay gaa aabay war geyey?» Yesu ke gweɗec ndana hay faŋga, gege:

²⁴«Meŋgə gədaŋ, te mesehw jaka pə ma ta way menjezl ana. Ya gwaɗakwar, ndana hay gaa ac ta yah mesehw kad pa, amaa ac ta zlafa bay.»

²⁵«Yaw, pas amta, bay ta way e te zleftek ka ta ɓazl ma ta way. Ara nesey, akwar te zlec da vəda, akwar te zel fəma ta way, akwar te gweɗey: “Bay Mazlakava, wunandan ma ta way!” A ta vahakwaɗ, gege: “Akwa dek da ma, ya sənakwar bay.”

²⁶Ava dəɓa ana, akwar ta zlar magwaɗa, gege: “Andə ka ndakwa ɗaf fa slam ana, andə ka səkwa jene fa slam ana, ka ka sasərakandaw dapa cəv ta maŋgway taciya hay”.

²⁷A ta gwaɗakwar saya, gege: “Akwa dek da ma, ya sənakwar bay. Akwar fakwanay ndah maŋga jene hay masa ece teh bay, madaɓa dəreŋ eve yey!”

²⁸Pas masa akwar ta wala Abəraham, Izak, Zakwab va ndah mehwedek ma fakwanay manjaha dapa Wunam ta bay ta Zlavay, takwar sə, akwar magəra da vəda!

²⁹Ara nesey, ndana hay ec te dekey jaka bəlam va jaka ma ta wudam, jaka sakatay va jaka hwahwaɓay ka ta ndə ɗaf ta macunam dapa Wunam ta bay ta Zlavay.

³⁰Yaw, ŋgeɗ hay deveŋ ndah metekweɗ ana, ec te tərec ndah mama hay. Deveŋ ndah mama, ec te tərec ka ndah metekweɗ ana.»

³¹Pəsaŋga ana ŋgesey, ndah deveŋ Farisa hay ɓa, ac ka ŋgucafa vaw Yesu aca ra ŋguzdana ma, ac ka gwaɗa, gege: «Zleftek fana, daɓa pa slam mekele, afa Herawt a wal ma ta kəɗakaa ka macəhwandaw.»

³²Yesu ke vehecen, gege: «Madaɗ ma ta gwaɗa gwebegwebekw[3] ana: “Aha, ya mbas damkwaw hay, ya mbəl ndana hay dapa mehecey, pəsna, tedew, dapa manah mamahkar ana sə, ya ta ndəvda mezlərey aɗaw”.

³³Amaa a lada ya kəs cəvey, ye də pəsna, tedew, badamta saya, afa gədaŋ dapa kad ndana hay ac da kəɗ nda mehwedek ma dəreŋ eve Zeruzelem.»

³⁴Ava dəɓa ana, Yesu ke gweɗ, gege: «Zeruzelem, Zeruzelem, Zlav ka zləraka ndah mehwedek ma tata, ke ke kəɗec avəda cukw cukw. Ka zlərakwar maslaŋ tata hay, ke ke kelec eve kekeŋ. Pas mekele, ya ka wal maɓəc wudiyak hay ara mamaŋ siyakw ta ɓəc wudiya hay pa pərkwasla tata, amaa akwar ka walaw aabay!

³⁵Macəna, Zlav a ta həla ha tata da yaŋ akwar. Way ta kwakwas takwar a ta tərata ke yidey. Ya gwaɗakwar, akwar te weleyey fe ndey ɓasabay, kasl pa pas masa akwar te gweɗey: “Mapəsma de ŋgey da yaŋ nda masa e dek eve mezel ta Bay Mazlakava.”»