Read Cuvok Lukas 15 Bible Online

Lukas 15 - Cuvok bible

Lukas 15

¹Pas mekele ɓa, ndah macəkala budaw[5] va ndah maŋga mebər hay ac ka ŋgucafa vaw Yesu fakwanay ka ta cəkafa zləmay.

²Farisa hay va ndah mesesərekecen ma majawa kad ndana hay ec ke hwehwer dapa taɓa teceŋ, ec ke gweɗ, gege: «Nda ana na e kəsec ndah maŋga mebər hay[6], a ndə ɗaf eve eceŋ fa slam ana sə, gwagumaw?»

³Ara nesey, Yesu ke gweɗec ava ma maɗəva, gege:

⁴«Daha ndana deveŋ akwar aŋga ava təmak hay temere, amaa amta deveŋ eceŋ ka zata sə, nda ana a gərda təmak hay kwakwar cuɗ dapa yaŋ ana cuɗ dapa səɓak, e dey, e te yehek təmak amta maza ana, say aŋga te ŋgetek avəda aabay geyey?

⁵Daha ke te ŋgetek avəda sə, e te wesl mabay. A ta lapaɗ təmak tata ana fa uway,

⁶e te dek kad a wunam. Mahusa tata a wunam sə, a ta zal guula tata hay va maslavda tata hay e te gweɗec, gege: “Medekey, mawaslakwa fa slam ana, afa təmak aɗaw ka zata, ye ke ŋgetek avəda.”»

⁷«Ya gwaɗakwar, meweslə ɓa da baymaləvaŋ mafay ta nda maŋga mebər amta masa ka ŋgwada rav tata. Mewesley ana ŋgesey, ka fəna meweslə da yaŋ ndah kwakwar cuɗ dapa yaŋ ana cuɗ masa aca wal maŋgwada rav tec bay.»

⁸«Macak zləmay saya, ŋgwaz ɓa, aŋga ava yam ta səlay kuraw. Daha səlay ana amta[7] ka zata sə, a gəɗa kwakwaw fa petərla, a yahiya eve leŋgesl eve leŋgesl dapa mafaɗ way kasl aŋga te ŋgetek avəda aabay geyey?

⁹Masa ke te ŋgetek avəda sə, a zal guula tata hay ava maslavda tata hay, e te gweɗec, gege: “Medekey, mawaslakwa fa slam ana, afa səlay aɗaw ka zata, ye ke ŋgetek avəda”.

¹⁰Ara nesey, ya gwaɗakwar, ara aŋga ana, meweslə ɓa da vara Maskəla hay ta Zlavay, mafay ta nda maŋga mebər amta masa ka ŋgwada rav tata.»

¹¹Yesu ke gweɗec saya, gege: «Ndana ɓa, aŋga ava wudeh ecew.

¹²Pas ɓa, wat matabuwa ka nəkafa papaŋ, gege: “Papa, vənandan meven ta ma te jene hay masa andə ta camiya ava dəɓa takaa. Yaw, meven ta ma taaɗaw sə, vuwa təlam cay”. Papaŋ sə, ke vəneceney.

¹³Ava dəɓa ta manah kusetke, wat matabuwa sə, ka husamda jə tata hay fakwanay, ke dey ava səlay ana pa vavara ɓa dəreŋ. Dapa vavara ana faŋga, ka zlar manas səlay ana kad pe jene hay mambəla ana hay aabay. Ka kwakwaca səlay ana avəda kad pa manjah masa sefteleh.

¹⁴Masa ka ndəvda səlay tata ana fakwan cay sə, may mazlakava ana ke ŋgə dapa vavara ana, ka ŋgat jə ta mandə ɓasabay.

¹⁵Ara nesey, ke dey, ke ŋgə mezlər da way ta ndana dapa vavara ana faŋga ɓa. Nda ana, a zlarda kad e ley, ke te ɓəcec vetem hay.

¹⁶Wat sə, may ka kəɗa mabay. Mafay ana, ka wulak mandə wut te wudez hay masa vetem hay aca ndiya, amaa ndana mavana cəv aabay.

¹⁷Ara nesey, ka zlar mawulak yaŋ da yaŋ jə masa aŋga ta ŋgiya, gege: “Ndah maŋga mezlər da way ta papa, ece ndə jene, ece mbəney, aca gərda dərziya ana, amaa taaɗaw sə, may e ɓəretiyey fana!

¹⁸Zuwan ya gərda wunam ana, ya vahaɓa kad vara papa, ya da gwaɗa: Papa, ye ke ŋgə mebər fa yam te ndey ta Zlavay va fa yam te ndey takaa.

¹⁹Təlam nesey, ya husa masa ke de zeliyey ka wudiyak sə, ɓasabay. Ara nesey, peɗiyey ara nda maŋga mezlər takaa war.”

²⁰Ke zleftek, ke vehey kad vara papaŋ.» «Amaa masa aŋga dəreŋ ava way ta papaŋ heley sə, papaŋ ka wala, ka ŋgafa metekweney. Ka hway ka ta cə yaŋ ava aŋga, ka humbataw.

²¹Wudiya sə, ka gwaɗa, gege: “Papa, ye ke ŋgə mebər fa yam te ndey ta Zlavay va fa yam te ndey takaa. Təlam nesey, ya husa masa ke de zeliyey wudiyak sə, ɓasabay”.

²²Amaa papaŋ ke gweɗec ɓel tata hay, gege: “Mevesek vaw, mekəsek rəkwat mambəla ana ta səlay, mapan fa vaw ta wat aɗaw nesey. Mekəsek njəlay ta wut ta ha, matalan pa wut ta ha tata. Mekəsek tahkar, mapan pe sek.

²³Metəhezek wut ta zla magəla, masa andə ta rəfakwa ŋgesey. Mazlaha, maŋgakwa macunam, mawaslakwa,

²⁴afa wat aɗaw nesey, aŋga ara wat masa ka məcata, amaa ka pərakata dapa maməcay, aŋga ara wat masa ka zata, amaa ye ke ŋgetek avəda”. Ndah maŋga mezlər tata hay sə, ac ka ŋgaw ara bay ta way tec te gweɗeceŋ. Ara nesey, ndana hay ac ka zlar meŋgə macunam eve mewesley.»

²⁵«Dapa masa aca ŋgə macunam ana heley, wut ta nda ana mazlakava sə, aŋga de ley. Medek tata de ley kad a wunam, ka cəna maɓəsl ma te megərevey va ta gaŋgaŋ.

²⁶Ka zal nda maŋga mezlər ta papaŋ amta, ka nəkafa, gege: “Maŋgata da wunam ana mey?”

²⁷Nda maŋga mezlər sə, ka vahan, gege: “Malamakw ka vahakata, papakw ka zlaha wut ta zla masa andə ta rəfakwa sə, avəda, afa malamakw ana e vehek sə, aŋga werwer”.

²⁸Wat mazlakava sə, pembey! E ŋgə rav, ka wal mesehw kad way ɓasabay. Papaŋ ke dey vara vaw, ka ŋgana mbahw, e de sehw kad way.

²⁹Amaa wat sə, ka vahan papaŋ, gege: “Papa, cak zləmay. Mavay hay ɓa, ya ŋgakaa mezlərey, ya cənakaɗ ma cəɗem cəɗem, amaa ka ka viyey kwa wut ta ɗakw amta ke te ŋgə macunam ava mandala aɗaw hay sə, aabay.

³⁰Amaa mevehek ta wudiyak nesey sə, ka ndəvakaɗ zleley takaa hay avəda fakwanay ta mayah barvəla hay fa zaŋ ana. Amaa kad aŋga sə, ka zlahana wut ta zla masa andə ta rəfakwa sesəker sə, mafay te me ŋgəɗa mey?”

³¹Papaŋ ka vahan, gege: “Wat aɗaw, cəɗem cəɗem andaw ava kaa fa slam ana, zleley aɗaw hay fakwana nesey sə, takaa ana.

³²Amaa a lada anda ŋgakwaɗ macunam ta malamakw nesey eve mewesley ɗagay, afa aŋga sə, aŋga ara wat masa ka məcata, amaa ka pərakata dapa maməcay, aŋga ara wat masa ka zata, maŋgata avəda!”»