Read Cuvok Lukas 19 Bible Online

Lukas 19 - Cuvok bible

Lukas 19

¹Ava dəɓa ana, Yesu ke dey jaka pe berne te Zeriku.

²Ndana ɓa faŋga, mezel Jakayus. Aŋga bay ta ndah macəkala budaw. Nda ana, aŋga eve zleley mabay.

³Ka yah cəvey, a wal da wala Yesu, amaa ka zlafa mawala aabay, afa aŋga desləke, ndana hay gaa aca təhan ndey avəda.

⁴Ka hway kad fəma ta miya, ke tep fa həval da ma te cəvey ana, a wal da wala Yesu masa e te də jaka vaŋga.

⁵Mahusa te Yesu pa slam ana, ka pə ndey kad a wudam, ka gwaɗa Jakayus ana, gege: «Jakayus, vesek vaw te mebəreŋgey, ta pəsna ya ta nah da way takaa.»

⁶Mafay ana, Jakayus ke vesek vaw, ke bəreŋgek kad fa vara, ka kəs Yesu eve mewesley.

⁷Amaa ndah mawala sə, ec ke hwehwer da yaŋ Yesu, gege: «Gwalaha! Nda ana e dey, a ta nah a way ta nda maŋga mebər hay sə, meemey!»

⁸Jakayus ke zlec fəma ta Bay Mazlakava, ka gwaɗa, gege: «Cəna, Bay Mazlakava, təlam nesey, ya ta vəna jeŋ aɗaw hay slam ecew, slam amta sə, ye te vecen kad maslamarga hay. Daha ya ka kəs budaw vara ndana ava gədaŋ ka fəna ara masa majawa sə, ya ta vahan ara aŋga ana dəɓa faɗ.»

⁹Yesu ke gweɗ, gege: «Ta pəsna, Zlav ke mbəlec ndah da hwaɗ ta way na avəda, afa Jakayus aŋga da hwaɗ ta way ta gwalay Abəraham.

¹⁰Eve metehwe ana, Wut ta nda e dek sə, a ta yah ndah maza, e de mbəlec avəda.»

¹¹Ara masa ndana hay aca cak zləmay fa ma ana hay, Yesu ke gweɗec ava ma maɗəva saya, afa aŋga zef eve berne te Zeruzelem. Eceŋ sə, ac ka wulakaw, Meŋgə bay ta Zlavay sə, e te ŋguzdek faŋga cay.

¹²Ke gweɗ, gege: «Ndana ɓa, aŋga tərsam ta bay, ke dey pa vavara ɓa dəreŋ, afa aca ra paɗ ka bay. Ava dəɓa ana, e de vehek kad pa vavara tata.

¹³Amaa wagaa e te dey sə, ka zal ndah maŋga mezlər tata hay kuraw. Ke vec səlay bakatar temere temere kwa waawa teceŋ, gege: “Meŋgə mezlər ava aŋga kasl pa pas te mevehek taaɗaw.” Ka data.

¹⁴Amaa ndah ta vavara tata ana, ac ka wal a da njah ka bay teceŋ sə, aabay. Mafay ana, ac ka zlar ndana hay ava dəɓa tata, gege: “Anda wal nda ana ŋga da njah ka bay taciya bay.”»

¹⁵«Amaa ava aŋga ana fakwanay, ac ka paɗ ka bay jaŋgata. Mevehek tata kad pa vavara tata sə, ke zelec ndah maŋga mezlər tata hay masa aŋga te vec səlay, afa a da səna səlay masa ac ta ŋgatiya kad yaŋ ana.

¹⁶Nda macaaca ana ke dekey fəma ta bay tata, ka gwaɗa, gege: “Bay aɗaw, ya ka ŋgat səlay bakatar temere temere kuraw ava səlay masa ke te viyey.”»

¹⁷«Bay sə, ka vahan, gege: “Etehey! Nda maŋga mezlər mambəla ana, mafay ta masa ke ke ŋgə mezlər eve cəvey ana eve jene kusetke, ara nesey, ya paɗakaa ke de ŋgə bay da yaŋ berne hay kuraw.”»

¹⁸«Nda meecew ana, ke dekey, ka gwaɗa, gege: “Bay aɗaw, ya ka ŋgat səlay bakatar temere zlam ava səlay masa ke te viyey.”»

¹⁹«Bay sə, ka gwaɗa ara ta nda macaaca ana sə, jaŋgata, gege: “Kaa may, njah bay da yaŋ berne hay zlam.”»

²⁰«Nda leŋgeɗey, ke dekey, ka gwaɗa, gege: “Bay aɗaw, aha səlay takaa. Ya ka raɓakaɗ ha pe bertete,

²¹afa ye ke lel fa kaa. Ya səniya, kaa sə, ka nda masa ka sən metekwen fa ndana bay. Ka kəs jene dapa slam masa ka ka paw aabay. Ka cə daw dapa slam masa ka ka sləkaw aabay.”»

²²«Bay sə, ka gwaɗa, gege: “Nda maŋga mezlər mambəla ana aabay. Ma takaa hay masa ke te gweɗek nesey sə, ya ta təɗakaa ma yaŋ ava aŋga. Daha ke səniyey, ya nda masa ya sən metekwen fa nda bay, ya kəs jene dapa slam masa ya ka paw aabay, ya cə daw dapa slam masa ya ka sləkaw aabay.

²³Naa ka van səlay ana kad nda mekele bay sə, mafay te mey? Efes pas masa ye te vehekey sə, ya ta kəsiya ava yam da dara ana.”»

²⁴«Bay sə, ke gweɗec ndah da cak tata, gege: “Makəsan səlay tata ana avəda, mavan kad nda masa aŋga ava səlay bakatar temere temere kuraw”.

²⁵Ndah ana, ac ka gwaɗa, gege: “Bay taciya, tata sə, aŋga ava bakatar temere temere kuraw cay biba!”

²⁶Bay sə, ke vehecen, gege: “Ya gwaɗakwar, nda masa aŋga ava jene mabay sə, ac ta pana a yaŋ ana saya. Amaa ta nda masa jə tata ana kusetke sə, ac ta kəsan mekusetke ana tata ŋga avəda.

²⁷Yaw, maslagəra aɗaw hay masa ac ka wal ya da njah ka bay tec bay sə, metəhezekeceŋ, mehwedekec kad fana, mekəɗec avəda cukw cukw fəma taaɗaw.”»

²⁸Ava dəɓa ta magwaɗ ma ana hay nesey, Yesu ke də kad pe berne te Zeruzelem. Ndana hay gaa ac ka cəpaw.

²⁹Mehusek tata zef ava wunam ta Betfazey va Betani, wunam hay masa ac zef ava ŋguɗa ta Awliviyey hay. Ka zlar ndah masasəraka jene tata ecew aca ra də kamma pa wunam ana, ke gweɗec, gege:

³⁰«Madaɗay pa wunam fəma tandakwa antisey. Daha akwar ka husata cay sə, akwar ta ŋgat wut ta zaŋgwa majawa, ndana ke tep a yaŋ ana aabay heley. Mepəlekey, mehwedekendey.

³¹Daha ndana ka nəkafakwar, gege: “Akwa pəliya ke mey?” Akwa ra gwaɗa: “Bay Mazlakava a waya.”»

³²Ndah masasəraka jene ecew sə, ec ke dey. Mahusa teceŋ, ac ka ŋgatafa jeŋ ana ara Yesu te gweɗeceŋ.

³³Dapa masa aca pəl wut ta zaŋgwa ana, ndah ta zaŋgwa ana ec ke nəkefec, gege: «Akwa pəl wut ta zaŋgwa ana ke mey?»

³⁴Ec ke vehecen ma ana, gege: «Bay Mazlakava a waya.»

³⁵Ac ka hwadan wut ta zaŋgwa sə, kad Yesu. Mahusa teceŋ, ac ka kəs rəkwat tec hay, ac ka caɗ fa dəɓa ta zaŋgwa ana, ac ka zləmadaɗ Yesu a yaŋ ana[8].

³⁶Dapa masa e dey, ndana hay ac ka hahəlan yaŋ, ndah dərziya ac ka caɗ rəkwat tec hay pe cəvey fəma te Yesu.

³⁷Dapa masa, aŋga zef eve berne te Zeruzelem, dapa cəv te mebəreŋgə fa ŋguɗa ta Awliviyey hay. Miya ta ndah masasəraka jene tata fakwan faŋga ec ke wesley, ac ka zlar mahahəm Zlavay ava gədaŋ, mafay ta cah hay masa ac ta wala fakwanay.

³⁸Ec ke gweɗ, gege: «Da lada sə, Bay Mazlakava da pəsafa ma bay masa e dek eve mezel tata. Metehey de ŋgə da baymaləvaŋ va membeɗey de ŋgə kad Zlav masa aŋga da baymaləvaŋ hay!»

³⁹Farisa hay dərziya faŋga dapa taɓa ta miya, ac ka gwaɗa Yesu, gege: «Nda masasəraka nda, gweɗec ndah masasəraka jene takaa aca ra njaha teete.»

⁴⁰Yesu ke vehecen, gege: «Ya gwaɗakwar, daha ec ke njehec teete sə, kwa kekeŋ hay ac ta cə lalaw ava gədaŋ!»

⁴¹Yesu a husa zef vara berne te Zeruzelem. Masa a wala berne ana, ɓəlaw ana makuɗa mafay te jene hay masa ec te ŋgetefec ndah dapa berne ana.

⁴²Ke gweɗ, gege: «Daha efes ka ka səna maŋgat meteh sə, gwagumaw dapa manah hay ana nesey, amaa təlam nesey ka raɓata fa yam te ndey takaa, ka zlafa mawal sabay.

⁴³Yaw, pas masa maslagəra takaa hay ac ta tulakakaa ava jə ta vəram hay, ac ta ɓəzlakaɗ ma ta way te berne, ka ta zlafa medek kad a vəda bay.

⁴⁴Ac ta mbəɗakaɗ berne takaa avəda fakwanay, ac ta gərda kwa kekeŋ da yaŋ kekeŋ aabay. Kaa va wudeh takaa sə, ac ta kəɗakwar avəda cukw cukw dapa galaŋ takwar, afa ka ka pə leŋgesl fa pas masa Zlav e te dek ka ta mbəlakwar sə, aabay!»

⁴⁵Ava dəɓa ana, Yesu ke sehw pə Way ta kwakwas. Dapa way ana faŋga, ndana hay aca ŋgə luma teceŋ. Ke mbəsec ndah mahusamda jene tec hay.

⁴⁶Ke gweɗ, gege: «Mavinda dapa Ma hay mavəna, Zlav ke gweɗ, gege: “Way aɗaw sə, way masa ndana hay ece re cəyey mbahw dapa”. Amaa takwar sə, akwa təraɗ way ana ka bədam ta makar hay!»

⁴⁷Cəɗem cəɗem Yesu a sasərak ndana hay dapa Way ta kwakwas. Bay hay ta ndaakwas hay, ndah mesesərekecen ma majawa kad ndana hay va mazlakava hay te Zuwef hay ac ka yah cəvey ka ta kəɗiya ka macəhwandaw.

⁴⁸Amaa ac ka ŋgat cəv ta matəhaziya aabay, afa ndana hay aca wal macak zləmay fa ma tata mabay.