Read Cuvok Lukas 2 Bible Online

Lukas 2 - Cuvok bible

Lukas 2

¹Yaw, dapa pas ana hay ŋgesey, Agustus, gwevernel dapa vavara ta Rawma, ke vec cəvey kad bay hay dapa vavara tata fakwanay, aca ra vinda ndana hay fakwanay.

²Ŋgesey, mavində vaw macaaca ana masa Kiriniyus aŋga gwevernel da yaŋ vavara te Siriya.

³Dapa ŋgesey ana, ndana hay fakwanay ac ke dey pe mevindek vaw ana. Kwa waawa ke dey pa wunam tata masa tərsam tec zleezle dapa.

⁴Zezef may, ke zleftek dapa pe berne Nezeret kad Gelile dapa berne te Deevet mezel Betəlehem dapa vavara te Zudey, afa aŋga da hwaɗ ta way va dapa tərsam te Deevet.

⁵Aca də kad arŋga ana sə, ke te vindek vaw ava ŋgwaza Maaray, masa aŋga ava hwaɗ.

⁶Mahusa tec e Betəlehem sə, pas te mehey ta Maaray ka husakata cay.

⁷E heyek cəvandaw tata sə, wat mawal. Ka paɗa wat ana ava rəkwat, ka nahaɗ pa karkaslah ta mandə jene ta gənaw hay, afa dapa way ta manah məlaŋ ana hay sə, slam kad eceŋ ɓasabay.

⁸Dapa vavara ana ŋgesey, gwala jene hay ɓa, ece pə ndey fa gənaw tec hay faŋga dapa səɓak ta vaɗ.

⁹Maskəla ta Bay Mazlakava ke ŋguzdecen vaw fəma teceŋ, meweɗ ta Bay Mazlakava ke səretec avəda ara slam mawaɗa, ac ke ŋgə zidaw macəkuma bay.

¹⁰Maskəla sə, gege: «Akwa ŋgə zidaw bay, afa ye dek sə, ka ta sləfakwaɗ Labara mambəla ana, ta mawaslda ndana hay fakwanay.

¹¹Tefes ta vaɗ nesey, Nda mambəla nda masa aŋga Kəristi Bay Mazlakava sə, ka hayata dapa berne ta bay Deevet.

¹²Mawala, akwar ta ɗaliya sə, fe jene hay nesey: Akwar ta ŋgat wat gwendez mapaɗa ava huba, aŋga manaha dapa karkaslah ta mandə jene ta gənaw hay.»

¹³Faŋga faŋga ana, miya ta maskəla hay mabay ec ke dekey, ac ka tulaka Maskəla medek macaaca ana, ac ka hahəm Zlavay ava laway. Dapa law teceŋ ana, ec ke gweɗ, gege:

¹⁴«Membeɗey de ŋgə kad Zlav da wudam da baymaləvaŋ. Metehey de ŋgey kad ndah masa e weleceŋ dapa vavara.»

¹⁵Ava dəɓa ana, maskəla hay sə, ec ke vehec a baymaləvaŋ. Gwala jene hay ec ke gweɗ dapa taɓa tec, gege: «Amcakwa e Betəlehem ana, ma ta wuzaɗakwaɗ jə masa aŋga te ŋgey masa Bay Mazlakava ta ŋguzdandakwaɗay.»

¹⁶Gwala jene hay sə, ec ke dey ava mavas vaw, mahusa teceŋ e Betəlehem sə, ac ka yahaw, ac ka ŋgat Maaray, Zezef va wat sə, manaha dapa karkaslah.

¹⁷Ava dəɓa ta mawala sə, ec ke ŋguzdecen ma masa maskəla te gweɗec da yaŋ wat.

¹⁸Ndana hay fakwan macəna ma ta gwala jene hay masa ec te ŋguzdeceney sə, ec ke rəzleceŋ.

¹⁹Ta Maaray sə, ka sləkaɗ ma ana fakwanay pe leŋgesl tata, ka yah macəna ma da yaŋ ana.

²⁰Ava dəɓa ana, gwala jene hay sə, ac ke vehec kad vara gənaw tec hay ava mahahəm Zlavay, ac ka hahəlan yaŋ mabay. Ac ka hahəmaw a yaŋ jene hay masa ac ka cəna, ac ka wala eve ndey teceŋ, afa ece welek sə, ara masa maskəla te gweɗeceŋ.

²¹Ava dəɓa ta luma amta, pas ta maŋgal ŋgwal ta wat ana, ac ka pafa mezel Yesu ara masa maskəla ta ŋguzdan kad mamaŋ dapa masa ke ŋgə ava hwaɗ bay heley.

²²Mehusek ta pas masa ma majawa ta Muyiz te gweɗey da yaŋ mapan vaw ta Maaray sə, ka husakata cay. Ac ka hwadaɗ wat sə, pe berne te Zeruzelem ka ta ŋguzdan kad Bay Mazlakava.

²³Ara masa mavinda dapa ma majawa ta Bay Mazlakava, gege: «Wudeh mawulah cəvandaw fakwanay sə, ac ta paɗ ha wal kad Bay Mazlakava.»

²⁴Maaray va Zezef ec ke dey ka ta ŋgə kwakwas ara masa magwaɗa dapa ma majawa ta Bay Mazlakava, ava mahwɗagwam hay mawula va ŋgwaziya ana, daha aabay mahwdakwar hay kweskweske mawula va ŋgwaziya ana.

²⁵Ndana ɓa de Zeruzelem mezel Simeyaŋw, aŋga nda mambəla ana, nda manaha yaŋ kad Zlavay. A ɓal nda masa Zlav e te zlərek ka ta mbəl Isreyel hay. Mesfen Mavəna ka njah ava aŋga cəɗem cəɗem.

²⁶Mesfeney ana, ka ŋguzdan kad Simeyaŋw, a ta mac aabay, say aŋga ta wala Kəristi, masa Bay Mazlakava e te zlərekey.

²⁷Ava dəɓa ana, Mesfeney ana ka hwadaɗ Simeyaŋw sə, pə Way ta kwakwas. Dapa pas ana ŋgesey, papaŋ va mamaŋ te Yesu ac ke hwedek wat kufiyaŋ sə, kad pə Way ta kwakwas ka ta ŋgə jə masa ma majawa te gweɗey da yaŋ wat ana.

²⁸Simeyaŋw ka wala wat ana, ka kəsaw pa ha tata, ka ŋgana wasay Zlavay, gege:

²⁹Təlam nesey, Bay Mazlakava, jə masa ka ka gwaɗa sə, ka ŋgata cay, ka zlafa magərda nda maŋga mezlər takaa da məc dapa metehey.

³⁰Afa ya ka wala Nda ma ta mbəla nda sə, eve ndey aɗaw cay.

³¹Nda masa ka ta ləmadiya ka ta mbəl ndana hay fakwanay.

³²Aŋga sə, slam mawaɗa kad masa aca sənakaa bay fakwanay, a ta vana gədaŋ takaa kad ndah takaa Isreyel.

³³Ac papaŋ va mamaŋ te Yesu, ac ke rəzlec da yaŋ ma masa Simeyaŋw te gweɗey da yaŋ wat ana.

³⁴Simeyaŋw ke pəsefec ma, ka gwaɗa Maaray mamaŋ sə, gege: «Wat ana nesey aŋga mapa sə, te metəɗdec ndah te Isreyel kad pe mebərey, dərziya hay ke te mbəley. A ta njah ke jə te meɗel jene ta Zlavay masa ndana hay ac ta ŋgwadafa dəɓa Zlavay.

³⁵E te ŋguzdek mawulak yaŋ hay maraɓa dapa rav ta ndana hay gaa. Kaa, mamaŋ sə, rav a ta ndalakaa ara ndana tatawa kaa ava kafaya.»

³⁶Dapa Way ta kwakwas ana sə, ŋgwaz mehwedek ma ɓa mezel Hana. Aŋga dəm te Fenəwel da hwaɗ ta way ta gwalay Aser, aŋga ava mavay gaa cay. Dapa medə tata kad a way ta mawal sə, ke ŋgə mavay tasəla ac ava mawula fa slam ana.

³⁷Ava dəɓa ta maməc ta mawula, ŋgwaz ana, ka njah ŋgwa macəhwandaw. Mavay tata fakwanay ke ŋgə kwakwar cahkar va faɗ. Cəɗem cəɗem aŋga dapa Way ta kwakwas, a kəɗana ha Zlavay hwavavaɗ, hwapapas, jaka pe meŋgə dalyama hay va macə mbahw hay.

³⁸Masa Simeyaŋw ke pəsefec ma cay sə, faŋga faŋga ana, Hana sə, ke ŋgucefec vaw Zezef va Maaray, ka zlar mahahəm Zlavay mafay ta wat ana. Ava dəɓa ana, ke gweɗ da yaŋ wat ana kad ndana hay fakwanay de Zeruzelem masa aca ɓal Zlav e de pəlec avəda.

³⁹Masa ac Zezef va Maaray ka ndəvda meŋgə kwakwas ana fakwanay ara ma majawa ta Bay Mazlakava te gweɗey sə, ec ke vehec pe berne teceŋ de Nezeret dapa vavara te Gelile.

⁴⁰Ta wat sə, ke gəley, ka ŋgat gədaŋ va leŋgesl fəma fəma. Mapəsma ta Zlavay ka njah da yaŋ ana.

⁴¹Fa mavay fa mavay, Zezef va Maaray ece dey e Zeruzelem ka ta ŋgə macunam ta Pak.

⁴²Masa Yesu aŋga ava mavay kuraw dapa yaŋ ana ecew sə, papaŋ va mamaŋ ac ka kəsaw kad pa macunam ara ma majawa tec te gweɗey.

⁴³Masa macunam ɓasabay sə, ec ke vehec kad a wunam, amaa te Yesu sə, ka njahata ava dəɓa de Zeruzelem. Ac papaŋ va mamaŋ sə, ac ka wala aabay.

⁴⁴Ac ka wulakaw, gəla aŋga ava mandala tata hay dapa cəvey. Ac ka ŋgə manah amta dapa cəvey sə, ac ka yahaw dapa taɓa ta ndah teceŋ va ndah masa ece səneceŋ.

⁴⁵Amaa ac ka ŋgataw aabay. Mafay ana, ec ke vehec Zeruzelem ke te yehekey.

⁴⁶Dapa manah mamahkar ana sə, ac ta ŋgatafa aŋga dapa Way ta kwakwas, manjaha dapa taɓa ta ndah mesesərekecen ma majawa kad ndana hay, e cəkefec zləmay, e nəkefec ma hay.

⁴⁷Ndana hay fakwanay faŋga ac ka cəkafa zləmay, ec ke rəzley da yaŋ mesen jene hay tata va mavah ma tata mambəla ana kad pa ma ta ndah masasəraka ndana hay.

⁴⁸Masa papaŋ va mamaŋ ac ta wala sə, ec ke rəzlec fətiya mabay. Mamaŋ ka gwaɗa, gege: «Wat aɗaw, ka ŋgandaw ara nesey sə, mafay te mey? Andaw ava papakw cuweeney zidaw ka kəɗandaw ta mayahakaa.»

⁴⁹Yesu gege: «Akwa yehiyey ara nesey sə, mafay te mey? Akwa sən masa ya ta njah dapa way ta papa ara nesey sə, bay geyey?»

⁵⁰Amaa Zezef va Maaray ac ka cəna ma da yaŋ ma masa Yesu te gweɗec sə, aabay.

⁵¹Yesu ke veh eveceŋ kad Nezeret ana. Ke cənecen ma ta papaŋ va mamaŋ. Mamaŋ sə, ka sləkaɗ ma ana fakwanay pe leŋgesl tata.

⁵²Yesu, e gəley, e dey fəma fəma eve leŋgesl meven jene hay mambəla ana, fa yam te ndey ta Zlavay va ta ndana hay.