Read Cuvok Lukas 20 Bible Online

Lukas 20 - Cuvok bible

Lukas 20

¹Pas ɓa, Yesu aŋga dapa masasərak ndana hay dapa Way ta kwakwas, ke bəzedec Labara mambəla ana. Bay hay ta ndaakwas hay, ndah mesesərekecen ma majawa kad ndana hay va mesnendə te Zuwef hay, ec ke dekey,

²ac ka nəkafa, gege: «Ŋguzdandanay, ke ŋgə jeŋ ana hay ara nesey sə, magwaɗaka wa, mavakaa gədaŋ te meŋgə jeŋ ana hay wa?»

³Yesu ke vehecen, gege: «Yey may, ya nəkafakwar ma pal amta, megweɗiyey.

⁴Mezlərek Zaŋ ke te ŋgec beetem kad ndana hay sə, Zlav geyey, ndana hay?»

⁵Ndah ana ac ka cə mamənak dapa taɓa tec, gege: «Ma da vahan kad pa gwagumaw? Daha anda gwaɗakwa: “Zlav te zlərekey”, a ta gwaɗandakwa, gege: “Naa akwa kəs ma ta Zaŋ Baatis ana aabay sə, mafay te mey?”

⁶Amaa daha anda gwaɗakwa: “Ndana hay te zlərekey”, ndana hay fakwanay ac ta kalandakwa eve kekeŋ, ac ta kəɗandakwa avəda, afa ndana hay fakwanay aca səniya mambəla ana, Zaŋ Baatis, aŋga nda mehwedek ma.»

⁷Mafay ana, ac ka vahan, gege: «Anda səniya bay»

⁸Yesu ke vehecen, gege: «Yaw, daha akwa wal meveheken ma ana bay sə, ya may, ya ŋguzdakwaɗ nda maviyey cəv te meŋgə jeŋ ana hay na aabay.»

⁹Ava dəɓa ana, Yesu ke gweɗec ndana hay ava ma maɗəva, gege: «Ndana ɓa ke ŋgey wudez te rezeŋ hay de ley tata. Ka gəraɗ ley ana pa ha ta ndah maŋga ley ta ndana masa aca ra vən jeŋ ana dapa ava nda te ley ana, ka data maŋgway dəreŋ, ke njehek gaa dərŋga.

¹⁰Masa kiya ta mandə wut te wudez ana hay ka husakata cay sə, ka zlar nda maŋga mezlər tata amta kad vara ndah maŋga ley tata ana aca ra vana meven ta ma tata may. Nda maŋga mezlər sə, ke də ley ana. Amaa ndah sə, ac ka kəɗa mabay, ac ka mbasana ava ha dahəŋga.

¹¹Ava dəɓa ana, nda te ley sə, a zlar nda maŋga mezlər tata mekele saya. Aŋga may, ac ka kəɗa ara nda macaaca ana suwar, ac ka lafaw, ac ka mbasana ava ha dahəŋga.

¹²Nda te ley sə, ka zlar nda maŋga mezlər tata mekele ka mahkar ana saya. Tata sə, ac ka kəɗa mabay, ac ka ŋgafa mbəlek fa vaw, ac ka kazlaɗ kad a vəda te ley ana.

¹³Mafay ana, nda te ley sə, ka wulakaw, gege: “Təlam nesey, ye de ŋgə sə, gwagumaw? Zuwan ya zlar wat aɗaw masa ya waya eleh nesey, aŋga sə, gəla ac ta cənan ma tata”.

¹⁴Amaa masa ndah maŋga ley tata ana ac ta wala sə, ece gweɗ dapa taɓa tec, gege: “Mawala nda ma ta cama ley ana nesey, daha ka husakata sə, anda ra kəɗakwaɗ avəda, afa ley ana da njah kad andakwa”.

¹⁵Mahusa tata vereceŋ, ac ka təhazaw, ac ka kazlaɗ kad a vəda, ac ka kəɗa avəda.» Ava dəɓa ana, Yesu ke nəkefec ndah faŋga, gege: «Dapa mawulak yaŋ takwar sə, nda te ley ana e te ŋgec ndah ana gwagumaw?

¹⁶Yaw, ya gwaɗakwar, nda te ley ana e te dek ke te bezlec ndah ana avəda fakwanay, e te vecen ley ana pa ha ta ndah mekele.» Masa ndah ana aca cəna ma ana ara nesey sə, ece gweɗ, gege: «Away, Zlav da ŋgaw ara na bay!»

¹⁷Yesu ke njerefeceŋ, gege: «Ma hay mavinda dapa Ma mavəna, gege: “Kekeŋ masa masamahəzla hay ta kazlda ava zlalav sə, anjəkar, aŋga kekeŋ mambəla ana ta mazlac way.”» Ma ana hay nesey sə, aca wal megweɗ gwagumaw?

¹⁸Yaw, nda masa ka təɗata fe kekeŋ ana sə, a paslata. Amaa daha kekeŋ ana ta kazlafa ndana sə, a mbata avəda mberkwekweɗ.

¹⁹Ndah mesesərekecen ma majawa kad ndana hay va bay hay ta ndaakwas hay, aca səniya Yesu sə, e gweɗek ma maɗəva nesey sə, da yaŋ eceŋ. Ac ka wal matəhaz Yesu pəsaŋga ana ŋgesey, amaa ece lel fa ndana hay.

²⁰E zlər dapa ŋgesey ana, ac ka jəɗ Yesu. Ac ka zlar ndana hay kad vara, afa aca ra jəɗiya dapa ma tata hay. Ndah ana, ac ka paɗ yaŋ teceŋ ara ndah mambəla ana. Aca wal aca ra cəna ma hay mambəla ana aabay dapa ma te Yesu, afa aca ra təhaziya, aca ra hwadaɗ a vara ndah ta ŋgwaməna, ac da təɗana ma yaŋ.

²¹Ac ka nəkafa, gege: «Nda masasəraka nda, anda səniya megweɗ takaa va mesesərek takaa sə, ac mambəla ana. Ke pec ndana hay fakwanay amta fa yam te ndey takaa. Ke sesərekec ndana hay aca ra njah ara masa Zlav ta waya eve metehwe ana.

²²Ara nesey, anda wal manəkafakaa, ma majawa tandakwa a vandakwa cəv ta mapəl budaw kad bay ta Rawma geyey, aabay?»

²³Amaa Yesu ka səna wewer tec sə, avəda, mafay ana, gege:

²⁴«Maŋguzdawa səlay ana amta hwa.» Dapa masa aca ŋguzdan səlay ana sə, ke nəkefec, gege: «Fa səlay ana nesey sə, yaŋ va mezel ta wa?» Ac ka vahan, gege: «Yaŋ va mezel bay ta Rawma.»

²⁵Yesu gege: «Ara nesey, meven ta ma te bay ta Rawma, mavan kad bay ta Rawma ana. Meven ta ma ta Zlavay sə, mavan kad Zlavay ana may.»

²⁶Aca jəɗ ma hay da hwaɗ tata, fəma ta ndana hay fakwanay, amaa ac a ŋgataw aabay. Sesəker ma masa Yesu te veheceney sə, ece rəzl da yaŋ ana mabay, ec ke njehec teete.

²⁷Ava dəɓa ana, ndah dərziya deveŋ Saaduki hay ac ka ŋgucafa vaw Yesu. Ndah ana hay ŋgesey sə, ndah makəsa mawulak yaŋ da yaŋ nda masa ka məcata sə, e te pərekek dapa maməc aabay[9] Ac ka nəkafa Yesu, gege:

²⁸«Nda masasəraka nda, zleezle Muyiz ka vindandakwa ma majawa, ke gweɗ, gege: “Daha ndana ka məcata, ŋgwaza ka hayana wat aabay, da lada sə, malamaŋ da kəs ŋgwa macəhwandaw ana, a da hayana wat pa slam ta malamaŋ masa ka məcata.”

²⁹Yaw, ndah va malamaŋ hay tasəla ɓa, masa hwaɗ ta way tec amta. Malamaŋ tec mazlakava kəs! A kəs ŋgwaz. Nda ana ɓərem a məcata, ka ŋgat wat ava ŋgwaz ana aabay.

³⁰Wat meecew ana, ka kəs ŋgwa macəhwandaw ana, ɓərem a məcata, ka ŋgat wat ava ŋgwaz ana aabay may.

³¹Ava dəɓa ana, wat mamahkar ana, ka kəs ŋgwaz ana may, ɓərem a məcata saya, ka ŋgat wat da vara ŋgwaz ana aabay suwar. Ara nesey, ac tasəla fakwanay teceŋ, ac ka kəs ŋgwaz ana, ac ke məceceŋ, ac ka ŋgat wat ava ŋgwaz ana aabay.

³²Mamaɗ yaŋ ana, ŋgwaz ana ɓərem a məcata may.

³³Ara nesey, pas masa ndah maməca, ac ka ta pərakata dapa maməcay sə, ŋgwaz ana a ta njah ka ŋgwaz ta walawa? Afa ac tasəla fakwanay ac ka kəsaw ka ŋgwaz teceŋ.»

³⁴Yesu ke vehecen, gege: «Dapa vavara nesey, mawulah va ŋgwazah aca kəs vaw.

³⁵Amaa ava dəɓa ta maməcay, mawulah va ŋgwazah masa Zlav te welec mambəla ana fa yam te ndey tata te mepərekek dapa maməcay sə, ac ta njah da cak tata. Dapa ŋgesey ana, mawulah va ŋgwazah ac ta kəs vaw ɓasabay.

³⁶Ac ta njah ara maskəla hay, ac ta məc ɓasabay. Ec te tərec ke wudeh ta Zlavay, afa ke zləmedec avəda dapa maməcay.

³⁷Kwa Muyiz, zleezle ke gweɗ eve metehwe ana, ndana hay ac ta pərakata dapa maməcay. Dapa ɗelewer masa aŋga ta vindiya da yaŋ kwakwaw masa e geɗ fa gamslak sə, ka zal Bay Mazlakava, gege: “Zlav ta Abəraham[10] Zlav ta Izak va Zlav ta Zakwab.”»

³⁸Yesu ke gweɗec saya, gege: «Vara Zlavay sə, ndah maməca va ndah eve ndey sə, ac fakwanay ec eve ndey, afa Zlavay sə, aŋga Zlav ta ndah eve ndey, kwa ec ke məceceŋ, aŋga Zlav teceŋ jaŋgata.»

³⁹Ndah mesesərekecen ma majawa kad ndana hay dərziya ac ka gwaɗa, gege: «Nda masasəraka nda, mavah ma takaa ana təɗe.»

⁴⁰Mafay ana, ndana hay ec ke lel ta manəkafa ma hay mekele mekele.

⁴¹Yesu ke nəkefec ndana hay faŋga, gege: «Ndana hay ece gweɗ, gege: Kəristi, aŋga wut te Deevet sə, a ŋgana gwagumaw?

⁴²Deevet ava yaŋ tata ana ka vindaw dapa ɗelewer ta Jaabura: “Bay Zlavay ka gwaɗa Bay aɗaw Mazlakava, gege: Dekey, njah da ha ta zam taaɗaw,

⁴³kasl pas masa ye te neheɗec maslagəra takaa hay a dara hwaɗ te sek takaa.”

⁴⁴Yaw, daha Deevet ava yaŋ ana ka zala Kəristi Bay aɗaw Mazlakava ara nesey sə, naa Kəristi ana da njah ka wut te Deevet ana sə, a ŋgana gwagumaw?»

⁴⁵Yesu ke kətec ndah masasəraka jene tata fa yam te ndey ta miya macəkafa zləmay fakwanay, gege:

⁴⁶«Mep leŋgesl fa ndah mesesərekecen ma majawa kad ndana hay. Aca wal maŋgway ava dawrawal ta maŋguzad mehehəm teceŋ. Aca wal ndana hay ece re gweɗefeceŋ ava manahda yaŋ kad fa vara dapa slam ta maɓac vaw hay. Dapa way hay ta macə mbahw sə, aca yah slam ta manjah fəma ta ndana hay, afa ndana hay fakwanay ece re weleceŋ. Pas ta macunam hay, aca yah slam ta manjah ta ndah mazlakava hay.

⁴⁷Asaya, daha aca cə mbahw sə, aca njahda gaa, afa ndana hay aca ra səna sə, ac ndah mambəla ana fa yam te dey ta Zlavay. Amaa ece pəreslecen jene hay ta ŋgwa macəhwandaw hay fakwanay. Mafay ana, ya gwaɗakwar, Zlav e te təɗec ma yaŋ ka fəna ta ndah dərziya hay.»