Read Cuvok Lukas 22 Bible Online

Lukas 22 - Cuvok bible

Lukas 22

¹Macunam te peŋ masa is dapa aabay mezel Pak sə, e ŋgucek vaw cay.

²Bay hay ta ndaakwas hay va ndah mesesərekecen ma majawa kad ndana hay ac ka yah cəvey ka ta kəɗ Yesu, amaa ec ke lel fa miya.

³Ava dəɓa ana, Saadan ke sehw pa rav ta Zudas, nda mezel Iskariyawt. Nda ana sə, aŋga nda amta deveŋ ndah masasəraka jene kuraw dapa yaŋ ana ecew.

⁴Zudas ke dey, ke te kərek maɗay ava bay hay ta ndaakwas hay va bay hay ta ndah maɓəla Way ta kwakwas ana, ka wal mevecen Yesu.

⁵Bay hay ta ndaakwas hay va bay hay ta ndah maɓəla Way ta kwakwas ana, ec ke wesl mabay. Mafay ana, ac ka gwaɗa daha ke te vecen Yesu ana sə, ac ta vana səlay.

⁶Zudas ka kəsaw te meveceney. Ara nesey, ka yah wewer te mevecen Yesu eve cəv masa ndana hay aca ra səna bay.

⁷Pas ta macunam te peŋ masa is dapa aabay sə, ka husakata cay. Pas ana ŋgesey, pas ta mazlah Wut ta təmak hay ke te ŋgə macunam ta Pak te Zuwef hay.

⁸Mafay ana, Yesu ke zlerdec Piyer va Zaŋ fəma tata kad Zeruzelem, gege: «Madaɗay ma ta ləmadandakwa slam va jə ta manday, anda da ndakwa ɗaf ta macunam ta Pak fa slam ana.»

⁹Ac Piyer va Zaŋ sə, ac ka nəkafa, gege: «Ka wal andaw ta ləmadandakwa slam va jə ta manday ana sə, dama?»

¹⁰Ke vehecen, gege: «Macak zləmay! Madaɗ pe berne te Zeruzelem. Amaa wagaa akwar te sehw pe berne ana sə, akwar ta cə yaŋ ava ndana ɓa, e dey ava yam dapa yes fə yaŋ sə, macəpaw kasl pə way masa e te sehw kad pa.

¹¹Magwaɗa bay ta way ana sə, nda masasərakandaw a nəkafakaa, gege: “Way masa andaw ta ndə ɗaf ta macunam ta Pak te Zuwef hay ava gulaɗaw hay dapa sə, aŋga fəla?”

¹²Ara nesey, a ta ŋguzdakwaɗ way da yaŋ way ɓa. Way ana sə, mazlakava ana eve jene hay masa anda walakwa fakwanay dapa ɓa, akwar da ləmadandakwa jə ta mandə dapa faŋga.»

¹³Ec ke dey, ac ka ŋgatafa jene hay fakwanay ara masa Yesu te gweɗeceŋ, ac ka ləmada ɗaf ta macunam ta Pak ana.

¹⁴Masa pas təɗe ta mandə ɗaf ta macunam ta Pak te Zuwef hay sə, Yesu va maslaŋ tata hay ec ke dey pə way masa Piyer va Zaŋ ta ləmadiya, ac ka ndə ɗaf fa slam ana.

¹⁵Yesu gege: «Ya ka wal mandə ɗaf ta macunam ta Pak te Zuwef hay nesey ava akwar fa slam ana, wagaa ec te ŋgediyey hahar!

¹⁶Aŋga, ya gwaɗakwar, ya ta ndə ɗaf ana ɓasabay, kasl pa pas masa ma da yaŋ ana ta panata fakwanay dapa Wunam ta bay ta Zlavay.»

¹⁷Ava dəɓa ana, Yesu ka kəs kwap, ka ŋgana wasay kad Zlavay, gege: «Makəs kwap nesey, masaw, akwar fakwanay.

¹⁸Aŋga, ya gwaɗakwar, ya ta sə yam te wut te rezeŋ nesey ava akwar ɓasabay, kasl pa pas masa meŋgə ta Zlav te husekey.»

¹⁹Ava dəɓa ana saya, ka kəs peŋ, ka ŋgana wasay Zlavay. Ka waca peŋ ana, ke vecen ndah masasəraka jene tata, gege: «Nesey sə, vaw aɗaw masa ya ta viya mafay takwar. Mandaw cəɗem cəɗem, afa ya da pəsakwar dapa yaŋ bay.»

²⁰Ava dəɓa ta mandə jene, ke vec kwap ka ŋgaw ara aŋga ana, eve megweɗ, gege: «Jə ta masə dapa kwap nesey sə, e ŋguzdek majaw ma masa Zlav ta jawiya waya ava ndana hay jaka pe bembez aɗaw.

²¹Mawala nda me te peɗiyey pa ha ta maslagəra aɗaw hay sə, aŋga kana fana, anda ndə ɗaf ava aŋga fa slam ana.

²²Eve metehwe ana, cama, Wut ta nda a ta məcata ara masa Zlav ka gwaɗa daha, amaa wabaw kad nda ma ta husamda pa ha ta maslagəra tata hay, afa marga a ta ŋgatafa!»

²³Mafay ta ma ana hay nesey, ndah masasəraka jene tata ac ka nəkaw dapa taɓa tec, gege: «Ma ta mbaha jeŋ ana ara na ndana wa?»

²⁴Ava dəɓa ana kusetke, ndah masasəraka jene ac ka tə yaw mabay dapa taɓa teceŋ, afa aca ra səna ma ta njah ka nda mazlakava deveŋ eceŋ sə, wa?

²⁵Yesu gege: «Bay hay dapa vavara nesey sə, aca ŋgə bay da yaŋ ndana hay ava gədaŋ. Aca wal sə, ndana hay ec de hehəmeceŋ, ec de zelec “bay hay maŋga mezlər mambəla ana”

²⁶Amaa kad akwar sə, de ŋgə ara na bay. Sesəker nda masa a wal manjah ka nda mazlakava deveŋ akwar sə, da njah ka matabuwa takwar. Nda maŋga bay da yaŋ akwar sə, da njah ka nda maŋga mezlər takwar.

²⁷Deveŋ nda mahəla ɗaf kad ndana va nda mandiya sə, mazlakava sə, wa? Mazlakava sə, nda mandana ɗaf biba? Amaa yey, ye deveŋ akwar sə, ara nda maŋga mezlər takwar.»

²⁸«Akwar sə, andakwa fa slam ana cəɗem cəɗem, kwa dapa marga hay masa e ŋgetefiyey, akwar ke gərdeyey aabay.

²⁹Ara masa Papa te viyey gədaŋ te meŋgə bay da yaŋ ndana hay, yey may, ya vakwar gədaŋ te meŋgə bay da yaŋ ndana hay.

³⁰Mafay ana, pas masa ye te ŋgə bay da yaŋ ndana hay sə, andə tandakwa jene va masə jene fa slam ana. Pas masa ya ka ta njahata fa slam ta manjah ta bay sə, akwar ta njah fa slam ta manjah ta bay ke te təɗec ma yaŋ tərsam te Isreyel hay kuraw dapa yaŋ ecew.»

³¹Yesu ka gwaɗa Simaŋw Piyer, gege: «Simaŋw, Simaŋw, cak zləmay, Saadan ka nək cəv vara Zlavay ta magwaguzakwar, ka wal a da pavakwar ara nda mapava bəley ka ta van wudiya ana hay ava sləɗa ana.

³²Amaa ya ka cə mbahw mafay takaa, afa ka da gərda makəsparav bay. Pas masa leŋgesl takaa ka vahakata kad vereyey saya sə, ke de vec gədaŋ kad malamakw hay.»

³³Piyer ka gwaɗa, gege: «Bay Mazlakava, ya maləmada ka ta cəpakaa, kwa aca hwadaka pa daŋgay, kwa ac ta kəɗakaa ka macəhwandaw, anda məc ava kaa cuweeney.»

³⁴Yesu ka vahan, gege: «Piyer, eve metehwe ana ya gwaɗakaa, wagaa balaŋgwaz a ta ŋgal uway ta pəsna sə, ke te cefiyey ma dəɓa mahkar, “Ya sənakaa bay, ya sənakaa bay.”»

³⁵Ava dəɓa ana, Yesu ke gweɗec ndah masasəraka jene tata, gege: «Pas masa ya ta zlardakwar ka ta bəzad Labara mambəla ana, akwar ka kəs səlay pa ha aabay, akwar ka kəs bakatar ta maŋgway aabay, akwar ka pə tahkar mekele aabay sə, akwar ka hwar jene ɓa geyey?» Ac ka vahan, gege: «Andə ka hwar jene aabay.»

³⁶Ke gweɗ, gege: «Amaa təlam nesey sə, nda masa aŋga ava səlay ɓa, a da kəsaw pa ha, nda masa aŋga ava bakatar ta maŋgway ɓa, a da kəsaw da ha. Nda masa aŋga ava kafaya aabay, a da husamda rəkwat tata ka ta husam kafaya amta,

³⁷afa ya gwaɗakwar, a lada masa mavinda dapa Ɗelewer mavəna da yaŋ yey sə, da ŋgata. Ma ana ke gweɗ, gege: “Aŋga maŋgəfa deveŋ ndah makəɗa ndana hay”. Eve metehwe ana, jə mavinda da yaŋ yey sə, cama a ŋgata.»

³⁸Ndah masasəraka jene tata ac ka gwaɗa, gege: «Bay Mazlakava kafaya hay ecew kana ɓa.» Ke vehecen, gege: «Na mak cay.»

³⁹Ka data kad a vəda, ke dey ara teceɗem kad fa ŋguɗa ta Awliviyey hay. Ndah masasəraka jene ac ka cəpaw.

⁴⁰Mahusa tata pa slam ana sə, ke gweɗec ndah masasəraka jene tata, gege: «Macə mbahw kad Zlavay da jənakwar, afa jə mafəca nda da fəcakwar kad pe mebər hay bay.»

⁴¹Ava dəɓa ana, ka ŋgəla vaw ava zlalav da cak teceŋ kusetke, daha ndana a kal kekeŋ sə, a husa pa slam ana. Ke kekəredey, ka cə mbahw, eve megweɗ, gege:

⁴²«Papa daha ka waya sə, ka zlafa maŋgucawa kwap na avəda dəreŋ eve yey. Amaa ava aŋga ana fakwanay, ŋgaw ara ka ta waya bəna, ara ya ta waya bay.» [

⁴³Dapa slam ana faŋga maskəla ta Zlav da wudam ka ŋguzdan vaw ka ta vana gədaŋ.

⁴⁴Ara nesey, Yesu ka cə mbahw ava gədaŋ tata fakwanay, afa zidaw ka kəɗa mabay. Mewreɓ fa vaw tata ke təkwek kad fa vara ara bembez.]

⁴⁵Ava dəɓa ta macə mbahw tata sə, ke zleftek, ke veh kad vara ndah masasəraka jene tata, ke ŋgetefec aca njawaŋ, afa mawulak yaŋ ke fənec fa gədaŋ.

⁴⁶Ke gweɗ, gege: «Akwa njawaŋ mafay te mey? Mezleftek, macə mbahw, afa akwar de təɗ pa gədaŋ te jə mafəca nda bay.»

⁴⁷Dapa masa Yesu aŋga dapa megweɗ heley sə, ndana hay gaa ec ke dey ava Zudas kad vara vaw, Zudas ana, e dek fəma teceŋ. Aŋga nda amta deveŋ ndah masasəraka jene kuraw dapa yaŋ ana ecew. Ka ŋgucafa vaw Yesu ka ta gwaɗafa ava mahumbat vaw, ara mandala tata.

⁴⁸Amaa Yesu ka gwaɗa, gege: «Zudas, ka ta və Wut ta nda pa ha ta maslagəra tata hay sə, ava mahumbat vaw geyey?»

⁴⁹Masa ndah da cak te Yesu aca wala jeŋ ana e ŋgey ara nesey sə, ac ka nəkafa, gege: «Bay Mazlakava, ka wal sə, anda tewec ndah ana avəda ava kafaya geyey?»

⁵⁰Nda amta deveŋ ndah masasəraka jene, wudak! A taw madərlam ta mazlakava ta ndaakwas hay, ka cərahan zləmay ta zam avəda ava kafaya.

⁵¹Amaa Yesu ke gweɗ, gege: «Magərda! Mak cay! Megərdec aca ra waw ara ac ta waya.» Yesu ka pafa ha zləmay ta nda ana, ka pukwan avəda.

⁵²Ava dəɓa ana, Yesu ke gweɗec kad bay hay ta ndaakwas hay, bay ta kafaraŋ hay maɓəla Way ta kwakwas va mesnendə hay te Zuwef hay masa ece dek ka ta təhaziya sə, gege: «Akwa dek ava kafaya, ava gada fa ha, fa ha, kad vereyey ara ya makar mapərasla nda sə, mafay te mey?

⁵³Masa ya da varakwar cəɗem cəɗem dapa Way ta kwakwas sə, akwar ke pefiyey ha ke te təhez aabay. Amaa təlam nesey, pas ana mapa kad akwar, akwar da ŋgə jə masa akwar ta waya da yaŋ yey va pas ta gədaŋ ta bay ta ləvaŋ hay.»

⁵⁴Ava dəɓa ana masa ac ka təhaza Yesu avəda, ac ka hwadaɗ a way ta mazlakava ta ndaakwas hay. Piyer ke cəpeceŋ, aŋga dəreŋ.

⁵⁵Da way ta nda ana, kwakwaw magəɗa dapa zaŋ ta way ɓa. Piyer ke dey, ka njah pa taɓa ta ndah da cak ta kwakwaw ana.

⁵⁶Dem maŋga mezlər da way ana faŋga ɓa, a ta wala Piyer manjaha da cak ta kwakwaw ana sə, baa! A pafa ndey, ke gweɗ, gege: «Nda nesey sə, ac aŋga!»

⁵⁷Amaa, Piyer a ta cəna ara nesey sə, a cafa ma, gege: «Away! Ŋgwaz nesey, ya sən nda ana bay.»

⁵⁸Manjah kusetke saya, nda mekele ɓa ka wala Piyer, ka gwaɗa, gege: «Kaa sə, ka deveŋ ndah masasəraka jene tata.» Amaa Piyer ka vahan nda ana, gege: «Away! Ye deveŋ eceŋ aabay.»

⁵⁹Ava dəɓa ana, manjah zəɓata saya, nda mekele ɓa saya a təkafa ha ma ana ava gədaŋ, ke gweɗ, gege: «Eve metehwe ana, nda nesey sə, ka njah ava aŋga, afa aŋga nda Gelile ana.»

⁶⁰Amaa Piyer ka vahan kad nda ana, gege: «Nda nesey, ya sən ma masa ka wal megweɗ na bay.» Faŋga faŋga ana, masa ka ndəvda ma ana aabay heley sə, balaŋgwaz ka ŋgal uway.

⁶¹Bay Mazlakava Yesu ka ŋgwadafa ma Piyer, ka njarafa. Dapa ŋgesey ana, Piyer ka sənafa ma masa Bay Mazlakava Yesu ka gwaɗa, gege: «Wagaa balaŋgwaz a ta ŋgal uway ta pəsna sə, ke te cefiyey ma ka mahkar.»

⁶²Piyer ka data a vəda, ka kuɗa mabay, ka zalda marava.

⁶³Ndah maɓəla Yesu sə, ac ka sasarafa, ac ka kəɗaw.

⁶⁴Ac ka səratan ndey ava rəkwat, ac kaa nəkafa, gege: «Makəɗakaa nesey sə, ndana wa? Ŋguzdandanay!»

⁶⁵Ac ka gwaɗa ma hay mekele mekele, ac ka lafaw.

⁶⁶Mehusek te pərek, mesnendə hay te Zuwef hay, mazlakava hay ta ndaakwas hay va ndah mesesərekecen ma majawa kad ndana hay ac a ɓəca vaw, ec ke kəsek Yesu ana kad pa slam ta macə mamənak teceŋ.

⁶⁷Ndah mazlakava dapa macam yaŋ sə, ac ka nəkafa Yesu, gege: «Gwaɗandaw, kaa sə, ka Kəristi bay masa Zlav ta piya ka ta mbəl ndana hay sə, geyey?» Ke vehecen, gege: «Daha ya gwaɗakwar, ye Kəristi, akwar ta kəs ma ana aabay.

⁶⁸Asaya, daha ya nəkafakwar ma amta sə, eve metehwe ana akwar te veheken ma ana aabay.

⁶⁹Amaa masəna, e zler dəga ta pəsna, Wut ta nda a ta njah da ha ta zam ta Zlav masa aŋga ava gədaŋ da yaŋ jene hay fakwanay.»

⁷⁰Ac fakwanay ac ka vahan, gege: «Naa kaa sə, ka Wut ta Zlav la geyey?» Ke vehecen saya, gege: «Aŋga, akwar ana maa, akwa gweɗek sə, ya Wut ta Zlavay.»

⁷¹Dapa ŋgesey ana, ec ke gweɗ, gege: «Andakwa ava yaŋ tandakwa ana, andə ka cənakwaɗ ma dapa ma tata cay, təlam nesey, anda yahakwa ndana a da gwaɗandakwa da yaŋ ana sə, ɓasabay!»