Read Cuvok Lukas 23 Bible Online

Lukas 23 - Cuvok bible

Lukas 23

¹Mesnendə hay te Zuwef hay makwasa sə, ac fakwanay, ec ke zleftek, ac ka hwad Yesu fəma ta Pilatu.

²Ac ka jawaw ava ma hay ara nesey, gege: «Anda ŋgatafa nda ana nesey e gədesecen leŋgesl ta ndah tandakwa, a wal ndana hay ac da pəl budaw kad bay ta Rawma bay, a pə yaŋ tata ka Kəristi. Asaya, a pə yaŋ tata ka bay ta bay hay.»

³Pilatu ka nəkafa Yesu, gege: «Kaa sə, ka bay te Zuwef hay tehwe may geyey?» Yesu ka vahan, gege: «Megweɗek nesey sə, kaa.»

⁴Pilatu ke gweɗec kad bay hay ta ndaakwas hay va miya makwasa faŋga sə, gege: «Ya ka ŋgat mebər masa təɗe ta majaw yaŋ ta nda nesey sə, aabay.»

⁵Amaa ac ka təkafa ha ma teceŋ ana saya, gege: «E heheɗecen dar te Zuwef hay te meŋgə jene mambəla ana aabay ava mesesərek tata hay mekele mekele. E zlerek de Gelile, te Zudey kasl fana.»

⁶Masa Pilatu a cəna, Yesu sə, e dek de Gelile, ka nəkafa ndah da cak tata, gege: «Nda nesey sə, aŋga nda Gelile ana tehwe geyey?»

⁷Masa a cəna, Yesu sə, e dek de Gelile, dapa vavara masa Herawt a ŋgə bay da yaŋ ana, ka zləraɗ kad vara vaw, afa dapa pas ana hay ŋgesey, Herawt aŋga de Zeruzelem ana faŋga may.

⁸Herawt a wala Yesu sə, ke wesl mabay, afa dəga zleezle ka cəna ma hay da yaŋ Yesu, ka hwar mawala. Ka wulakaw dapa yaŋ tata, gəla Yesu e ŋgə cah meendey tata may kwa.

⁹Bay Herawt ka nəkafa ava ma hay mekele mekele, amaa kwa Yesu ka kazlana pa aabay.

¹⁰Bay hay ta ndaakwas hay va ndah mesesərekecen ma majawa kad ndana hay ac faŋga. Ac ka yahafa ma Yesu ava gədaŋ.

¹¹Herawt va kafaraŋ tata hay, ac ka sasarafa, ac ka lafaw. Ac ka pana rəkwat ta bay fa vaw, ac ka vahaɗ kad vara gwevernel Pilatu saya.

¹²Daha aabay sə, ac Herawt va gwevernel Pilatu aca dərazl yaŋ fa slam ana aabay, amaa e zler ta pəsaŋga ana ŋgesey, ac guula.

¹³Ava dəɓa ana, gwevernel Pilatu ke kwesekec bay hay ta ndaakwas hay, mesnendə hay te Zuwef hay va miya,

¹⁴gege: «Akwar ke hwedek nda nesey kad vereyey, akwa gwaɗa a nas vavara taciya. Ya ka nəkafa meendey takwar, ya ka ŋgat mebər te mezlər masa mak ta majaw yaŋ tata ara akwar ta jawiya ava ma hay sə, aabay.

¹⁵Herawt ka ŋgat mebər da vara vaw aabay may, mafay ana, ke vehek avəda kad vara andakwa. Eve metehwe ana, nda nesey sə, aŋga eve mebər masa təɗe te mekəɗ sə, aabay.

¹⁶Təlam nesey, ya ta kəlapa, ya da pəla.» [

¹⁷Fa macunam ta Pak fakwanay sə, Pilatu e pəlec nda amta deveŋ ndah dapa daŋgay.]

¹⁸Amaa ndah ana fakwanay faŋga ac ka cə lalaw ava gədaŋ, gege: «Kəɗandan nda na avəda cukw cukw ka macəhwandaw, pəla Barabas!»

¹⁹Aca kazlaɗ Barabas pa daŋgay sə, afa aŋga ta həl ndana hay ke te ŋgə baazlam da yaŋ bay te berne ana va aŋga ta kəɗ ndana cukw cukw macəhwandaw.

²⁰Ava dəɓa ana, Pilatu ke gweɗec ndah maɓəca fəma tata saya, afa a wal mapəla Yesu.

²¹Amaa ndah ana, ac ka cafa lalaw, gege: «Zləlawaɗ fa hap mazləlawa, zləlawaɗ fa hap mazləlawa!»

²²Pilatu ke gweɗec ka mahkar ana, gege: «Nda ana e ŋgek mambəla ana aabay sə, jene mey? Ya ka ŋgat mebər masa təɗe ta makəɗiya ka macəhwandaw sə, aabay. Ye dey, ya ta kəlapa mambəla ana, ya da pəla.»

²³Amaa ece dey fəma fəma ava macə lalaw ava gədaŋ da yaŋ mazləlaw Yesu fa hap mazləlawa. Macə lalaw teceŋ ava gədaŋ sə, ka fəna mawulak yaŋ ta Pilatu mabay,

²⁴Ara nesey, Pilatu ka kəs mawulak yaŋ te meŋgə jə masa ndah maɓəca fəma tata, ta nəkafa.

²⁵Ke pəlecen nda masa aca wal ke pəley. Nda ana sə, aca kazlaɗ pa daŋgay sə, afa aŋga ta həl ndana hay ka ta laf bay te berne ana va aŋga ta kəɗek ndana cukw cukw macəhwandaw. Ke vecen Yesu, aca ra ŋgaw ara masa ac ta waya.

²⁶Dapa masa aca hwad Yesu ke te derey sə, ac ta cə yaŋ ava Simaŋw, nda Siren ana ɓa, e dek de ley. Kafaraŋ hay sə, ac ka təhazaw, ac ka zəɓan hap mazləlawa sə, fa uway, a zəɓiya ava dəɓa te Yesu.

²⁷Ndana hay gaa ac ka cəpaw. Ŋgwazah ec ke dey kad dara ana, ac ka kəɗ rav, ac ka kuɗa mabay mafay tata.

²⁸Amaa Yesu ke ŋgwedefec ma, ke vec gədaŋ, gege: «Ŋgwazah te Zeruzelem, akwa kuɗa mafay taaɗaw bay, amaa makuɗa sə, mafay ta yaŋ takwar va wudeh takwar hay!

²⁹Pas ta masə marga hay e te dekey masa ndana hay ac te gweɗ, gege: “Meweslə ɓa kad ŋgwazah dəlay, ŋgwazah masa ac ke heyə aabay va masa ac ka və wa teceŋ kad wudeh aabay!”

³⁰Dapa pas ana ŋgesey, ndana hay ac te gweɗ kad a wudam hay: “Membəɗek kad a yaŋ andaw” va kad maɗar hay: “Mapəsahandaw avəda”.

³¹Yaw, daha ac ka pana kwakwaw fa hap dendeɓek, naa ava hap makula[12] sə, aca ra ŋgana gwagumalamaw?»

³²Dapa ŋgesey ana, ec ke hwedek ndana hay ɓa ecew, ndah ana makar hay, ece re kəɗec avəda cukw cukw fa slam ana ava Yesu.

³³Mahusa teceŋ pa slam mezel, taɓa ta yaŋ sə, kafaraŋ hay ac ka daraɗ Yesu faŋga fa hap mazləlawa. Ec ke dereɗec makar hay ecew sə, fa hap mazləlawa hay ecew mekele saya may. Nda amta aŋga mazləlawa fa hap da ha ta zam te Yesu, nda leŋgeɗey mazləlawa fa hap da ha ta gula te Yesu.

³⁴Yesu ke gweɗ, gege: «Papa, pəlecen mebər teceŋ, afa aca sən jə masa ac ta ŋgiya na bay.» Ndah madara Yesu sə, ac ka kazlə siyakw dapa taɓa teceŋ, afa aca ra vən rəkwat te Yesu.

³⁵Ndana hay fakwanay ac faŋga, ac ka ndandazlaw. Mazlakava hay te Zuwef hay ac ka sasarafa, gege: «Ka mbəla ndah dərziya avəda, a da mbəla yaŋ tata may, daha aŋga sə, aŋga Kəristi nda masa Zlav ta piya ka ta mbəl ndana hay!»

³⁶Kafaraŋ hay may, ac ka sasarafa, ac ka ŋgucafa vaw, ac ka vana wuzam kwakwiyaŋ, a da saw.

³⁷Ac ka gwaɗa, gege: «Daha kaa sə, ka bay te Zuwef hay sə, mbəla yaŋ takaa avəda!»

³⁸Ac ka vində ma fa karkaslah ɓa, ac ka daraɗ ma mavinda fa karkaslah sə, a yaŋ Yesu. Ma mavinda fa karkaslah ana sə, ara nesey: «Nda nesey, aŋga bay te Zuwef hay.»

³⁹Nda amta deveŋ makar hay mazləlawa da cak te Yesu sə, ka laf Yesu, gege: «Kaa sə, ka Kəristi biba? Mbəla yaŋ takaa avəda ava andaw ana fakwanay may!»

⁴⁰Amaa nda makar mazləlawa fa hap leŋgeɗ sə, ka payafa, gege: «Kaa masa mazləlawa ara aŋga nesey sə, ke lel fa Zlav aabay geyey?

⁴¹Mezləlew taciya fa hap nesey sə, mapana, aca zləlawandaw sə, mafay te mezlər taciya mambəla ana aabay. Amaa aŋga sə, ke ŋgek mebər kwa kusetke aabay!»

⁴²Ava dəɓa ana, ka gwaɗa Yesu, gege: «Pas masa ke te vehek ka ta ŋgə bay takaa sə, ya ta pəsakaa dapa yaŋ bay.»

⁴³Yesu ka vahan, gege: «Ya gwaɗakaa eve metehwe ana, e zler dəga ta pəsna nesey, andaw ta njah ava kaa dapa slam ta mambivaw da baymaləvaŋ.»

⁴⁴Dapa ŋgesey ana, pas mbala pa taɓa ta yaŋ cay, ləvaŋ ke ŋgey dapa vavara fakwanay, kasl fe ler mahkar ta fakwaɗ,

⁴⁵pas e weɗ aabay. Magambargambar dapa Way ta Zlavay ka vənata paa dapa ecew.

⁴⁶Yesu ka cə lalaw ava gədaŋ, gege: «Papa, ya gərakaɗ mesəfeney aɗaw pa ha takaa.» Ava dəɓa ta magwaɗ ma ana hay nesey, ka məcata.

⁴⁷Mazlakava ta kafaraŋ hay ta Rawma ka wala jə masa e ŋgey ara nesey sə, ka hahəm Zlavay, ke gweɗ, gege: «Eve metehwe ana, nda nesey sə, aŋga eve mebər aabay.»

⁴⁸Miya makwasa faŋga ta map ndey fe jene hay masa e ŋgə dapa slam ana sə, ac ka kəɗ rav, ac ka kuɗa mafay tata.

⁴⁹Ndah masasəraka jene fakwanay va ŋgwazah masa ece cəpek de Gelile, ec ke zlec dəreŋ, ec ke pə ndey fe jene hay masa ec te ŋgey.

⁵⁰Ara nesey, mehusek ta ndana ɓa mezel Zezef, aŋga deveŋ ndah maca mamənak te Zuwef hay, aŋga nda mambəla ana va nda maŋga mezlər eve cəvey ana.

⁵¹Kwa ka cam vaw kad pa makəs mawulak yaŋ va mezlər ta ndah dərziya sə, aabay. Aŋga sə, aŋga nda ta wunam ta Arimatey, berne te Zuwef hay. Ka ɓal Meŋgə bay ta Zlavay.

⁵²Masa Yesu ka məcata cay sə, Zezef ana ke dey vara gwevernel Pilatu, ka ta nəkafa slaw ta vaw te Yesu, a wal a da pəsahiya.

⁵³Ava dəɓa ana, ke bəreŋgek slaw ta vaw te Yesu fa hap mazləlawa sə, avəda kad fa vara. Ka paɗa ava rəkwat mambəla ana, ka hwadaɗ pa jəv mahwahurkwa dapa pəra masa ac ka pəsah macəhwandə pa aabay heley.

⁵⁴Pəsaŋga ana, luma ta Gajava, pas ɓasabay, pas ta masasak vaw te Zuwef hay[13] aŋga hukw cay.

⁵⁵Ŋgwazah mecəpek Yesu de Gelile sə, ec ke də ava Zezef kad pa jəvay ana. Ac ka pə ndey kad pa, aca ra wala macəhwandaw ana manaha sə, gwagumaw.

⁵⁶Ava dəɓa ana, ec ke vehec kad a wunam teceŋ, ac ka ləmad vaw ava təbekw mezel arawmat va mal te meŋgeŋgəzey[14]. Pas ta masasak vaw sə, ŋgwaza hay ana ac a sasak vaw ara ma majawa ta Muyiz te gweɗeceŋ.