Read Cuvok Lukas 24 Bible Online

Lukas 24 - Cuvok bible

Lukas 24

¹Manah macaaca ana ta hwaɗ ta luma, slamɓal te pərek, ŋgwaza hay ana ec ke dey a ma ta jəvay ava mal hay masa mezekey ana mambəla ana masa ac ta ləmadiya.

²Beelem mazlakava ana maɓəzla da ma ta jəvay ana sə, matatalama avəda ava zlalav.

³Ec ke sehw pa, amaa ac ka ŋgat slaw ta vaw ta Bay Mazlakava Yesu sə, aabay.

⁴Mafay ana, ac ka wulak yaŋ macəkuma bay. Faŋga faŋga ana, ndana hay ɓa ecew ac ke ŋguzdecen vaw ava rəkwat fa vaw məsle ana ndeɗ ndeɗ.

⁵Ŋgwazah sə, ac ka ŋgə zidaw mabay, ac ka cəkwaɗ yaŋ kad fa vara. Ndah sə, gege: «Akwa yah nda masa aŋga eve ndey dapa maməcay hay sə, mafay te mey?

⁶Aŋga fana aabay, amaa ka pərakata dapa maməcay, aŋga eve ndey. Masənafa, ma masa aŋga ta gwaɗakwar de Gelile,

⁷ke gweɗ, gege: “Cama aca vana Wut ta nda avəda pa ha ta ndah maŋga mebər hay, ac ta zləlawaɗ fa hap mazləlawa, ava dəɓa ana, a ta pərakata dapa maməcay manah mamahkar ana.”»

⁸Ac ka sənafa ma te Yesu masa aŋga te gweɗeceŋ.

⁹Mevehek tec dapa jəvay, ec ke gweɗecen jə masa e ŋgə fakwanay kad ndah masasəraka jene tata kuraw dapa yaŋ ana amta va ndah masasəraka jene tata dərziya.

¹⁰Magwaɗa ma ana kad maslaŋ hay sə, ac Maaray Magədala, Zeyan, Maaray mamaŋ ta Zak va ŋgwazah mecəpeceŋ.

¹¹Amaa maslaŋ ana hay aca wulakiya sə, ma hay masa ŋgwazah ta gwaɗiya nesey sə, ma hay saw. Mafay ana, ac ka kəs ma ana aabay.

¹²Ava aŋga ana fakwanay Piyer ke zleftek, ka hway pa jəvay ke te wuzeɗekey. A husa a ma ta jəvay, ke gəɓ kad pa, ke pə ndey, amaa ka ŋgat jene dapa mekele aabay, magəra sə, rəkwat babəla. Ka vahata, ma ana ka həzlan yaŋ mabay mafay te jə masa aŋga ta wala.

¹³Ta pəsaŋga ana masa Yesu e pərekek dapa maməcay sə, ndah masasəraka jene tata ecew ac dapa medey kad pa wunam ɓa mezel Emawus. Wunam ana sə, e ŋgə kilewmeeter kuraw dapa yaŋ ana amta ava Zeruzelem.

¹⁴Aca kər maɗay da yaŋ jene hay fakwan masa ece ŋgey dapa manahay ana ŋgesey.

¹⁵Dapa masa aca tə yaw dapa taɓa teceŋ ava gədaŋ sə, Yesu ke təhezec dapa cəvey ana, ec ke dey fa slam ana eve eceŋ.

¹⁶Aca wala mambəla ana, amaa jene ɓa e kəsecen ndey avəda aca ra səna Yesu ana bay.

¹⁷Yesu ke nəkefec, gege: «Dapa medə takwar nesey sə, akwa kər maɗay da yaŋ mey?» Ec ke zlecey, amaa ma ana ke məcecen vaw avəda.

¹⁸Nda amta deveŋ eceŋ mezel Kəliyawpas, ka gwaɗa, gege: «Nda aɗaw, kaa sə, ka məlaŋ de Zeruzelem fana geyey? Ka ka cəna jə masa e ŋgə dapa manah ana nesey sə, aabay geyey?»

¹⁹Ke nəkefeceŋ, gege: «Maŋgata mey?» Ac ka vahan, gege: «Ma da yaŋ Yesu, nda Nezeret ana. Aŋga nda mazlakava mehwedek ma ta Zlavay. Aŋga ava gədaŋ dapa mezlər tata, dapa megweɗ tata mambəla ana fəma ta Zlavay va fəma ta ndana hay fakwanay.

²⁰Amaa bay hay ta ndaakwas hay va mazlakava hay tandakwa ac ka hwadaɗ a vara Rawma hay ac ka təɗana ma a yaŋ te mekəɗey. Ac ka zləlawaɗ fa hap mazləlawa.

²¹Taciya, anda wulakiya sə, anda gwaɗa ma ta mbəlandakwa Isreyel hay dapa marga sə, aŋga. Amaa ava aŋga ana fakwanay, aŋga na ta pəsna manah mahkar masa aŋga ta məcay.

²²Ŋgwazah dərziya deveŋ andaw fana, ac ka ɓaslandan yaŋ, ec ke dey ta slamɓal te pərek teefesey a ma ta jav tata ana,

²³amaa ac ka ŋgat macəhwandə tata ana aabay. Ec ke vehekeceŋ, ac ka gwaɗandaw, gege: “Maskəla hay ac ka ŋguzdandan vaw”. Ac ka gwaɗandaw saya gege: “Yesu ka pərakata dapa maməcay, aŋga eve ndey”.

²⁴Ndah deveŋ andaw dərziya ec ke dey a ma ta jəvay ana. Ec ke welek jeŋ ana ara masa ŋgwazah ta gwaɗandaw sə, jaŋgata, amaa Yesu sə, ac ka wala aabay.»

²⁵Mafay ana, Yesu gege: «Hay! A kwar ndah masa leŋgesl pahata. Akwar ndah maŋga matəhwahwam ta makəs ma masa ndah mehwedek ma ta bəzadakaɗay.

²⁶Kəristi sə, a lada a sə marga ɗagay, ava dəɓa ana, e te dey a ta njah pa slam tata mawaɗa sə, akwa səniya bay geyey?»

²⁷Yesu ke ŋguzdecen ma da yaŋ masa magwaɗa ana daha dapa Ma hay Mavinda dapa Ɗelewer mavəna fakwanay da yaŋ aŋga. A zlar meŋguzdecen dəga dapa ɗelewer ta Muyiz va dapa ɗelewer hay ta ndah mehwedek ma fakwanay.

²⁸Mahusa teceŋ zef ava wunam masa aca wal medə pa sə, Yesu a ŋgiya ara e te gərdeceŋ, ke dey fəma ta ndah masasəraka jene tata.

²⁹Amaa ac ka ŋgana mbahw, ac ka gwaɗa, gege: «Manjahakwa fa slam ana, afa pas ɓasabay, mbala vaɗ cay.» Ke vehekey, ec ke sehw kad way fa slam ana.

³⁰Ava dəɓa ana, ac ka njah fa slam ana ka ta ndə ɗaf, Yesu ka kəs peŋ, ka ŋgana wasay Zlavay. Ka waca peŋ ana, ke veceney.

³¹Dapa ŋgesey ana, ndey teceŋ ka wunata, ac ka səna Yesu ana avəda. Amaa faŋga faŋga ana, Yesu mamah, ka maməhata meendey teceŋ.

³²Ec ke gweɗ dapa taɓa tec, gege: «Dapa masa a sasərakandakwa dapa cəvey va maŋguzdandakwaɗ ma da yaŋ Ma hay Mavəna sə, andakwa eve meweslə mabay aabay geyey?»

³³Ec ke zleftek faŋga faŋga ana, ec ke veh kad Zeruzelem. Ec ke ŋgetefec ndah masasəraka jene kuraw dapa yaŋ ana amta macama ava ndah masa ac eve eceŋ fa slam ana.

³⁴Ndah makwasa sə, ec ke gweɗec ndah masasəraka jene ecew sə, kamma, gege: «Ava metehwe ana Bay Mazlakava Yesu ka pərakata dapa maməcay, ka ŋguzdan vaw kad Simaŋw!»

³⁵Eceŋ may, ec ke gweɗecen jene hay masa ec te ŋgey dapa cəv ta Emawus. Asaya, ac ke ŋguzdecen dapa masa ac ta sən Yesu sə, dapa mavan peŋ.

³⁶Dapa masa ndah masasəraka jene ecew ece gweɗ da yaŋ ana heley sə, faŋga faŋga ana, Yesu ava yaŋ tata ana, ke ŋguzdecen vaw, gege: «Meteh ta Zlavay da njah da yaŋ akwar.»

³⁷Ac ka ŋgə zidaw mabay, ec ke kekesley, ac ka wulakaw, gege: «Nda te veɗ te ŋguzdecen vaw.»

³⁸Amaa Yesu ke gweɗ, gege: «Akwa ŋgə zidaw mafay te mey? Akwa wulak yaŋ ecew ecew sə, mafay te mey?»

³⁹Mepek ndey fa ha va sek aɗaw hay. Nesey sə, yey eve metehwe ana biba! Meteteleyey, mepefiyey ndey, afa nda te veɗ sə, aŋga ava slaw ta vaw kwa slaslar maa aabay, aŋga wal ava yey ara masa akwa zlafa maɗaliya.

⁴⁰Dapa masa e gweɗeceŋ sə, ke ŋguzdecen ha tata va sek tata hay.

⁴¹Amaa ac ka zlafa makəs ma ana mambəla ana aabay heley, afa ac dapa mewesley. Asaya, ec ke rəzl da yaŋ ana mabay. Dapa merəzl teceŋ, Yesu gege: «Akwar ava jə ta mandə fana ɓa geyey?»

⁴²Ac ka vana kəlef mafaka ana amta.

⁴³Ka kəsaw, ka ndaw fəma teceŋ.

⁴⁴Ava dəɓa ana, gege: «Dapa masa andakwa ɗaf fa slam ana heley, ya ka gwaɗakwar: “A lada ma masa mavinda da yaŋ yey dapa ɗelewer ta ma majawa ta Muyiz, dapa ɗelewer ta ndah mehwedek ma va dapa ɗelewer ta Jaabura sə, da ŋgata.”»

⁴⁵Ara nesey, ke wunecen leŋgesl teceŋ ka ta cəna Ma hay Mavinda.

⁴⁶Ke gweɗ, gege: «Ara masa mavinda, gege: “Kəristi sə, a ta sə marga, dapa manah mamahkar ana sə, a ta pərakata dapa maməcay”,

⁴⁷ara nesey, ac ta bəzad ma eve mezel tata da yaŋ maŋgwad rav va mepəl mebərey kad ndana hay dapa vavara hay fakwanay, e te zler de Zeruzelem.

⁴⁸Ma ta bəzad labara ana kad ndana hay sə, akwar mawala jeŋ ana hay eve ndey takwar nesey.

⁴⁹Mawala, yey ava yaŋ taaɗaw, ya ta zlərakwar jə masa Papa ka gwaɗa daha. Amaa takwar sə, manjah dapa berne te Zeruzelem kasl pa pas masa akwar ta ŋgat map gədaŋ mazlakava masa e dek da wudam da vara Zlavay fa vaw takwar.»

⁵⁰Ava dəɓa ana, Yesu ke həlekec ndah masasəraka jene tata kad a vəda te berne te Zeruzelem, ec ke dey zef a gəva ta Betani. Mahusa teceŋ faŋga, ka baŋgaɗa ha, ke pəsefec ma.

⁵¹Dapa masa e pəsefec ma sə, ke gərdeceŋ. Zlav ka kəsa avəda kad a wudam a baymaləvaŋ.

⁵²Ndah masasəraka jene tata, ava dəɓa te mekekəredey fəma tata sə, ec ke vehec kad Zeruzelem, ac ka hahəm Zlavay eve meweslə mabay.

⁵³Cəɗem cəɗem ac dapa Way ta kwakwas, aca hahəm Zlavay.