Read Cuvok Lukas 3 Bible Online

Lukas 3 - Cuvok bible

Lukas 3

¹Dapa masa Zaŋ a zlar mezlər tata sə, bay Tiber ke ŋgə mavay kuraw dapa yaŋ ana zlam dapa gwevernel ta vavara ta Rawma. Paŋws Pilatu aŋga bay da yaŋ vavara te Zudey. Herawt aŋga bay da yaŋ vavara te Gelile. Malamaŋ Fəlep aŋga bay dapa vavara ta Iturey va da Tərakwanitid. Lizaniyas aŋga bay da yaŋ vavara ta Abileŋ.

²Hanas va Kayfas ac mazlakava hay ta ndaakwas hay. Dapa ŋgesey ana, Zaŋ Baatis, wut ta Zakaray aŋga dapa yaŋ ta səɓak. Faŋga ana, Zlav ka ŋguzdana ma tata.

³Zaŋ ana ka ŋgway dapa vavara hay fakwanay da ma ta wayam te Zurdeŋ. Ka bəzad ma ta Zlavay kad ndana hay da yaŋ beetem ta maŋgwad rav ka ta ŋgat mapal mebər hay.

⁴Ara mavinda dapa ɗelewer nda mehwedek ma Izay, ke gweɗ, gege: «Ndana ɓa a cə lalaw dapa yaŋ ta səɓak, e gweɗ, gege: “Maləmadana cəv kad Bay Mazlakava, maləmadan cəvey ana mambəla ana nduwak.

⁵Mapəsaha slam gudakw hay avəda fakwanay. Mabərhaza wudam va ŋguɗa hay avəda fakwanay. Cəv hay matərwaɗa sə, meləmedec mambəla ana. Cəv hay masa kekeŋ dapa mabay sə, mehəlec avəda.

⁶Ara nesey, ndana hay fakwanay ac ta wala mambəla nda ta Zlavay.”»

⁷Zaŋ ke gweɗec kad miya masa ece dey kad vara vaw ke te ŋgə beetem sə, gege: «Tərsam ta bay ta wudam hay! Magwaɗakwar masa akwar ta mbəlata fa mazam ta rav ta Zlavay masa e te dekey sə, wa?

⁸Meŋguzdek jene hay mambəla ana dapa takwar, masa aca tə yaw da yaŋ maŋgwad rav takwar. Akwar ta wulakiya dapa rav takwar: “Abəraham aŋga papaŋ ta papaŋ taciya” sə, ara na bay. Afa ya gwaɗakwar, Zlav a zlafa matəra kekeŋ hay na avəda ke wudeh ta Abəraham.

⁹Təlam nesey, jan maləmada cay ka ta ŋgal wudez hay dəga dapa slaslalay ana. Kwa wudez wula wula masa e hey wudiya ana hay mambəla ana aabay sə, ac ta ŋgəla avəda, ac ta pana kwakwaw fətiya.»

¹⁰Miya ka nəkafa Zaŋ, gege: «Taciya sə, anda ra ŋgə sə, mey?»

¹¹Zaŋ ke vehecen, gege: «Daha nda amta deveŋ akwar aŋga ava rəkwat ecew, da vana amta kad nda masa aŋga ava aŋga aabay. Asaya, nda masa aŋga ava jə ta mandə ɓa sə, aca ra vənaw ava ndah masa jə ta mandə tec aabay.»

¹²Ndah macəkala budaw hay may, ec ke dekey ke te ŋgə beetem ana. Ac ka nəkafa Zaŋ, gege: «Nda masasəraka nda, taciya sə, anda ra ŋgə sə, mey?»

¹³Ke vehecen, gege: «Akwar ta nək budaw ka fəna masa ŋgwaməna ta jawiya bay.»

¹⁴Kafaraŋ hay, ac mavaŋga may, ac ka nəkafa Zaŋ ara aŋga ana, gege: «Andaw may, taciya sə, anda ra ŋgə sə, mey?» Ke vehecen, gege: «Akwar ta pərasl səlay ta ndana ava gədaŋ bay, akwar ta ɗəmazl ndana ava ma hay a yaŋ mebər tata aabay bay, mewesley da yaŋ meyəv te mezlər takwar.»

¹⁵Ndana hay aca ɓal jene hay mambəla ana masa e te ŋgey. Mafay ana, kwa waawa ka wulakaw, gəla Zaŋ ana, aŋga Kəristi sə, kwa.

¹⁶Zaŋ ke gweɗec fakwanay, gege: «Yey sə, ya ŋgakwar beetem ava yam, amaa nda mekele ɓa, masa e fəniyey ava gədaŋ e te dekey. Ya husa kwa ka ta pal ɗuweŋ ta tahkar tata bay. Aŋga sə, a ta ŋgakwar beetem eve Mesfen Mavəna va ava kwakwaw.

¹⁷Aŋga ava daram dapa ha, a ta faɗ gədak, a da həl bəley kad pa wuda tata. Amaa sləɗa ana sə, a ta pana kwakwaw fətiya masa a ta məc aabay.»

¹⁸Ara nesey, Zaŋ ana ke vec gədaŋ ava ma hay mekele mekele saya, ke bəzedec Labara mambəla ana.

¹⁹Zaŋ ka payafa Herawt, afa ka kəsa Herawdiyat, ŋgwaz ta malamaŋ avəda ka ŋgwaza va masa ke ŋgə jene hay mekele mekele masa ece teh bay.

²⁰Mafay ana, Herawt ke ŋgə jə mambəla ana aabay mafəna ana saya, ka kazlaɗ Zaŋ Baatis ana pa daŋgay.

²¹Masa Zaŋ Baatis e ŋgec beetem kad ndana hay fakwanay sə, ka ŋgana kad Yesu may. Ava dəɓa ana, Yesu ka cə mbahw, faŋga faŋga ana, slam da wudam paŋ! Ke wuney.

²²Mesfen Mavəna ke bəreŋgek kad yaŋ Yesu, ndana hay ac ka wala, aŋga ara mahwɗagwam. Uway ke cənek da wudam, gege: «Kaa sə, ka wat aɗaw masa ya walakaa elehey. Ye wesl gaa da yaŋ kaa.»

²³Dapa masa Yesu a zlar mezlər tata sə, aŋga ava mavay mbala kwakwar mahkar. Ndana hay ac ka wulakaw, Yesu sə, aŋga wut te Zezef. Zezef sə, aŋga wut te Heley,

²⁴Heley aŋga wut ta Matat, Matat aŋga wut te Levi, Levi aŋga wut te Melki, Melki aŋga wut ta Janay, Janay aŋga wut te Zezef,

²⁵Zezef aŋga wut ta Matatiyas, Matatiyas aŋga wut ta Amaws, Amaws aŋga wut ta Nahum, Nahum aŋga wut te Esəli, Esəli aŋga wut ta Nagay,

²⁶Nagay aŋga wut ta Mat, Mat aŋga wut ta Matatiyas, Matatiyas aŋga wut te Semeyiŋ, Semeyiŋ aŋga wut ta Zawzek, Zawzek aŋga wut ta Zawda,

²⁷Zawda aŋga wut ta Zuwanaŋ, Zuwanaŋ aŋga wut ta Reza, Reza wut te Zerubeebel, Zerubeebel aŋga wut ta Salatiyel, Salatiyel aŋga wut te Neri,

²⁸Neri aŋga wut te Melki, Melki aŋga wut ta Adi, Adi aŋga wut ta Kwazam, Kwazam aŋga wut ta Elmadam, Elmadam aŋga wut te Er,

²⁹Er aŋga wut te Yesu, Yesu aŋga wut te Eliyezer, Eliyezer aŋga wut ta Zuwarim, Zuwarim aŋga wut ta Matat, Matat aŋga wut te Levi,

³⁰Levi aŋga wut ta Simeyaŋw, Simeyaŋw aŋga wut ta Zuda, Zuda aŋga wut te Zezef, Zezef aŋga wut ta Zenam, Zenam aŋga wut ta Eliyakim,

³¹Eliyakim aŋga wut ta Meliya, Meliya aŋga wut ta Mena, Mena aŋga wut ta Matata, Matata aŋga wut ta Nataŋ, Nataŋ aŋga wut te Deevet,

³²Deevet aŋga wut te Zesey, Zesey aŋga wut ta Awbet, Awbet aŋga wut ta Buwes, Buwes aŋga wut ta Sala, Sala aŋga wut ta Nasaŋw,

³³Nasaŋw aŋga wut ta Aminadab, Aminadab aŋga wut ta Adəmiŋ, Adəmiŋ aŋga wut ta Arni, Arni aŋga wut ta Esraŋw, Esraŋw aŋga wut ta Feres, Fares aŋga wut ta Zuda,

³⁴Zuda aŋga wut ta Zakwab, Zakwab aŋga wut ta Izak, Izak aŋga wut ta Abəraham, Abəraham aŋga wut ta Tara, Tara aŋga wut ta Nahwar,

³⁵Nahwar aŋga wut ta Seruk, Seruk aŋga wut ta Riyaw, Riyaw aŋga wut te Pelek, Pelek aŋga wut te Eber, Eber aŋga wut ta Sala,

³⁶Sala aŋga wut ta Kaynam, Kaynam aŋga wut ta Arfazat, Arfazat aŋga wut te Sem, Sem aŋga wut te Nuwe, Nuwe aŋga wut te Lemek,

³⁷Lemek aŋga wut ta Matuzala, Matuzala aŋga wut ta Enakw, Enakw aŋga wut te Zerek, Zerek aŋga wut te Meleliyel, Meleliyel aŋga wut ta Kaynam,

³⁸Kaynam aŋga wut ta Enaws, Enaws aŋga wut te Set, Set aŋga wut ta Adamaw, Adamaw sə, aŋga wut ta Zlavay.