Read Cuvok Lukas 4 Bible Online

Lukas 4 - Cuvok bible

Lukas 4

¹Mevehek te Yesu da wayam te Zurdeŋ sə, ka nəhata eve Mesfen Mavəna. Mesfeney ana ka hwadaɗ pə yaŋ ta səɓak.

²Dapa manah kwakwar faɗ, bay ta haalay ka cakaw. Kwa ka ndə jene dapa manah hay ana ŋgesey sə, aabay. Masa mbala manah hay ana e te ndəv cay sə, may ka kəɗa Yesu.

³Ara nesey, bay ta haalay sə, ka gwaɗa, gege: «Daha ka wut ta Zlavay sə, gwaɗa kekeŋ nesey e de tər ka jə ta manday.»

⁴Yesu ka vahan, gege: «Mavinda dapa Ɗelewer mavəna, gege: “Ndana a njah eve ndey sə, ava jə ta mandə babəla bay.”»

⁵Bay ta haalay sə, ka hwadaɗ fa maɗar, ka ŋguzdan wunam ta bay hay ta vavara fakwan faŋga faŋga.

⁶Ka gwaɗa, gege: «Ya ta vakwaɗ gədaŋ te meŋgə bay da yaŋ ndana hay na fakwanay va membeɗ ta wunam bay ana hay, afa jeŋ ana hay fakwanay nesey sə, taaɗaw, ya zlafa maviya kad nda masa ya wal mavana.

⁷Ara nesey, daha kaa, ka ke kekərediyey sə, ya ta vakaɗ fakwanay.»

⁸Yesu ka vahan, gege: «Mavinda dapa Ɗelewer mavəna, gege: “Ka te kekəred sə, kad Bay Mazlakava Zlav takaa, ka ta kəɗana ha sə, kad aŋga, aŋga pal amta.”»

⁹Bay ta haalay sə, ka hwadaɗ Yesu e Zeruzelem. Ka paɗ pə yaŋ ta Way ta kwakwas, ka gwaɗa, gege: «Daha ka wut ta Zlavay, kezl fana kad fa vara,

¹⁰afa mavinda dapa Ɗelewer mavəna, gege: “Zlav e te gweɗec maskəla tata hay, ac da ɓəlafakaa”.

¹¹Asaya, “ac ta lacakaa a hwaɗ ta ha teceŋ, afa mecəhwen da kəɗakaa fe kekeŋ bay.”»

¹²Yesu ka vahan, gege: «Mavinda dapa Ɗelewer mavəna, gege: “Ka ta paɗ Bay Mazlakava, Zlav takaa pe mecek bay.”»

¹³Ava dəɓa ta masa bay ta haalay ka caka Yesu eve wewer tata hay mekele mekele, ka zlafa aabay sə, ka gərda ka pas mekele.

¹⁴Yesu ava gədaŋ mazlakava te Mesfeney, ka vahakata pa vavara te Gelile. Mezel tata ke cen vəla vəla dapa vavara ana fakwanay.

¹⁵Ka sasərak ndana hay dapa Way hay ta macə mbahw te Zuwef hay, ndana hay fakwanay ac ka hahəmaw mabay.

¹⁶Yesu ke də e Nezeret pa gəva masa e gəlek dapa. Pas ta masasak vaw, ke sehw pə Way ta macə mbahw te Zuwef hay ara tecəɗem. Ke zleftek ka ta jaŋgə ma ta Zlavay fəma ta ndana hay.

¹⁷Ava dəɓa ana, ac ka vana ɗelewer mapaɗa ana, masa Izay, nda mehwedek ma ta vindiya zleezle. Yesu ka pəla, ka ŋgat ma mavinda dapa ara nesey:

¹⁸«Mesfen ta Bay Mazlakava aŋga da yaŋ yey, afa ke cəhefiyey mal fə yaŋ, ke te bəzedec Labara mambəla ana, kad maslamarga hay. Ke zlerdeyey, te megweɗec ndah majawa da yaŋ mepəlek teceŋ, ke te wunecen ndey ta mahazlaw hay, ka ta pal ndah masa ac dapa ɓeley,

¹⁹ka ta ŋguzad mavay masa Bay Mazlakava e te kəsec ndana hay.»

²⁰Ava dəɓa ana, ka paɗa ɗelewer ana, ka van kad nda maŋga mezlərey, ka njahata. Ndah dapa Way ta macə mbahw ana fakwanay ac ka pafa ndey.

²¹Yesu ka zlar megweɗec, gege: «Ma hay Mavinda nesey ac ka ŋgata kad akwar masa akwa cəna pəsna nesey.»

²²Ndana hay fakwan faŋga, ac ke gweɗ ma mambəla ana da yaŋ Yesu. Ac ke rəzleceŋ da yaŋ ma hay mambəla ana masa e dek dapa ma tata. Ec ke gweɗ, gege: «Gwalaha! Naa wat ana na aŋga wat te Zezef?»

²³Dapa ŋgesey ana, Yesu gege: «Eve metehwe ana akwar te gweɗiyey ma maɗəva nesey: “Daɓtar, mbəla yaŋ takaa avəda ava yaŋ takaa ana”. Andaw ka cəna jene hay masa ke te ŋgec fakwanay da Kafarnahum, ŋgaw ara aŋga ana fana da wunam takaa may.»

²⁴Ava dəɓa ana, Yesu ke gweɗec saya, gege: Eve metehwe ana ya gwaɗakwar, kwa nda mehwedek ma wula wula sə, ac ta kəsiya mambəla ana dapa wunam tata sə, aabay.

²⁵Eve metehwe ana ya gwaɗakwar, Ŋgwa fe yidey hay mabay dapa vavara te Isreyel dapa pas masa Eli aŋga ɓa heley. Slam da baymaləvaŋ ka ɓəzlata mavay mahkar ava kiya makwa yam ka slə aabay. Mayə mazlakava ana ke ŋgey dapa vavara fakwanay.

²⁶Anjəkar Zlav ka zlar Eli kad vara ŋgwa fe yidey amta deveŋ eceŋ sə, aabay, amaa say kad vara ŋgwa fe yidey ɓa da Sarapta dapa vavara ta Sidaŋw.

²⁷Meskwelme hay mabay dapa vavara te Isreyel dapa pas masa nda mehwedek ma Elizey aŋga ɓa heley. Anjəkar kwa nda amta deveŋ eceŋ masa ka ŋgat masəɗata sə, aabay. Amaa say Naaman nda Siriya ana.

²⁸Ndana hay fakwanay dapa Way ta macə mbahw ana, rav ke hececeŋ mafay ta macəna ma ana hay nesey.

²⁹Ac fakwanay, ec ke zleftek, ac ka təraŋgaw kad a vəda, ac ka hwadaɗ kasl a ma ta mazaŋgalaŋ ta maɗar masa berne tec malama da yaŋ ana. Ac ka wal mazadaɗ kad fa vara.

³⁰Anjəkar, Yesu sə, mamahata dapa taɓa teceŋ, ka data pa slam mekele.

³¹Yesu ka də a Kafarnahum berne dapa vavara te Gelile. Dərŋga sə, ke sesərekec ndana hay pas ta masasak vaw.

³²Ndana hay ec ke rəzley da yaŋ mesesərek tata ana, afa ma tata hay ac manəha ava gədaŋ masa e dek da vara Zlavay.

³³Dapa Way ta macə mbahw te Zuwef hay, ndana ɓa aŋga mesfen maləza, ka cə lalaw ava gədaŋ, gege:

³⁴«Hay! Yesu nda Nezeret, ka wal fa andaw mey? Ke dek sə, ka ta zandaw geyey? Ya səniya, kaa sə, ka nda Mavəna masa Zlav te zlərekey.»

³⁵Yesu ka ɓaɓəcaw ava gədaŋ, gege: «Ɓəzla ma! Daɓa dapa nda nesey.» Faŋga faŋga ana, mesfen maləza sə, ka kazlaɗ nda sə, fa vara meendey ta ndana hay. Ka data dapa kad a vəda, kwa ka ŋgana jene aabay.

³⁶Ndana hay fakwanay ec ke rəzleceŋ, ec ke gweɗ dapa taɓa tec, gege: «Gwalaha! Ma na ma te mey? E gweɗ ava gədaŋ ta bay va ava gədaŋ mazlakava kad mesfen hay maləza sə, aca hwaɓa.»

³⁷Ara nesey, mezel te Yesu ke cən vəla vəla fakwanay dapa vavara ana.

³⁸Ava dəɓa ana, Yesu ka data dapa way ta mabəzad ma ta Zlavay kad a vəda, ke dey a way ta Simaŋw. Mahusa tata pa, a ŋgatafa mamaŋ ta ŋgwaz ta Simaŋw aŋga eve mehecey ta yaŋdaw. Dapa ŋgesey ana, ndana hay ac ka ŋgana mbahw kad Yesu a da mbəla avəda.

³⁹Ke gəɓey kad yaŋ ŋgwaz ana, ka payafa mehecey dapa sə, ava gədaŋ. Kwakwaw ka həlafa fa vaw. Faŋga faŋga ana, ŋgwaz ana ke zleftek, ke vec jə ta manday.

⁴⁰Ava dəɓa te mekezl ta pas kad way[1] ndana hay ec ke hwedek ndah eve mehecey hay mekele mekele fakw kad vara Yesu. Ke pec ha a yaŋ amta amta teceŋ, ke mbəlec avəda fakwanay.

⁴¹Damkwaw dapa yaŋ ta ndana hay gaa ac ke dekec kad a vəda, ac ka cə lalaw, gege: «Ka Wut ta Zlavay.» Amaa Yesu ke ɓeɓəceceŋ aca ra gweɗ sabay, afa aca səniya sə, Yesu sə, aŋga Kəristi.

⁴²Slamɓal, Yesu ke zleftek, ka gərda wunam ana, ka data pə yaŋ ta səɓak. Miya hay ac ka yahaw, ac ka ŋgata avəda. Masa ac ka ŋgata avəda sə, aca wal Yesu da njah vereceŋ, e de gərdec sabay.

⁴³Amaa gege: «Kad berne hay mekele sə, a lada ye bəzedec Labara mambəla ana te Meŋgə bay ta Zlavay, afa ya mazləra sə, ka ŋgə mezlərey ana nesey.»

⁴⁴Ara nesey, Yesu ka bəzad Labara mambəla ana dapa way ta macə mbahw hay dapa vavara te Zudey ana.