Read Cuvok Zaŋ 10 Bible Online

Zaŋ 10 - Cuvok bible

Zaŋ 10

¹Yesu gege: «Eve metehwe ana ya gwaɗakwar nda masa e də kad pa galaŋ ta təmak hay jaka pa ma ta way ana bay, amaa e cəkwel jaka yaŋ way ana sə, ŋgesey, aŋga makar, aŋga nda mapərasla nda.

²Amaa nda masa e sehw kad pa galaŋ jaka pa ma ta way sə, nda ŋgesey, aŋga gwala təmak ana hay.

³Nda maɓəla ma ta way ta galaŋ ana, a wunan ma ta way, təmak ana hay aca cəna uway tata, afa təmak ana hay tata, e zelec eve mezel teceŋ, e gəvec kad a vəda.

⁴Masa ke gəvec avəda fakwanay kad a vəda cay sə, e də fəma teceŋ, aca cəpiya, afa aca sən uway tata.

⁵Amaa daha nda məlaŋ ana te dey sə, təmak ana hay aca cəpiya aabay, sesəker aca hway fa nda ana, afa aca sən uway ta nda məlaŋ bay.»

⁶Yesu e gweɗec ava ma maɗəva ara nesey, amaa ac ka cəna ma da yaŋ ma masa e gweɗec sə, aabay.

⁷Yesu ke gweɗec saya, gege: «Eve metehwe ana ya gwaɗakwar yey sə, ya ma ta way ta galaŋ ta təmak hay.»

⁸Ndah medek fakwan kamma fe yey sə, ac makar hay, ac ndah mapərasla nda, təmak ana hay ac ke cənecen ma aabay.

⁹Yey sə, ya ma ta way, daha ndana e sehwek kad way jaka vereyey sə, a mbəlata. E te sehwey, e te vehekey va a ta ŋgat jə ta manday.

¹⁰Nda makar e dek sə, ke te kərey, ka ta kəɗ nda va mazə nda war. Amaa yey sə, ye dekey, afa ndana hay aca ra ŋgat mesfeney, aca ra ŋgataw ana sə, gaa.

¹¹Yey sə, ya gwala jene mambəla ana, gwala jene mambəla ana sə, a və mesfen tata kad təmak tata hay.

¹²Amaa nda maŋga mezlər mafay ta səlay sə, aŋga gwala jene metehwe ana bay, afa təmak ana hay tata bay, daha a wala gəda te ley e dekey sə, e gərdec təmak ana hay, a hwaɓa. Ara nesey, gəda te ley e təhezec təmak ana hay, dərziya hay aca vəna yaŋ.

¹³A hwaɓa sə, afa ma tata ava təmak hay aabay, aŋga sə, aŋga nda maŋga mezlər mafay ta səlay war.

¹⁴Yey sə, ya gwala jene mambəla ana. Ye sənec təmak aɗaw hay, təmak aɗaw hay may, ece səniyey,

¹⁵ara masa Papa e səniyey, yey may, ya səniya. Ya və mesfeney aɗaw kad təmak aɗaw hay.

¹⁶Ya ava təmak ana hay mekele ɓa masa ac dapa galaŋ na aabay, eceŋ ana sə, ye re te gəvekec avəda, aca ra cəna uway aɗaw, ac da njah dapa bakw amta, gwala jene amta.

¹⁷Ya və mesfeney aɗaw ka ta məcay, afa ya ta ŋgata avəda ava dəɓa ana, Papa e weliyey sə, mafay ana.

¹⁸Ndana mazlafa makəsawa aabay, amaa ya ta viya ava ha taaɗaw. Ya ava gədaŋ ɓa ta maviya, ya ava gədaŋ ɓa ta maŋgata avəda. Nesey, ma majawa masa ya ta ŋgatiya vara Papa.

¹⁹Ma ana hay nesey, ke pərekek mavən vaw dapa taɓa ta mazlakava hay te Zuwef hay saya.

²⁰Ndana hay gaa deveŋ eceŋ, ece gweɗ, gege: «Aŋga ava damkwaw dapa yaŋ, aŋga marəzla ana, akwa cəkafa zləmay mafay te mey?»

²¹Ŋgeɗ hay may, gege: «Nda masa aŋga ava damkwaw dapa yaŋ sə, e gweɗ ara na aabay. Damkwaw a zlafa mawunan ndey ta nda mahazlaw ana geyey?»

²²Zuwef hay aca ŋgə macunam ta mawan Way ta kwakwas de Zeruzelem. Dapa ŋgesey ana, kiya te memeɗ.

²³Yesu ka ŋgway da dara zəmbek masa aca zaliya zəmbek ta bay Salmaŋw da cak ta Way ta kwakwas.

²⁴Mazlakava hay te Zuwef hay ac ka tulaka, ac ka gwaɗa, gege: «Ka ŋgwadandaw ava ma hay ara nesey sə, kasl ewey? Gwaɗandaw eve metehwe ana, daha kaa sə, ka Kəristi.»

²⁵Yesu ke vehecen, gege: «Ya ka gwaɗakwaɗ cay, amaa akwar ka kəs ma ana aabay. Mezlər hay masa ye te ŋgec eve mezel ta Papa sə, aca tə yaw da yaŋ yey,

²⁶amaa akwa gwam ka kəs ma ana bay sə, afa akwar ndah aɗaw bay, ndah aɗaw hay sə, ac ara təmak aɗaw hay.

²⁷Təmak aɗaw hay sə, aca cəna uway aɗaw, yey may, ye səneceŋ, ece cəpiyey fa dar fa dar.

²⁸Ye vec manjah katar ka midakw da cak ta Zlavay. Ac ta zə ɓasabay, kwa ndana ma ta zlafa mepəreslec dapa ha aɗaw aabay.

²⁹Papa mavuwa jeŋ ana hay nesey sə, aŋga mazlakava da yaŋ jene hay fakwanay, kwa ndana ava gədaŋ ta mapərasla jeŋ ana dapa ha ta Papa ana aabay.

³⁰Yey va Papa sə, andaw amta.»

³¹Zuwef ana hay ac ka kwakwal kekeŋ saya ka ta kaliya.

³²Amaa Yesu gege: «Ye ke ŋgə mezlər hay mambəla ana mabay fa yam te ndey takwar masa ece dek da vara Papa. Naa akwar te keliyey sə, mafay te mezlər hay wula?»

³³Zuwef hay ac ka vahan, gege: «Andə ta kalakaa sə, mafay te mezlər takaa mambəla ana bay, amaa mafay ta masa ka ta laf Zlavay, afa kaa sə, ka ndana, ka pə yaŋ takaa ka Zlavay.»

³⁴Yesu ke vehecen, gege: «Mavinda dapa ma majawa takwar, yey Zlavay, ye ke gweɗey: “Akwar sə, akwar zlav hay”.

³⁵E ŋgey ara Ma mavinda ta zal ndah masa ma ta Zlav mavinda kad eceŋ sə, mezel tec zlav hay. Yaw, Ma mavinda sə, ndana a zlafa mavavəsiya bay.

³⁶Yey sə, ya nda masa Papa ke yeheɗiyey ha, ke zlerekiyey pa vavara, akwa gwaɗa ya laf Zlavay, afa ye te gweɗek, yey sə, ya Wut ta Zlav sə, la geyey?

³⁷Daha mezlər hay masa ye te ŋgec nesey, mezlər ta Papa bay sə, akwar ta kəs ma aɗaw ana bay!

³⁸Amaa daha ye ŋgə nesey sə, mezlər tata eve metehwe ana, kwa daha akwar ka kəs ma taaɗaw aabay sə, makəs mezlər hay masa ye te ŋgec nesey, afa akwar da səna va macəna Papa sə, aŋga macama ava yey, ara ya macama ava Papa.»

³⁹Ara nesey, ac ka yah cəv ta matəhaziya saya, amaa ke mbəlefeceŋ.

⁴⁰Yesu ka vahata a luwa ta wayam te Zurdeŋ, pa slam masa Zaŋ Baatis a zlar meŋgec beetem kad ndana hay dapa sə, ka njahata dərŋga.

⁴¹Ndana hay gaa ec ke dey kad cak tata, ec ke gweɗ, gege: «Zaŋ Baatis sə, kwa ke ŋgə cah aabay, amaa ma masa aŋga te gweɗek fakwanay da yaŋ nda nesey sə, ma ana hay tehwe.»

⁴²Ara nesey, ndana hay gaa faŋga ac ka kəs ma tata.