Read Cuvok Zaŋ 11 Bible Online

Zaŋ 11 - Cuvok bible

Zaŋ 11

¹Ndana ɓa mezel Lazaraws, aŋga gwabay, aŋga nda ta wunam ta Betani, wunam masa Maaray va dəmaŋ Marta dapa.

²Maaray ana sə, aŋga ŋgwaz macəha mal te meŋgeŋgəzey fe sek ta Bay Mazlakava, matukwaɗa sek ta Bay Mazlakava eve ŋgwec ta yaŋ tata. Lazaraws masa gwabay ana ŋgesey sə, aŋga malamaŋ.

³Ndah ava dəmaŋ ana cuweeney sə, ac ka zlar ndana kad vara Yesu aca ra gwaɗa: «Bay Mazlakava, nda masa ka waya sə, aŋga gwabay.»

⁴Masa Yesu a cəna ara nesey sə, e gweɗ, gege: «Meməcey ta Lazaraws nesey sə, ta maməc bay, amaa e te ŋguzdek gədaŋ mazlakava ta Zlavay. Ndana hay ac ta hahəm Wut ta Zlavay sə, jaka pe mehecey tata ana.»

⁵Yesu sə, e welec Marta, Maaray dəmaŋ va Lazaraws.

⁶Amaa masa a cəna Lazaraws ana aŋga gwabay sə, ke ŋgə manah ecew ava dəɓa ana dapa slam masa aŋga dərŋga.

⁷Ava dəɓa ana, ke gweɗec ndah masasəraka jene tata, gege: «Mavahakwa kad pa vavara te Zudey.»

⁸Ndah masasəraka jene, ac ka vahan, gege: «Raabi, ke ŋgə manjah gaa aabay heley masa mazlakava hay te Zuwef hay dərŋga ac ka yah makalakaa eve kekeŋ ka ta kəɗakaa ka macəhwandaw, naa ka wal meveh kad arŋga saya sə, gwagumaw?»

⁹Yesu gege: «Da hwaɗ ta pas amta sə, ler kuraw dapa yaŋ ana ecew biba? Eve metehwe ana, daha ndana a ŋgway ta pas sə, mecəhwen a kəɗa aabay, afa a wala meweɗ ta vavara nesey,

¹⁰amaa, daha ndana a ŋgway ta vaɗ sə, mecəhwen a kəɗa, afa slam mawaɗa vara vaw aabay.»

¹¹Ava dəɓa ta magwaɗ ma ana hay nesey, gege: «Guula tandakwa Lazaraws ka njata waŋ, amaa ye dey, ye te pərekek avəda.»

¹²Ndah masasəraka jene ac ka gwaɗa, gege: «Bay Mazlakava, daha ka njata waŋ sə, a ta pərakata.»

¹³Yesu a wal megweɗ sə, Lazaraws ka məcata, amaa ndah masasəraka jene tata ac ka cəna ma da yaŋ ana aabay, aca wulakiya sə, a njawaŋ tehwe.

¹⁴Yesu ke penecen ma ana, gege: «Lazaraws ka məcata,

¹⁵ye wesl gaa mafay takwar da yaŋ masa ye ke də vara vaw aabay heley, afa akwar da kəs ma aɗaw sə, mafay ana, təlam nesey, amcakwa vara vaw.»

¹⁶Tumas nda masa aca zaliya Mawasay sə, ke gweɗec ndah masasəraka jene dərziya, gege: «Andakwa may, amcakwa, anda da məcakwa ava aŋga.»

¹⁷Mahusa te Yesu a Betani, a ta ŋgatafa Lazaraws dapa jəvay, ke ŋgə manah faɗ cay.

¹⁸Betani ana sə, aŋga zef eve berne te Zeruzelem, e ŋgə kilewmeeter mbala mahkar,

¹⁹Ndana hay gaa dapa vavara te Zudey, ac ke dey kad vara Marta va Maaray ke te təkecen rav, mafay ta maməc ta malamaŋ teceŋ.

²⁰Masa Marta a cəna Yesu e dekey, ka hway ka ta cə yaŋ ava aŋga, ta Maaray sə, aŋga manjaha da wunam.

²¹Marta ka gwaɗa Yesu, gege: «Bay Mazlakava, daha efes ka fana ta manjəkəlak sə, malama ana ka məc aabay.

²²Amaa kwa təlam nesey ana, ya səniya, jə masa ka nəkafa Zlav fakwanay sə, a vakaa.»

²³Yesu ka gwaɗa, gege: «Malamakw a ta pərakata dapa maməcay.»

²⁴Marta ka vahan, gege: «Aŋga, ya səniya, a ta pərakata pas te mepərek ta ndah maməca dapa pas te mendəv ta vavara.»

²⁵Yesu ka gwaɗa, gege: «Yey sə, ya nda mapəraka nda dapa maməcay, ya nda mavana mesfeney. Nda masa ka kəs ma aɗaw, kwa ka məcata, a ta njah eve ndey,

²⁶nda masa aŋga eve ndey, ka kəs ma aɗaw sə, kwa a ta məc aabay. Ka kəs ma ana na geyey?»

²⁷Marta ka vahan, gege: «Aŋga, Bay Mazlakava, ya kəsiya, kaa sə, ka Kəristi, Wut ta Zlavay masa anda ɓəliya e de dek kad pa vavara.»

²⁸Ava dəɓa ta masa Marta ka gwaɗa Yesu ara nesey, ke dey vara dəmaŋ Maaray, ka sasəkana ma, gege: «Nda masasəraka nda ke dekey, a zalakaa.»

²⁹Masa Maaray a ta cəna ara nesey sə, ke zleftek zef, ke dey kad vara vaw.

³⁰Yesu ka husa pa wunam ana aabay heley, amaa aŋga faŋga ana heley dapa slam masa ac ta cə yaŋ ava Marta.

³¹Ndah dapa vavara te Zudey masa ac da way ava Maaray aca təkan rav sə, aca wala Maaray e zleftek paf, e də kad a vəda ava mavas vaw sə, ac ka wulakaw, e zleftek nesey sə, ka ta kuɗa a ma ta jəvay. Ac ka cəpaw.

³²Maaray a husa pa slam masa Yesu aŋga dapa, a ta wala sə, kwerjejekw! E kekəred fəma tata, a gwaɗa, gege: «Bay Mazlakava, daha efes ka fana ta manjəkəlak sə, malama ana ka məc aabay pəse.»

³³Masa Yesu a wala Maaray va ndah mecəpekey, aca kuɗa, ka ɓəlan rav macəkuma bay.

³⁴E gweɗ, gege: «Akwa paɗ macəhwandaw ana sə, fəla?» Ac ka vahan, gege: «Bay Mazlakava, dek ta wuzaɗa.»

³⁵Yesu ka kuɗa.

³⁶Ndah medek dapa vavara te Zudey sə, ec ke gweɗ, gege: «Mawala masa a wal Lazaraws ana!»

³⁷Amaa ndah dərziya deveŋ eceŋ ec ke gweɗ, gege: «Mawunan ndey ta nda mahazlaw sə, aŋga biba, naa a zlafa maran ma ta maməc ta Lazaraws ana bay ŋgəɗa geyey?»

³⁸Ava dəɓa ana, rav te Yesu ke bəzleŋgeɗ saya. Ke dey a ma ta jəvay ana. Jəvay ana sə, mahwahurkwa dapa kekeŋ mazlakava ana, maɓəzla eve beelem.

³⁹Yesu gege: «Matatalama beelem da ma ana avəda.» Marta dəmaŋ ta nda maməca sə, ka gwaɗa, gege: «Bay Mazlakava, a ta zakafandakwa, afa ke ŋgə manah faɗ pəsna.»

⁴⁰Amaa Yesu ka vahan, gege: «Ya ka gwaɗakaa aabay geyey? Daha ka kəs ma aɗaw sə, ka ta wala gədaŋ ta Zlavay.»

⁴¹Ac ka tatalama beelem sə, avəda. Yesu ka baŋgaɗ ndey kad a wudam, ka cə mbahw, gege: «Papa, ya ŋgakaa wasay, afa ka ka cənawa mbahw aɗaw.

⁴²Ya səniya, ka cənawa mbahw aɗaw cəɗem cəɗem, amaa ye gweɗ ara nesey sə, mafay ta miya da cak taaɗaw nesey, afa aca ra kəsiya kaa sə, ke te zlərekiyey.»

⁴³Ava dəɓa te megweɗ ma ana, ka tal ma ava gədaŋ, gege: «Lazaraws, dek kad a vəda!»

⁴⁴Lazaraws, nda məcata sə, həmɓak! E zleftek, e dek kad a vəda, sek va ha hay matəkaɗa ava rəkwat, yaŋ tata masərata ava rəkwat. Yesu ke gweɗec kad ndana hay, gege: «Mapəlan avəda, margərda da daɗay.»

⁴⁵Ndah dapa vavara te Zudey gaa medek kad vara Maaray sə, ac ka wala jə masa Yesu ta ŋgiya sə, ac ka kəs ma tata.

⁴⁶Amaa ndah leŋgeɗ hay deveŋ eceŋ, ec ke dey kad vara Farisa hay, ec ke kərecen maɗay da yaŋ jə masa Yesu ta ŋgiya.

⁴⁷Bay hay ta ndaakwas hay va Farisa hay ac ka cam yaŋ dapa slam ta mamənak tec mazlakava, ec ke gweɗ, gege: «Anda da ŋgakwa gwagumaw? Nda ana na e ŋgə cah hay elehey.

⁴⁸Daha anda gərakwaɗ a da ŋgaw ara nesey sə, ndana hay fakwanay ac ta kəs ma tata. Ara nesey, mazlakava hay ta Rawma ec te dekey, ac ta pəlahandakwaɗ Way ta kwakwas tandakwa avəda, ac ta bazlandakwa Zuwef hay avəda.»

⁴⁹Nda amta deveŋ eceŋ ɓa, mezel Kayfas. Aŋga mazlakava ta ndaakwas hay dapa mavay ana ŋgesey, gege: «Akwar na kwa akwa cəna jene bay!

⁵⁰Akwa sən masa zuwan nda amta ta məc mafay ta miya fakwanay da yaŋ masa andakwa fakwanay te bezl aabay geyey.»

⁵¹E gweɗek ara nesey sə, mawulak yaŋ tata bay, amaa ara masa dapa mavay ana ŋgesey sə, aŋga mazlakava ta ndaakwas hay, e gweɗ ara nda mehwedek ma da yaŋ a lada Yesu da məcata mafay te Zuwef hay fakwanay,

⁵²a ta məc sə, mafay te Zuwef hay babəla bay, amaa ke te cemecen yaŋ te wudeh ta Zlavay masa ec ke kwekwececeŋ, ara nesey, ec te cemec ka vaw amta.

⁵³Dəga pəsaŋga ana ŋgesey, ac ka zlac mawulak yaŋ teceŋ ta makəɗiya ka macəhwandaw.

⁵⁴Ara nesey, Yesu ka ŋgway kad pa taɓa mazlakava hay te Zuwef hay meendey meendey sə, ɓasabay. Ac ka data dapa faŋga kad pe berne, mezel Efərayim, dapa vavara masa aŋga zef ava səɓak, dərŋga ec ke vərendə ava ndah masasəraka jene tata.

⁵⁵Dapa ŋgesey ana, macunam te Zuwef hay mezel Pak sə, aŋga hukw cay. Ndana hay gaa dapa wunam hay jaka ma ta səɓak ec ke dey kad Zeruzelem manah amta wagaa macunam ana e te husekey, afa aca ra pana yaŋ tec avəda, ec de tər ka ndah mambəla ana fa yam te ndey ta Zlavay.

⁵⁶Ac ka yah Yesu, ac ka nəkaw dapa taɓa tec amta amta dapa Way ta kwakwas, gege: «Akwa wulakiya gwagumaw? E dek pa macunam ana aabay geyey?»

⁵⁷Mazlakava hay ta ndaakwas hay va Farisa hay ec ke və cəv, gege: «Kwa waawa masəna slam masa Yesu aŋga dapa sə, e de dek gwaɗandanay, ara nesey, anda ra te təhezekey.»