Read Cuvok Zaŋ 14 Bible Online

Zaŋ 14 - Cuvok bible

Zaŋ 14

¹Yesu ke gweɗec ndah masasəraka jene tata, gege: «Rav takwar a ta təɗakwar bay. Makəs ma ta Zlavay, makəs ma taaɗaw may.

²Da way ta Papa sə, slam ta manjah hay mabay. Daha slam ana hay ɓa tehwe aabay sə, ya gwaɗakwar masa ye dey, ya ta ləmadakwar slam ana hay masa akwar ta njah dapa sə, aabay.

³Daha ya ka ta data pa maləmadakwaɗ cay sə, ye te vehekey, andə ta dakwa ava akwar, ara nesey, pa slam masa ya ta njahay sə, akwar ta njah faŋga may.

⁴Slam ana masa ye te də kad pa nesey sə, akwa sən cəvey ana.»

⁵Tumas ka nəkafa, gege: «Bay Mazlakava, slam masa ke te də kad pa nesey sə, anda səniya bay. Naa, anda ra sən cəvey ana sə, gwagumaw?»

⁶Yesu ka vahan, gege: «Yey sə, ye cəvey, metehwe ana va ye mesfeney. Ndana mazlafa medə kad vara Papa jaka pe cəv mekele aabay, say jaka vereyey.

⁷Daha akwa səniyey, akwa səna Papa avəda may. Dəga ta pəsna akwa səniya, akwar ka wala.»

⁸Fəlep ka gwaɗa, gege: «Bay Mazlakava ŋguzdandan Zlav Papaŋ ana, makandaw cay!»

⁹Yesu ka vahan, gege: «Dəga zleezle andakwa ava akwar fa slam ana, ka ke səniyey bay suwar geyey Fəlep? Nda masa ka wala yey, ka wala Zlav Papaŋ. Naa ke gweɗiyey ŋguzdandan Zlav Papaŋ sə, mafay te mey?

¹⁰Ka ka kəsaw masa ya dapa Zlav Papaŋ, Zlav Papaŋ may, aŋga dapa yey sə, aabay geyey? Ma hay masa ya ta gwaɗakwar nesey sə, ye gweɗek dapa yaŋ taaɗaw bay. Sesəker Zlav Papaŋ masa aŋga dapa yey sə, aŋga ta ŋgə mezlər tata hay.

¹¹Makəs ma aɗaw, yey sə, ya dapa Zlav Papaŋ, Zlav Papaŋ may, aŋga dapa yey. Daha akwa ka kəs ma aɗaw aabay, makəs mezlər hay masa ya ta ŋgiya naa ŋgəɗa ta!

¹²Ya gwaɗakwar, nda masa ka kəs ma aɗaw sə, e te ŋgə mezlər hay masa ye ŋgec na may. A ta ŋgiya ana sə, mazlakava ana ka fəna masa ya ŋgiya, afa yey sə, ye də kad vara Papa.

¹³Jene hay fakwan masa akwar ta nəkiya eve mezeley aɗaw sə, ya ta ŋgakwaɗay, afa ndana hay aca ra hahəm Zlav Papaŋ jaka pa Wudiya.

¹⁴Daha akwa nəkefiyey jene eve mezeley aɗaw sə, ya ta ŋgakwaɗay.»

¹⁵Yesu ke gweɗ saya, gege: «Daha akwa weliyey, manahda yaŋ kad pa ma hay ta ma aɗaw majawa,

¹⁶yey sə, ya ta cana mbahw Zlav Papaŋ, a da zlərakwar nda ma ta jənakwar. Nda ana sə, a ta njah ava akwar katar ka midakw.

¹⁷Aŋga sə, aŋga Mesfen te metehwe ana, aŋga nda masa ndah ta vavara aca zlafa makəsiya bay, afa ac ka wala aabay, aca səniya bay. Amaa takwar sə, akwa səniya, afa aŋga da cak takwar, aŋga dapa akwar.

¹⁸Ya ta gərdakwar ara matawak hay sə, aabay, ye te vehekey kad varakwar.

¹⁹Asaya, manjah kusetke, ndah ta vavara ec te weley ɓasabay, amaa takwar sə, akwar te weleyey, yey eve ndey, akwar may, akwar ta njah eve ndey.

²⁰Daha pas ana ka ta husakata cay sə, akwar ta səna avəda, ya macama ava Papa, akwar may, akwar macama ava yey, yey may, ya macama ava akwar.

²¹Nda masa a pə ma aɗaw majawa pe leŋgesl tata, e ŋgə mezlər ava aŋga sə, ŋgesey, e weliyey. Nda masa e weliyey, Papa a ta waya. Yey may, ya ta wal nda ana, ya ta ŋguzdan yaŋ taaɗaw.»

²²Zud masa aŋga Zudas Iskariyawt bay, ka gwaɗa, gege: «Bay Mazlakava, ka ta ŋguzda yaŋ takaa kad ndah ta vavara aabay say kad andaw babəla sə, mafay te mey?»

²³Yesu ka vahan, gege: «Nda masa e weliyey, a pafa yaŋ ma aɗaw sə, Papa a ta wal nda ana ŋgesey. Andaw te dey kad vara vaw, andə ta njah da vara vaw.

²⁴Nda masa e weliyey bay sə, a pafa yaŋ ma aɗaw hay aabay. Ma masa akwar ta cəna nesey sə, e dek de vereyey bay, amaa e dek da vara Papa, nda mezlərekiyey.

²⁵Ya gwaɗakwaɗ jeŋ ana hay nesey sə, dapa masa ya da cak takwar heley.

²⁶Nda ma ta jənakwar, Mesfen mavəna masa Papa a ta zlərakwar eve mezeley aɗaw sə, a ta sasərakakwaɗ jene hay fakwanay, a ta sləfakwaɗ jene hay fakwan masa ya ta gwaɗakwar.

²⁷Ya gərakwar metehey, ya vakwar metehey aɗaw. Ya ta vakwar ara ndah ta vavara ta viya bay. A lada rav takwar de kekesl bay, e de ŋgə zidaw bay.

²⁸Akwar ka cəna, ma masa ya ka gwaɗakwar: “Ya ta daɓa, ava dəɓa ana, ye te vehekey kad varakwar”. Daha akwa weliyey, akwar te wesley mafay ta masa ya ta daɓa kad vara Papa, afa Zlav Papaŋ sə, e fəneyey.

²⁹Ya gwaɗakwaɗ ma ana təlam nesey, wagaa jeŋ ana e te ŋgə, ara nesey, daha pas ana ka ta husakata sə, akwar ta kəsa ma aɗaw ana avəda.

³⁰Ya ta gwaɗ ma hay gaa ava akwar ɓasabay, afa bay ta vavara nesey e dekey. Metehwe ana, aŋga sə, aŋga ava gədaŋ kwa kusetke da yaŋ yey aabay,

³¹amaa da lada sə, ndah ta vavara aca ra səna, yey sə, ya wal Papa. Ye ŋgə jene hay fakwan masa Papa ana te gweɗiyey. Mezleftek, amcakwa!»