Read Cuvok Zaŋ 17 Bible Online

Zaŋ 17 - Cuvok bible

Zaŋ 17

¹Ava dəɓa ta masa Yesu ke gweɗec ndah masasəraka jene tata ara na cay sə, ka baŋgaɗ ndey kad a wudam, a cə mbahw kad Zlavay, gege: «Awa Papa, pas ana ka husakata cay. Ŋguzdek mehehəm taaɗaw, yey Wudiyak kad ndana hay, afa yey Wudiyak, ye de ŋguzdek mehehəm takaa kad ndana hay may.

²Ka ke viyey matimaazlaɓ takaa da yaŋ ndana hay fakwanay. Ara nesey, ye te vec mesfen katar ka midakw kad ndah masa ke te vuwec pa ha taaɗaw.

³Mesfen katar ka midakw ana sə, masa ndah ana aca səniya, kaa sə, ka Zlav metehwe ana, pal ka amta va masən yey Yesu Kəristi masa ke te zlərekey.

⁴Yey sə, ya ka hahəmakaa dapa vavara nesey, ya ka ndəvda mezlər masa ka ta vuwa te meŋgey.

⁵Təlam nesey, Papa, hehəmiyey da cak takaa eve mehehəm masa ke te viyey dapa masa ya da cak takaa heley wagaa ka ta lam vavara.»

⁶«Ya ka ŋguzda mezel takaa kad ndah masa ke te pelekec dapa vavara, ka ke vuweceŋ. Ac ndah takaa, amaa ka ke vuweceŋ pa ha taaɗaw, ac ka pafa yaŋ ma takaa.

⁷Təlam nesey, aca səniya, jene hay fakwanay masa ka ta vuwa sə, ece dek da varakaa,

⁸afa ye ke vec ma hay masa ka ta vuwa, ac ka kəsaw, ac ka səna eve metehwe ana, ye dek sə, da varakaa, ac ka kəsaw, mezlərekiyey sə, kaa.

⁹Ya cə mbahw nesey sə, mafay teceŋ ana, bəna mafay ta ndah ta vavara bay. Amaa ye cə mbahw sə, mafay teceŋ, ndah masa ke te vuwec pa ha taaɗaw, afa ac ndah takaa.

¹⁰Jene hay taaɗaw fakwanay sə, takaa. Ara aŋga ana, jene hay takaa hay fakwanay sə, taaɗaw. Mehehəm taaɗaw ke ŋguzdek kad a vəda jaka vereceŋ.

¹¹Ya ta njah dapa vavara na ɓasabay. Eceŋ sə, ac ta njah dapa vavara, yey sə, ye te veh kad varakaa. Papa, kaa sə, ka mavəna, pefec ndey ava gədaŋ te mezel takaa masa ka ta vuwa. Ara nesey, ac ta tərata ka nda amta, ara masa andaw ava kaa amta.

¹²Dapa masa andaw eveceŋ sə, ye ke pefec ndey dapa gədaŋ te mezel takaa masa ka ta vuwa. Ye ke berɗeceŋ, kwa nda amta ka zə aabay, say nda masa aŋga ana ta zə mesfen tata, e ŋgə ara nesey sə, afa Ma mavinda zleezle sə, da ŋgata.

¹³Təlam nesey, ye də kad varakaa, ye gweɗ ma ana hay nesey sə, dapa vavara, afa ndah ana, ac da ŋgat mewesley aɗaw masa manəha dapa eceŋ.

¹⁴Yey sə, ye ke vec ma takaa, amaa ndah ta vavara ece welec fe ndey bay, afa eceŋ sə, ac ndah ta vavara sabay, ara aŋga ana yey may, ya nda ta vavara na bay.

¹⁵Ya ka nəkafakaa masa ke de həlec avəda dapa vavara sə, aabay, amaa ke de pefec ndey Nda suwe de ŋgec jə masa e teh teh bay, bay.

¹⁶Eceŋ sə, ac ndah ta vavara na bay, ara masa yey, ya nda ta vavara na bay may.

¹⁷Peɗec ha wal kad kaa jaka pe metehwe ana. Ma takaa sə, aŋga metehwe ana.

¹⁸Ke ke zlərdiyey kad pa vavara, ara aŋga ana, yey may, ye zlerdec dapa vavara.

¹⁹Yey ana, ye pə yaŋ taaɗaw wal kad kaa mafay teceŋ, afa eceŋ may, aca ra tər ka ndah mapa ha wal kad kaa jaka pe metehwe ana.»

²⁰Ya cə mbahw ana sə, mafay ta ndah masasəraka jene taaɗaw babəla bay, amaa ya cə mbahw sə, mafay ta ndah ma ta kəsa ma taaɗaw jaka pa mabəzad ma ta ndah masasəraka jene taaɗaw nesey,

²¹ara nesey, ac fakwanay aca ra njah amta, ara kaa, kaa Papa, ka dapa yey, yey may, ya dapa kaa. Ac may, ac da njah dapa andaw, afa ndah ta vavara da kəsiya, ke te zlərekiyey.

²²Yey sə, ye ke vec mehehəm takaa masa ka ta vuwa, afa ac da njah amta, ara andaw ava kaa amta.

²³Yey sə, ya dapa eceŋ, ara masa ka dapa yey. Ara nesey, ac ta njah mambəla ana ara nda amta, afa ndah ta vavara da səna, kaa sə, ke te zlərekiyey. Asaya, afa ndah ta vavara da səna, kaa sə, ke welec ndah masasəraka jene taaɗaw ara masa ke te weliyey.

²⁴Papa, ya wal sə, slam masa ya ta njah dapa sə, ndah masa ka te vuwec sə, aca ra njah dapa ava yey may. Ara nesey, ac ta wala mehehəm taaɗaw masa ka ta vuwa, afa ka ke weliyey dəga vavara malama bay heley.

²⁵Papa, kaa sə, ka nda maŋga mezlər eve cəvey ana, ndah ta vavara nesey, ac ka sənakaa aabay. Amaa yey sə, ya ka sənakaa, ndah nesey sə, ac ka səna ke te zlərekiyey.

²⁶Ye ke ŋguzdecen mezel takaa, afa ac da sənakaa, ye te ŋguzdecen saya, afa mawal nda masa ka te weliyey sə, da njah dapa eceŋ. Yey may, ya ta njah dapa eceŋ.