Read Cuvok Zaŋ 18 Bible Online

Zaŋ 18 - Cuvok bible

Zaŋ 18

¹Ava dəɓa ta masa Yesu ka ndəvda macə mbahw ana cay, ka data ava ndah masasəraka jene tata a luwa leŋgeɗey ta wayam ta Kedəraŋw. Zerdeŋ faŋga ana ɓa, ec ke sehw pa ava ndah masasəraka jene tata.

²Anjəkar, Zudas nda ma ta vana Yesu pa ha ta maslagəra tata hay sə, a sən slam ana may, afa Yesu va ndah masasəraka jene tata ac ka cam vaw dapa dəɓa gaa hay.

³Zudas ana ke dey pe zerdeŋ ana, aŋga fəma teceŋ ava miya ta kafaraŋ hay gaa, ndah maɓəla Way ta kwakwas masa mazlakava hay ta ndaakwas hay va Farisa hay te zlərekeceŋ. Ac fakwanay, maləmada ava petərla hay, ava valakw hay va jə ta vəram hay fa ha fa ha.

⁴Yesu a sən jə masa a ta ŋgatafa fakwanay. Mafay ana, ke zleftek, ke ŋgetefeceŋ, ke nəkefec, gege: «Akwa yah wa?»

⁵Ac ka vahan, gege: «Anda yah Yesu, wut ta wunam te Nezeret.» Yesu gege: «Yey ana.» Anjəkar Zudas, nda ma ta vana Yesu pa ha ta maslagəra tata hay sə, mazlaca faŋga deveŋ eceŋ.

⁶Dapa masa Yesu e gweɗec: «Yey ana» sə, ece veh ava dəɓa ava dəɓa, ece təɗ kad fa vara.

⁷Yesu ke nəkefec saya, gege: «Akwa yah sə, wa?» Aca vahan, gege: «Yesu, wut ta wunam te Nezeret.»

⁸Yesu ke vehecen, gege: «Ya ka gwaɗakwar cay, yey ana. Daha akwa yah sə, yey, megərdec ndah nesey aca ra daɓa.»

⁹Yesu e gweɗ ara nesey sə, afa ma tata da ŋgata ara masa aŋga te gweɗ dapa mbahw tata, gege: «Ya ka zə ndana kwa amta deveŋ ndah masa ka te vuwec pa ha taaɗaw sə, aabay.»

¹⁰Simaŋw Piyer, aŋga ava kafaya ɓa, pat! E seɗek kad a vəda, cərahan zləmay ta zam ta nda maŋga mezlər da way ta mazlakava ta ndaakwas hay sə, avəda. Mezel ta nda maŋga mezlərey ana sə, Malkus.

¹¹Amaa Yesu ka gwaɗa Piyer, gege: «Vahaɗ kafaya takaa pə way ana. Ka wulakiya sə, ya da sə marga masa Papa ta vuwa sə, bay geyey?»

¹²Kafaraŋ hay ava mazlakava tec hay va ndah maɓəla Way ta kwakwas masa mazlakava hay te Zuwef hay te zlərekeceŋ sə, ac ka təhazaw, ac ka jawa.

¹³Macaaca ana, aca hwadiya a way ta Hanas, mes ta Kayfas. Kayfas ana sə, aŋga mazlakava ta ndaakwas hay ta laməŋga ana.

¹⁴Anjəkar, Kayfas ana ŋgesey te vec mamənak kad mazlakava hay te Zuwef hay, gege: «Zuwan nda amta ta məcay pa slam ta ndana hay fakwan aabay geyey.»

¹⁵Simaŋw Piyer va nda masasəraka jene leŋgeɗey, ac ka cəp Yesu. Ara masa mazlakava ta ndaakwas hay, a sən nda masasəraka jene leŋgeɗey ana ŋgesey, ece sehw ava Yesu kad hwaɗ ta way ta nda mazlakava ta ndaakwas hay.

¹⁶Piyer sə, aŋga mazlaca da vəda, fəma ta way. Nda masasəraka jene leŋgeɗ masa mazlakava ta ndaakwas hay a səniya sə, ka data a vəda, ka gwaɗa ŋgwaz maɓəla ma ta way, a da vana cəv kad Piyer de sehw kad way.

¹⁷Ara nesey, ŋgwaz maŋga mezlərey maɓəla ma ta way sə, ka gwaɗa Piyer, gege: «Kaa may, naa ka nda amta deveŋ ndah masasəraka jene ta nda ana antisey?» Piyer ka vahan, gege: «Away, ya bay!»

¹⁸Ndah maŋga mezlərey va ndah maɓəla Way ta kwakwas sə, ac ka gəɗa kwakwaw, aca daziya, afa memeɗ mabay. Piyer may, aŋga mazlaca da cak teceŋ, a daz kwakwaw ana.

¹⁹Ava dəɓa ana, mazlakava ta ndaakwas hay sə, a nəkafa Yesu da yaŋ ndah masasəraka jene tata va mesesərek tata hay masa aŋga te sesərekecen kad ndana hay.

²⁰Yesu ka vahan, gege: «Yey sə, ye ke gweɗ meendey ta ndana hay fakwanay. Ye ke sesərekec ndana hay cəɗem cəɗem dapa Way hay ta macə mbahw te Zuwef hay va dapa Way ta kwakwas, faŋga Zuwef hay fakwanay aca ɓac vaw dapa, ye ke gweɗ ava ma maraɓa sə, aabay.

²¹Naa ke nəkefiyey ara nesey sə, mafay te mey? Nəkefec ndah masa ac ka cəna ma masa ye te gweɗey, eceŋ sə, aca səniya mambəla ana masa ye te gweɗey.»

²²Masa Yesu e gweɗek ma ana ara nesey sə, nda amta deveŋ ndah maɓəla Way ta kwakwas faŋga sə, kpay ana ha darzləmay te Yesu, a gwaɗa, gege: «Mavah ma kad mazlakava ta ndaakwas hay ara na ɓa geyey?»

²³Yesu a vahan, gege: «Daha ye ke gweɗek ma mambəla ana aabay sə, ŋguzdek ma ana kad a vəda. Amaa, daha ye gweɗek nesey sə, mambəla ana, naa ke cekiyey ha a darzləmay sə, mafay te mey?»

²⁴Ara nesey, Hanas ka zləraɗ Yesu majawa kad vara Kayfas mazlakava ta ndaakwas hay.

²⁵Dapa ŋgesey ana, Simaŋw Piyer aŋga manjaha faŋga, a daz kwakwaw. Ndah dərziya ac ka nəkafa, gege: «Kaa may, naa ka nda amta deveŋ ndah masasəraka jene ta nda ana na biba?» Amaa, a cafa ma, gege: «Away, ya bay!»

²⁶Nda amta deveŋ ndah maŋga mezlər ta mazlakava ta ndaakwas hay, nda ana ŋgesey, hwaɗ ta way tec amta ava nda masa Piyer ta cərahan zləmay sə, ka gwaɗa, gege: «Ya ka walakaa, akwar ava aŋga ana dapa zerdeŋ aabay kwa?»

²⁷Amaa Piyer ka cafa ma saya, gege «Away, ya bay!» Dapa ŋgesey ana, balaŋgwaz a ŋgal uway.

²⁸Tedew te pərek ana, aca kəs Yesu da way ta Kayfas, aca hwadaɗ pə way ta mambaɗ ma hay te gwevernel Pilatu. Ndah mahwadiya sə, aca gwam ke sehw kad pə way ana bay, afa aca wal mazləɓ yaŋ tec bay, aca wal mandə ɗaf ta macunam ta Pak.

²⁹Mafay ana, Pilatu ke dek kad a vəda, ke ŋgetefeceŋ. Ke nəkefec, gege: «Akwa cafa lalaw nda ana nesey sə, da yaŋ mey?»

³⁰Ac ka vahan, gege: «Daha ke ŋgek jene masa e teh bay aabay sə, anda hwedek kad varakaa aabay.»

³¹Pilatu, ke vehecen, gege: «Akwar ava yaŋ takwar ana, makəsaw, ma ta təɗana ma yaŋ ara ma majawa takwar te gweɗey.» Mazlakava hay te Zuwef hay aca vahan, gege: «Andaw ava cəv ta makəɗ ndana ka macəhwandaw sə, aabay.»

³²Jeŋ ana e ŋgə ara nesey sə, afa ma masa Yesu te gweɗey, a ta məc memey sə, a da ŋgata.

³³Pilatu ke sehw kad pə way tata ana saya, ka zala Yesu, ka nəkafa, gege: «Kaa sə, ka bay te Zuwef hay geyey?»

³⁴Yesu ka vahan, gege: «Ke gweɗekey nesey sə, dapa mawulak yaŋ takaa geyey, ndana hay ta gwaɗakaa?»

³⁵Pilatu a vahan, gege: «Yey sə, ya nda Zuwef ana, geyey? Ndah takaa va mazlakava ta kwakwas takwar hay ta hwadakakaa kad vara yey, naa ke ŋgek sə, mey?»

³⁶Yesu a vahan, gege: «Meŋgə bay taaɗaw da yaŋ ndana hay sə, dapa vavara na bay. Daha maŋga bay dapa vavara nesey yey sə, efes ndah maŋga mezlərey aɗaw hay aca ŋgana vəram avəda mafay taaɗaw, afa mazlakava te Zuwef hay ece re təheziyey bay. Amaa təlam nesey meŋgə bay taaɗaw da yaŋ ndana hay sə, dapa vavara fana na bay.»

³⁷Pilatu ka gwaɗa, gege: «Naa kaa sə, ka bay la geyey?» Yesu ka vahan, gege: «Ara masa ke te gweɗekey ana, yey sə, ya bay. Ye heyekey, ye dek kad pa vavara nesey sə, afa ya da tə yaw da yaŋ metehwe ana. Nda masa aŋga nda te metehwe ana sə, a cak zləmay fa ma taaɗaw hay.»

³⁸Pilatu ka vahan, gege: «Metehwe ana sə, jene mey?» Ava dəɓa ana, Pilatu ka də kad a vəda vara Zuwef hay saya, gege: «Kwa ya ka ŋgat mebər vara nda ana te makəɗ ka macəhwandaw sə, aabay.

³⁹Amaa ara masa kwakwas takwar te gweɗey fa mavay fa mavay, ya pəlakwar nda amta deveŋ ndah maɓəzla dapa daŋgay masa akwa waya pas ta macunam ta Pak. Naa akwa wal ya pəlakwaɗ bay te Zuwef hay sə, geyey?»

⁴⁰Aca vahan ava macə lalaw, gege: «Away, ka ta pəla bay, pəl sə, Barabas.» Anjəkar Barabas ana sə, aŋga nda makəɗa nda.