Read Cuvok Zaŋ 20 Bible Online

Zaŋ 20 - Cuvok bible

Zaŋ 20

¹Ta slamɓal te pərek, pas ta luma ta məzam, Maaray dəm ta wunam ta Magədala, ke dey e te wuzeɗek jav te Yesu. Mahusa tata a ma ta jəvay ana, a wala beelem mazlakava da ma ta jəvay ana sə, matatalama avəda ava zlalav.

²Ka hway kad vara Simaŋw Piyer va nda masasəraka jene leŋgeɗey, nda masa Yesu a waya elehey, gege: «Ac ka kəsa macəhwandə ta Bay Mazlakava avəda dapa jəvay, anda sən slam masa ac ta piya pa bay.»

³Piyer ke də kad a vəda ava nda masasəraka jene leŋgeɗey, ec ke dey a ma ta jəvay ana.

⁴Ac ka hway cuweeney fa slam ana, amaa nda masasəraka jene leŋgeɗ sə, a hway ka fəna Piyer, ka husata kamma a ma ta jəvay ana.

⁵Ke zeŋgey, ke pə ndey kad pa, a ta wala sə, rəkwat hay makuya fa vara, amaa ke sehw pa jəvay ana aabay.

⁶Mehusek ta Simaŋw Piyer ava dəɓa tata sə, səɗekw! E sehw kad pa, a ta wala sə, rəkwat hay makuya fa vara

⁷va rəkwat masa aca təkaɗan yaŋ ava aŋga, rəkwat ana tata mapaɗa wal ava cakay.

⁸Dapa ŋgesey ana, nda masasəraka jene leŋgeɗ masa a husa macaaca ana a ma ta jəvay sə, ke sehw pa jəvay ana may. Ka wala, ka kəsaw pa rav,

⁹afa kasl pa pas ana ŋgesey, ac ka cəna ma mavinda masa e gweɗ da yaŋ Yesu a ta pərakata dapa maməcay sə, aabay.

¹⁰Ava dəɓa ana, ndah masasəraka jene ana cuweeney sə, ec ke vehec kad a wunam.

¹¹Dapa ŋgesey ana, Maaray aŋga mazlaca da ma ta jəvay ana da vəda, a kuɗa. Masa a kuɗa sə, e zeŋgey, e pə ndey kad pa jəvay ana,

¹²a ta wala maskəla hay ecew ac ava rəkwat fa vaw məsle ana, ac manjaha cama dapa slam masa ac ta paɗ macəhwandə te Yesu fətiya. Nda amta aŋga manjaha fa slam ta yaŋ, nda leŋgeɗey aŋga manjaha fa slam te sek.

¹³Maskəla hay sə, aca nəkafa, gege: «Ka kuɗa ka wal mey?» E vehecen, gege: «Ac ka kəsa macəhwandə ta Bay aɗaw Mazlakava avəda, ya sən slam masa ac ta paɗ pa bay.»

¹⁴Ava dəɓa te megweɗ ta ŋgwaz ana ara nesey, e te pə ndey kad ava dəɓa sə, a wala Yesu mazlaca, amaa kwa ka sənaw masa aŋga sə, aabay.

¹⁵Yesu ka nəkafa, gege: «Ka kuɗa ke wel mey? Ka yah wa?» Amaa Maaray a wulakiya sə, gəla aŋga nda te zerdeŋ ana. Ka gwaɗa, gege: «Bay aɗaw, daha ka ta kəsiya sə, ŋguzdawa slam masa ka ta paɗ pa, ya ra te kəsek avəda.»

¹⁶Yesu ka gwaɗa, gege: «Maaray!» Maaray ka ŋgwadafa ma, ka gwaɗa ava ma te Ebəre, gege: «Rabuni», ara megweɗey, nda masasəraka nda.

¹⁷Yesu ka gwaɗa, gege: «Ke pefiyey ha bay, afa ye ke veh vara Papa aabay heley. Amaa daɗ ŋgetefec malama hay, gweɗeceŋ, ye te veh kad vara Papa masa aŋga Papaŋ takwar may, aŋga Zlavay aɗaw masa aŋga Zlav takwar may.»

¹⁸Maaray dəm ta wunam ta Magədala sə, ke dey vara ndah masasəraka jene, gege: «Ya ka wala Bay Mazlakava!» Ke gweɗecen ma hay masa Yesu ta gwaɗa fakwanay.

¹⁹Ta fakwaɗ pas ta luma ta Məzam ana ŋgesey, ma ta way hay masa ndah masasəraka jene ac dapa sə, ac mafaala, afa aca ŋgə zidaw fa mazlakava hay te Zuwef hay. Yesu ke təhekey, ke zlec pa taɓa teceŋ, gege: «A lada metehey da njah ava akwar.»

²⁰Ava dəɓa te megweɗ tata ara nesey, ke ŋguzdecen ha tata hay va ŋgalak tata. Ndah masasəraka jene sə, ec ke wesl macəkuma bay, afa ac ka wala Bay Mazlakava.

²¹Ara nesey, Yesu ke gweɗec saya, gege: «A lada metehey da njah ava akwar. Ara masa Zlav Papaŋ, te zlerdeyey, yey may, ya zlardakwar.»

²²Ava dəɓa ta ma ana hay nesey, ke fətefec mesfeney, gege: «Makəs Mesfen Mavəna.

²³Ndah masa akwar ke pəlecen mebər teceŋ, Zlav e te pəlecen mebər tec may. Amaa ndah masa akwar ke pəlecen mebər tec aabay sə, Zlav e te pəlecen mebər tec aabay may.»

²⁴Tumas, masa mezel Mawasay, aŋga nda amta deveŋ ndah masasəraka jene tata kuraw dapa yaŋ ana ecew, dapa masa Yesu e ŋguzdecen vaw kad ndah masasəraka jene tata dərziya sə, aŋga faŋga aabay.

²⁵Ndah masasəraka jene dərziya ac ka gwaɗa, gege: «Andə ka wala Bay Mazlakava.» Amaa Tumas ke vehecen, gege: «Daha ya ka wala vevek te mbəlek fa ha tata te meder aabay, daha ya ka tal wut ta ha pa slam te mederey ana aabay, daha ya ka tal ha aɗaw pe vevek te mbəlek fa ŋgalak tata aabay sə, ŋgesey, ya ta kəs ma ana aabay.»

²⁶Manah macahkar ana, ndah masasəraka jene aca kwas vaw pə way ana saya, Tumas, aŋga deveŋ eceŋ. Yesu ke dekey, ma ta way ana hay mafaala, ke zlec pa taɓa teceŋ, gege: «A lada metehey da njah ava akwar.»

²⁷Yesu ka gwaɗa Tumas, gege: «Telek wut ta ha takaa kad fana, wala ha aɗaw hay. Ŋgucek ha takaa, talaɗ pa ŋgalak aɗaw. Gərda masasal rav, amaa kəs ma ana.»

²⁸Tumas a vahan, gege: «Ka Bay Mazlakava aɗaw, ka Zlavay aɗaw!»

²⁹Yesu ka gwaɗa, gege: «Ka kəs ma ana nesey sə, afa ke te weleyey biba? Meweslə ɓa kad ndah masa ec ke weleyey aabay, ac ka kəs ma aɗaw.»

³⁰Yesu ka ŋgə cah hay mekele mekele gaa meendey ta ndah masasəraka jene tata, amaa cah hay ana fakwanay mavinda dapa ɗelewer ana na aabay.

³¹Cah hay masa ac mavinda dapa ɗelewer ana nesey sə, afa akwar da pə yaŋ takwar ta makəs Yesu sə, aŋga Kəristi, aŋga Wut ta Zlavay. Ara nesey, daha akwar ka kəs ma ana, akwar ta ŋgat mesfeney jaka vara vaw.