Read Cuvok Zaŋ 21 Bible Online

Zaŋ 21 - Cuvok bible

Zaŋ 21

¹Ava dəɓa ana, Yesu ke ŋguzdecen vaw saya kad ndah masasəraka jene tata da ma te təker mazlakava te Tiberiyat. Mawala ara masa e ŋgey ana.

²Simaŋw Piyer, Tumas masa aca zala Mawasay, Neteniyel wut te berne ta Kana dapa vavara te Gelile, wudeh te Zebede va ndah masasəraka jene dərziya ecew, ac fa slam ana.

³Simaŋw Piyer gege: «Ye də pe metəhez kəlef.» Ac ka gwaɗa, gege: «Andaw may, anda cəpakaa.» Ec ke dey, ec ke tep pa kaslkaslah. Amaa ta vaɗ ana ŋgesey, kwa ac ka ŋgat kəlef ana aabay.

⁴Mehusek ta slam pərek, ac ta wala Yesu aŋga mazlaca da ma te təker ana, amaa ndah masasəraka jene ac ka sən masa aŋga sə, aabay.

⁵Yesu ke nəkefec, gege: «Guula aɗaw hay, akwar ka ŋgat kəlef ana may geyey?» Aca vahan, gege: «Aabay.»

⁶E gweɗec saya, gege: «Makazlaɗ səfa takwar pa yam ana, a cak ta kaslkaslah jaka luwa ta zam, akwar ta ŋgatiya.» Ac ka kazlaɗay, ac ka zlafa mesəpenek səfa ana dapa yam kad pa kaslkaslah sabay, afa ac ka ŋgat kəlef hay mabay.

⁷Nda masasəraka jene masa Yesu a waya elehey sə, ka gwaɗa Simaŋw Piyer, gege: «Anjəkar Bay Mazlakava.» Masa Simaŋw Piyer a cəna, anjəkar Bay Mazlakava sə, ka paɗ rəkwat tata fa vaw, afa aŋga ava vaw dahəŋga, e cəkwel kad pa yam ana.

⁸Ndah masasəraka jene dərziya ac ka zad kaslkaslah ana kad rav ta zazay da ma te təker ana, aca səpan səfa masa manəha weh ava kəlef sə, kad fa vara, afa ac dəreŋ ava ma te təker ana aabay, e ŋgə meeter temere amta.

⁹Dapa masa ec ke bəreŋgekec cay, ac ka wala kwakwaw magəɗa, kəlef maɗara da yaŋ ana va peŋ da cakiya.

¹⁰Yesu gege: «Mehəlekec kəlef masa akwa təhezekec təlam nesey kusetke hwa!»

¹¹Simaŋw Piyer ke sehw kad pa kaslkaslah ana, ke səpenek səfa masa manəha eve kəlef hay dapa temere ava kwakwar zlam dapa yaŋ ana mahkar, ac mazlakava mazlakava ana hay. Kwa ac dapa mabay sə, səfa ana ke ŋgər aabay.

¹²Yesu gege: «Medekey, mandaɓa ɗaf.» Kwa ndana deveŋ ndah masasəraka jene tata ka wulak manəkafa masa: «Kaa ana, ka wa?» Sə, aabay: Afa aca səniya mambəla ana, aŋga sə, aŋga Bay Mazlakava.

¹³Ara nesey, Yesu ke ŋgucefec vaw, ka kəs peŋ, ke vəneceney, ke vec kəlef ara aŋga may.

¹⁴Nesey, maŋguzad vaw te Yesu mamahkar ana kad ndah masasəraka jene tata ava dəɓa te mepərek tata dapa maməcay.

¹⁵Ava dəɓa ta mandə jene, Yesu ka gwaɗa Simaŋw Piyer, gege: «Simaŋw wut ta Zaŋ, ke weliyey ka fəna masa ndah na hay te weleyey geyey?» Ka vahan, gege: «Aŋga, Bay Mazlakava, ka səniya, yey sə, ya walakaa.» Yesu ka gwaɗa, gege: «Pefec ndey wut ta təmak aɗaw hay.»

¹⁶Ka nəkafa ke ecew ana, gege: «Simaŋw wut ta Zaŋ, ke weliyey geyey?» Piyer ka vahan, gege: «Aŋga, Bay Mazlakava, ka səniya, yey sə, ya walakaa.» Yesu ka gwaɗa, gege: «Njah ka gwala jene ta təmak aɗaw hay.»

¹⁷Ka gwaɗa mamahkar ana, gege: «Simaŋw wut ta Zaŋ, ke weliyey, geyey?» Piyer sə, ka məcan vaw avəda mafay ta masa Yesu a nəkafa ka mahkar ana: «Ke weliyey, geyey?» Ka vahan, gege: «Bay Mazlakava, kaa sə, ka sən jene hay fakwanay, ka səniya, yey sə, ya walakaa.» Yesu ka gwaɗa, gege: «Ɓəcec təmak aɗaw hay.

¹⁸Ya gwaɗakaa ava metehw tehwe ana, dapa masa ka gawla heley sə, kaa ava yaŋ takaa ana ka jaw kanda takaa, ke dey a pa slam masa ka ta waya. Amaa daha ka ka ŋgata marndaw cay sə, ka ta baŋgaɗa ha kad a wudam, ndana mekele a ta jawakaɗ kanda ana. Asaya, a ta hwadakaa pa slam masa ka waya bay.»

¹⁹Ava ma ana hay nesey, Yesu a wal megweɗ sə, Piyer a ta məc meemey. Maməc tata ana a ta hahəlan yaŋ ta Zlavay. Yesu ka gwaɗa, gege: «Cəpiyey.»

²⁰Piyer e te njer kad ava dəɓa teceŋ sə, a wala nda masasəraka jene masa Yesu a waya elehey. Nda ana sə, aŋga nda magasafa vaw fa Yesu da yaŋ ɗaf ka ta nəkafa: «Bay Mazlakava, ma ta husamdakaa kad maslagəra takaa hay sə, wa?»

²¹Piyer ka wala, ka gwaɗa Yesu, gege: «Bay Mazlakava, naa tata sə, ma ta ŋgatafa mey?»

²²Yesu a vahan, gege: «Daha ya wal a da njah eve ndey kasl pa pas te mevehek taaɗaw sə, ma takaa dapa aabay, kaa sə, cəpiyey!»

²³Ma ana nesey, ka cənata vara malamaŋ hay dərziya, ava megweɗey, nda masasəraka jene nesey sə, tata a ta macə aabay. Anjəkar, Yesu ka gwaɗa masa tata a ta macə aabay sə, aabay. Amaa a gwaɗa sə, gege: «Daha ya wal a da njah eve ndey kasl pa pas te mevehek taaɗaw sə, ma takaa dapa aabay?»

²⁴Matana yaw da yaŋ jene ana hay ŋgesey sə, nda masasəraka jene ana ŋgesey, ke vindeceŋ, taciya sə, anda səniya matə yaw tata ana ŋgesey sə, tehwe.

²⁵Yesu ke ŋgə jene hay mekele mekele gaa saya. Daha jeŋ ana hay fakwanay mavinda amta amta pe ɗelewer ana nesey sə, ya wulakiya vavara a ta husa ka ta pə ɗelewer ana na fakwan bay.