Read Cuvok Zaŋ 6 Bible Online

Zaŋ 6 - Cuvok bible

Zaŋ 6

¹Ava dəɓa ana, Yesu ke zleŋ kad luwa leŋgeɗey te təker mazlakava te Gelile masa aca zaliya təker mazlakava te Tiberiyat.

²Miya ta ndana hay gaa ac ka cəpaw, afa ac ka wala cah hay masa aŋga ta ŋgiya da yaŋ ndah eve mehecey hay.

³Mafay ana, Yesu ke tep pa wudam, ac ka njah faŋga ava ndah masasəraka jene tata.

⁴Dapa ŋgesey ana, macunam te Zuwef hay mezel Pak sə, hwak cay.

⁵Yesu e pə ndey sə, a ta wala ndana hay gaa ece dek kad vara vaw. Ka nəkafa Fəlep, gege: «Anda ta husamakakwa jə ta manday kad ndah ana fakwanay nesey sə, dama?»

⁶E gweɗ ara nesey sə, a cak Fəlep, afa aŋga sə, a sən jə masa a ta ŋgiya.

⁷Fəlep ka vahan, gege: «Kwa jə ta mandə ta bakatar temere ecew[5] sə, a ta husa kad kwa waawa masa a da ŋgataɓa mepepəsey ana sə, aabay.»

⁸Nda amta deveŋ ndah masasəraka jene tata mezel Endəre, malamaŋ ta Simaŋw Piyer, ka gwaɗa, gege:

⁹«Wat gawla fəna ɓa, aŋga ava peŋ masa səlay fətiya gaa aabay zlam va kəlef kweskweske ecew[6]. Naa kad ndana hay gaa nesey sə, a da husa mey?»

¹⁰Yesu e gweɗ, gege: «Menjeheɗec ndana hay maanjahay.» Dapa slam ana ŋgesey, kəzeŋ mabay. Ac ka njah maanjahay, mawulah ece ŋgə bakatar zlam.

¹¹Yesu ka kəs peŋ ana hay, ka ŋgana wasay Zlavay, ke vənecen kad ndana hay faŋga. Ka kəs kəlef, ka ŋgaw ara aŋga ana. Kwa waawa ka ndaw mban ara aŋga ta waya.

¹²Masa ac mban cay sə, Yesu ke gweɗec ndah masasəraka jene tata, gege: «Meɓəcekec mepepəsey ana hay masa maza fakwanay, afa kwa kusetke e de nes taambəla bay.»

¹³Ec ke ɓəcek mezekey ana hay, ac ka nəha waŋ hay kuraw dapa yaŋ ana ecew eve mepepəs te peŋ hay masa səlay ana gaa aabay zlam masa ac ta ndiya.

¹⁴Ndana hay ac ka wala cah hay masa Yesu ta ŋgiya sə, ec ke gweɗ, gege: «Eve metehwe ana, nda nesey sə, aŋga nda mehwedek ma, aŋga nda masa anda ɓəlakwa e te dek kad pa vavara.»

¹⁵Yesu a səniya, ec te dekey, ac ta təhaziya fa gədaŋ, ac ta paɗ ka bay teceŋ. Mafay ana, ka data kad pa wudam saya, aŋga pal aŋga amta.

¹⁶Ta fakwaɗ ana ŋgesey, ndah masasəraka jene ec ke bəreŋgə kad ma ta yam mafayakfayak ana.

¹⁷Ec ke tep pa kaslkaslah, ac ka də Kafarnahum a luwa ta wayam ana leŋgeɗey. Dapa ŋgesey ana, vaɗ e ŋgə cay, amaa Yesu ka husa verec aabay heley.

¹⁸Bərgadaŋ mazlakava ana ke ŋgə mabay, yam ana ke cewesley.

¹⁹Masa ece zleŋgə ava kaslkaslah ana, e ŋgə kilewmeeter zlam, daha aabay makwa sə, aca wala Yesu e dey da yaŋ yam, aŋga zef vara kaslkaslah ana. Ara nesey, zidaw ke kəɗeceŋ,

²⁰amaa Yesu gege: «Na yey, akwa ŋgə zidaw bay!»

²¹Aca wal makəsiya pa kaslkaslah ana, amaa kaslkaslah ana ka husata a rav ta zazay pa slam masa aca wal medə kad pa cay.

²²Tedew ana, ndana hay gaa jaka luwa leŋgeɗey ta yam mafayakfayak ana sə, ac ka wala kaslkaslah pal amta dapa slam ana faŋga. Aca səniya Yesu ke tep pa kaslkaslah ana ava ndah masasəraka jene tata aabay, ec ke dec babəla teceŋ.

²³Amaa kaslkaslah hay mekele ece dek da Tiberiyat, aca husa mbala pa slam masa ndana hay gaa ta ndə peŋ masa Bay Mazlakava ta ŋgana wasay kad Zlavay mafay ana.

²⁴Masa ndana hay aca wala Yesu va ndah masasəraka jene tata faŋga aabay sə, ec ke tep pa kaslkaslah hay medek da Tiberiyat sə, ec ke dey a Kafarnahum, ac ka yah Yesu.

²⁵Ndana hay ac ta ŋgatafa Yesu da ma ta yam mafayakfayak ana jaka luwa leŋgeɗey, ac ka gwaɗa, gege: «Raabi, ke dek kad fana ana ewey?»

²⁶Yesu ke vehecen, gege: «Eve metehwe ana ya gwaɗakwar akwa yehiyey nesey sə, mafay ta masa akwar ta wala cah hay bay, amaa afa akwar ka ndə peŋ hay mban.

²⁷Akwar te ŋgə mezlərey mafay ta ɗaf masa a ta nasata dapa vavara na bay, amaa meŋgə mezlərey mafay ta ɗaf masa a ta njahay, a ta və mesfen katar ka midakw, ɗaf masa Wut ta nda a ta vakwar, afa Zlav Papaŋ ka pana tampaŋw tata fətiya.»

²⁸Ac ka gwaɗa, gege: «Andə da ŋgana gwagumaw te meŋgə mezlər masa a da wafa Zlavay?»

²⁹Yesu ke vehecen, gege: «Mezlər masa a wafa Zlavay sə, mekəs ma ta nda masa aŋga te zlərekey.»

³⁰Ac ka gwaɗa, gege: «Cah hay wula masa ka da ŋgiya, anda ra wala, andə da kəs ma takaa? Ke te ŋgek sə, mezlər hay wula?

³¹Zleezle, papaŋ ta papaŋ taciya hay ac ka ndə man dapa yaŋ ta səɓak. Ara masa mavinda, ke gweɗ gege: “Ke vec ɗaf masa e dek da baymaləvaŋ.”»

³²Amaa Yesu gege: «Eve metehwe ana ya gwaɗakwar mavakwar ɗaf masa e dek da baymaləvaŋ sə, Muyiz bay, amaa ɗaf metehwe ana masa e dek da baymaləvaŋ, mavakwar sə, Papa.

³³Ɗaf ta Zlavay sə, aŋga nda masa e dek da baymaləvaŋ, mavana mesfen kad ndah ta vavara sə, aŋga.»

³⁴Ac ka gwaɗa, gege: «Bay Mazlakava, vandaw ɗaf ana ŋga cəɗem cəɗem may!»

³⁵Yesu gege: «Yey sə, ya ɗaf masa e və mesfeney. Nda masa ke dek vereyey sə, may a ta kəɗa ɓasabay. Nda masa ka kəs ma aɗaw sə, yam a ta kəɗa ɓasabay.

³⁶Amaa ya ka gwaɗakwar, akwar ka wala, amaa akwar ka kəs ma ana bay.

³⁷Ndah masa Papa te vuwec fakwanay, ec te dekec kad vereyey. Ara nesey, nda masa e dek kad vereyey sə, ya mbasana aabay,

³⁸afa ye dek da baymaləvaŋ sə, ke te ŋgə jə masa ya ta waya bay, amaa ke te ŋgə jə masa nda mezlərekiyey ta waya.

³⁹Mawala, jə masa nda mezlərekiyey ta waya, a wal sə, kwa nda amta masa aŋga ta vuwa pa ha aɗaw sə, da zə bay. Amaa ye de pərekec avəda dapa maməcay pas te mendev ta vavara.

⁴⁰Mawala jə masa Papa a waya: Nda masa a wala Wudiya, a kəs ma tata, a ŋgat manjah katar ka midakw, yey may, pas te mendəv ta vavara sə, ya ta pəraka avəda dapa maməcay.»

⁴¹E zler pəsaŋga ana ŋgesey, Zuwef hay ec ke hwehwərey da yaŋ ana, afa ke gweɗ, gege: «Yey sə, ya ɗaf masa e dek da baymaləvaŋ.»

⁴²Ec ke gweɗ saya, gege: «Naa aŋga Yesu, wut te Zezef? Naa anda sənakwa papaŋ va mamaŋ? Naa, e gweɗ təlam nesey: “Yey sə, ye dek da baymaləvaŋ” sə, gwagumaw?»

⁴³Yesu ke vehecen, gege: «Magərda mehwehwer dapa taɓa takwar!

⁴⁴Kwa ndana mazlafa medek kad vereyey ava gədaŋ tata sə, aabay, say Papa, nda mezlərekiyey, te hwedekey. Ara nesey, pas te mendəv ta vavara sə, ye te pərekekec avəda dapa maməcay.

⁴⁵Mavinda dapa ɗelewer ta ndah mehwedek ma zleezle ke gweɗ, gege: “Zlav e te sesərekec ndana hay fakwanay”. Kwa waawa macəka zləmay fa ma masa e dek da vara Papa, a ta kəs mesesərek tata, e te dek vereyey.

⁴⁶Kwa nda amta masa ka wala Papa sə, aabay, say nda masa e dek da vara Zlavay, aŋga sə, ka wala Papa.

⁴⁷Ya gwaɗakwar, nda makəsa ma ana sə, ka ŋgat manjah katar ka midakw cay.

⁴⁸Yey sə, ya ɗaf masa e və mesfeney.

⁴⁹Zleezle papaŋ ta papaŋ takwar hay ac ka ndə man dapa yaŋ ta səɓak, ec ke məceceŋ.

⁵⁰Amaa ɗaf masa e dek da baymaləvaŋ sə, aŋga ara nesey, nda masa ka ta ndaw sə, a ta macə aabay.»

⁵¹Yey sə, ya ɗaf masa aŋga eve dey, masa e dek da baymaləvaŋ. Daha ndana ka ndaw sə, a ta njah eve ndey katar ka midakw. Ɗaf masa ya ta viya sə, slaw ta vaw taaɗaw, ya ta viya ana sə, afa ndah dapa vavara aca ra njah eve ndey.

⁵²Zuwef hay aca tə yaw dapa taɓa teceŋ ava gədaŋ, gege: «Nda ana na a ta vandakwa slaw ta vaw tata ka nday sə, a ŋgana gwagumaw?»

⁵³Yesu gege: «Eve metehwe ana ya gwaɗakwar daha akwar ka ndə slaw ta vaw ta Wut ta Nda aabay, daha akwar ka sə bembez tata aabay sə, ŋgesey akwar ta ŋgat mesfen dapa akwar aabay.

⁵⁴Nda masa ka ndə slaw ta vaw aɗaw va masə bembez aɗaw sə, ka ŋgat manjah katar ka midakw cay. Pas te mendəv ta vavara sə, ya ta pəraka avəda dapa maməcay,

⁵⁵afa slaw ta vaw aɗaw sə, aŋga ɗaf metehwe ana, bembez aɗaw, aŋga jə ta masə metehwe ana.

⁵⁶Nda mandana slaw ta vaw aɗaw va masana bembez aɗaw sə, aŋga manjaha macama ava yey, yey may, ya ta njah macama ava aŋga.

⁵⁷Papa, nda mezlərekiyey, aŋga eve ndey, ya manjaha eve ndey nesey sə, mafay tata. Ara nesey, nda masa ka ndə slaw ta vaw taaɗaw sə, a ta njahay eve ndey jaka piyey.

⁵⁸Nesey ɗaf masa e dek da baymaləvaŋ: Aŋga wal ava masa papaŋ ta papaŋ takwar hay ta ndiya zleezle, ec ke məceceŋ, amaa nda mandana ɗaf nesey sə, a ta njah eve ndey katar ka midakw.»

⁵⁹Nesey mesesərek hay te Yesu dapa way ta macə mbahw te Zuwef hay da Kafarnahum.

⁶⁰Ava dəɓa ana, ndah deveŋ ndah masasəraka jene tata gaa macəna ma ana nesey, ac ka zlar megweɗ, gege: «Ma ana nesey sə, e ɓəs bay, ma ta zlafa makəsiya wa?»

⁶¹Amaa Yesu ka səna mehwehwer ta ndah masasəraka jene tata da yaŋ ma masa aŋga ta gwaɗiya sə, avəda. Mafay ana, gege: «Ma ana hay nesey sə, ac ta slawakwar geyey?

⁶²Yaw, naa daha akwar ta wala Wut ta Nda e te veh kad baymaləvaŋ pa slam masa e dek dapa zleezle sə, gwagumalamaw?

⁶³Mesfen Mavəna sə, a və mesfen kad ndana hay, ndana aŋga amta sə, a zlafa meŋgə jene aabay. Ma hay masa ya ta gwaɗakwar nesey sə, aca vakwar Mesfen Mavəna va mesfeney.

⁶⁴Amaa ndah mekele dapa taɓa takwar, ac ka kəs ma ana aabay.» Anjəkar dəga dapa mezlerey ana sə, Yesu a sən ndah masa ac ta kəs ma tata aabay va nda ma ta viya pa ha ta maslagəra tata hay.

⁶⁵Yesu ke gweɗec saya, gege: «Mawala masa ya ta gwaɗakwar ara nesey sə, mafay te mey: “Kwa ndana mazlafa medek kad vereyey ta yaŋ tata sə, aabay, say nda masa Papa ta vana cəvey.”»

⁶⁶E zler dəga pəsaŋga ana ŋgesey, ndana hay gaa deveŋ ndah masasəraka jene tata ece veh kad ava dəɓa, aca wal macəpiya sabay.

⁶⁷Yesu ke nəkefec maslaŋ tata hay kuraw dapa yaŋ ana ecew, gege: «Akwar may, akwa wal madaɓa bay geyey?»

⁶⁸Simaŋw Piyer ka vahan, gege: «Bay Mazlakava, taciya anda ra də sə, vara wa la wa? Kaa sə, ka ava ma hay masa aca və manjah katar ka midakw.

⁶⁹Andaw sə, andə ka kəs ma takaa, anda səniya, kaa sə, ka nda mavəna masa e dek da vara Zlavay.»

⁷⁰Yesu ke vehecen, gege: «Mapalakwar kuraw dapa yaŋ ana ecew nesey sə, yey biba? Amaa nda amta deveŋ akwar sə, aŋga bay ta haalay.»

⁷¹E gweɗ ara nesey sə, da yaŋ Zudas, wut ta Simaŋw Iskariyawt. Yaw, ma ta vana Yesu kad pa ha ta maslagəra tata hay sə, aŋga ana. Kwa aŋga nda amta deveŋ maslaŋ tata hay kuraw dapa yaŋ ana ecew.