Read Cuvok Zaŋ 8 Bible Online

Zaŋ 8 - Cuvok bible

Zaŋ 8

¹Yesu ka data kad fa ŋguɗa ta Awliviyey hay.

²Ta slamɓal te pərek, ke veh kad pə Way ta kwakwas ana saya, ndana hay gaa ec ke dey kad vara vaw, ka njah maanjahay, ke sesərekeceŋ.

³Ndah mesesərekecen ma majawa kad ndana hay va Farisa hay ac ka hwadana ŋgwaz ɓa kad fəma tata. Ŋgwaz ana sə, ece təhezek dapa maŋgə madama. Ac ka zlacaɗ fəma ta ndana hay fakwanay,

⁴ac ka gwaɗa Yesu, gege: «Nda masasəraka nda, wala, anda təhezek ŋgwaz nesey dapa maŋgə madama.»

⁵Dapa ma majawa sə, Muyiz ke gweɗ, gege: «Tərsam ta ŋgwaza hay ana ara nesey sə, te mekelec eve kekeŋ aca ra məcaɗay. Yaw, na kaa may, ke gweɗ gwagumaw?»

⁶Ece gweɗ ara nesey sə, aca ŋgayiya, afa aca wal majawiya ava ma hay. Amaa Yesu ke zeŋ kad fa vara, ka vah jene fa vara ava wut ta ha.

⁷Ara masa ece dey ta manəkafa ma hay, Yesu ka baŋgaɗa yaŋ, gege: «Da lada sə, ndana deveŋ akwar masa ke ŋgə mebər kwa kusetke aabay sə, da kalaw kamma!»

⁸Ke zeŋ saya, ka vah jene fa vara.

⁹Ndah mehwedek ŋgwaz ana, aca cəna ma ana ara nesey sə, bəɗezl! Aca vəna yaŋ amta amta, madaɓa kamma sə, marndaw hay, magəra sə, Yesu aŋga amta. Ara masa ŋgwaz ana, aŋga faŋga heley fəma tata,

¹⁰Yesu ka baŋgaɗa yaŋ saya, ka nəkafa ŋgwaz ana, gege: «Ŋgwaz, ndah macafakaa lalaw sə, ac kəla? Ndana macadakaa ava ma sə, aabay war geyey?»

¹¹Ŋgwaz sə, ka vahan, gege: «Bay Mazlakava, kwa nda amta aabay.» Yesu ka gwaɗa, gege: «Yey may, ya təɗakaa ma yaŋ aabay. Daɓa, amaa e zler təlam nesey, ke te ŋgə mebər sabay.»

¹²Yesu e gweɗ kad ndana hay saya, gege: «Yey sə, ya slam mawaɗa ta vavara. Nda masa e cəpiyey sə, a də dapa ləvaŋ aabay, a ta ŋgat slam mawaɗa masa a hwad nda kad pa manjah katar ka midakw.»

¹³Farisa hay ac ka gwaɗa, gege: «Ka tə yaw fə yaŋ takaa ana sə, matə yaw takaa ana ŋgesey, tehwe bay.»

¹⁴Yesu ke vehecen, gege: «Kwa ya tə yaw da yaŋ yey ana, amaa matə yaw aɗaw ana tehwe, afa ya sən slam masa ye dek dapa va masa ye də kad pa. Amaa akwar sə, akwa sən slam masa ye dek dapa va masa ye də kad pa bay.

¹⁵Akwar sə, akwa təɗ ma yaŋ ndana hay ara mawulak yaŋ ta ndana, amaa yey sə, ya təɗ ma yaŋ ndana aabay.

¹⁶Yaw, kwa daha ya təɗana ma yaŋ ndana sə, matəɗ ma taaɗaw ana aŋga eve cəvey ana, afa ya təɗana ma yaŋ ndana sə, ya amta bay, amaa andaw ava Papa mezlərekiyey.

¹⁷Mavinda dapa ma majawa takwar dapa slam mekele, gege: “Matə yaw ta ndah ecew sə, ndana hay aca kəsiya”.

¹⁸Yey sə, ya tə yaw da yaŋ yey ana. Papa nda mezlərekiyey, a tə yaw da yaŋ yey ana may.»

¹⁹Aca gwaɗa, gege: «Papakw ana aŋga dama?» Yesu ke vehecen, gege: «Akwar sə, akwa səniyey bay, akwar ta sən Papa aabay may. Efes daha akwa səniyey sə, akwa səna Papa avəda may.»

²⁰Yesu e gweɗec ma ana nesey sə, aŋga dapa masasərak ndana hay dapa Way ta kwakwas, aŋga da cak ta slam ta map jə ta mavə jene kad Zlavay dapa way ana. Ndana mazlafa mapafa ha aabay, afa pas te metəhez tata ke husek bay heley.

²¹Yesu e gweɗec ndah ana saya, gege: «Yey sə, ya ta daɓa. Akwar sə, akwar te yehiyey, amaa akwar ta məcata dapa mebər takwar. Slam masa ye te də kad pa sə, akwar ta zlafa medə pa bay.»

²²Mazlakava hay te Zuwef hay ece gweɗ dapa taɓa tec, gege: «Nda ana a ta kəɗa yaŋ tata avəda geyey? Afa e gweɗ, gege: “Pa slam masa ye te dey sə, akwar ta zlafa medə pa aabay.”»

²³Yesu gege: «Akwar sə, akwar ndah dapa dar, yey sə, ya nda da wudam. Akwar sə, akwar ndah ta vavara nesey, yey sə, ya nda ta vavara na bay.

²⁴Mafay ana, ya ka gwaɗakwar, “Akwar ta məcata dapa mebər takwar”. Daha akwar ka kəsaw, masa “Yey sə, yey” aabay sə, akwar ta məcata dapa mebər takwar.»

²⁵Ac ka gwaɗa, gege: «Kaa ana sə, ka wa?» Yesu ke vehecen, gege: «Yey sə, ya nda masa ya ka gwaɗakwaɗ dəga dapa mezlerey ana.

²⁶Ya ava ma hay gaa te megweɗ da yaŋ akwar va ma hay masa ya da təɗakwar ma yaŋ ava aŋga. Amaa nda mezlərekiyey sə, aŋga nda masa e gweɗ eve metehwe ana. Ma hay masa ya gwaɗiya kad ndah ta vavara nesey sə, ye cənek da vara vaw.»

²⁷Amaa ac ka cəna masa e gweɗec da yaŋ Papaŋ sə, aabay.

²⁸Ara nesey, Yesu gege: «Pas masa akwar ka ta baŋgaɗa Wut ta nda avəda sə, akwar ta səna avəda, “Yey sə, yey”. Asaya, akwar ta səniya, yey sə, ye ŋgə jene ava mawulak yaŋ taaɗaw pal yey amta sə, aabay, ye gweɗ sə, ma masa Papa ta sasərakawa.

²⁹Nda mezlərekiyey sə, aŋga ava yey. Ke gərdeyey ya amta sə, aabay, afa cəɗem cəɗem ye ŋgə jə masa a wafa.»

³⁰Masa Yesu e gweɗ ara nesey, ndana hay gaa aca kəs ma tata ana.

³¹Yesu ke gweɗec kad Zuwef hay makəsa ma tata sə, gege: «Daha akwar manjaha dapa ma aɗaw, ŋgesey, akwar ndah masasəraka jene taaɗaw metehwe ana.

³²Ara nesey, akwar ta səna metehwe ana sə, avəda, metehwe ana ŋgesey, a ta pəlakwar avəda dapa ɓeley.»

³³Ac ka vahan, gege: «Andaw sə, andaw ndah dapa tərsam ta Abəraham, kwa ndana deveŋ andaw masa ka njah ɓel ta ndana sə, aabay. Naa ka gwaɗandaw: “Ac ta pəlakwar avəda dapa ɓeley” sə, a ŋgana gwagumaw?»

³⁴Yesu ke vehecen, gege: «Eve metehwe ana ya gwaɗakwar kwa waawa maŋga mebərey sə, aŋga ɓel te mebərey ana.

³⁵Ɓel sə, a njah cəɗem cəɗem da hwaɗ ta way aabay. Amaa wut ta nda ta way ana sə, aŋga da hwaɗ ta way ana cəɗem cəɗem.

³⁶Daha Wat ka pəlakwar dapa ɓeley sə, akwa tərata ndah mapəla metehwe ana.

³⁷Ya səniya, akwar sə, akwar dapa tərsam ta Abəraham, amaa akwa yah me te kəɗiyey ka macəhwandaw, afa ma taaɗaw e sehw pa akwar aabay.

³⁸Yey sə, ya gwaɗ ma masa ya ta wala vara Papa, amaa akwar sə, akwa ŋgə jə masa akwar ta cəna vara papaŋ takwar.»

³⁹Ac ka vahan, gege: «Papaŋ ta papaŋ taciya sə, Abəraham.» Yesu gege: «Daha efes akwar ndah dapa tərsam ta Abəraham sə, akwa ŋgə mezlər hay masa Abəraham ana a ŋgiya.»

⁴⁰Yey sə, ya ka gwaɗakwaɗ metehwe ana masa ye te cənek da vara Zlavay. Amaa təlam nesey, akwa yah cəv te mekəɗiyey ka macəhwandaw jaŋgata. Abəraham sə, ka ŋgaw ara ŋga aabay.

⁴¹Amaa akwar sə, akwa ŋgə mezlər ta papaŋ takwar. Ac ka vahan, gege: «Andaw sə, anda heyek fa zaŋ ana bay, papaŋ taciya sə, pal amta, aŋga Zlavay.»

⁴²Yesu gege: «Daha Zlav aŋga Papaŋ takwar sə, efes akwa weliyey, afa ye dek sə, dapa Zlavay ana, ya fana nesey sə, mafay tata. Ye dek sə, ta yaŋ taaɗaw bay, amaa aŋga te zlərekiyey.

⁴³Ma masa ya gwaɗakwar sə, akwa cəna bay mafay te mey? Afa akwa zlafa macəna ma aɗaw ana bay.

⁴⁴Papaŋ takwar sə, bay ta haalay. Jene hay masa akwa wal maŋgiya fakwan nesey sə, a wafa kad papaŋ takwar. Aŋga sə, aŋga nda makəɗa nda ka macəhwandaw dəga dapa mezler ta vavara. A sən metehwe ana bay, afa metehwe ana vara vaw aabay. Daha e gweɗ ava maŋgal ma sə, ŋgesey, jə tata, afa aŋga nda maŋgəla ma, aŋga papaŋ ta maŋgal ma.

⁴⁵Taaɗaw sə, ye gweɗ metehwe ana, mafay ana akwa gwam ka kəs ma ana bay.

⁴⁶Ndana wa deveŋ akwar fana, masa a zlafa matə yaw da yaŋ mebər vereyey ɓa? Daha ye gweɗ metehwe ana, naa akwa gwam ka kəs ma ana bay sə, mafay te melemey?

⁴⁷Nda ta Zlavay sə, a cak zləmay fa ma ta Zlavay ana. Akwa gwam ke cəkefiyey zləmay bay sə, afa akwar ndah ta Zlav bay.»

⁴⁸Zuwef hay ac ka vahan, gege: «Anda zlafa megweɗ eve metehwe ana, kaa sə, ka nda Samariya ana, ka ava damkwaw dapa yaŋ.»

⁴⁹Yesu ke vehecen, gege: «Ya ava damkwaw dapa yaŋ aabay, ya ŋgə sə, ya hahəlan yaŋ ta Papa, amaa akwar sə, akwa gwam ka hahəlawa yaŋ bay.

⁵⁰Yaw, yey sə, ya ka yah ndana da hahəlawa yaŋ sə, aabay. Amaa ndana pal amta ɓa masa a ta hahəlawa yaŋ, aŋga sə, ma ta təɗa ma yaŋ ndana hay sə, aŋga.

⁵¹Ya gwaɗakwar, nda mapafa yaŋ ma aɗaw sə, kwa a ta wala maməc aabay.»

⁵²Zuwef ana hay sə, ac ka gwaɗa, gege: «Anda səniya təlam nesey, ka ava damkwaw dapa yaŋ takaa ɓa. Anda səniya sə, Abəraham ka məcata, ndah mehwedek ma ec ke məcec may. Naa kaa sə, ka gwaɗa: “Nda masa ka pafa yaŋ ma aɗaw sə, kwa a ta məc aabay”.

⁵³Kaa sə, ka mazlakava fa papaŋ ta papaŋ taciya Abəraham masa ka məcata sə, la geyey? Ndah mehwedek ma ta Zlav may, ac ke məceceŋ, naa kaa sə, ka pə yaŋ takaa ka wa la wa?»

⁵⁴Yesu ke vehecen, gege: «Daha yey ana ya hahəl yaŋ taaɗaw, mahahəl yaŋ ana ŋga a ŋgata ara jene taambəla. Mahahəlawa yaŋ sə, Papa, nda masa akwa zaliya Zlav takwar.

⁵⁵Akwa səniya bay, amaa yey sə, ya səniya. Daha ya gwaɗa, ya səniya bay sə, ŋgesey, ya tərata ara akwar, ndah maŋgəla ma hay. Amaa yey sə, ya səniya, ya pafa yaŋ ma tata.

⁵⁶Abəraham, papaŋ ta papaŋ takwar ke weslə gaa da yaŋ mawala pas te medek taaɗaw kad pa vavara. Ka wala, ke weslə mabay da yaŋ ana.»

⁵⁷Zuwef ana hay ac ka gwaɗa, gege: «Mavay takaa kwa a husa kwakwar zlam bay heley, naa ka gwaɗa ka ka wala Abəraham?»

⁵⁸Yesu ke vehecen, gege: «Eve metehwe ana ya gwaɗakwar dəga Abəraham mahaya bay heley sə, yey sə, yey.»

⁵⁹Mafay ana, ac ka kwakwal kekeŋ pa ha ka ta kaliya, amaa Yesu ndek! A raɓata, ka data kad a vəda dapa Way ta kwakwas.