Read Cuvok Zaŋ 9 Bible Online

Zaŋ 9 - Cuvok bible

Zaŋ 9

¹Pas ɓa, Yesu a ŋgway a ta wala ndana ɓa, aŋga mahazlaw dəga meyehek tata.

²Ndah masasəraka jene tata ac ka nəkafa, gege: «Raabi, mebər ta wa masa nda ana e de heyek aŋga mahazlaw ara nesey, mebər tata geyey? Mebər ta papaŋ va mamaŋ?»

³Yesu ke vehecen, gege: «Away, e heyek aŋga mahazlaw sə, mafay te mebər tata, kwa daha aabay tec papaŋ va mamaŋ bay, amaa e heyek ara nesey sə, afa mezlər ta Zlavay de ŋguzdek kad a vəda jaka vara vaw.

⁴Pas ɓa ɗagay nesey sə, a lada anda ŋgakwaɗ mezlər ta nda mezlərekiyey na avəda. Mbala vaɗ cay, ndana ma ta zlafa meŋgə mezlər ɓasabay,

⁵kwa e wey e wey masa ya dapa vavara sə, ya nda mawaɗa vavara.»

⁶Ava dəɓa te megweɗ tata ara nesey, ka caɓ slesleɓ kad fa vara, ka haɗ rəɓasl eve slesleɓ ana, ka kwaran fe ndey ta nda mahazlaw ana,

⁷ka gwaɗa, gege: «Daɗ ta pana ndey dapa təker te Siluwey,» Siluwey sə, a wal megweɗey Maslaŋ. Nda mahazlaw sə, ke dey, ke penek ndey, mevehek tata, ka wala ndey mambəla ana cay.

⁸Maslavda tata hay va ndah mawala cəɗem cəɗem e rəkey sə, ac ka wala, a wala ndey mambəla ana sə, ac ka nəkaw, gege: «Naa nda mahazlaw masa e rek cəɗem cəɗem sə, biba?»

⁹Ndah dərziya, gege: «Aŋga ana.» Ŋgeɗ hay, gege: «Away, aŋga bay, nda maɗala vaw.» Amaa nda ana, gege: «Yey ana.»

¹⁰Ac ka nəkafa, gege: «Na ndey takaa ana e wen gwagumaw?»

¹¹E vehecen, gege: «Ndana ɓa mezel Yesu, aŋga ta haɗ rəɓasl eve slesleɓ tata, ka kwarawa fe ndey, ke gweɗiyey, gege: “Daɗ ta pana ndey pe təker te Siluwey”. Ye ke dey, ya ka pana ndey ana. Ava dəɓa ana, ya ka wala ndey mambəla ana.»

¹²Ac ka gwaɗa, gege: «Nda ana aŋga fəla?» E vehecen, gege: «Ya səniya bay.»

¹³Ac ka hwadaɗ nda mahazlaw sə, kad vara Farisa hay,

¹⁴anjəkar Yesu a haɗ rəɓasl, a kwaran fe ndey ta nda ana, a wunan ndey sə, pas ta masasak vaw.

¹⁵Mafay ana, Farisa hay sə, ac ka nəkafa, gege: «Ka da wala ndey ana ara nesey sə, a ŋgana gwagumaw?» E vehecen, gege: «Ke kwerefiyey rəɓasl fe ndey, ya ka pana ndey ana, ya wala ndey mambəla ana.»

¹⁶Farisa hay dərziya, gege: «Nda maŋga jeŋ ana nesey sə, e dek da vara Zlav bay, afa e ŋgə mezlər pas ta masasak vaw, a nah yaŋ kad pə ma majawa ta Muyiz aabay.» Amaa ndah dərziya deveŋ eceŋ, gege: «Nda te mebərey sə, e ŋgetek matimaazlaɓ te meŋgə cah hay ana ara nesey sə, dama?» Mafay ana, ac ka vəna vaw avəda dapa taɓa teceŋ.

¹⁷Ava dəɓa ana, aca nəkafa nda membəlek dapa mahazlaw sə, gege: «Naa kaa may, ke gweɗ da yaŋ nda mawunakaɗ ndey nesey sə, gwagumaw?» E vehecen, gege: «Aŋga nda mehwedek ma.»

¹⁸Amaa mazlakava hay te Zuwef hay ac ka wal makəsiya masa nda ana e heyek da hwaɗ ta mamaŋ aŋga mahazlaw, amaa təlam nesey, a wala ndey mambəla ana sə, aabay. Mafay ana, ac ka zal papaŋ va mamaŋ ta nda ana.

¹⁹Ec ke nəkefec, gege: «Nda nesey sə, aŋga wut takwar eve metehwe ana geyey? E heyek aŋga mahazlaw tehwe may geyey? Naa a wala ndey təlam na mambəla ana sə, a ŋgana gwagumaw?»

²⁰Papaŋ va mamaŋ ta nda ana ec ke vehecen, gege: «Anda səniya nesey sə, wut taciya, e heyek aŋga mahazlaw,

²¹a da wala ndey ana sə, gəla a ŋgana gwagumaw gwagumaw sə, anda səniya sabay. Nda mawunan ndey ana, anda səniya bay. Yaw, aŋga sə, aŋga magəla cay, manəkafa, da ŋguzdakwaɗ ma ana!»

²²Papaŋ va mamaŋ ece gweɗ ara nesey sə, afa ece lel fa mazlakava hay te Zuwef hay masa deveŋ eceŋ faŋga. Eceŋ sə, ac ka jawa ma teceŋ daha nda masa a tə yaw da yaŋ Yesu, aŋga Kəristi sə, ac ta mbasana dapa Way ta macə mbahw te Zuwef hay.

²³Mafay ana, papaŋ va mamaŋ, gege: «Aŋga sə, aŋga magəla cay, manəkafa, da ŋguzdakwaɗ ma ana!»

²⁴Ava dəɓa ana, Farisa hay sə, ac ka zala nda membəlek dapa mahazlaw sə, saya, ac ka nəkafa, gege: «Gweɗ metehwe ana fa yam te ndey ta Zlavay. Andaw sə, anda səniya, nda ana ŋga, aŋga nda te mebərey.»

²⁵Nda sə, e vehecen, gege: «Gəla aŋga nda te mebərey sə, ya səniya bay. Amaa jene pal amta masa ya səniya sə, “Ya ka njah mahazlaw, amaa təlam nesey, ya wala ndey.”»

²⁶Aca gwaɗa, gege: «Nda ana ka ŋgakaa ɓa mey? A wunakaɗ ndey ana sə, a ŋgana gwagumaw?»

²⁷Ke vehecen, gege: «Ya ka gwaɗakwar tefes cay, amaa akwar ka kəs ma ana aabay. Naa akwa wal macəna saya sə, mafay te melemey? Akwa wal metər ka ndah masasəraka jene tata ana may geyey?»

²⁸Farisa hay sə, aca laf nda ana, gege: «Nda masasəraka jene tata sə, sesəker kaa bəna andaw bay. Andaw sə, andaw ndah masasəraka ta Muyiz.

²⁹Andaw sə, anda səniya, Zlav ka gwaɗa Muyiz, amaa nda ŋgesey sə, anda sən slam masa e dek dapa bay.»

³⁰Nda sə, ke vehecen saya, gege: «Yaw, jene pal amta ɓa masa e rəzliyey. Aya, akwa sən slam masa e dek dapa bay, amaa ka wunawa ndey aɗaw avəda.

³¹Anda sənakwa nda masa aŋga eve mebərey sə, Zlav a cənan ma tata aabay, amaa a cənan ma ta ndah manahan yaŋ, maŋgana jə masa a waya.

³²Dapa manjah tandakwa andə ka cənakwaɗ ndana ka wunan ndey ta nda mahazlaw masa e heyek ava aŋga sə, ɓa geyey?

³³Daha nda ana na e dek da vara Zlav bay sə, a zlafa meŋgek jene kwa kusetke aabay!»

³⁴Aca vahan, gege: «Dəga meheyek takaa, ka dapa mebərey sə, ka ta sasərakandaw jene? Ac ka mbasana kad a vəda.»

³⁵Yesu a ta cəna masa Farisa hay ac ka mbasana nda membəlek dapa mahazlaw sə, ka yahaw. Ac ta cə yaŋ ava aŋga, ka gwaɗa, gege: «Ka kəs ma ta Wut ta nda geyey?»

³⁶Nda ana ka vahan, gege: «Bay Mazlakava, Wut ta nda ana sə, wa? Ŋguzdawa, afa ya da kəs ma tata ana may.»

³⁷Yesu a gwaɗa, gege: «Mambəla ana, sa ka wala nda ana, Wut ta nda sə, yey, magwaɗaka nesey.»

³⁸Nda sə, ka vahan, gege: «Bay Mazlakava, ya kəsiya! Ke kekəred fəma tata.»

³⁹Ava dəɓa ana, Yesu e gweɗ, gege: «Ye dek kad pa vavara sə, afa matəɗ ma de ŋgey, afa mahazlaw hay, aca ra wala ndey, ndah masa aca wala ndey may, aca ra həɗazlaɗay.»

⁴⁰Farisa hay dərziya da cak te Yesu faŋga, ac ka cəna ma masa Yesu ta gwaɗiya sə, ac ka nəkafa, gege: «Naa andaw may, andaw mahazlaw hay la geyey?»

⁴¹Yesu ke vehecen, gege: «Daha efes akwar mahazlaw hay sə, ŋgesey, akwar ava mebər aabay. Amaa təlam nesey, akwa gweɗey, “Anda wala ndey”: Mebər takwar a ta njahay ara aŋga ana.»