Read Cuvok Mezlər ta Maslaŋ hay 1 Bible Online

Mezlər ta Maslaŋ hay 1 - Cuvok bible

Mezlər ta Maslaŋ hay 1

¹Awa Tiyawfil. Dapa ɗelewer aɗaw teeməle sə, ya ka vindakaɗ ma da yaŋ jene hay masa Yesu ta ŋgiya fakwanay va masa aŋga ta sasərakiya kad ndana hay, dəga dapa mezler te mezlər tata dapa vavara,

²kasl pas masa Zlav ta kəsiya kad baymaləvaŋ. Wagaa Zlav a ta kəsiya kad wudam sə, ke gweɗec ma majawa mabay ava gədaŋ te Mesfen Mavəna kad maslaŋ tata hay masa aŋga te peleceŋ.

³Ava dəɓa te mepərekek tata dapa maməcay sə, ke ŋguzdecen vaw kad maslaŋ tata hay eve meŋguzdecen yaŋ tata eve cəv hay mekele mekele masa aŋga eve ndey. Da hwaɗ ta manah kwakwar faɗ sə, ke ŋguzdecen vaw va megweɗec ma da yaŋ Meŋgə bay ta Zlavay.

⁴Pas mekele ɓa, Yesu ac ka ndə ɗaf fa slam ana ava maslaŋ tata hay. Ke kəteceŋ, gege: «Manjah fana dapa berne te Zeruzelem, akwar te də dəreŋ bay, maɓal jə masa Papa te gweɗey a ta vakwar, ara masa ya ta gwaɗakwar.

⁵Zaŋ Baatis e ŋgec beetem kad ndana hay sə, ava yam, amaa dapa manah kusetke fana, akwar ta ŋgat beetem te Mesfen Mavəna.»

⁶Maslaŋ hay makwasa sə, ac ka nəkafa Yesu, gege: «Bay Mazlakava, ka ta ləmad Wunam ta bay te Isreyel hay sə, təlam na geyey?»

⁷Yesu ke vehecen, gege: «Akwar eve cəv ta masəna manah hay va ler hay masa Zlav Papaŋ ta piya ava gədaŋ tata sə, aabay.

⁸Amaa akwar ta ŋgat gədaŋ mazlakava, gədaŋ te Mesfen Mavəna e te dek kad yaŋ akwar. Ara nesey, akwar ta njah ka ndah mata yaw da yaŋ yey de Zeruzelem, dapa vavara te Zudey va ta Samariya fakwanay, kasl pa kwakumakw ta vavara.»

⁹Ava dəɓa ta masa Yesu ka ndəvda megweɗ ma ana hay cay sə, ka vahata a baymaləvaŋ, ndah da cak tata sə, ac ka ndandazlaw kasl pe mesəret tata pa zlav ta yam, ac ka wala ɓasabay

¹⁰Dapa masa ndah masasəraka jene tata ece pə ndey kad a wudam, pa slam masa Yesu e veh kad pa sə, faŋga faŋga ana, ndana hay ecew ava rəkwat məsle ana fa vaw, ec ke ŋguzdecen vaw dapa taɓa teceŋ,

¹¹ec ke gweɗec, gege: «Akwar ndah Gelile hay, akwar mazlaca, akwa pə ndey kad a wudam sə, mafay te mey? Yesu masa aŋga ta gərdakwar ka data kad baymaləvaŋ nesey sə, e te vehek ara masa akwar ta wala e veh kad a wudam nesey.»

¹²Ava dəɓa ana, maslaŋ hay te Yesu, ece bəreŋgek dapa wudam mezel ŋguɗa ta Awliviyey hay. Ece vehek kad pe berne te Zeruzelem. Wudam ana sə, dəreŋ aabay, e ŋgə kilewmeeter amta.

¹³Mehusek tec e Zeruzelem sə, ec ke tep pə way da yaŋ way ɓa, dapa slam masa cəɗem cəɗem ac makwasa dapa. Maslaŋ ana hay sə, ac: Piyer, Zaŋ, Zak, Endəre, Fəlep, Tumas, Bartelemi, Mata, Zak wut ta Alfey, Simaŋw wut ta wunam va Zud wut ta Zak.

¹⁴Ac fakwanay, aca kwas vaw cəɗem cəɗem ka ta cə mbahw ava rav amta. Ac makwasa ana sə, ava ŋgwazah mekele mekele, Maaray mamaŋ te Yesu va malamaŋ hay te Yesu ana.

¹⁵Dapa manah ana hay ŋgesey, makəsparav hay sə, ac makwasa fa slam ana. Ece ŋgə 120. Piyer ke zleftek, ke gweɗec, gege:

¹⁶«Malama hay, a lada jə masa Mesfen Mavəna te gweɗ zleezle dapa Ɗelewer mavəna jaka pa ma te Deevet da yaŋ Zudas, nda mapada ma ta ndah matəhaza Yesu sə, da ŋgata,

¹⁷Aŋga sə, aŋga deveŋ andakwa, ka ŋgat meven ta ma te mezlər tandakwa.»

¹⁸Anjəkar Zudas ana, ava səlay te meyəv te mezlər tata masa aŋga ta ŋgiya e teh bay sə, ka husam ley ɓa, ka təɗata de ley ana kamma, hwaɗ ka pəzakwata, wiɗec hay ac ka kwiyakata a vəda, ka məcata.

¹⁹Ndana hay fakwanay de Zeruzelem ac ka cəna labara ana. Ara nesey, aca zal ley ana ava ma teceŋ, «Hakəldama», ara megweɗey, «ley te bembez.»

²⁰Piyer ke gweɗec saya, gege: «Mavinda dapa ɗelewer ta Jaabura, gege: “A lada way tata sə, a da təraɗ ke yidey, ndana a da njah pa bay.” Yaw, mavinda saya, gege: “Da lada sə, ndana mekele a da kəs mezler tata ana.”»

²¹«Ara nesey, mambəla sə, ndana mekele e dek kad e veŋ andakwa ka tə yaw da yaŋ mepərek ta Bay Mazlakava Yesu. A lada nda ana aŋga deveŋ andakwa dəga dapa masa anda ŋgwakwa cəɗem cəɗem fa slam ana ava Yesu kwa a fəla fəla fakwanay. Nda masa andaw ta kəsakwa sə, a lada nda ana aŋga ava andakwa dəga pas masa Zaŋ Baatis ta ŋgana beetem kad Yesu kasl pa pas masa Yesu ta gərdandakwa, ka vahata kad baymaləvaŋ.»

²³Ava dəɓa ta masa ac ka cəna ma ta Piyer ana cay sə, ac ka kəs ndana hay ecew. Ndah ana sə, ac Zezef masa ndana hay aca zaliya Barsabas, mebəzen Zustus va Matiyas.

²⁴Ndah dapa macam yaŋ sə, ac ka cə mbahw kad Zlavay, gege: «Bay Zlavay, kaa sə, ka sən rav ta ndana hay fakwanay, ŋguzdandan nda amta deveŋ ndah ecew nesey masa ka ta waya,

²⁵a da njah ka maslaŋ pa slam ta Zudas masa aŋga ta gərda mezlərey ana. Zudas sə, ka data pa slam masa ara aŋga ta waya.»

²⁶Ac ka vində mezel teceŋ, ac ka kazlə siyakw da yaŋ mezel tec cuweeney ka ta yah nda amta deveŋ eceŋ. Siyakw ana e təɗ sə, kad a yaŋ mezel ta Matiyas. Ara nesey, ac ka paɗ Matiyas e veŋ maslaŋ hay kuraw dapa yaŋ ana amta.