Read Cuvok Mezlər ta Maslaŋ hay 10 Bible Online

Mezlər ta Maslaŋ hay 10 - Cuvok bible

Mezlər ta Maslaŋ hay 10

¹Ndana ɓa dapa berne ta Sizar, mezel Kwernel. Aŋga mazlakava ta kafaraŋ hay 100 masa ac deveŋ kafaraŋ ta Rawma hay mezel «Kafaraŋ hay medek da Itali.»

²Nda ana e lel fa Zlavay. Aŋga ava ndah da hwaɗ ta way tata fakwanay aca nah yaŋ kad Zlavay, cəɗem cəɗem e jənec maslamarga hay, e vec jene hay, a cə mbahw cəɗem cəɗem kad Zlav.

³Pas leŋgeɗ ɓa, ta fakwaɗ fe ler mahkar, Zlav ka ŋguzdana jene kad Kwernel ana. Ka wala maskəla ta Zlavay e dek kad vara vaw. Ka zala, gege: «Kwernel»

⁴Kwernel a ta wala sə, zidaw ka ŋgana, mafay ana, ka gwaɗa, gege: «Maŋgata mey Bay aɗaw?» Maskəla sə, ka vahan, gege: «Zlav ka cəna macə mbahw takaa va masa ke te jənec maslamarga hay. Jeŋ ana hay ŋgesey, ka wafa Zlavay. Mafay ana, ka ka pəsana dapa yaŋ aabay.

⁵Təlam nesey, zlar ndana kad pe berne ta Zawpey aca ra te zelek Simaŋw masa aca zaliya Piyer.

⁶Aŋga da way ta nda maləɓa mbal ɓa mezel Simaŋw, way tata ana aŋga da ma ta yam mafayakfayak ana.»

⁷Ava dəɓa te meveh ta maskəla magwaɗa Kwernel sə, Kwernel ana ke zelekec madərlam tata hay ecew va kafaraŋ amta deveŋ kafaraŋ tata hay. Kafaraŋ ana ŋgesey sə, aŋga nda masa e lel fa Zlavay ara bay tata sə, jaŋgata.

⁸Kwernel sə, ke gweɗecen ma da yaŋ jə masa Zlav ta ŋguzdan sə, fakwanay, ke zlerdeceŋ kad Zawpey vara Piyer.

⁹Tedew te pərek ana, ndah masa Kwernel te zlerdec sə, ac dapa cəv mbala zef eve berne ta Zawpey. Ta yaŋ ta pas, Piyer ke tep a yaŋ way makərpa ka ta cə mbahw kad Zlavay.

¹⁰Masa aŋga dapa macə mbahw kad Zlavay sə, may ka kəɗa, ka wal jə ta manday. Dapa masa aca tana ɗaf sə, Zlav ka ŋguzdana jene.

¹¹E te njer kad a wudam sə, a wala slam da baymaləvaŋ mawuna. Jene ara gwedurey mazlakava ana ɓa, ma ana hay faɗ majawa eve ɗuweŋ, mambaŋgaɗa kad a wudam, a bəraŋgafa kad fa vara.

¹²Dapa gwedurey ana, jə te ley hay mekele mekele ɓa. Jeŋ ana hay sə, ŋgeɗ hay sek faɗ, ŋgeɗ hay masa ece də ta hwaɗ ta hwaɗ va ɗiyak hay mekele mekele.

¹³Uway ke cənek da wudam, ka gwaɗa, gege: «Piyer zleftek, zlə uway te jə na hay fakwanay, ndaw!»

¹⁴Amaa Piyer ka vahan, gege: «Away! Bay Mazlakava, dapa manjahay aɗaw jə masa kwakwas taciya ka vandaw cəv ta mandiya aabay sə, ya ka ndaw aabay heley.»

¹⁵Uway sə, ke cənek ke ecew ana saya, gege: «Jə masa Zlav ka paɗ mambəla ana ta manday sə, ka ta paɗ ka jə maləza bay.»

¹⁶Uway ana e cənek ara nesey ana ka mahkar. Ava dəɓa ta uway mamahkar ana sə, jeŋ ana ka vahata kad pa slam tata a baymaləvaŋ.

¹⁷Piyer ka wulak jə masa Zlav ta ŋguzdan sə, a wal maŋguzdana mey? Dapa ŋgesey ana, ndah masa Kwernel te zlerdec sə, ac dapa menəkefec ndana hay, gege: «Way ta Simaŋw nda maləɓa mbal sə, fəla?» Ec ke dey, ec ke zlec da vəda ɗagay.

¹⁸Ec ke zel kad way ana, ac ka nəkaw, gege: «Simaŋw nda masa aca zaliya Piyer sə, aŋga fana geyey?»

¹⁹Piyer aŋga dapa slam ta macə mbahw, ka wulak jə masa Zlav ta ŋguzdanay. Mesfen Mavəna sə, ka gwaɗa, gege: «Cak zləmay, ndana hay mahkar ɓa aca yahakaa.

²⁰Zleftek bəreŋgefeceŋ, akwar de dey eve eceŋ fa slam ana. Ke te lel bay, afa mezlərekec kad varakaa sə, yey.»

²¹Piyer ke bəreŋgefec ndah ana, ke gweɗec, gege: «Yey sə, ya nda masa akwa yahiya. Mehwedek akwar mey?»

²²Ndah ana, ac ka vahan, gege: «Anda dek sə, Kwernel, mazlakava ta kafaraŋ hay ta zlərakandaw. Aŋga sə, aŋga nda maŋga jene eve cəvey ana fa yam te ndey ta Zlavay, kwa aŋga nda Zuwef ana bay, a nah yaŋ kad Zlavay ara Zuwef ana hay. Zuwef hay fakwanay aca hahəmiya mabay. Nda ana sə, maskəla ta Zlav ke dek kad vara vaw, ka gwaɗa, gege: “Te kəsek Piyer kad way takaa, ka da cəkafa zləmay fa ma masa a ta gwaɗakaa.”»

²³Piyer ke kəsec kad way, ke vec slam ta manahay ta vaɗ ana ŋgesey. Tedew te pərek ana, ec ke zleftek, ec ke dey ava Piyer. Malamaŋ hay dapa Yesu dərziya da Zawpey ec ke pedecen ma.

²⁴Badamta ana, aca husa pe berne ta Sizar. Dapa ŋgesey ana, Kwernel ke zelekec tərsam tata hay fakwanay va guula tata hay masa e hehəmec mabay, ac makwasa aca ɓəliya.

²⁵Mahusa te Piyer a way ana, Kwernel ke dey ka ta cə yaŋ ava aŋga. Kwernel ka gwaɗafa, ke kekəred fəma tata.

²⁶Amaa Piyer ka baŋgaɗa avəda, ka gwaɗa, gege: «Zleftek, yey sə, ya ndana ara kaa may.»

²⁷Piyer ac ka kər maɗay eve Kwernel kasl pa Zaŋ ta way tata. Mahusa tec pa Zaŋ ta way sə, Piyer ka ŋgat ndana hay makwasa faŋga mabay.

²⁸Piyer gege: «Akwa səniya kwakwas te Zuwef hay ka vana cəv kad nda Zuwef ana da ŋgə guula ava nda masa Zuwef ana bay sə, aabay, kwa mesehw kad way tata sə, cəv aabay. Amaa Zlav ke ŋguzediyey jene amta ɓa, ya ta pə ndana ara jə maləza ana bay.

²⁹Dapa masa ke zelekiyey nesey sə, ye ke lel te medek aabay. Yaw, ya wal macəna təlam nesey sə, ke zelekiyey sə, ke mey?»

³⁰Kwernel ka vahan, gege: «Yaw, aŋga na manah mahkar pəsna, fe ler mahkar taanta ta fakwaɗ ara nesey, ya dapa macə mbahw kad Zlavay da way aɗaw. Dapa ŋgesey ana, ndana ɓa, aŋga ava rəkwat fa vaw məsle ana ndeɗ ndeɗ, ke dek kad vereyey,

³¹ke gweɗiyey, gege: “Kwernel, Zlav ka cəna macə mbahw takaa. Asaya, ka sənafa majəna nda takaa kad vara maslamarga hay.

³²Ara nesey, zlar ndana hay kad pe berne ta Zawpey, te zelek Simaŋw masa aca zaliya Piyer. Aŋga da way ta ndana ɓa, mezel Simaŋw nda maləɓa mbal, way tata da ma ta yam mafayakfayak ana”.

³³Dapa ŋgesey ana, ya ka zlar ndana hay ka ta zalakakaa nesey. Wasay gaa, afa ke ke dekey. Təlam nesey, andaw fakwanay makwasa fana fəma ta Zlavay ka ta cak zləmay fa ma masa Bay Mazlakava ta vakaɗ ka da ŋguzdandanay.»

³⁴Piyer ka zlar mebəzedec ma ta Zlavay, gege: «Təlam nesey, eve metehwe ana, ya ka cəna cay, anjəkar Zlav a pal ndana hay meepel aabay.

³⁵Ara megweɗey, nda masa ke lel fətiya, ke ŋgə mezlər eve cəvey ana, kwa aŋga dapa tərsam wula wula sə, Zlav a kəsiya.

³⁶Zlav ke zlərek ma tata kad ndah tata Isreyel hay. Ma ana sə, Labara mambəla ana ma ta njahaɗandakwa dapa meteh masa da vara Yesu Kəristi Bay Mazlakava ta ndana hay fakwanay.

³⁷Akwa sən jə masa e ŋgə dapa vavara te Gelile kasl pa vavara te Zudey ava dəɓa ta masa Zaŋ Baatis ka bəzad ma ta Zlavay va meŋgə beetem kad ndana hay sə, biba?

³⁸Akwa səniya Zlav ka yahaɗ Yesu nda Nezeret ana ha, ka vana Mesfen tata va gədaŋ tata mazlakava. Ka ŋgway dapa wunam hay mekele mekele, ke ŋgə jene hay mambəla ana. Ke mbəlec ndah gwabay hay masa bay ta haalay ke tərec avəda ke ɓel tata hay, afa Zlav aŋga ava aŋga.»

³⁹Andaw sə, andaw ndah mawala jeŋ ana hay eve ndey taciya, anda tə yaw da yaŋ jeŋ ana hay masa aŋga ta ŋgiya fakwanay de Zeruzelem va dapa vavara te Zuwef hay mekele mekele. Ac ka daraɗ fa hap mazləlawa ana, ac ka kəɗa vəda ka macəhwandaw.

⁴⁰Amaa dapa manah mamahkar ana sə, Zlav ke pərekek avəda dapa maməcay. Ka vana cəv ta maŋguzad vaw kad ndana hay.

⁴¹A ŋguzad vaw ana sə, kad ndana hay fakwan aabay, amaa kad andaw macaaca ana masa aŋga ta palandaw ɗagay. Yaw, andaw sə, ndah masa Zlav ka palaɗandaw ha macaaca ana ka ta tə yaw da yaŋ ana. Andaw ka ndə jene va masə jene fa slam ana ava Yesu ava dəɓa ta masa Zlav ke pərekek avəda dapa maməcay.

⁴²Zlav ka gwaɗandaw, anda da bəzad Labara mambəla ana kad ndana hay, anda da tə yaw da yaŋ ma ana, eve megweɗey, Yesu sə, aŋga nda masa Zlav ta piya ka ta təɗ ma a yaŋ ndah eve ndey va ndah maməca hay.

⁴³Ndah mehwedek ma ta Zlav fakwanay, ec ke gweɗ zleezle da yaŋ Yesu ana, gege: «Kwa waawa masa ka kəs ma te Yesu eve metehwe ana sə, Zlav a ta pəlan mebər tata jaka pa gədaŋ te mezel tata.»

⁴⁴Dapa masa Piyer e gweɗ heley sə, Mesfen Mavəna ke dek kad a yaŋ ndah macəkafa zləmay fa ma tata.

⁴⁵Zuwef hay makəsparav fakwanay medek ava Piyer faŋga sə, ac ke rəzlec mabay, afa ndah dapa vavara hay masa aca sən Zlav bay sə, ac ka ŋgat Mesfen Mavəna.

⁴⁶Zuwef ana hay ac ka cəna ndah ana ece gweɗ ava ma ta wunam hay mekele mekele masa aca səniya bay sə, ac ka hahəm Zlavay. Piyer ke gweɗ, gege:

⁴⁷«Təlam nesey, ndah ana ac ka ŋgat Mesfen Mavəna ara masa anda ta ŋgatakwa sə, may. Naa ma te recen ma te meŋgec beetem sə, wa?»

⁴⁸Mafay ana, Piyer ke gweɗec, aca ra ŋgec beetem eve mezel te Yesu Kəristi. Dapa ŋgesey ana, ac ka nəkafa Piyer a da njah de vereceŋ kwa manah kusetke.