Read Cuvok Mezlər ta Maslaŋ hay 12 Bible Online

Mezlər ta Maslaŋ hay 12 - Cuvok bible

Mezlər ta Maslaŋ hay 12

¹Dapa ŋgesey ana, bay Herawt ka zlar meŋgedec marga kad ndah mekele mekele dapa Macam yaŋ ta ndah ta Zlavay.

²Ara nesey, ka tawa Zak malamaŋ ta Zaŋ avəda ava kafaya, ka kəɗa avəda.

³Dapa masa a wala mekəɗ ta Zak ke weslədec Zuwef hay sə, ka təhaz Piyer, ka ɓəzlaɗ pa daŋgay. Dapa ŋgesey ana, ac dapa macunam te peŋ masa kəfa ana maɓəsla bay.

⁴Mafay ana, ke gweɗec kafaraŋ hay aca ra ɓəlaw. Kafaraŋ maɓəliya hay sə, ac faɗ faɗ, dəɓa faɗ. Herawt ana, ka wal ma ta təɗana ma a yaŋ Piyer ava dəɓa ta macunam ta Pak te Zuwef hay meendey ta ndana hay fakwanay.

⁵Ara nesey, Piyer maɓəzla dapa daŋgay, amaa Macam yaŋ ta ndah ta Zlavay ac ka cə mbahw kad Zlavay mafay tata cəɗem cəɗem ava rav pal amta.

⁶Ta vaɗ ana masa Herawt a ta təɗana ma a yaŋ Piyer tedew te pərek ana sə, Piyer manaha, majawa ava jajarɓay hay ecew, a njawaŋ dapa taɓa ta kafaraŋ hay ecew ɓa. Kafaraŋ hay dərziya aca ɓal fəma ta daŋgay ana saya.

⁷Faŋga faŋga ana, maskəla ta Mazlakava ke dekey, slam dapa daŋgay ana ke weɗey. Maskəla sə, ka gwaguza Piyer ana, ka zləmadaw, ka gwaɗa, gege: «Zleftek ke zef!» Masa maskəla a gwagwaz Piyer sə, faŋga faŋga jajarɓay dapa ha tata ec ke pəleceŋ, ec ke kwiyeceŋ.

⁸Ava dəɓa ana, maskəla sə, ka gwaɗa, gege: «Ləmada vaw takaa, paɗ tahkar pe sek.» Piyer ka ŋgaw ara masa maskəla ta gwaɗa. Maskəla ana, ka gwaɗa saya, gege: «Paɗ rəkwat takaa fa vaw, dek cəpiyey.»

⁹Piyer ka cəp maskəla dapa daŋgay sə, kasl a vəda. Amaa Piyer ka sən jə masa maskəla ana ta ŋgana ŋgesey, jə metehwe ana sə, aabay. A wulakiya sə, mesəhwen ta ŋgana.

¹⁰Dapa medə teceŋ sə, ac ka gərda gəva ta kafaraŋ hay majəɗiya macaaca ana va kafaraŋ hay majəɗiya meecew ana, kasl fəma ta way ta daŋgay ana ta ɓəray masa te medek dapa berne kad a vəda. Ma ta way ana, ke wen fə yaŋ tata aŋga amta. Ec ke dekec dapa daŋgay ana kad a vəda, ec ke dey jaka pe cəv te medə kad pe berne ana. Ava dəɓa ana kusetke, faŋga faŋga ana, maskəla ta Zlav sə, ka data, ka gərda Piyer aŋga amta faŋga.

¹¹Dapa slam ana faŋga, Piyer ka sən jə masa e ŋgə da vara vaw nesey sə, anjəkar metehwe ana. Mafay ana, ke gweɗ, gege: «Təlam nesey, ya səniya eve metehwe ana Bay Zlavay ke zlərek maskəla tata ke te mbəliyey dapa ha ta Herawt. Asaya, dapa jə mambəla ana aabay hay masa Zuwef hay ta wulak maŋgiya da yaŋ yey.»

¹²Masa Piyer ka səna ma da yaŋ jeŋ ana avəda sə, ke dey kad way ta Maaray, mamaŋ ta Zaŋ Markwas. Ndana hay gaa makwasa da way ana, ac ka cə mbahw kad Zlavay.

¹³Piyer ke zel fəma ta way da vəda, ka kəɗ kwetem[6]. Dem maŋga mezlər da way ana faŋga ɓa dapa taɓa teceŋ mezel Rawdey. Ke dey ka ta wuzaɗ nda makəɗa kwetem ana.

¹⁴Mahusa tata fəma ta way ana, ka cəna uway te Piyer, ke wesl mabay. Mafay ana, kwa ka wun ma ta way sə, aabay, mahway kad vara ndah macana mbahw da way, gege: «Piyer aŋga da vəda.»

¹⁵Ndah sə, ac ka vahan, gege: «Jene a mbəlakaa dapa yaŋ geyey!» Amaa, dem sə, ke vehecen ma ana saya, gege: «Eve metehwe ana, aŋga ana.» Ndah ana ac ka gwaɗa, gege: «E ŋgey, gəla maskəla tata[7] kwa!»

¹⁶Amaa, Piyer ka gərda mezeley va makəɗ kwetem fəma ta way sə, aabay jaŋgata. Ac ka wuna ma ta way ana, ac ta wala sə, anjəkar Piyer, ac ka rəzlata mabay da yaŋ ana.

¹⁷Piyer sə, ke beŋgeɗec ha, aca ra njah teete. Ava dəɓa ana, ke ŋguzdecen ma da yaŋ jə masa Bay Mazlakava ta ŋgana dapa daŋgay sə, gege: «Magwaɗan ma ana nesey kad Zak[8] va malamaŋ tandakwa hay mekele dapa Macam yaŋ ta ndah ta Zlavay.» Ava dəɓa ana, ke gərdeceŋ, ka data kad pa slam mekele.

¹⁸Metev ta slam pərek sə, kafaraŋ hay aca wuna ma, aca sən megweɗ sabay. Ece gweɗ, gege: «Piyer ana a ŋgana gwagumaw?»

¹⁹Herawt ka zlar ndana hay ka ta yahiya vəla vəla fakwanay, amaa ac ka ŋgataw aabay. Mafay ana, Herawt ke nəkefec kafaraŋ hay majəɗa Piyer ana. Ke gweɗec ndah mekele, ece re kəɗec kafaraŋ ana hay avəda cukw cukw. Ava dəɓa ana, Herawt ke zleftek dapa vavara te Zudey kad pe berne ta Sizar, ke njehek kusetke dərŋga.

²⁰Dapa ŋgesey ana, Herawt, rav ka haca da yaŋ ndah dapa berne te Tir va dapa berne ta Sidaŋw mabay. Ndah dapa berne ana hay ŋgesey aca husam jene ta mandə hay sə, dapa vavara ta Herawt ana. Dapa ŋgesey ana, ac ka cacala ma teceŋ, ac ka yah cəv te medey kad vara vaw. Mafay ana, ac ka vana səlay kad Bəlastus madərlam mazlakava ta bay Herawt ana, afa ac da ŋgat cəv ta mahusa vara vaw ka ta ŋgana mbahw, ac da ŋgat manjah dapa metehey.

²¹Pas masa mapa ka ta ŋgana mbahw kad Herawt sə, ka husakata cay. Pəsaŋga ana ŋgesey, Herawt ka pə rəkwat ta bay fa vaw, ka njah fa gwadadakw ta bay tata fəma ta ndana hay, ke gweɗec ma hay mekele mekele.

²²Dapa megweɗ tata ana, ndah fəma tata sə, aca cə lalaw, gege: «Megweɗ nesey sə, Zlav bəna, ndana sabay.»

²³Amaa, faŋga faŋga ana, maskəla ta Bay Mazlakava kpakw a kəɗa Herawt ana avəda cukw cukw, afa masa ndana hay ac ka hahəlan yaŋ faŋga sə, ke kəseceŋ, ka paɗ yaŋ tata ka Zlavay. Matalay hay ac ka ndana avəda, ava dəɓa ana, ka məcata.

²⁴Dapa ŋgesey ana, ma ta Zlav ke dey fəma fəma, ndah makəsa ma ta Zlavay ana, ece sekekey kad veŋ ana.

²⁵Ava dəɓa ana, masa Barnabas va Sawl ac ka ndəvda mezlər tec de Zeruzelem sə, ec ke veh kad pe berne ta Antakiya. Ece veh ava Zaŋ Markwas.