Read Cuvok Mezlər ta Maslaŋ hay 13 Bible Online

Mezlər ta Maslaŋ hay 13 - Cuvok bible

Mezlər ta Maslaŋ hay 13

¹Deveŋ Macam yaŋ ta ndah ta Zlavay dapa berne ta Antakiya masa dapa vavara te Siriya sə, ndah mehwedek ma va ndah masasəraka ndana hay ɓa. Ndah ana hay sə, ac Barnabas, Simeyaŋw masa aca zaliya «Magəda», Luziyus nda Siren ana, Manayaŋ masa ece gel fa slam ana ava Herawt nda maŋga bay da yaŋ vavara te Gelile va Sawl.

²Pas ɓa aca ŋgə kwakwas ta macə mbahw kad Bay Mazlakava, aca ŋgə dalyama. Mesfen Mavəna, gege: «Mapuwa Sawl va Barnabas ha wal, aca ra ŋgawa mezlər masa ye te zelec mafay ana.»

³Ara nesey, ava dəɓa ta masa ac ka ndəvda meŋgə dalyama va macə mbahw sə, ec ke pec ha yaŋ Barnabas va Sawl, ec ke gərdeceŋ, ece re dey kad pe mezlərey ana.

⁴Ara nesey, Mesfen Mavəna ke zlerdec Barnabas va Sawl. Ec ke dey pe berne te Selekiya. Faŋga sə, ec ke tep pa kaslkaslah, ec ke dey kad pa vavara dapa taɓa ta yam mafayakfayak ana ɓa mezel Kipərus.

⁵Mahusa tec pe berne ta Salamin, ac ka bəzad ma ta Zlavay dapa way ta macə mbahw te Zuwef hay. Zaŋ Markwas aŋga deveŋ eceŋ, e jəneceŋ.

⁶Ac ka ŋgway dapa vavara ana fakwanay kasl pe berne ta Pafaws. Dapa vavara ana faŋga, ac ka ŋgat nda Zuwef ana ɓa, mezel Bar-Yesu. Aŋga dapa meŋgə cah hay masa e dek dapa gədaŋ ta Zlav bay. Ka ŋgal ma, gege: «Aŋga sə, aŋga nda mehwedek ma.»

⁷Bar-Yesu ana sə, aŋga madərlam ta bay ta vavara ana. Bay ana, mezel Sarziyas Pawlas, aŋga nda eve leŋgesl. Ke zelec Pawl va Barnabas kad way tata, afa ka wal a da cəna ma ta Zlavay vereceŋ.

⁸Bar-Yesu, nda maŋga cah hay sə, aca zaliya ava ma te Gərek hay «Elimas.» Amaa Elimas ana, a wal ma tec Barnabas va Sawl bay. Ka wal bay ana da kəs ma ta Zlav bay may, ke dey kad vara vaw dəɓa gaa hay.

⁹Ara nesey, Sawl masa aca zaliya ava ma te Gərek, Pawl sə, aŋga manəha eve Mesfen Mavəna, ka pafa ndey Elimas ana,

¹⁰ka gwaɗa, gege: «Kaa, nda maŋgəla ma! Kaa, nda mafəca ndana hay fakwanay! Wut ta bay ta haalay! Kaa, maslagəra te jene hay mambəla ana fakwanay! Mawulak yaŋ ta Bay Zlav matərwaɗa aabay, amaa kaa sə, ka yah cəv cəɗem cəɗem ka ta tərwaɗ mawulak yaŋ ta Zlavay ana.

¹¹Yaw, təlam nesey cak zləmay! Bay Zlavay a ta nasakaa avəda, ka ta həɗazlata. Manah ɓa hay ka ta wala meweɗ ta pas aabay.» Faŋga faŋga ana, slam fakwanay ka tərata ləvaŋ fəma tata, a wala ndey sabay. Mafay ana, ka yah ndana a da təhaziya pa ha.

¹²Bay sə, a wala jə masa e ŋgə ara nesey sə, ka rəzlata mabay da yaŋ ma ta Bay Mazlakava Yesu, ka kəs ma ta Zlavay.

¹³Ava dəɓa ana, Pawl va ndah macəpiya ec ke tep pa kaslkaslah, ec ke zleftek dapa berne ta Pafaws. Ec ke zleŋ yam mafayakfayak ana, ec ke dey kad berne te Pergey dapa vavara ta Pamfili. A faŋga sə, Zaŋ Markwas ke gərdeceŋ, ke vahata e Zeruzelem.

¹⁴Ava dəɓa ana, Pawl va Barnabas ec ke zleftek dapa berne te Pergey ana, ec ke dey pe berne ta Antakiya masa dapa vavara te Pizidi. Ta pas ta masasak vaw, ec ke dey pə Way ta macə mbahw te Zuwef hay, ac ka njah dapa faŋga.

¹⁵Dapa way ana faŋga, ndana hay ac ka jaŋgə ɗelewer ta ma majawa ta Muyiz va ta ndah mehwedek ma. Ava dəɓa ana, mesnendə hay ta way ana, ac ka zlar ndana kad vara Pawl va Barnabas, ece re gweɗeceŋ, gege: «Malamaŋ taciya hay, daha akwar ava ma te mevec gədaŋ kad ndah makwasa fana na ɓa sə, akwa zlafa megweɗey.»

¹⁶Pawl ke zleftek, ke zlecey, ka baŋgaɗa ha tata, ka zlar megweɗeceŋ. Akwar Isreyel hay va ndah masa Zuwef hay bay melel fa Zlavay, macak zləmay!

¹⁷Zlav masa ndah te Isreyel ta nahan yaŋ sə, ka yaha papaŋ ta papaŋ tandakwa hay zleezle. Ke sekec mabay dapa masa ac dapa vavara ta Misəra. Ava dəɓa ana, Zlav ke həlekec avəda dapa vavara ta Misəra ava gədaŋ tata mazlakava.

¹⁸Dapa mavay 40, ke pefec ndey dapa yaŋ ta səɓak.

¹⁹Ava dəɓa ana, ke bezlec tərsam hay tasəla avəda dapa vavara ta Kanana fakwanay, ke vecen vavara ana kad Isreyel hay aca ra camiya.

²⁰Mavay masa Isreyel hay ac dapa ɓeley va masa ac dapa yaŋ ta səɓak sə, ke ŋgə 450. Ava dəɓa ana, Zlav ke pec ndah mevənecen ma[9] tec hay ece re jənec papaŋ ta papaŋ tandakwa ana hay, kasl fa nda mehwedek ma tata mezel Semiyel te dekey.

²¹Dapa ŋgesey ana, ac ka nəkafa Zlavay e de vec bay. Ara nesey, Zlav ke vec Sawul wut ta Kis dapa tərsam te Benjemeŋ ka ta ŋgə bay teceŋ. Sawul ana, ke ŋgə bay da yaŋ vavara ana mavay 40.

²²Bay Zlavay ka kəsa Sawul ana avəda dapa bay, ke pec Deevet pa slam ana. Zlav ke gweɗ da yaŋ ana, gege: «Ya ka ŋgat nda masa e wefiyey dapa leŋgesl aɗaw, mezel Deevet wut te Zesey. A ta ŋgana mezlər hay masa ya ta waya sə avəda fakwanay.»

²³Dapa tərsam te Deevet ana, Zlav ke yehek nda amta masa a ta mbəl ndah te Isreyel ara masa aŋga te gweɗ zleezle. Nda ana sə, Yesu.

²⁴Wagaa Yesu a ta zlar mezlər tata sə, Zaŋ Baatis ke bəzedec ma da yaŋ beetem kad Isreyel hay fakwanay, gege: «Meŋgə beetem masa e de ŋguzdek akwa wal maŋgwada rav takwar.»

²⁵Mbala masa Zaŋ Baatis a ta ndəvda mezlər tata sə, ke gweɗec kad ndana hay, gege: «Akwa wulakiya sə, yey wa? Yey sə, ya nda masa akwa ɓəliya sə, bay. Amaa macak zləmay, ndana ɓa e te dekey ava dəɓa taaɗaw, nda ana ke fəniyey. Kwa ka ta pal ɗuweŋ ta tahkar tata sə, ya zlafa mapəliya bay.»

²⁶Pawl ke gweɗec, saya, gege: «Malama hay, akwar masa dapa tərsam ta Abəraham va ndah masa Zuwef hay bay manahda yaŋ kad Zlavay, Zlav ka zlərandakwa Labara mambəla ana ta mambəlandakwa dapa mebərey.

²⁷Eve metehwe ana, ndah de Zeruzelem va bay tec hay ac ka səna Yesu sə, aŋga wa sə, aabay. Ma ta ndah mehwedek ma masa aca jaŋgiya cəɗem cəɗem pas ta masasak vaw hay sə, ac ka cəna aabay. Amaa ac ka ŋgana jə masa magwaɗa ana daha sə, avəda ava matəɗana ma yaŋ Yesu ke te kəɗey.

²⁸Kwa ac ka ŋgat ma vara vaw ta matəɗana ma yaŋ ke te kəɗ Yesu ka macəhwandaw sə, aabay. Ava aŋga ana fakwanay, ac ka ŋgana mbahw kad gwevernel Pilatu a da kəɗa avəda cukw cukw.

²⁹Masa ac ka ndəvda meŋgə jə masa ma ta Zlav te gweɗ da yaŋ Yesu sə, ec ke bəreŋgek avəda fa hap mazləlawa, ac ka paɗ pa jəvay.

³⁰Amaa Zlav ke pərekek avəda dapa maməcay.

³¹Yesu ana ke ŋguzdecen vaw kad ndana hay manah gaa. E ŋguzdecen vaw ana sə, kad ndah masa ac ka ŋgway eve eceŋ zleezle dapa vavara te Gelile kasl pe berne te Zeruzelem. Təlam nesey, ndah ana hay aca tə yaw da yaŋ ana fəma te Isreyel hay.»

³²Taciya may, anda bəzadakwar Labara mambəla ana da yaŋ jə masa Zlav ke gweɗec kad papaŋ ta papaŋ tandakwa hay zleezle, e te ŋgeceney.

³³Təlam nesey, Zlav ka ŋgandakwaɗ jeŋ ana, andakwa wudeh tec hay jaka pe mepərekek te Yesu dapa maməcay. Ara mavinda dapa ɗelewer ta Jaabura ke gweɗ, gege: «Kaa sə, ka wat aɗaw, e zler ta pəsna sə, ya papakw.»

³⁴Yaw, Zlav ke pərekek avəda dapa maməcay, afa slaw ta vaw tata e de kuɗep bay. Zleezle Zlav ke gweɗey: «Ya ta pəsafakwar ma ara ya ta gwaɗa Deevet. Eve metehwe ana, ya ta ŋgakwaɗ jeŋ ana.»

³⁵Mafay ana, mavinda dapa slam mekele saya, gege: «Nda maŋga mezlər takaa Mavəna sə, ka gərda slaw ta vaw tata da kuɗapaɗ aabay.»

³⁶Deevet ana, dapa masa aŋga eve ndey heley sə, ke ŋgə mezlər masa ara Zlav ta waya. Ka məcata, ac ka pəsahaɗ pa jəvay a cak ta jav ta papaŋ ta papaŋ hay, slaw ta vaw tata ka kuɗapata.

³⁷Amaa te Yesu, nda masa Zlav te mepərekek dapa maməcay sə, slaw ta vaw tata ke kuɗep aabay.

³⁸Yaw, malama va dəma hay, masəna eve metehwe ana, anda bəzadakwaɗ Zlav e pəlecen mebər ta ndana hay sə, jaka vara Yesu. Zlav a pəlakwaɗ mebər takwar sə, mafay ta masa akwar ta cəp ma majawa ta Muyiz bay.

³⁹Amaa kwa waawa masa ka kəs ma te Yesu sə, Zlav a ta pəlan mebər tata.

⁴⁰Mafay ana, mep leŋgesl fa ma ta ndah mehwedek ma masa ac ta gwaɗakwar zleezle, afa jə masa ac ka gwaɗa sə, a da husafakwar bay. Ndah ana hay ec ke gweɗ, gege:

⁴¹Mawala, akwar ndah mapana ma ta Zlavay ara jene taambəla! Manjah dapa merəzley, mazaɗay. Ya wal me te ŋgə mezlərey dapa manjah takwar masa akwar eve ndey nesey. Mezlər masa akwar ava yaŋ takwar, akwar ta kəsiya aabay, kwa daha ndana ka kərakwaɗ maɗay ana.

⁴²Masa Pawl va Barnabas, ec ke dek kad a vəda dapa Way ta macə mbahw te Zuwef hay ana sə, ndah ana ec ke gweɗeceŋ, ece re vehek pas ta masasak vaw mekele, ece re gweɗec ma ana saya.

⁴³Ava dəɓa ta mavən yaŋ dapa macam yaŋ sə, ndana hay gaa ec ke pedecen ma ta Pawl va Barnabas. Mepedecen ma ana sə, Zuwef hay va ndah masa ac ka gərda kwakwas teceŋ ka ta cəp ma majawa ta Muyiz. Dapa medə teceŋ ana, ac ka kar maɗay fa slam ana. Pawl va Barnabas ec ke vec gədaŋ, aca ra njah cəɗem cəɗem dapa mambəla ana ta Zlavay.

⁴⁴Mehusek ta pas ta masasak vaw mekele, hamazlakava ta miya dapa berne ana, ec ke kwesek vaw mabay ka ta cak zləmay fa ma ta Bay Mazlakava Yesu.

⁴⁵Amaa masa Zuwef hay aca wala ndana hay maɓəca faŋga mabay sə, səlek ke ŋgeceŋ. Ac ka laf Pawl, afa aca wal ma tata bay.

⁴⁶Pawl va Barnabas, ac ka ŋgə zidaw aabay, mafay ana, ec ke gweɗeceŋ, gege: Cama anda zlar magwaɗakwaɗ ma ta Zlavay kad akwar Zuwef hay ɗagay. Amaa, akwar ka kəs ma ana aabay. Ara nesey, akwa ŋguzdek sə, akwa husa ta maŋgat manjah katar ka midakw da cak ta Zlav da baymaləvaŋ sə, aabay. Mafay ana, anda gərdakwar, anda daɓa kad pa wunam hay mekele. Anda daɓa kad vara ndah masa Zuwef hay bay.

⁴⁷Maha, Bay Mazlakava ka vandaw ma tata majawa, gege: Ya ka paɗakaa, ka slam mawaɗa ta ndah masa Zuwef hay bay, afa ke de hwedec cəv te membəley, kasl pa kwakumakw ta vavara.

⁴⁸Masa ndah Zuwef hay bay aca cəna ma ana ara nesey sə, ece wesl mabay, aca hahəm Bay Mazlakava. Ndah masa Zlav te peleceŋ fakwanay ka ta ŋgat manjah katar ka midakw sə, ac ka kəs ma te Yesu.

⁴⁹Ara nesey, ndana hay ac ka bəzad ma ta Zlavay kwa fəla fəla dapa vavara ana ŋgesey.

⁵⁰Amaa Zuwef hay dapa vavara ta Antakiya, ec ke heheɗecen dar ta ndah mazlakava hay va ŋgwazah masa ec eve zleley mabay macəpa ma majawa te Zuwef hay dapa berne ana, ece re ŋgedec marga kad Pawl va Barnabas. Ec ke mbesec dapa wunam teceŋ.

⁵¹Maslaŋ hay sə, ac ka slav melbelbe fe sek[10] teceŋ, ac ka data kad pe berne ta Ikawniya.

⁵²Amaa ndah masasəraka jene sə, ac manəha eve mewesley va Mesfen Mavəna.