Read Cuvok Mezlər ta Maslaŋ hay 14 Bible Online

Mezlər ta Maslaŋ hay 14 - Cuvok bible

Mezlər ta Maslaŋ hay 14

¹Mahusa ta Pawl va Barnabas pe berne ta Ikawniya, ec ke dey pə Way ta macə mbahw te Zuwef hay faŋga. Dapa mabəzad ma teceŋ mambəla ana kad ndana hay, Zuwef hay va Gərek hay ac ka tərata ka ndah makəsa ma ta Zlavay.

²Amaa Zuwef hay dərziya gaa ac ka kəs ma ana bay. Ara nesey, ec ke heheɗecen dar ta ndah masa Zuwef hay bay, aca ra wulak jene hay mambəla ana aabay da yaŋ malamaŋ tec hay dapa Yesu ana.

³Ava aŋga ana fakwanay, Pawl va Barnabas ac ka njah dapa berne ta Ikawniya mabay. Ac ka bəzad ma ta Bay Mazlakava ava zidaw dapa vaw aabay. Ac ka tə yaw da yaŋ ma ta mambəla ana Zlavay, eve meŋgə cah hay mekele mekele marəzla nda jaka pa ha teceŋ.

⁴Ndana hay dapa berne ana, ac ka vəna vaw dəɓa ecew mafay ta ma ana. Dərziya hay ac ka kəs mawulak yaŋ te Zuwef hay, leŋgeɗ hay may, ac ka kəs mawulak ta maslaŋ hay.

⁵Dapa manah hay ana ŋgesey, Zuwef hay, ndah masa Zuwef hay bay va bay tec hay ac ka cacal ma tec amta. Ac ka wal meŋgedec marga kad Pawl va Barnabas, ac ka wal mekəɗec avəda cukw cukw ava mekelec eve kekeŋ.

⁶Amaa Pawl va Barnabas ac ka cəna ma ana, ac ka hwayata ke te reɓ pe berne ta Likawni, ec ke dey kad pe berne te Listira, pe berne te Derbey masa dapa vavara ta Ikawniya. Asaya, pa wunam hay mekele mekele dapa vavara ana.

⁷Dərŋga ana may, ac ka bəzad Labara mambəla ana kad ndana hay.

⁸Dapa berne ta Listira, ndana ɓa mahahalɓa dəga meheyek tata, a zlafa medə bay.

⁹Pas leŋgeɗ ɓa, a cak zləmay fa ma masa Pawl ta gwaɗa. Pawl ka njarafa nda ana, a wala aŋga ava makəsparav ta maŋgat membəley.

¹⁰Pawl ka gwaɗa ava gədaŋ, gege: «Zleftek, zlec eve sek takaa.» Nda sə, ke zleftek, ke cəkweley, ke dey eve sek tata hay.

¹¹Miya faŋga ac ka wala jə masa Pawl ta ŋgiya, ac ka cə lalaw ava gədaŋ, ec ke gweɗ ava ma ta Likawni hay, gege: «Haalay hay ec ke dek kad vara andakwa, ec ke tərec ka ndana hay.»

¹²Ece pec Pawl va Barnabas ka haalay hay. Aca zal Barnabas «Zus» eve mezel ta haalay tec mazlakava fəma ta way te berne teceŋ. Aca zal Pawl may «Hermes[11]» sə, afa Pawl te gweɗeceŋ.

¹³Ndaakwas ta haalay mezel Zus masa aŋga zef dapa cəv te mesehw kad pe berne ana, ke hwedek mar ta zla hay ecew macacəkwa eve mefefen te wudez hay kad fəma ta way ta haalay ana. Ac ava ndana hay fakwanay, ac ka wal meŋgec kwakwas kad Pawl va Barnabas ara haalay hay.

¹⁴Amaa masa maslaŋ hay Pawl va Barnabas aca wala ara nesey sə, aca ŋgarə rəkwat tec hay fa vaw, ac ka hway kad pa taɓa ta ndah ana hay ava macə lalaw, gege:

¹⁵«Gwalaha! Akwa mbeh ne jene mey? Andaw sə, ndana hay ara akwar, anda dek kad fana sə, ka ta bəzadakwar Labara mambəla ana. Anda gwaɗakwar, magərda matə haalay takwar hay masa a ta jənakwar aabay ŋgesey. Meŋgwedek ma kad vara Zlavay, nda masa aŋga eve ndey katar ka midakw. Nda malama slam da baymaləvaŋ, dapa vavara, yam mafayakfayak ana ava jene hay dapa fakwanay.

¹⁶Zleezle sə, Zlav ke gərdec ndah dapa vavara hay fakwanay aca ra cəp cəv teceŋ.

¹⁷Ava aŋga ana fakwanay, Zlav ka ŋguzad mawal nda tata cəɗem cəɗem dapa taɓa teceŋ jaka pe jə mambəla ana masa aŋga ta ŋgiya. Ka slakwar yam, ka vakwar jə ta manday fa mavay fa mavay ara akwar ta waya, ka mbənakwar ava jə ta manday, ka vakwar mewesley.»

¹⁸Amaa kwa Pawl va Barnabas ece gweɗec ma ana hay ara nesey sə, ece recen ma ta ndah ana te meŋgec kwakwas ara haalay hay sə, ava gəra mabay.

¹⁹Ava dəɓa ana, Zuwef hay medek dapa berne ta Antakiya masa dapa vavara te Pizidi va Zuwef hay medek dapa berne ta Ikawniya, ec ke heheɗecen dar ta ndah dapa berne te Listira ana, aca ra kal Pawl eve kekeŋ ka macəhwandaw. Ac ka kalaw, ac ka səpanaw fa vara kad a vəda te berne, aca wulakiya sə, gege: «Pawl ka məcata cay.»

²⁰Amaa masa ndah masasəraka jene ac ka kwasa vaw a cak tata. Pawl ke zleftek, ke veh kad pe berne. Tedew te pərek ana, Pawl ec ke dey va Barnabas kad pe berne te Derbe.

²¹Ac ka bəzad Labara mambəla ana dapa berne te Derbey ana. Ndana hay mabay faŋga, ac ka kəs ma te Yesu. Ava dəɓa ana saya, Pawl va Barnabas ec ke veh kad pe berne ta Listira, pe berne ta Ikawniya va berne ta Antakiya dapa vavara te Pizidi.

²²Ec ke təkecen rav ta ndah masasəraka jene va mevec gədaŋ te medey fəma fəma dapa makəsparav, gege: «Da lada sə, anda dakwa jaka marga hay mabay ke te sehw pa Wunam ta bay ta Zlavay.»

²³Dapa Macam yaŋ ta ndah ta Zlavay[12] fəla fəla fakwanay, ac ka pal ndana hay aca ra njah ke mesnendə tec hay[13]. Masa ec ke pelec cay sə, ac ka ŋgə dalyama, ac ka cə mbahw kad Zlavay mafay teceŋ. Pawl va Barnabas ac ka paɗ ndah ana, pa ha ta Bay Mazlakava masa ac ka kəs ma tata, afa e de ɓəlefeceŋ.

²⁴Ava dəɓa ana, ec ke dey jaka pa vavara te Pizidi, ac ka husa pa vavara ta Pamfili.

²⁵Dapa vavara ta Pamfili, macaaca ana, ac ka bəzad ma ta Zlavay dapa berne te Pergey, ava dəɓa ana, ec ke dey ka ta bəzad ma ta Zlavay dapa berne ta Ataliya.

²⁶Da Itali ana sə, ec ke zleŋ jaka pa kaslkaslah kad pe berne ta Antakiya masa dapa vavara te Siriya. Makəsparav hay zleezle macana mbahw kad Zlavay mafay ta Pawl va Barnabas, afa Zlav de pəsefec ma ke te ŋgə mezlər tata sə, ac dapa berne ta Antakiya ana faŋga.

²⁷Mahusa tec a Antakiya dapa vavara te Siriya sə, ec ke cemecen yaŋ ta ndah te Yesu ana dərŋga. Ec ke gweɗecen ma da yaŋ jene hay masa Zlav ta ŋgiya fakwanay. Asaya, ec ke ŋguzdecen jene hay masa Zlav ta ŋgiya ke te wunecen cəv kad ndah masa Zuwef hay bay, afa aca ra pə Yesu ka nda mambəla ana.

²⁸Pawl va Barnabas ac ka njah mabay dərŋga vara makəsparav hay.